Help Bybelstudente om ’n standpunt vir die waarheid in te neem

1-2. (a) Hoekom huiwer party Bybelstudente om ’n standpunt vir die waarheid in te neem? (b) Wat sal ons in hierdie artikel bespreek?

HET jy daaroor getwyfel om een van Jehovah se Getuies te word? Dalk was jy bang dat jou werksmaats, vriende of gesin teen jou sou draai. Of dalk het jy gevoel dat jy nooit aan God se standaarde gehoorsaam sal kan wees nie. As dit die geval is, kan jy empatie hê met Bybelstudente wat dalk huiwer om ’n standpunt vir die waarheid in te neem.

² Jesus het erken dat sulke vrese maklik kan keer dat ’n persoon geestelik groei (Matt. 13:​20-22). Maar hy het nie dié afgeskryf wat gehuiwer het om hom te volg nie. Hy het eerder vir sy dissipels gewys hoe om sulke persone te help om (1) struikelblokke te identifiseer wat keer dat hulle vordering maak, (2) hulle liefde vir Jehovah te versterk, (3) hulle prioriteite aan te pas en (4) hulle uitdagings te oorkom. Hoe kan ons toepas wat Jesus vir sy dissipels gesê het, terwyl ons die Geniet die lewe vir ewig!-boek gebruik om ’n Bybelstudent te help om ’n standpunt vir die waarheid in te neem?

HELP JOU STUDENT OM STRUIKELBLOKKE TE IDENTIFISEER WAT KEER DAT HY VORDERING MAAK

3. Wat het dalk gekeer dat Nikodemus een van Jesus se dissipels word?

³ Nikodemus, ’n belangrike leier van die Jode, het ’n struikelblok gehad wat gekeer het dat hy een van Jesus se dissipels word. Net omtrent ses maande nadat Jesus sy bediening begin het, het Nikodemus erken dat Jesus God se verteenwoordiger is (Joh. 3:​1, 2). Maar Nikodemus het gekies om Jesus in die geheim te ontmoet, want hy was “bang vir die Jode” (Joh. 7:13; 12:42). Hy het dalk gedink dat hy te veel het om te verloor as hy ’n dissipel van Jesus word.a

4. Hoe het Jesus Nikodemus gehelp om te verstaan wat God van hom verwag het?

⁴ Nikodemus het kennis van die Wet gehad, maar hy het hulp nodig gehad om te verstaan wat Jehovah van hom verwag het. Hoe het Jesus hom gehelp? Jesus was vrygewig met sy tyd en het Nikodemus selfs in die nag ontmoet. En Jesus het duidelik vir Nikodemus gesê wat hy moet doen om ’n dissipel te word: oor sy sondes berou toon, in water gedoop word en geloof in die Seun van God beoefen. – Joh. 3:​5, 14-21.

5. Hoe kan ons ’n Bybelstudent help om te identifiseer wat dit is wat keer dat hy vordering maak?

⁵ Al het ’n Bybelstudent ’n goeie begrip van die Bybel, het hy dalk hulp nodig om te identifiseer wat dit is wat keer dat hy vordering maak. Sekulêre werk of gesinsteenstand trek dalk sy aandag af van geestelike doelwitte. So wees daar vir jou student. Jy kan hom dalk nooi vir ’n koppie koffie of om te gaan stap. In so ’n gemaklike atmosfeer sal jy hom dalk kan help om openlik te praat oor sy uitdagings. Moedig jou student aan om enige nodige aanpassings te maak, nie om jou gelukkig te maak nie, maar om te wys dat hy Jehovah liefhet.

6. Hoe kan jy ’n student help om die moed te kry om ’n standpunt vir die waarheid in te neem? (1 Korintiërs 16:13)

⁶ Wanneer ’n Bybelstudent die vertroue het dat Jehovah hom sal help om volgens Bybelstandaarde te lewe, sal hy die moed kry om toe te pas wat hy leer. (Lees 1 Korintiërs 16:13.) Jou rol kan vergelyk word met dié van ’n onderwyser. Wanneer jy dink aan jou skooldae, van watter soort onderwyser het jy die meeste gehou? Dit is seker die onderwyser wat jou geduldig gehelp het om vertroue in jou vermoë op te bou. Op ’n soortgelyke manier leer ’n goeie Bybelonderrigter sy student nie net wat God wil hê ons moet doen nie, maar hy verseker hom ook dat hy met Jehovah se hulp die nodige aanpassings in sy lewe kan maak. Hoe kan jy dit doen?

