Onthou om vir ander te bid

1. Hoe weet ons dat ons gebede belangrik is vir Jehovah?

GEBED is ’n wonderlike voorsiening. Dink hieraan: Jehovah het sekere take aan die engele toegewys (Ps. 91:11). Hy het ook vir sy Seun gewigtige verantwoordelikhede gegee (Matt. 28:18). Maar het hy iemand anders toegewys om na ons gebede te luister? Nee, dit is iets wat Jehovah kies om self te doen. Jehovah, die “Hoorder van gebed,” luister persoonlik na ons. – Ps. 65:2.

2. Watter voorbeeld het die apostel Paulus gestel wanneer dit daarby kom om vir ander te bid?

² Al kan ons Jehovah vryelik nader oor ons eie bekommernisse, moet ons ook vir ander bid. Die apostel Paulus het dit gedoen. Byvoorbeeld, hy het aan die gemeente in Efese geskryf en gepraat van sy “gebede vir [hulle]” (Ef. 1:16). Paulus het ook vir individue gebid. Byvoorbeeld, hy het vir Timoteus gesê: “Ek is dankbaar teenoor God . . . In my smeekgebede dink ek dag en nag aan jou” (2 Tim. 1:3). Paulus het sy eie bekommernisse gehad om oor te bid (2 Kor. 11:23; 12:​7, 8). Maar hy het die tyd geneem om vir ander te bid.

3. Hoekom vergeet ons dalk om vir ander te bid?

³ Ons vergeet dalk soms om vir ander te bid. Hoekom? ’n Christensuster met die naam Sabrinaa identifiseer een rede. Sy sê: “Die lewe in hierdie wêreld is dol. Ons kan so baie op ons eie probleme konsentreer dat ons net oor ons eie behoeftes bid.” Gebeur dit soms met jou? As dit die geval is, kan hierdie artikel jou help. Dit sal (1) verduidelik hoekom dit belangrik is om vir ander te bid en (2) voorstelle gee oor hoe jy dit kan doen.

HOEKOM MOET ONS VIR ANDER BID?

4-5. Hoe kan ons gebede vir ander “’n kragtige uitwerking” hê? (Jakobus 5:16)

⁴ Om vir ander te bid, “het ’n kragtige uitwerking”. (Lees Jakobus 5:16.) Kan ons gebede vir ander regtig ’n uitwerking hê op die uitkoms van ’n situasie? Ja, dit kan. Jesus, wat geweet het dat die apostel Petrus binnekort sou ontken dat hy Jesus ken, het gesê: “Ek het ’n smeekgebed vir jou gedoen dat jou geloof nie sal verswak nie” (Luk. 22:32). Paulus het ook geweet dat gebed ’n verskil kan maak. Toe hy verkeerdelik in die tronk gegooi is in Rome, het hy aan Filemon geskryf: “Ek hoop dat ek deur middel van julle gebede aan julle teruggegee sal word.” (Filem. 22; sien die studienota “for I am hoping that through your prayers” in nwtsty.) Paulus is toe kort daarna vrygelaat en kon weer begin preek.

⁵ Dit beteken natuurlik nie dat ons druk op Jehovah kan plaas deur te bid nie. Hy skenk aandag aan hoe baie sy knegte omgee oor dit waarvoor hulle bid, en soms kies hy om te doen wat hulle hom vra. Die feit dat ons dit weet, kan ons help om intens tot Jehovah oor ’n situasie te bid en die saak dan met vertroue in sy hande te laat. – Ps. 37:5; sien 2 Korintiërs 1:11 en studienotas.

6. Hoe kan ons gebede vir ander ’n uitwerking hê op hoe ons oor hulle voel? (1 Petrus 3:8)

⁶ Om vir ander te bid, help ons om “empatie” te ontwikkel. (Lees 1 Petrus 3:8.) ’n Persoon wat empatie het, is bewus van ’n ander persoon se lyding en het ’n begeerte om dit te verlig (Mark. 1:​40, 41). ’n Ouerman met die naam Michael sê: “Wanneer ek vir ander bid oor hulle behoeftes, word ek meer bewus van die moeilike tye wat hulle deurmaak, en dit versterk my liefde vir hulle. Ek voel nader aan hulle, al is hulle dalk nie bewus daarvan nie.” ’n Ouerman met die naam Richard beskryf nog ’n voordeel. Hy sê: “Wanneer ons vir iemand bid, is ons meer geneig om iets te doen om hom te help.” Hy voeg by: “Wanneer ons aanbied om die persoon vir wie ons bid op ’n praktiese manier te help, help ons in ’n sekere sin om ons gebed vir hom te beantwoord.”

