Hoe om die geveg teen verkeerde begeertes te wen

1. Wat is waar van alle onvolmaakte mense?

HET jy al ooit ’n sterk begeerte gehad om iets te doen wat Jehovah nie goedkeur nie? Indien wel, moenie tot die gevolgtrekking kom dat jy ’n groter probleem deurmaak as ander nie. Die Bybel sê: “Die versoekings wat julle deurmaak, is iets wat ander mense ook deurmaak” (1 Kor. 10:13). Dit beteken dat dit nie saak maak met watter verkeerde begeerte jy sukkel nie, ander sukkel ook daarmee. Jy is nie alleen nie, en met Jehovah se hulp kan jy die geveg wen.

2. Met watter soort versoekings sukkel party Christene en Bybelstudente dalk? (Sien ook prente.)

² Die Bybel sê ook: “Elkeen word getoets wanneer hy deur sy eie begeerte gelok en verlei word” (Jak. 1:14). Wat vir een persoon ’n versoeking is, is dalk nie vir ’n ander persoon ’n versoeking nie. Byvoorbeeld, party Christene kom in die versoeking om hulle skuldig te maak aan onsedelike gedrag met iemand van die teenoorgestelde geslag; ander met iemand van dieselfde geslag. Dié wat opgehou het om na pornografie te kyk, voel dalk ’n sterk begeerte om weer na die gewoonte terug te keer. Baie wat opgehou het om dwelms of alkohol te misbruik, het ’n soortgelyke uitdaging. Dit is ’n paar begeertes waarmee party Christene en Bybelstudente sukkel. Ons almal het al heel moontlik op die een of ander stadium soos die apostel Paulus gevoel, wat geskryf het: “Wanneer ek wil doen wat reg is, is ek geneig om te doen wat sleg is.” – Rom. 7:21.

3. Watter effek kan dit op ’n individu hê as hy aanhoudend met dieselfde verkeerde begeerte sukkel?

³ As jy aanhoudend met dieselfde verkeerde begeerte sukkel, voel jy dalk magteloos, asof jy nie die versoeking kan weerstaan nie. Jy voel dalk ook hopeloos, asof Jehovah jou sal veroordeel net omdat jy die verkeerde begeerte het. Wees verseker dat nie een van hierdie gevoelens die waarheid is nie! Om te verduidelik hoekom, sal hierdie artikel twee vrae bespreek: (1) Waar kom gevoelens van magteloosheid en hopeloosheid vandaan? (2) Hoe kan jy die geveg teen verkeerde begeertes wen?

HOE DIE DUIWEL WIL HÊ ONS MOET VOEL

4. (a) Hoekom wil Satan hê dat ons magteloos moet voel? (b) Hoekom is ons nie magteloos in ons geveg teen versoeking nie?

⁴ Satan wil hê dat ons magteloos moet voel wanneer ons in die versoeking gebring word. Jesus het dit erken toe hy sy volgelinge leer om te bid: “Moet ons nie in versoeking bring nie, maar verlos ons van die Duiwel” (Matt. 6:13). Satan bevraagteken die mens se gewilligheid om Jehovah te gehoorsaam wanneer hulle in die versoeking kom (Job 2:​4, 5). Dink aan die ironie daarvan. Satan is die een wat deur sy eie begeerte verlei is, en hy was nie gewillig om aan Jehovah getrou te bly nie. Hy glo ongetwyfeld dat ons net soos hy is, dat ons vinnig sal wees om Jehovah te verlaat wanneer ons in die versoeking kom. Satan het selfs gedink dat die volmaakte Seun van God in die versoeking gebring kon word om te doen wat verkeerd is! (Matt. 4:​8, 9). Maar dink net: Is ons regtig magteloos in ons geveg teen verkeerde begeertes? Glad nie! Ons stem saam met die apostel Paulus, wat geskryf het: “Vir alles is ek sterk genoeg deur hom wat my krag gee.” – Fil. 4:13.