HELP JOU STUDENT OM SY LIEFDE VIR JEHOVAH TE VERSTERK

7. Hoe het Jesus dié wat na hom geluister het, gehelp om hulle liefde vir Jehovah te versterk?

⁷ Jesus het geweet dat liefde vir God sy dissipels sou motiveer om toe te pas wat hulle geleer het. Hy het sy dissipels dikwels dinge geleer wat hulle sou help om hulle liefde vir hulle hemelse Vader te versterk. Byvoorbeeld, hy het Jehovah vergelyk met ’n man wat goeie dinge vir sy kinders gee (Matt. 7:​9-11). Party van Jesus se luisteraars het dalk nie so ’n liefdevolle pa gehad nie. Dink net hoe hulle moes gevoel het toe Jesus die illustrasie gegee het van ’n liefdevolle pa wat sy seun terugverwelkom het wat op ’n verkeerde pad was. Hulle kon Jehovah se liefde vir sy aardse kinders sien. – Luk. 15:​20-24.

8. Hoe kan jy ’n Bybelstudent help om sy liefde vir Jehovah te versterk?

⁸ Jy kan ook ’n Bybelstudent help om sy liefde vir Jehovah te versterk deur God se eienskappe in jou onderrigting te beklemtoon. Help hom gedurende elke studiesessie om wat hy leer, te verbind met Jehovah se liefde. Wanneer julle die losprys bespreek, beklemtoon hoe dit op hom van toepassing is (Rom. 5:8; 1 Joh. 4:10). ’n Student sal waarskynlik beweeg word om Jehovah lief te hê wanneer hy nadink oor hoe baie Jehovah hom persoonlik liefhet. – Gal. 2:20.

9. Wat het ’n man met die naam Michael gehelp om sy lewenswyse te verander?

⁹ Kyk na die voorbeeld van Michael, van Indonesië. Hy het in die waarheid grootgeword, maar het hom nie laat doop nie. Toe hy 18 was, het hy na ’n ander land gegaan om as ’n trokbestuurder te werk. Later het hy in Indonesië getrou, maar hy het aangehou om in ’n ander land te werk wat ver van sy vrou en dogter af was. Intussen het sy vrou en dogter die Bybel begin studeer en vordering begin maak. Nadat sy ma gesterf het, het Michael besluit om terug te gaan huis toe om vir sy pa te sorg en het hy ingestem om ’n Bybelstudie te hê. Toe hy die “Soek dieper”-deel in les 27 van die Geniet die lewe vir ewig!-boek gestudeer het, het dit Michael diep geraak. Terwyl hy nagedink het oor hoe Jehovah moes gevoel het om te sien hoe Sy Seun ly, het Michael begin huil. Hy het diep waardering vir die losprys ontwikkel en is beweeg om sy lewenswyse te verander en hom te laat doop.

HELP JOU STUDENT OM SY PRIORITEITE AAN TE PAS

10. Hoe het Jesus sy vroeë dissipels gehelp om hulle prioriteite aan te pas? (Lukas 5:​5-11) (Sien ook prent.)

¹⁰ Die vroeë dissipels het vinnig besef dat Jesus die beloofde Messias is, maar hulle het hulp nodig gehad om die bediening hulle prioriteit te maak. Petrus en Andreas was al ’n ruk lank dissipels toe Jesus hulle genooi het om hom voltyds te volg (Matt. 4:​18, 19). Hulle het saam met Jakobus en Johannes as vissermanne gewerk en het ’n suksesvolle besigheid gehad (Mark. 1:​16-20). Toe Petrus en Andreas “hulle nette gelos” het, het hulle heel moontlik reëlings getref om vir hulle gesin te sorg terwyl hulle Jesus gevolg het. Wat het hulle beweeg om hulle prioriteite aan te pas? Die verslag in Lukas sê vir ons dat Jesus ’n wonderwerk gedoen het wat hulle vertroue versterk het in Jehovah se vermoë om vir hulle te sorg. – Lees Lukas 5:​5-11.