7. Hoe kan dit ons help om ’n gebalanseerde beskouing van ons eie probleme te hê as ons vir ander bid? (Filippense 2:​3, 4) (Sien ook prente.)

⁷ Om vir ander te bid, help ons om die regte beskouing van ons eie probleme te hê. (Lees Filippense 2:​3, 4.) Elkeen van ons sukkel met die een of ander probleem omdat ons in ’n wêreld lewe wat onder die Duiwel se beheer is (1 Joh. 5:19; Op. 12:12). Wanneer ons dit ’n gewoonte maak om vir ander te bid, word ons daaraan herinner dat “die hele gemeenskap van [ons] broers in die wêreld op dieselfde manier ly” (1 Pet. 5:9). ’n Pionier met die naam Katherine sê: “Wanneer ek vir ander bid, herinner dit my aan die feit dat ander ook uitdagings ondervind. Daardie feit help my om nie te veel op my eie probleme te begin fokus nie.”

HULLE HET ONS GEBEDE NODIG

8. Gee voorbeelde van wie ons by ons gebede kan insluit.

⁸ Wie kan ons by ons gebede insluit? Ons kan bid vir groepe mense – byvoorbeeld, dié wat gesondheidsprobleme het, jongmense wat by die skool gespot word en groepsdruk ondervind of dié wat die uitdagings van die ouderdom ondervind. Baie van ons medegelowiges verduur teenstand, of van familielede of van regerings (Matt. 10:​18, 36; Hand. 12:5). Party van ons broers moes hulle huise verlaat as gevolg van politieke onrus. Ander is slagoffers van natuurrampe. Ons ken hierdie broers en susters dalk nie persoonlik nie. Maar wanneer ons vir hulle bid, wys ons dat ons Jesus se opdrag volg dat ons “mekaar [moet] liefhê”. – Joh. 13:34.

9. Hoekom moet ons bid vir dié wat die leiding in Jehovah se organisasie neem sowel as vir hulle vrouens?

⁹ Ons kan ook bid vir dié wat die leiding in Jehovah se organisasie neem. Dit sluit die Bestuursliggaam en hulle helpers in, sowel as Takkomitees, verantwoordelike opsieners by die takkantore, kringopsieners, gemeentelike ouermanne en bedieningsknegte. Baie van hierdie broers sukkel met hulle eie probleme terwyl hulle hard werk om ons te help (2 Kor. 12:15). Byvoorbeeld, ’n kringopsiener met die naam Mark sê: “Een van my grootste uitdagings is die feit dat ek ver weg is van my bejaarde ouers. Hulle albei het gesondheidsprobleme. Al kyk my suster en haar man mooi na hulle, maak dit my baie hartseer omdat ek so beperk is in wat ek persoonlik vir hulle kan doen.” Of ons nou bewus is van die probleme waarmee hierdie hardwerkende broers sukkel of nie, dit sal goed wees om hulle in ons gebede te hou (1 Tess. 5:​12, 13). Ons kan ook bid vir hierdie broers se vrouens, want hulle lojale ondersteuning help hulle mans om in hulle toewysings te bly.

10-11. Aanvaar Jehovah algemene gebede vir ons broers en susters? Verduidelik.

¹⁰ Soos ons bespreek het, bid ons dikwels vir groot groepe broers en susters. Byvoorbeeld, sonder enige spesifieke individu in gedagte, vra ons Jehovah dalk om dié te help wat in die tronk is of om dié te vertroos wat geliefdes aan die dood verloor het. ’n Ouerman met die naam Donald sê: “Ons het so baie broers en susters wat deur moeilike tye gaan dat ons soms ’n ‘sambreel’-gebed doen sodat ons almal wat ly, kan insluit.”

¹¹ Aanvaar Jehovah sulke gebede? Natuurlik! Ons weet tog nie wat die spesifieke behoeftes is van al ons medegelowiges nie. So dit is gepas om algemene versoeke vir groepe broers en susters te maak (Joh. 17:20; Ef. 6:18). Hierdie gebede bewys dat ons “lief [is] vir die hele gemeenskap van broers”. – 1 Pet. 2:17.

WANNEER ONS VIR INDIVIDUE BID

12. Hoe kan dit ons help om spesifieker in ons gebede te wees as ons oplettend is?

¹² Wees oplettend. Behalwe om vir groepe broers en susters te bid, is dit gepas om vir individue by die naam te bid. Sukkel iemand in jou gemeente met ’n chroniese siekte? Is ’n jong persoon mismoedig, dalk as gevolg van die druk wat hy by die skool ondervind? Sukkel ’n enkelouer om ’n kind “in die dissipline en riglyne van Jehovah” groot te maak? (Ef. 6:4). As jy oplettend is, sal jy jou meegevoel vir ander vergroot, wat jou begeerte om vir hulle te bid, sal versterk.b – Rom. 12:15.

