Jehovah wil hê dat almal berou moet toon

1. Wat beteken dit om berou te toon?

WANNEER ons iets verkeerds doen, is dit baie belangrik dat ons berou toon. Volgens die Bybel toon ’n persoon berou wanneer hy spyt is oor ’n verkeerde ding wat hy gedoen het, daarmee ophou en vasbeslote is om dit nie weer te doen nie. – Sien Woordelys, “Berou”.

2. Hoekom moet ons almal oor berou leer? (Nehemia 8:​9-11)

² Elke persoon moet oor berou leer. Hoekom? Want ons almal sondig elke dag. As nakomelinge van Adam en Eva het elkeen van ons sonde en die dood geërf (Rom. 3:23; 5:12). Nie een van ons kan dit vryspring nie. Selfs manne met sterk geloof, soos die apostel Paulus, moes teen sonde veg (Rom. 7:​21-24). Beteken dit dat ons die hele tyd mismoedig moet wees as gevolg van ons sondes? Nee, Jehovah is genadig, en hy wil hê dat ons gelukkig moet wees. Dink aan die Jode in Nehemia se dag. (Lees Nehemia 8:​9-11.) Jehovah wou nie hê dat hulle baie hartseer oor die sondes van die verlede moes wees nie. Hy wou hê dat hulle hom met vreugde moes aanbid. Jehovah weet dat dit ons gelukkig maak om berou te toon. Daarom leer hy ons daaroor. As ons oor ons sondes berou toon, kan ons oortuig wees dat ons genadige Vader ons sal vergewe.

3. Wat sal ons in hierdie artikel bespreek?

³ Kom ons leer meer oor berou. In hierdie artikel sal ons drie dinge bespreek. Eerstens sal ons leer wat Jehovah Israel oor berou geleer het. Dan sal ons fokus op hoe Jehovah mense gehelp het om berou te toon. Laastens sal ons bespreek wat Jesus se volgelinge oor berou geleer het.

WAT JEHOVAH ISRAEL OOR BEROU GELEER HET

4. Wat het Jehovah die nasie Israel oor berou geleer?

⁴ Toe Jehovah die Israeliete in ’n nasie georganiseer het, het hy ’n verbond, ’n formele ooreenkoms, met hulle gemaak. As hulle sy wette gehoorsaam het, sou hy hulle beskerm en seën. Hy het oor sy wette gesê: “En hierdie gebod wat ek julle vandag beveel, is nie te moeilik vir julle nie, en dit is ook nie vir julle onbereikbaar nie” (Deut. 30:​11, 16). Maar as hulle nie sy wette gehoorsaam het nie of as hulle gekies het om ander gode te aanbid, sou hy hulle nie meer beskerm nie en sou hulle swaarkry. En tog kon hulle selfs dan Jehovah se guns terugkry. Hulle kon “tot Jehovah [hulle] God terugkeer en na sy stem luister” (Deut. 30:​1-3, 17-20). Met ander woorde, hulle kon berou toon. As hulle dit gedoen het, sou Jehovah nader aan hulle kom en hulle weer seën.

5. Hoe het Jehovah gewys dat hy nie sy volk afgeskryf het nie? (2 Konings 17:​13, 14)

⁵ Jehovah se volk het herhaaldelik teen hom gerebelleer. Hulle het afgode aanbid en ander aaklige dinge gedoen. As gevolg hiervan het hulle swaargekry. Maar Jehovah het nie sy hardkoppige volk afgeskryf nie. Hy het keer op keer profete gestuur om sy volk aan te moedig om berou te toon en na hom toe terug te keer. – Lees 2 Konings 17:​13, 14.

6. Hoe het Jehovah sy profete gebruik om sy volk te leer dat dit belangrik is om berou te toon? (Sien ook prent.)

⁶ Jehovah het dikwels sy profete gebruik om sy volk te waarsku en reg te help. Byvoorbeeld, God het deur middel van Jeremia gesê: “Keer terug, o ontroue Israel . . . Ek sal nie kwaad na julle kyk nie, want ek is lojaal . . . Ek sal nie vir ewig kwaad bly nie. Maar erken net jou skuld, want jy het teen Jehovah . . . in opstand gekom” (Jer. 3:​12, 13). Deur middel van Joël het Jehovah gesê: “Julle [moet] met julle hele hart na my terugkeer” (Joël 2:​12, 13). Deur Jesaja het hy gesê: “Reinig julle, hou op om goddelose dinge voor my te doen. Hou op met julle slegte dade” (Jes. 1:​16-19). En Jehovah het deur Esegiël gevra: “Gee die dood van ’n goddelose my enige vreugde? . . . Sou ek nie eerder wou hê dat hy moet ophou met wat hy doen en bly lewe nie? Dit maak my nooit bly as iemand sterf nie, . . . draai dus terug en lewe” (Eseg. 18:​23, 32). Jehovah is baie bly wanneer mense berou toon oor hulle sondes, want hy wil hê dat hulle vir ewig moet lewe. Maar Jehovah wag nie totdat mense ’n verandering maak voordat hy hulle help nie. Kom ons kyk na ’n paar ander voorbeelde hiervan.