11. Hoe kan ons ons eie ondervindinge gebruik om ’n student se geloof te versterk?

¹¹ Ons kan nie soos Jesus wonderwerke doen nie, maar ons kan ondervindinge deel van hoe Jehovah dié ondersteun wat Hom eerste in hulle lewens stel. Byvoorbeeld, onthou jy hoe Jehovah jou gehelp het toe jy vergaderinge begin bywoon het? Dalk moes jy vir jou werkgewer gaan verduidelik hoekom jy nie meer oortyd kan werk nie as dit met jou vergaderingbywoning ingemeng het. Terwyl jy jou ondervindinge met jou student deel, verduidelik hoe jou geloof versterk is toe jy gesien het hoe Jehovah jou besluit ondersteun om sy aanbidding jou prioriteit te maak.

12. (a) Hoekom moet ons verskillende verkondigers na ’n Bybelstudie nooi? (b) Hoe kan jy video’s gebruik om jou student op ’n effektiewe manier te leer? Gee ’n voorbeeld.

¹² Jou student sal ook daarby baat vind om te hoor hoe ander Christene hulle prioriteite aangepas het. So nooi medegelowiges uit ’n verskeidenheid agtergronde om die Bybelstudie saam met jou te doen. Vra hulle om te verduidelik hoe hulle in die waarheid gekom het en wat hulle gedoen het om Jehovah se diens hulle prioriteit in die lewe te maak. En neem tyd om saam met jou student na die video’s uit die “Soek dieper”-deel of die “Leer meer”-deel van die Geniet die lewe vir ewig!-boek te kyk. Byvoorbeeld, wanneer julle les 37 bespreek, kan jy beginsels uit die video Jehovah sal in ons behoeftes voorsien beklemtoon.

HELP JOU STUDENT OM UITDAGINGS TE OORKOM

13. Hoe het Jesus sy dissipels vir teenstand voorberei?

¹³ Jesus het herhaaldelik vir sy volgelinge gesê dat hulle teenstand van ander sou ondervind, selfs van familielede (Matt. 5:11; 10:​22, 36). Aan die einde van Jesus se bediening het hy sy dissipels gewaarsku dat hulle doodgemaak kan word (Matt. 24:9; Joh. 15:20; 16:2). Hy het hulle aangemoedig om wyslik op te tree in hulle bediening. Hy het hulle aangeraai om nie dié wat hulle teëstaan, te konfronteer nie en om versigtig te wees sodat hulle kan aanhou preek.

14. Hoe kan ons ’n student help om vir teenstand voor te berei? (2 Timoteus 3:12)

¹⁴ Ons kan ’n student help om vir teenstand voor te berei deur te verduidelik wat hy kan verwag om van medewerkers, vriende en familielede te hoor. (Lees 2 Timoteus 3:12.) Party medewerkers sal dalk die student se nuwe lewenswyse bespot. Ander, selfs nabye familielede, sal dalk sy Bybelse oortuigings kritiseer. Hoe gouer ons ons studente voorberei om teenstand te hanteer, hoe beter toegerus sal hulle wees wanneer dit kom.

15. Wat kan ’n Bybelstudent help om familieteenstand te hanteer?

¹⁵ Wanneer dit by familieteenstand kom, moedig jou student aan om te dink oor hoekom sy familielede dalk ontsteld is. Hulle dink dalk dat hy mislei is of hulle is dalk net bevooroordeeld teenoor Jehovah se Getuies. Selfs Jesus het negatiewe reaksies gehad van dié vir wie hy lief was (Mark. 3:21; Joh. 7:5). Leer jou student om geduldig en taktvol te bly wanneer dit kom by hoe hy ander behandel, insluitende familielede.

16. Hoe kan ons ’n Bybelstudent help om op ’n taktvolle manier sy oortuigings te deel?

¹⁶ Selfs wanneer familielede belangstelling toon, sal dit goed wees as ’n student nie alles op een slag verduidelik nie. Anders sal sy geliefdes dalk oorweldig voel en as gevolg daarvan huiwerig wees om nog ’n gesprek te hê. So moedig jou student aan om sy oortuigings op ’n manier te verduidelik wat die deur ooplaat vir toekomstige gesprekke (Kol. 4:6). Dalk kan hy sy familielede nooi om jw.org te besoek. Dit sal hulle die geleentheid gee om teen hulle eie pas meer oor Jehovah se Getuies te leer.