5. Hoe weet ons dat Jehovah die vertroue het dat ons die geveg teen verkeerde begeertes kan wen?

⁵ In skerp teenstelling met Satan het Jehovah die vertroue dat ons verkeerde begeertes kan weerstaan. Hoe weet ons dit? Omdat Jehovah voorspel het dat ’n groot menigte mense aan hom getrou sal bly en die groot verdrukking sal oorleef. Dink aan wat dit beteken. Jehovah, wat nie kan lieg nie, sê dat ’n groot hoeveelheid mense – nie net ’n paar nie – sy nuwe wêreld sal binnegaan met “wit klere” aan, wat beteken dat hulle ’n rein posisie voor Jehovah het (Op. 7:​9, 13, 14). Dit is duidelik dat Jehovah nie dink dat ons magteloos is in ons geveg teen verkeerde begeertes nie.

6-7. Hoekom wil Satan hê dat ons hopeloos in ons geveg teen versoeking moet voel?

⁶ Satan wil graag hê dat ons nie net magteloos moet voel nie maar ook hopeloos – asof Jehovah ons sal veroordeel net omdat ons verkeerde begeertes het. Dink weer aan die ironie. Satan is die een wat sonder hoop is. Hy is deur Jehovah geoordeel, en hy verdien nie om vir ewig te lewe nie (Gen. 3:15; Op. 20:10). Satan wil ongetwyfeld hê dat ons ook moet voel dat ons sonder hoop is – veral omdat ons die vooruitsig het om die einste seëning te verkry wat hy nie kan kry nie. Maar ons is nie sonder hoop nie. Om die waarheid te sê, die Bybel verseker ons dat Jehovah ons wil help, nie ons wil veroordeel nie. Hy “wil [nie] hê dat enigiemand vernietig moet word nie, maar wil hê dat almal berou moet toon”. – 2 Pet. 3:9.

⁷ So as ons dan glo dat ons magteloos of hopeloos in ons geveg teen verkeerde begeertes is, dink ons soos Satan graag wil hê ons moet dink. Wanneer ons dit besef, kan dit ons help om ons vasbeslotenheid te versterk om ’n ferm standpunt teen hom in te neem. – 1 Pet. 5:​8, 9.

HOE ONS SONDIGE TOESTAND ONS KAN LAAT VOEL

8. Wat behels sonde behalwe verkeerde dade? (Psalm 51:5) (Sien ook “Wat dit beteken”.)

⁸ Behalwe Satan is daar nog iets wat kan veroorsaak dat ons magteloos en hopeloos voel in ons geveg teen verkeerde begeertes. Wat is dit? Ons sondige toestand, wat ons by ons eerste menseouers geërf het.a – Job 14:4; lees Psalm 51:5.

9-10. (a) Hoe het die toestand van sonde Adam en Eva geaffekteer? (Sien ook prent.) (b) Hoe affekteer die toestand van sonde ons?

⁹ Dink aan hoe die toestand van sonde Adam en Eva geaffekteer het. Nadat hulle ongehoorsaam aan Jehovah was, het hulle weggekruip en hulle liggame probeer bedek. Insight on the Scriptures sê die volgende hieroor: “So sonde het veroorsaak dat hulle skuldig, angstig, onseker en skaam voel.” Dit was asof Adam en Eva in ’n huis toegesluit is wat net daardie vier kamers gehad het. Adam en Eva kon van een kamer na ’n ander kamer beweeg, maar hulle kon nie uit die huis uitkom nie. Hulle kon nie hulle sondige toestand vryspring nie.

¹⁰ Ons is natuurlik nie in presies dieselfde situasie as waarin Adam en Eva was nie. Die losprys – wat nie op die eerste paartjie van toepassing is nie – kan ons van sonde reinig en ons ’n skoon gewete gee (1 Kor. 6:11). Maar ons het ’n sondige toestand geërf. So dit is nie verbasend dat ons ook skuldig, angstig, onseker en skaam voel nie. Om die waarheid te sê, die Bybel sê dat sonde nog steeds ’n houvas op die mens het. En dit is waar vir almal, selfs vir dié wat “nie gesondig het soos Adam gesondig het nie” (Rom. 5:14). So ontmoedigend as wat daardie feit dalk lyk, dit hoef ons nie magteloos en hopeloos te laat voel nie. Ons kan daardie negatiewe gevoelens verwerp. Hoe?

