Hoe om jou gebede te verbeter

1-2. (a) Wat kan keer dat ons openlik met Jehovah praat? (b) Hoe weet ons dat Jehovah liefdevol na ons gebede luister?

VOEL jy soms dat jou gebede herhalend, oppervlakkig of net ’n roetine geword het? Indien wel, is jy nie alleen nie. As gevolg van die vinnige pas van ons lewe is ons dalk geneig om deur ons gebede te jaag. Of ons vind dit dalk selfs moeilik om openlik met Jehovah te praat omdat ons voel dat ons nie goed genoeg is om tot hom te bid nie.

² Die Bybel verseker ons dat dit nie vir Jehovah saak maak hoe goed ons onsself uitdruk wanneer ons bid nie, maar dat ons gebede uit ’n nederige hart kom. Hy hoor “die versoek van die nederiges” (Ps. 10:17). Hy luister liefdevol na elke woord wat ons sê omdat hy regtig in ons belangstel. – Ps. 139:​1-3.

3. Watter vrae sal ons in hierdie artikel bespreek?

³ So ons vra dalk: Hoekom kan ons vol vertroue tot Jehovah bid? Hoe kan ons ons gebede betekenisvoller maak? Hoe kan dit ons help om ons gebede te verbeter as ons nadink oor opregte gebede wat in die Bybel opgeteken is? En wat kan ons doen as ons te ontsteld is om ons gevoelens in woorde uit te druk? Kom ons kyk na die antwoorde op hierdie vrae.

BID VOL VERTROUE TOT JEHOVAH

4. Wat kan ons help om vol vertroue tot Jehovah te bid? (Psalm 119:145)

⁴ Wanneer ons verstaan dat Jehovah ’n lojale vriend is wat wil hê dat ons suksesvol moet wees, sal ons besef dat ons vol vertroue tot hom kan bid. Die skrywer van Psalm 119 het probeer om so ’n liefdevolle verhouding met Jehovah te hê. Sy lewe was nie probleemvry nie. Hy is onregverdig behandel deur bedrieglike mense (Ps. 119:​23, 69, 78). Hy moes ook met sy eie onvolmaakthede sukkel (Ps. 119:5). Maar hy was nie bang om uit sy hart met Jehovah te praat nie. – Lees Psalm 119:145.

5. Hoekom moet ons nie toelaat dat negatiewe gevoelens keer dat ons bid nie? Illustreer.

⁵ Jehovah nooi selfs dié wat ernstige foute gemaak het om tot hom te bid (Jes. 55:​6, 7). So ons moenie toelaat dat negatiewe gevoelens keer dat ons bid nie. Dink aan hierdie illustrasie: ’n Vlieënier weet dat hy met lugverkeerbeheerders kan kommunikeer as hy hulp nodig het. Moet hy huiwer om hulle te kontak omdat hy skaam is dat hy verdwaal het of ’n fout gemaak het? Beslis nie! Net so, al voel ons soms verlore of het ons gesondig, kan ons vol vertroue tot Jehovah bid. – Ps. 119:​25, 176.

HOE OM JOU GEBEDE BETEKENISVOLLER TE MAAK

6-7. Hoe kan dit ons help om ons gebede betekenisvoller te maak as ons nadink oor Jehovah se eienskappe? Gee ’n voorbeeld. (Sien ook voetnoot.)

⁶ Wanneer ons openlik met Jehovah praat deur ons diepste gedagtes en gevoelens met hom te deel, word ons gebede betekenisvoller. So, wat kan ons doen om die diepte van ons gebede te verbeter?