17. Hoe kan jy ’n student oplei om vrae oor Jehovah se Getuies te hanteer? (Sien ook prent.)

¹⁷ Jy kan die jw.org-reeks “Algemene vrae” gebruik om jou student te help om eenvoudige antwoorde voor te berei op vrae wat familielede of werksmaats dalk vra (2 Tim. 2:​24, 25). Hersien aan die einde van elke les die “Party mense sê”-deel van die Geniet die lewe vir ewig!-boek. Moedig jou student aan om antwoorde in sy eie woorde te oefen. Moenie huiwer om vir hom voorstelle te gee oor hoe hy sy antwoorde kan verbeter nie. Sulke oefensessies sal hom help om sy eie geloof met selfvertroue te verdedig.

18. Hoe kan jy ’n student aanmoedig om sy geloof in die bediening te deel? (Matteus 10:27)

¹⁸ Jesus het sy dissipels aangemoedig om die goeie nuus in die openbaar te verkondig. (Lees Matteus 10:27.) Hoe gouer ’n student begin om sy geloof te deel, hoe gouer sal hy leer om op Jehovah te vertrou. Hoe kan jy ’n student help om dit sy doelwit te maak? Wanneer ’n predikingskampanje vir die gemeente aangekondig word, moedig jou student aan om te dink aan hoe hy as ’n verkondiger kan kwalifiseer. Verduidelik hoekom baie dit makliker gevind het om gedurende sulke kampanjes te begin preek. Hy sal dalk ook baat vind by die opleiding wat ons gedurende die vergadering in die week kry oor hoe om in die openbaar te praat. Terwyl hy probeer om hierdie doelwit te bereik, sal hy leer hoe om sy oortuigings beter te verduidelik.

WYS DAT JY VERTROUE IN JOU STUDENT HET

19. Hoe het Jesus gewys dat hy vertroue het in sy dissipels, en hoe kan ons hom navolg?

¹⁹ Voordat Jesus hemel toe gegaan het, het hy vir sy dissipels gesê dat hulle met hom herenig sou wees. Hulle het nie verstaan dat Jesus gepraat het oor die feit dat hulle hemel toe gaan nie. Ten spyte hiervan het hy op hulle lojaliteit gefokus, nie op hulle twyfelgedagtes nie (Joh. 14:​1-5, 8). Hy het geweet dat hulle tyd nodig gehad het om sekere dinge te verstaan, soos die hemelse hoop (Joh. 16:12). Ons kan ook wys dat ons vertroue het in ons student se begeerte om Jehovah gelukkig te maak.

20. Hoe het ’n suster in Malawi gewys dat sy vertroue in haar student het?

²⁰ Ons bly hoopvol dat ons student wil doen wat reg is. Kyk byvoorbeeld na Chifundo, ’n suster in Malawi. Sy het ’n Bybelstudie in die Geniet die lewe vir ewig!-boek begin met ’n jong Katolieke vrou met die naam Alinafe. Nadat hulle les 14 bespreek het, het Chifundo haar student gevra wat sy dink van die gebruik van beelde in aanbidding. Alinafe het baie emosioneel geword en geantwoord: “Dit is ’n persoonlike keuse!” Chifundo het gewonder of dit die einde van die Bybelstudie sou wees. Maar sy het geduldig aangehou om met Alinafe te studeer en gehoop dat sy met verloop van tyd die punt sou snap. ’n Paar maande later het Chifundo haar die vraag in les 34 gevra: “Hoe het jou Bybelstudie en die dinge wat jy oor die ware God, Jehovah, geleer het, jou sover gehelp?” Chifundo vertel hoe Alinafe gereageer het: “Sy het so baie wonderlike punte genoem, en een daarvan was dat die Getuies nie deelneem aan gebruike wat die Bybel sê verkeerd is nie.” Kort daarna het Alinafe opgehou om beelde te gebruik en vir doop gekwalifiseer.

21. Hoe kan ons ’n student se begeerte versterk om ’n standpunt vir die waarheid in te neem?

²¹ Al is Jehovah die een “wat dit laat groei”, speel ons ’n rol daarin om ’n Bybelstudent te help om vordering te maak (1 Kor. 3:7). Ons doen meer as om hom te leer wat God wil hê hy moet doen. Ons help hom om ’n diep liefde vir Jehovah te ontwikkel. Ons moedig hom ook aan om sy liefde te wys deur sy prioriteite aan te pas. En ons leer hom hoe om op Jehovah te vertrou wanneer hy uitdagings het. Deur te wys dat ons vertroue in hom het, versterk ons sy oortuiging dat hy ook aan Jehovah se standaarde gehoorsaam kan wees en ’n ferm standpunt vir die waarheid kan inneem.