1925 – Honderd jaar gelede

UITGESTELDE VERWAGTING

In 1925 het baie Bybelstudente verwag dat die aardse Paradys herstel sou word. Hoekom? Broer Albert Schroeder, wat later op die Bestuursliggaam gedien het, het verduidelik: “Ons het gedink dat die oorblyfsel van Christus se gesalfde volgelinge hemel toe sou gaan om deel te wees van die Koninkryk en dat die getroue manne van ouds, soos Abraham, Dawid en ander, opgewek sou word as hoofde om die regering van die aarde oor te neem as deel van God se koninkryk.” So toe dit nie gebeur het nie, was party broers en susters natuurlik teleurgesteld. – Spr. 13:12.

Ten spyte van hierdie teleurstelling het die meeste Bybelstudente besig gebly in die predikingswerk en meer bewus geword van hulle verantwoordelikheid om Getuies van Jehovah te wees. Kyk byvoorbeeld na die werk wat hulle gedoen het om die waarheid wyd en syd uit te saai.

RADIO-UITSENDING BREI UIT

As gevolg van die sukses van die WBBR-radiostasie gedurende die vorige jaar het die Bybelstudente nog ’n kragtige radiostasie gebou, hierdie keer naby Chicago, Illinois. Die naam vir die nuwe stasie was WORD. Ralph Leffler, ’n radio-ingenieur wat gehelp het om die stasie te bou, het gesê: “Op koue wintersaande is WORD wyd en syd gehoor.” Byvoorbeeld, een gesin wat meer as 5 000 kilometer daarvandaan gebly het in Pilot Station, Alaska, het ingeskakel by een van die eerste uitsendings. Nadat die gesin daarna geluister het, het hulle ’n brief geskryf aan dié wat by die stasie gewerk het om vir hulle dankie te sê dat hulle so ’n aanmoedigende geestelike program voorsien het.

The Watch Tower van 1 Desember 1925 het uitgebrei oor die stasie se wonderlike dekking en gesê: “WORD is een van die superstasies van die Verenigde State en gebruik 5 000 watt. Die opvangs van hierdie stasie is goed aan die Atlantiese sowel as die Pasifiese kusgebied, Kuba en die verre noordelike deel van Alaska. Baie mense wat nog nooit voorheen die waarheid gehoor het nie, het begin belangstel nadat hulle na hierdie stasie geluister het.”

Gedurende hierdie selfde tyd het die Bybelstudente ook probeer om die gebruik van die radio uit te brei om die goeie nuus in Kanada te verkondig. In 1924 is die radiostasie CHUC in Saskatoon, Saskatchewan, gebou. Dit was een van die eerste godsdienstige radiostasies in Kanada. Teen 1925 moes die klein stasie na ’n ander plek skuif. Daarom het die Wagtoringgenootskap die stasie oorgeneem en sy uitsendingstudio geskuif na die Regent-gebou, ’n ou teater in Saskatoon wat hulle gekoop en opgeknap het vir hierdie doel.

Danksy hierdie stasie het baie mense wat in klein dorpe en plattelandse gebiede in Saskatchewan gebly het, die goeie nuus vir die eerste keer gehoor. Byvoorbeeld, in een afgesonderde dorp het ’n Mev. Graham geskryf om Bybellektuur aan te vra nadat sy na ’n uitsending geluister het. Broer George Naish het gesê: “Haar uitroep ‘Leer ons!’ was so hard en duidelik dat ons vir haar die hele stel Studies in the Scriptures gestuur het.” Kort daarna het Mev. Graham die Koninkryksboodskap selfs verder versprei.

’N DUIDELIKER BEGRIP VAN ONS OORTUIGINGS

The Watch Tower van 1 Maart 1925 het ’n belangrike artikel bevat met die titel “Birth of the Nation”. Hoekom was hierdie artikel so belangrik? Die Bybelstudente het al ’n tyd lank geweet dat Satan ’n organisasie het wat bestaan uit onsigbare goddelose geesskepsele in die hemel en uit godsdienstige, kommersiële en politieke elemente op die aarde. Maar deur middel van hierdie artikel het “die getroue en verstandige slaaf” die broederskap gehelp om te verstaan dat Jehovah ook ’n organisasie het, een wat heeltemal anders is as Satan se organisasie en dit teëstaan (Matt. 24:45). En die slaaf het verduidelik dat God se Koninkryk in 1914 gebore is en dat Satan en sy demone in daardie jaar, as gevolg van die ‘oorlog wat in die hemel uitgebreek het’, uit die hemel neergegooi is en nou tot die aarde beperk is. – Op. 12:​7-9.

Party het dit moeilik gevind om hierdie nuwe begrip te aanvaar. Die artikel het dit erken en gesê: “As daar lesers van die Watch Tower is wat nie kan saamstem met wat hier gesê is nie, word daar aanbeveel dat hulle kalm en geduldig op die Here wag en altyd ’n rein hart behou.”