11. Hoe moet ons op gevoelens van magteloosheid reageer, en hoekom? (Romeine 6:12)

¹¹ Wanneer ons magteloos voel – asof ons nie suksesvol teen verkeerde begeertes kan veg nie – kan ons dit beskou as ons sondige toestand wat “praat”, en ons moenie daarna luister nie. Hoekom nie? Omdat die Bybel ons leer dat ons nie sonde hoef toe te laat om aan te hou om oor ons “as koning [te] regeer” nie. (Lees Romeine 6:12.) Dit beteken dat ons kan kies om nie op verkeerde begeertes te reageer nie (Gal. 5:16). Jehovah het die vertroue dat ons versoeking kan weerstaan; anders sou hy nie vereis dat ons dit doen nie (Deut. 30:​11-14; Rom. 6:6; 1 Tess. 4:3). Dit is duidelik dat ons nie magteloos in ons geveg teen verkeerde begeertes is nie.

12. Hoe moet ons op gevoelens van hopeloosheid reageer, en hoekom?

¹² Net so, wanneer ons hopeloos voel – asof Jehovah ons sal veroordeel net omdat ons verkeerde begeertes het – kan ons dit beskou as ons sondige toestand wat “praat”, en ons moenie daarna luister nie. Hoekom nie? Omdat die Bybel ons leer dat Jehovah ons sondige toestand verstaan (Ps. 103:​13, 14). Hy “weet alles” omtrent ons, insluitende hoe ons oorgeërfde sondige toestand op verskillende maniere tot ons verkeerde neigings bydra (1 Joh. 3:​19, 20). As ons veg teen ons begeerte om te doen wat verkeerd is en nie daarop reageer nie, sal Jehovah ons as rein beskou. Hoekom kan ons daarvan seker wees?

13-14. Beteken dit dat ons misluk het as ons maar net verkeerde begeertes het? Verduidelik.

¹³ Die Bybel wys dat daar ’n groot verskil is tussen die beoefening van wat verkeerd is (wat ons kan beheer) en die begeerte om te doen wat verkeerd is (wat dalk vanself opkom). Byvoorbeeld, party Christene in Korinte in die eerste eeu het voorheen homoseksualiteit beoefen. Paulus het geskryf: “Dit [is] wat party van julle was.” Het dit beteken dat hulle nooit weer enige begeerte gehad het om homoseksuele dade te beoefen nie? Dit sou nie realisties wees om dit te glo nie omdat sulke drange dikwels diepgewortel is. Maar Christene wat selfbeheersing beoefen het en dit vermy het om op hulle begeertes te reageer, was vir Jehovah aanvaarbaar. Hy het hulle beskou as Christene wat “skoon gewas” is (1 Kor. 6:​9-11). Dieselfde kan in jou geval waar wees.

¹⁴ Maak nie saak met watter verkeerde begeertes jy sukkel nie, jy kan dit suksesvol oorkom. Selfs al kan jy nie daarvan ontslae raak nie, kan jy selfbeheersing beoefen en dit vermy ‘om te doen wat jou vlees en gedagtes wil hê jy moet doen’ (Ef. 2:3). Hoe kan jy dit doen en sodoende die geveg teen verkeerde begeertes wen?

HOE OM TE WEN

15. Hoekom moet ons eerlik met onsself wees as ons die geveg teen verkeerde begeertes wil wen?

¹⁵ Om die geveg teen verkeerde begeertes te wen, sal jy eerlik met jouself moet wees oor jou swakhede. Wees versigtig om nie jouself met “valse redenasies” te bedrieg nie (Jak. 1:22). Om te maak asof die probleem nie so ernstig is nie – soos om te redeneer: ‘Ander drink meer as wat ek drink’ of om ander daarvoor te blameer: ‘Ek sal nie in die versoeking kom om na pornografie te kyk as my vrou liefdevoller teenoor my is nie’ – sal dit net vir jou makliker maak om voor die versoeking in te gee. So moenie probeer om ’n verkeerde weg, selfs in jou denke, te regverdig nie. Neem verantwoordelikheid vir jou dade. – Gal. 6:7.

16. Hoe kan jy jou vasbeslotenheid versterk om te doen wat reg is?

¹⁶ Behalwe om eerlik met jouself te wees oor jou swakhede, sal jy jou vasbeslotenheid moet versterk om nie daarvoor in te gee nie (1 Kor. 9:​26, 27; 1 Tess. 4:4; 1 Pet. 1:​15, 16). Dink aan waarmee jy die meeste sukkel en wanneer. Dit is dalk ’n sekere soort versoeking of ’n sekere tyd van die dag wanneer daar ’n groter kans is dat jy in die versoeking sal kom. Byvoorbeeld, is dit vir jou moeiliker om ’n versoeking te weerstaan wanneer jy moeg is of wanneer dit laat in die aand is? Berei jouself voor, en besluit wat jy sal doen wanneer die situasie opduik. Die beste tyd om dit te doen, is voordat die versoeking plaasvind. – Spr. 22:3.