7. Wat het Jehovah sy volk geleer deur middel van die profeet Hosea en sy vrou?

⁷ Kyk wat Jehovah sy volk geleer het deur middel van die profeet Hosea en sy vrou, Gomer. Nadat sy egbreuk gepleeg het, het sy Hosea vir ander mans verlaat. Was daar enige hoop vir haar? Jehovah, wat harte kan lees, het vir Hosea gesê: “Gaan weer, gaan na die vrou wat ’n ander man se liefde ontvang en wat egbreuk pleeg en wees lief vir haar, net soos Jehovah die Israeliete liefhet terwyl hulle ander gode aanbid” (Hos. 3:1; Spr. 16:2). Let op dat Hosea se vrou nog steeds besig was om ernstig te sondig. Maar Jehovah het vir Hosea gesê om haar te vergewe en haar terug te neem as sy vrou.a Net so het Jehovah nie sy rebelse volk afgeskryf nie. Al was hulle nog besig om baie slegte dinge te doen, het hy hulle nog steeds liefgehad. Hy het aangehou om sy profete te stuur om hulle te help om berou te toon en veranderinge in hulle lewe te maak. Beteken dit dat Jehovah, “die Een wat harte ondersoek”, ’n persoon wat nog steeds ernstig sondig, sal probeer help om berou te toon? (Spr. 17:3). Kom ons kyk.

HOE JEHOVAH SONDAARS HELP OM BEROU TE TOON

8. Hoe het Jehovah Kain probeer help om berou te toon? (Genesis 4:​3-7) (Sien ook prent.)

⁸ Kain was Adam en Eva se eerste seun. Hy het die begeerte om te doen wat sleg is, van sy ouers geërf. Die Bybel sê ook van hom: “Sy eie werke was goddeloos” (1 Joh. 3:12). Miskien is dit hoekom Jehovah nie “Kain en sy offer . . . goedgekeur” het toe hy ’n offerande gebring het nie. In plaas daarvan om sy gedrag te verander, het ‘Kain baie kwaad geword en was hy ongelukkig’. Wat het Jehovah toe gedoen? Hy het met Kain gepraat. (Lees Genesis 4:​3-7.) Let op dat Jehovah liefdevol met Kain geredeneer het. Hy het hom hoop gegee en hom teen die gevaar van sonde gewaarsku. Ongelukkig het Kain geweier om te luister. Hy het nie toegelaat dat Jehovah hom help om berou te toon nie. Maar het daardie negatiewe reaksie Jehovah gekeer om ander sondaars te probeer help om berou te toon? Glad nie!

9. Hoe het Jehovah Dawid gehelp om berou te toon?

⁹ Jehovah was baie lief vir koning Dawid. Hy het hom selfs “’n man na my hart” genoem (Hand. 13:22). Maar Dawid het ernstig gesondig. Hy het egbreuk en moord gepleeg. Volgens die Wet van Moses het Dawid die dood verdien (Lev. 20:10; Num. 35:31). Maar Jehovah was liefdevol en wou Dawid help om berou te toon.b Hy het sy profeet Natan gestuur om die koning te besoek, selfs al het Dawid nog nie gewys dat hy berou getoon het nie. Natan het ’n illustrasie gebruik om Dawid se hart te raak. Dawid het besef dat hy Jehovah baie seergemaak het en het berou getoon (2 Sam. 12:​1-14). Hy het ’n hartroerende psalm geskryf wat wys dat hy berouvol was (Ps. 51, opskrif). Hierdie psalm het tallose sondaars vertroos en gemotiveer om berou te toon. Is ons nie bly dat Jehovah sy geliefde kneg Dawid liefdevol gehelp het om berou te toon nie?

10. Hoe laat dit jou voel om te weet dat Jehovah geduldig met ons is en ons vergewe?

¹⁰ Jehovah haat alle soorte sonde (Ps. 5:​4, 5). Maar hy weet dat ons almal sondaars is, en omdat hy lief is vir ons, kies hy om ons te help om teen sonde te veg. Hy probeer altyd om selfs die ergste sondaars te help om berou te toon en nader aan hom te kom. Dit is baie vertroostend om dit te weet! Terwyl ons oor Jehovah se geduld en vergifnis nadink, is ons vasbeslote om getrou aan hom te bly en om gou berou te toon wanneer ons sondig. Kom ons kyk nou na hoe die Christengemeente verder geleer was oor berou.

WAT JESUS SY VOLGELINGE OOR BEROU GELEER HET

11-12. Wat het Jesus mense oor Jehovah geleer? (Sien prent.)

¹¹ In die eerste eeu HJ het die tyd aangebreek vir die Messias om te kom. Soos die vorige artikel genoem het, het Jehovah beide Johannes die Doper en Jesus Christus gebruik om mense te leer hoe belangrik dit is om berou te toon. – Matt. 3:​1, 2; 4:17.