⁷ Dink na oor Jehovah se eienskappe.a Hoe meer ons oor sy eienskappe nadink, hoe meer sal ons ons gedagtes openlik kan uitdruk (Ps. 145:​8, 9, 18). Kyk na die voorbeeld van Kristine, ’n suster wat ’n gewelddadige pa gehad het. Sy verduidelik: “Dit was nie vir my maklik om met Jehovah as ’n Vader te praat nie. Ek het gevoel dat my onvolmaakthede sou veroorsaak dat hy my verlaat.” Watter eienskap van Jehovah het haar gehelp? Sy sê: “Jehovah se lojale liefde laat my veilig voel. Ek weet dat hy nooit my hand sal los nie. Al val ek, sal hy my liefdevol optel. Dit help my om my diepste vreugdes sowel as my diepste bekommernisse met hom te deel.”

8-9. Hoe kan dit jou help wanneer jy nadink oor wat jy wil sê voordat jy bid? Gee ’n voorbeeld.

⁸ Dink na oor wat om te sê. Voordat jy bid, kan jy jouself ’n paar vrae afvra. Byvoorbeeld: ‘Watter spesifieke probleme het ek op die oomblik? Is daar enige iemand wat ek moet vergewe? Ondervind ek ’n nuwe uitdaging wat Jehovah my moet help om te oorkom?’ (2 Kon. 19:​15-19). Ons kan ook die patroon volg wat Jesus gestel het deur na te dink oor wat ons Jehovah kan vra in verband met Sy naam, Sy Koninkryk en Sy wil. – Matt. 6:​9, 10.

⁹ Toe ’n suster met die naam Aliska uitgevind het dat haar man terminale breinkanker het, was dit vir haar moeilik om te bid. Sy vertel: “Ek was so ontsteld dat ek dit moeilik gevind het om reguit genoeg te dink om te bid.” Wat het haar gehelp? Sy verduidelik: “Ek neem ’n paar oomblikke voordat ek bid om my gedagtes te organiseer, en dit het my gehelp om seker te maak dat my gebede nie net oor my gaan nie. Hierdie metode het my gehelp om kalmer te voel en om in ’n beter gemoedstoestand te wees wanneer ek bid.”

10. Hoekom moet ons ons tyd probeer vat wanneer ons bid? (Sien ook prente.)

¹⁰ Vat jou tyd wanneer jy bid. Al kan kort gebede betekenisvol wees, is ons meer geneig om ons diepste gedagtes uit te druk wanneer ons ons tyd vat om te bid.b Aliska se man, Elijah, vertel: “Ek probeer baie keer gedurende die dag bid, en ek het nader aan Jehovah gekom deur my tyd te vat wanneer ek bid. Jehovah wag nie ongeduldig vir my om klaar te bid nie, so ek kan my tyd vat.” Probeer die volgende: Vind ’n tyd en ’n plek waar jy, dalk selfs hardop, sonder afleidings kan bid, en maak dit ’n gewoonte om jou tyd te vat wanneer jy bid.

DINK NA OOR OPREGTE GEBEDE WAT IN DIE BYBEL OPGETEKEN IS

11. Hoe vind ons daarby baat wanneer ons nadink oor opregte gebede wat in die Bybel opgeteken is? (Sien ook die venster “Voel jy ook soos hulle gevoel het?”)

¹¹ Jy kan daarby baat vind wanneer jy nadink oor opregte gebede en heilige liedere, of psalms, wat in die Bybel opgeteken is. Wanneer jy kyk na hoe God se knegte hulle diepste gedagtes uitgedruk het, sal dit jou beweeg om jou hart teenoor Jehovah oop te maak. Jy sal dalk ook nuwe uitdrukkings van lof ontdek wat jy in jou gebede kan gebruik. En jy sal heel moontlik gebede vind wat met jou omstandighede verband hou.

12. Watter vrae kan ons ons afvra wanneer ons nadink oor die inhoud van ’n gebed?

¹² Wanneer jy nadink oor die inhoud van ’n gebed wat in die Bybel opgeteken is, vra jou af: ‘Wie het hierdie woorde gesê en onder watter omstandighede? Het ek al dieselfde gevoelens ondervind wat in hierdie gebed uitgedruk word? Watter lesse kan ek hieruit leer?’ Jy sal dalk ekstra navorsing moet doen om hierdie vrae te beantwoord, maar dit is die moeite werd. Kyk na ’n paar voorbeelde.