Maar Tom Eyre, ’n kolporteur (nou bekend as ’n pionier) van Brittanje, het vertel hoe die meeste van die Bybelstudente oor daardie artikel gevoel het: “Die broers was baie opgewonde oor hierdie verduideliking van Openbaring 12. Toe ons besef dat die Koninkryk in die hemel opgerig is, was ons baie gretig om hierdie goeie nuus met ander te deel. Dit het ons beslis aangespoor om meer te doen en in staat gestel om te sien hoe Jehovah besig is om sy volk na groter dinge te lei.”

GOD SE VOLK GETUIG VIR JEHOVAH

Vandag is Jehovah se Getuies baie bekend met die woorde van Jesaja 43:10: “‘Julle is my getuies,’ sê Jehovah, ‘ja, my kneg wat ek uitgekies het.’” Maar voor 1925 is hierdie teks baie min in ons publikasies bespreek. Maar dit sou verander. Gedurende 1925 het The Watch Tower die onderwerp van Jesaja 43:10 en 12 in 11 uitgawes van die tydskrif bespreek!

Teen die einde van Augustus 1925 het die Bybelstudente by ’n streekbyeenkoms in Indianapolis, Indiana, bymekaargekom. In ’n verwelkomingsboodskap op die streekbyeenkomsprogram het Joseph F. Rutherford gesê: “Ons het na hierdie streekbyeenkoms toe gekom om . . . krag van die Here te verkry sodat ons na die veld kan terugkeer met hernieude energie om sy getuies te wees.” Regdeur die agt dae lange streekbyeenkoms is bywoners aangemoedig om by elke geleentheid oor Jehovah te getuig.

Op Saterdag 29 Augustus het broer Rutherford die tema “A Call to Action” bespreek. In sy toespraak het hy die belangrikheid van die predikingswerk beklemtoon: “Jehovah sê vir sy volk . . . : ‘Julle [is] my getuies, . . . en ek is God.’ Toe het hy hulle met hierdie sterk woorde beveel: ‘Rig ’n banier vir die volke op.’ Daar is niemand anders op die aarde om ’n banier op te rig vir die mense behalwe [sy volk], dié wat die gees van die Here het en wat as gevolg daarvan sy getuies is nie.” – Jes. 43:12; 62:10.

Ná broer Rutherford se toespraak het die gehoor eenparig die resolusie aangeneem met die titel “Message of Hope”, wat gewys het dat God se Koninkryk die ware hoop is om “die seëninge van vrede, voorspoed, gesondheid, lewe, vryheid en ewige geluk” te ontvang. Hierdie resolusie is later in verskeie tale vertaal en as ’n pamflet gedruk. Omtrent 40 miljoen kopieë is versprei.

Dit het nog ’n hele paar jaar geneem voordat die Bybelstudente die naam Jehovah se Getuies amptelik aangeneem het. Maar hulle het al hoe meer bewus geword van hulle verantwoordelikheid om sy getuies te wees.

DIE BYBELSTUDENTE KEER TERUG NA BELANGSTELLENDES

Namate die hoeveelheid Bybelstudente wêreldwyd vermeerder het, is hulle ook meer aangemoedig om terug te keer na dié wat voorheen belangstelling in die goeie nuus getoon het. Ná die kampanje om die pamflet Message of Hope te versprei, het die Bulletina gesê: “Reël om terug te keer na huise waar werkers nie lektuur geplaas het nie, maar waar ’n kopie van die Message of Hope gelaat is.”

Die Bulletin vir Januarie 1925 het die volgende verslag van ’n Bybelstudent in Plano, Texas, bevat: “Ons is beïndruk met die feit dat gebied wat ’n hele paar keer al gedek is, dikwels beter as nuwe velde is. ’n Klein dorp in ons gebied is al vyf keer in die laaste tien jaar gedek. . . . Suster Hendrix en my ma het dit onlangs weer gedek en meer boeke as [ooit] tevore geplaas.”

En in die land Panama het ’n kolporteur geskryf: “Baie mense wat my by hulle deur weggejaag het, se gesindheid het verander toe ek ’n tweede of ’n derde keer teruggekeer het. Ek het hierdie jaar die meeste van my tyd gebruik om terug te keer na dié wat die een of ander tyd in die verlede besoek is, en ek het goeie ondervindinge met party van hulle gehad.”

ONS KYK NA DIE TOEKOMS

In sy jaarlikse brief aan alle kolporteurs het broer Rutherford die jaar se aktiwiteit opgesom en gepraat oor die werk wat voorlê. Hy het gesê: “Gedurende die afgelope jaar was dit julle voorreg om baie te vertroos wat hartseer was. Hierdie werk het julle baie bly gemaak . . . In die komende jaar sal julle geleenthede hê om getuies vir God en sy koninkryk te wees en om sy banier op te rig vir die mense. . . . Laat ons aanhou om ons stemme saam te gebruik om ons God en ons Koning te loof.”

Soos die jaar 1925 tot ’n einde gekom het, het die broers planne gemaak om hulle fasiliteite in Brooklyn uit te brei. Die jaar 1926 sou die begin wees van die grootste bouprojek wat die organisasie nog ooit aangepak het.