¹² Toe Jesus op die aarde was, het hy mense geleer dat sy Vader gretig is om ons te vergewe wanneer ons sondig. Een manier hoe hy dit gedoen het, was deur ’n pragtige illustrasie oor die verlore seun te vertel. Daardie jong man het gekies om ’n tyd lank ’n sondige lewe te lei. Maar hy het “tot sy sinne [gekom]” en teruggekeer huis toe. Hoe het sy pa gereageer? Jesus het gesê dat terwyl die seun “nog ’n hele ent weg was, het sy pa hom gesien en baie jammer vir hom gevoel, en hy het gehardloop en hom omhels en hom gesoen”. Die seun was van plan om te vra of hy een van sy pa se gehuurde werkers kon word, maar sy pa het hom “my seun” genoem en hom teruggeneem. Die pa het gesê: “Hy was verlore en is gevind” (Luk. 15:​11-32). Toe Jesus in die hemel gelewe het voordat hy aarde toe gekom het, het hy sekerlik gesien hoe sy Vader sulke meegevoel aan tallose berouvolle sondaars getoon het. Hierdie illustrasie wat Jesus gebruik het, is regtig vertroostend en wys ons hoe genadig ons Vader, Jehovah, is!

13-14. Wat het die apostel Petrus oor berou geleer, en wat het hy ander daaroor geleer? (Sien ook prent.)

¹³ Die apostel Petrus het belangrike lesse oor berou en vergifnis by Jesus geleer. Petrus het dikwels vergifnis nodig gehad, en Jesus was gretig om hom te vergewe. Byvoorbeeld, nadat Petrus drie keer ontken het dat hy sy Here ken, het hy baie ontsteld gevoel oor wat hy gedoen het (Matt. 26:​34, 35, 69-75). Maar nadat Jesus opgewek is, het hy aan Petrus verskyn – blykbaar in privaat (Luk. 24:​33, 34; 1 Kor. 15:​3-5). By daardie geleentheid het Jesus sonder twyfel sy berouvolle apostel liefdevol vergewe en gerusgestel. – Sien Markus 16:7.

¹⁴ Petrus het verstaan hoe dit gevoel het om berou te toon en om vergewe te word. So hy kon ander oor hierdie dinge leer. Die een of ander tyd ná die Pinksterfees het Petrus ’n toespraak gegee vir ’n skare ongelowige Jode en vir hulle verduidelik dat hulle die Messias doodgemaak het. Maar hy het hulle liefdevol aangemoedig: “Toon dus berou en draai om sodat julle sondes uitgewis kan word. Dan sal Jehovah self tye van verfrissing bring” (Hand. 3:​14, 15, 17, 19). Petrus het dus gewys dat berou ’n sondaar beweeg om om te draai en om ’n nuwe weg te volg, een wat God bly maak. Met ander woorde, hy verander sy verkeerde denke en hou op om te doen wat sleg is. Die apostel het ook gewys dat Jehovah hulle sonde sou uitwis, of dit heeltemal sou laat verdwyn. En baie jare later het Petrus Christene verseker: “Jehovah . . . is geduldig met julle omdat hy nie wil hê dat enigiemand vernietig moet word nie, maar wil hê dat almal berou moet toon” (2 Pet. 3:9). Wat ’n pragtige hoop is dit tog vir Christene wanneer hulle sondig – selfs ernstig sondig!

15-16. (a) Hoe het die apostel Paulus oor vergifnis geleer? (1 Timoteus 1:​12-15) (b) Wat sal ons in die volgende artikel bespreek?

¹⁵ Daar is min mense wat meer berou moes toon en vergifnis moes ontvang as Saulus van Tarsus. Hy was ’n wrede vervolger van Christus se geliefde volgelinge. Die meeste Christene het hom heel moontlik as ’n verlore saak beskou en gedink dat daar geen hoop vir hom was om berou te toon nie. Maar Jesus het geweet dat Saulus kon verander en berou toon. Hy en sy Vader het goeie eienskappe in Saulus gesien. Jesus het gesê: “Ek het hierdie man gekies” (Hand. 9:15). Jesus het selfs ’n wonderwerk gebruik om Saulus te help om berou te toon (Hand. 7:58–8:3; 9:​1-9, 17-20). Nadat hy ’n Christen geword het, het Saulus – later bekend as die apostel Paulus – dikwels gesê hoe hy die goedheid en genade wat aan hom getoon is, waardeer. (Lees 1 Timoteus 1:​12-15.) Die dankbare apostel het ander geleer: “God [wil] jou in sy goedhartigheid . . . help om berou te toon.” – Rom. 2:4.

¹⁶ Hoe het Paulus dit hanteer toe hy oor ’n skandelike probleem oor onsedelikheid in die Christengemeente in Korinte gehoor het? Hy het dit op ’n manier gedoen wat ons baie leer oor Jehovah se liefdevolle dissipline en oor hoe belangrik dit is om genade te toon. In die volgende artikel sal ons bespreek wat in die gemeente in Korinte gebeur het.