13. Hoe kan ons bid vir dié wat ons nie persoonlik ken nie?

¹³ Bid vir ander by die naam. Ons kan dit doen selfs vir dié wat ons nog nooit ontmoet het nie. Byvoorbeeld, dink aan ons broers en susters wat in die tronk is in lande soos die Krim, Eritrea, Rusland en Singapoer. Jy kan op jw.org die name vind van dié wat in die tronk is.c ’n Kringopsiener met die naam Brian sê: “Wanneer ek die naam van ’n broer of ’n suster wat in die tronk is, neerskryf en dit dan hardop sê, is dit vir my makliker om te onthou om daardie persoon te noem wanneer ek in die privaat bid.”

14-15. Hoe kan ons ons versoeke spesifiek maak ?

¹⁴ Maak spesifieke versoeke. Michael, wat vroeër aangehaal is, stel voor: “Terwyl ek verslae op jw.org lees van broers wat in die tronk is, probeer ek my voorstel hoe ek sou voel as ek in hulle situasie was. Ek weet dat ek my oor my vrou sou bekommer, en ek sou wou seker maak dat daar na haar omgesien word. So dit gee my iets spesifieks om in te sluit by my gebede vir ons getroude broers wat in die tronk is.” – Heb. 13:​3, vtn.

¹⁵ Wanneer ons dink aan hoe die daaglikse lewe vir ons broers in die tronk moet wees, kan ons ook ander maniere vind om ons gebede spesifiek te maak. Byvoorbeeld, ons kan bid dat die tronkbewaarders vriendelik sal wees en dat dié in gesagsposisies ons broers sal toelaat om vryelik te aanbid (1 Tim. 2:​1, 2). Ons kan bid dat die plaaslike gemeente aangemoedig sal wees deur die voorbeeld van hulle getroue broer wat in die tronk is of dat ongelowiges die gevangene se goeie gedrag sal raaksien en na ons boodskap sal luister (1 Pet. 2:12). Dieselfde beginsels sal ons natuurlik help met ons gebede vir ons broers en susters wat ander moeilike tye verduur. As ons oplettend is, vir ander by die naam bid en spesifieke versoeke maak, kan ons wys dat ons “oorvloedig [is] in liefde teenoor mekaar”. – 1 Tess. 3:12.

’N GEBALANSEERDE BESKOUING VAN ONS GEBEDE

16. Hoe kan ons ’n gebalanseerde beskouing van ons gebede behou? (Matteus 6:8)

¹⁶ Soos ons gesien het, kan ons gebede ’n verskil maak in hoe ’n situasie uitdraai. Maar ons moet ’n gebalanseerde beskouing hê. Wanneer ons bid, is ons nie besig om Jehovah in te lig oor iets wat hy nie alreeds weet nie; en ons moet hom nie raad gee oor hoe om ’n situasie op die beste manier te hanteer nie. Jehovah weet wat sy knegte nodig het selfs voordat hulle – of ons – daarvan bewus is. (Lees Matteus 6:8.) So hoekom moet ons vir ander bid? Buiten die redes wat alreeds in hierdie artikel genoem is, is dit ’n manier om te wys hoe baie ons vir ander omgee. Liefde motiveer ons om vir mekaar te bid. En dit maak Jehovah bly om te sien dat sy knegte sy liefde weerspieël.

17-18. Hoe kan ons gebede vir medegelowiges geïllustreer word?

¹⁷ Al lyk dit nie asof ons gebede ’n uitwerking het op die uitkoms van ’n situasie nie, weerspieël dit ons liefde vir ons broers en susters, en Jehovah sien dit raak. Ons kan dit op hierdie manier illustreer: Stel jou ’n gesin voor met twee klein kinders – ’n seuntjie en ’n dogtertjie. Die seuntjie is siek in die bed. Die dogtertjie smeek haar pa: “Doen asseblief iets vir my boetie. Hy’s regtig siek!” Die pa het alreeds die situasie onder beheer; hy is lief vir sy seun en is besig om goed vir hom te sorg. Maar dit maak die pa baie bly om te sien dat sy dogtertjie so baie vir haar boetie omgee dat sy haar pa smeek om hom te help.

¹⁸ Dit is wat Jehovah ons aanmoedig om te doen – om vir mekaar om te gee en vir mekaar te bid. Wanneer ons dit doen, openbaar ons gebede die diepte van ons onselfsugtige besorgdheid oor ander, en Jehovah sien dit raak (2 Tess. 1:3; Heb. 6:10). En soos ons bespreek het, kan ons gebede in party gevalle selfs ’n verskil maak in hoe ’n situasie uitdraai. So laat ons ons heel bes doen om te onthou om vir ander te bid.