2 | “Vertroosting uit die Skrif”

DIE BYBEL SÊ: “Alles wat vroeër geskryf is, is geskryf sodat ons daaruit kan leer, sodat ons deur ons volharding en deur die vertroosting uit die Skrif hoop kan hê.” – ROMEINE 15:4.

Wat dit beteken

Die Bybel versterk ons met vertroostende gedagtes wat ons kan help wanneer ons op ’n negatiewe manier dink. Die Bybel se boodskap gee ons ook hoop dat emosionele pyn binnekort iets van die verlede sal wees.

Hoe dit kan help

Ons almal voel soms angstig, maar dié wat aan depressie of angstigheid ly, sukkel dalk die hele tyd met pynlike emosies. Hoe kan die Bybel help?

Die Bybel gee baie positiewe gedagtes wat negatiewe gedagtes kan vervang (Filippense 4:8). Dit kan ons verstand regtig vul met vertroostende en kalmerende gedagtes wat ons sal help om ons emosies te beheer. – Psalm 94:18, 19.
Die Bybel kan ons help om op te hou dink dat ons waardeloos is. – Lukas 12:6, 7.
Daar is baie Bybeltekste wat ons verseker dat ons nie alleen is nie en dat God, ons Skepper, heeltemal verstaan hoe ons voel. – Psalm 34:18; 1 Johannes 3:19, 20.
Die Bybel belowe dat God ’n einde sal maak aan pynlike herinneringe (Jesaja 65:17; Openbaring 21:4). Wanneer ons sukkel met pynlike gedagtes en emosies, kan hierdie belofte ons die krag gee om aan te gaan.

Hoe die Bybel help – Jessica

Hoe depressie my affekteer

“Toe ek 25 jaar oud was, het ek ’n senuwee-ineenstorting gehad en was ek met erge depressie gediagnoseer. Ek het gesukkel met skielike en onbeheerbare herinneringe van pynlike dinge wat in die verlede gebeur het. Dokters het my gehelp verstaan dat my depressie veroorsaak was deur die negatiewe manier waarop ek gedink het as gevolg van die traumatiese dinge wat in my lewe gebeur het. Buiten die regte medikasie het ek behandeling nodig gehad om my te help om negatiewe denkpatrone te identifiseer en reg te stel.”

Hoe die Bybel my help

“In die donkerste oomblikke van my depressie het ek angsaanvalle, verskriklike angstigheid en slapeloosheid ondervind. Ek het dikwels in die aand oorweldig gevoel deur angstige gedagtes wat ek nie kon beheer nie. Soos Psalm 94:19 verduidelik, kan God ons vertroos en kalmeer wanneer ons oorweldig is deur bekommernisse. So ek het my Bybel en ’n notaboek met aanmoedigende tekste langs my bed gehou. Wanneer ek nie kon slaap nie, het ek ’n paar Bybelverse gelees, en so toegelaat dat God se gedagtes my vertroos.

“Die Bybel moedig ons aan om ontslae te raak van gedagtes wat nie ooreenstem met dit wat ons omtrent God weet nie. In die verlede was ek oortuig dat ek waardeloos is en dat niemand my liefhet nie. Maar ek het geleer dat sulke gedagtes eintlik nie met die Bybel ooreenstem nie, want die Bybel wys dat God ’n liefdevolle Vader is wat meegevoel het en wat vir elkeen van ons omgee. Met verloop van tyd het ek my gedagtes begin beheer, eerder as om toe te laat dat my gedagtes my beheer. Ek het geleer om myself te beskou soos God my beskou. Dit was ’n belangrike stap wat my gehelp het om die negatiewe beskouing wat ek van myself gehad het, te verander.

“Ek sien uit na die tyd wanneer alle pynlike herinneringe en negatiewe denkpatrone sal verdwyn. Om te weet dat verstandelike siektes iets van die verlede sal wees, gee my die krag om my beperkings nou te hanteer. En dit gee my ’n wonderlike hoop vir die toekoms wanneer my stryd teen depressie uiteindelik verby sal wees.”