13. Wat is een les oor gebed wat ons by Hanna kan leer? (1 Samuel 1:​10, 11) (Sien ook prent.)

¹³ Lees 1 Samuel 1:​10, 11. Toe Hanna hierdie gebed gesê het, het sy twee groot probleme gehad. Sy was onvrugbaar, en haar man se ander vrou het haar lewe baie onaangenaam gemaak (1 Sam. 1:​4-7). Wat kan jy uit Hanna se gebed leer as jy ’n aanhoudende probleem ondervind? Sy het verligting gevind deur lank tot God te bid en deur uit die hart vir hom te sê hoe sy voel (1 Sam. 1:​12, 18). Ons kan ook verligting vind wanneer ons ons “las vir Jehovah [gee]” deur vir hom te sê hoe ons oor ons spesifieke bekommernisse voel. – Ps. 55:22.

14. (a) Wat leer ons nog uit Hanna se voorbeeld? (b) Hoe kan ons ons gebede verbeter deur oor God se Woord na te dink? (Sien voetnoot.)

¹⁴ ’n Paar jaar ná die geboorte van haar seun Samuel het Hanna hom na die hoëpriester Eli toe gebring (1 Sam. 1:​24-28). In ’n opregte gebed het sy gesê hoe oortuig sy is dat Jehovah sy lojale knegte beskerm en vir hulle sorg (1 Sam. 2:​1, 8, 9).c Haar probleme by die huis het dalk nie verdwyn nie, maar Hanna het gefokus op hoe Jehovah haar geseën het. Wat is die les vir ons? Ons sal aanhoudende uitdagings beter kan hanteer as ons fokus op hoe Jehovah ons tot nou toe ondersteun het.

15. Wat kan ons uit die profeet Jeremia se gebed leer wanneer ons onregte ondervind? (Jeremia 12:1)

¹⁵ Lees Jeremia 12:1. Die profeet Jeremia was op een stadium in sy lewe ontsteld toe hy gesien het hoe suksesvol die goddelose mense is. Hy is ook dikwels ontmoedig deur die manier hoe ander Israeliete hom behandel het (Jer. 20:​7, 8). Ons kan verstaan hoe hy gevoel het wanneer ons sien hoe voorspoedig oneerlike mense is of wanneer ons bespot word. Al het Jeremia gesê hoe gefrustreerd hy is, het hy nie God se geregtigheid bevraagteken nie. Terwyl hy gesien het hoe Jehovah Sy opstandige volk gedissiplineer het, is sy vertroue in God se geregtigheid sekerlik versterk (Jer. 32:19). Ons kan ook openlik vir Jehovah sê wanneer ons gefrustreerd is, met die vertroue dat hy op die regte tyd enige onregte wat ons nou ondervind, sal regstel.

16. Wat kan ons uit die gebed van ’n Leviet leer as ons beperk voel deur ons omstandighede? (Psalm 42:​1-4) (Sien ook prente.)

¹⁶ Lees Psalm 42:​1-4. Hierdie lied is geskryf deur ’n Leviet wat nie saam met sy mede-Israeliete by die tempel kon aanbid nie. Sy psalm wys hoe hy gevoel het. Ons voel dalk ook soos hy as ons nie ons huis kan verlaat nie of in die tronk is vir ons geloof. Ons emosies gaan dalk op en af, maar dit sal goed wees as ons in gebed vir Jehovah sê hoe ons voel. Dit kan ons help om ons gedagtes te ondersoek en om dinge in perspektief te stel. Die Leviet het byvoorbeeld besef dat hy nuwe geleenthede sou hê om Jehovah te loof (Ps. 42:5). Hy het ook nagedink oor hoe Jehovah besig is om vir hom te sorg (Ps. 42:8). Wanneer ons opreg tot God bid, kan dit ons help om ons gevoelens te ontleed, ons balans terug te kry en die krag te vind om te volhard.