17. Wat kan ons uit Josef se voorbeeld leer? (Genesis 39:​7-9) (Sien ook prente.)

¹⁷ Dink aan hoe Josef gereageer het toe Potifar se vrou hom probeer verlei het. Hy het onmiddellik vir haar nee gesê. (Lees Genesis 39:​7-9.) Wat kan ons hieruit leer? Josef het presies geweet hoe hy daaroor voel om ’n ander man se vrou te neem voordat Potifar se vrou hom probeer verlei het. Op dieselfde manier kan jy jou vasbeslotenheid versterk om te doen wat reg is voordat ’n versoeking opduik. Op daardie manier sal dit vir jou makliker wees om te doen wat reg is omdat jy alreeds besluit het wat jy gaan doen.

“HOU AAN OM SEKER TE MAAK DAT JULLE IN DIE GELOOF IS”

18. Hoe kan jy die geveg teen verkeerde begeertes wen? (2 Korintiërs 13:5)

¹⁸ Om die geveg teen verkeerde begeertes te wen, sal jy moet “[aanhou] om seker te maak dat [jy] in die geloof is” – dit wil sê moet aanhou om jouself gereeld te ondersoek om te sien hoe jy vaar. (Lees 2 Korintiërs 13:5.) Hersien van tyd tot tyd jou denke en dade en maak veranderinge waar dit nodig is. Byvoorbeeld, selfs wanneer jy ’n versoeking suksesvol verwerp, kan jy jou afvra: ‘Hoe lank het dit my geneem om nee te sê?’ As jy nie onmiddellik nee gesê het nie, moenie jouself veroordeel nie. Neem eerder stappe om te verbeter. Vra jou vrae af soos: ‘Kan ek die hoeveelheid tyd verminder wat dit my neem om van verkeerde gedagtes ontslae te raak? Maak my keuse van vermaak dit vir my moeiliker om versoeking te weerstaan? Hou ek onmiddellik op om te kyk na onsedelike tonele? Verstaan ek hoekom Jehovah se standaarde altyd die beste is selfs wanneer dit vereis dat ek selfbeheersing moet beoefen?’ – Ps. 101:3.

19. Hoe kan onwyse besluite wat dalk klein lyk, dit vir ons moeiliker maak om teen verkeerde begeertes te veg?

¹⁹ Jy moet dit ook vermy om verskonings te maak vir verkeerde gedrag. Die Bybel sê: “Die hart is bedriegliker as enigiets anders en is desperaat” (Jer. 17:9). Jesus het gesê dat dit “goddelose redenasies” voortbring (Matt. 15:19). Byvoorbeeld, ’n persoon wat opgehou het om na pornografie te kyk, dink dalk later dat dit “veilig” is om na seksueel prikkelende foto’s te kyk omdat dit nie openlike naaktheid bevat nie. Of hy redeneer dalk: ‘Daar is niks daarmee verkeerd om te fantaseer oor verkeerde begeertes solank ek net nie daarop reageer nie.’ In ’n sekere sin is daardie persoon se bedrieglike hart besig om vooruit te beplan “om die begeertes van die vlees te bevredig” (Rom. 13:14). Hoe kan jy dit vermy om dit te doen? Wees bewus van en vermy dit om klein onwyse besluite te maak wat daartoe sal lei dat jy groot onwyse besluite maak, soos om iets verkeerds te doen.b Verwerp ook enige gedagtes, of “goddelose redenasies”, wat kan veroorsaak dat jy verkeerde gedrag verskoon.

20. Watter vooruitsig het ons vir die toekoms, en watter hulp het ons nou?

²⁰ Soos ons geleer het, het ons deur middel van Jehovah se hulp die krag om versoeking te weerstaan. Ons het ook, danksy sy genade, die hoop om vir ewig in die nuwe wêreld te lewe. Dit sal ’n verligting wees om Jehovah met ’n rein verstand en hart te dien! Tot dan kan ons seker wees dat ons nie magteloos of hopeloos is in ons geveg teen verkeerde begeertes nie. Met Jehovah se seën op ons pogings kan ons wen!