17. (a) Wat kan ons uit die profeet Jona se gebed leer? (Jona 2:​1, 2) (b) Hoe kan party uitdrukkings uit die Psalms ons help wanneer ons moeilike tye deurmaak? (Sien voetnoot.)

¹⁷ Lees Jona 2:​1, 2. Die profeet Jona het hierdie gebed gesê terwyl hy in die maag van ’n groot vis was. Al was hy ongehoorsaam aan Jehovah, was Jona oortuig dat God sy stem sou hoor. Jona het in sy gebed baie uitdrukkings gebruik wat in die Psalms gevind word.d Hy was heel moontlik bekend met hierdie Psalms. Omdat hy daaroor nagedink het, was hy oortuig dat Jehovah hom sou help. Net so, as ons party Bybelverse probeer memoriseer, sal ons dit dalk kan onthou en sal dit ons vertroos wanneer ons gedurende moeilike tye tot Jehovah bid.

HOU AAN OM NADER AAN JEHOVAH TE KOM IN GEBED

18-19. Watter versekering vind ons in Romeine 8:​26, 27 as ons sukkel om ons gevoelens en woorde uit te druk wanneer ons bid? Gee ’n voorbeeld.

¹⁸ Lees Romeine 8:​26, 27. Ons voel dalk soms so oorweldig deur angstigheid dat ons nie ons gevoelens in woorde kan uitdruk nie. Maar ons is nie sonder hulp nie. Gedurende sulke tye “pleit” God se heilige gees vir ons. Hoe so? Deur middel van sy gees het Jehovah seker gemaak dat baie gebede in sy Woord neergeskryf is. Wanneer ons nie ons gedagtes duidelik kan uitdruk nie, sal Jehovah dalk sekere uitdrukkings in daardie gebede aanvaar as versoeke wat ons graag wil maak, en hy sal dit dalk beantwoord.

¹⁹ Hierdie gedagte het ’n Russiese suster met die naam Jelena gehelp. Sy is in hegtenis geneem omdat sy gebid het en omdat sy die Bybel gelees het. Jelena het so baie stres ondervind dat sy dit moeilik gevind het om te bid. Sy vertel: “Ek het toe onthou dat Jehovah, wanneer ek oorweldig voel en nie weet waarvoor om te bid nie, die geïnspireerde gebede van God se knegte uit die verlede . . . sal aanvaar as versoeke wat ek graag wil maak. . . . Dit het my baie vertroos gedurende ’n verskriklik moeilike tyd.”

20. Hoe kan ons ons verstand vir gebed voorberei wanneer ons gestres is?

²⁰ Wanneer ons gestres is, kan dit moeilik wees om te fokus terwyl ons bid. Om ons verstand voor te berei, kan ons na oudio-opnames van die Psalms luister. Ons kan ook ons gevoelens probeer neerskryf soos koning Dawid gedoen het (Ps. 18, 34, 142; opskrifte). Daar is natuurlik nie vaste reëls oor hoe ons onsself vir gebed moet voorberei nie (Ps. 141:2). Doen wat die beste vir jou werk.

21. Hoekom kan ons met ons hele hart bid?

²¹ Dit is baie vertroostend om te weet dat Jehovah ons gevoelens verstaan selfs voordat ons enige iets sê (Ps. 139:4). Maar hy wil hoor hoe ons vir hom sê hoe ons voel en hoe baie ons op hom vertrou. So moenie huiwer om tot jou hemelse Vader te bid nie. Laat die gebede wat in sy Woord neergeskryf is, jou inspireer. Bid met jou hele hart. Sê vir Jehovah wat jou gelukkig maak en wat jou hartseer maak. As jou ware vriend sal Jehovah altyd daar wees vir jou!