Honderd jaar gelede—1913
DIE Watch Tower van 1 Januarie 1913 het die gewilde mening weerspieël toe dit die Amerikaanse joernalis Herbert Kaufman aangehaal het, wat gesê het: “‘Onmoontlik’ is nou ’n outydse woord . . . Amper elke droom van die verlede is vandag ’n werklikheid.” In 1913 was die wêreld optimisties oor die toekoms.
Een rede vir hierdie optimisme was die vooruitgang wat op tegnologiese gebied gemaak is. In die Verenigde State het die Ford-motormaatskappy byvoorbeeld ’n nuwe fabriek in Highland Park, Michigan, oopgemaak. Byna oornag het die prys van ’n motor skerp gedaal, wat dit vir miljoene mense moontlik gemaak het om een te besit. Hoe het Ford dit reggekry om die prys so af te bring? Die nuwe fabriek het ’n monteerbaan gehad. Hierdie nuwe tegnologie het dit vir Ford moontlik gemaak om sy gewilde Model T-motor te monteer in ’n fraksie van die tyd wat dit voorheen geneem het, en dit het die koste afgebring.
Jehovah se volk was ook optimisties, maar om ander redes. Die Bybelstudente het al lank verkondig dat 1914 ’n baie belangrike jaar in die mensegeskiedenis sou wees, en hulle het in groot afwagting verkeer. Hulle ywerige bedrywigheid het getoon dat hulle nie van plan was om die pas te verslap namate daardie jaar nadergekom het nie.
’n Poskaart: Die transkontinentale toer van pastor Russell
In Junie 1913 het ’n reeks byeenkomste begin met ’n eendaagse byeenkoms in Kansas City, Missouri, VSA. Oor die volgende vier weke het ’n gehuurde trein ’n vreugdevolle groep van meer as 200 broers en susters dwarsoor die weste van die Verenigde State en Kanada geneem. By elke byeenkoms het nuwelinge die geleentheid gekry om vir bykomende inligting te vra. Duisende het gunstig gereageer, en die Bybelstudente het later met die belangstellendes in aanraking gekom.
Gedurende 1913 was die Brooklyn-hoofkantoorpersoneel besig met die vervaardiging van die “Fotodrama van die Skepping”. Dit was ’n agt uur lange program wat bestaan het uit opnames van Bybeltoesprake asook musiek wat gesinchroniseer is met gekleurde glasskyfies en rolprente. Die Bybelstudente het gehoop dat die “Fotodrama” gebruik sou word om miljoene belangstellendes te bereik. Hoewel daar op daardie stadium net omtrent 5 100 bedrywige verkondigers van die goeie nuus was, was hulle verklaarde voorneme dat die program “soveel publisiteit moontlik dwarsoor die wêreld gegee moet word”.
Wat het 1914 ingehou? Hoe sou die “Fotodrama” ontvang word? Wat sou in die herfs, aan die einde van die Heidense Tye, gebeur? Die Bybelstudente het gretig daarna uitgesien om die antwoorde op hierdie vrae te ontvang, seker van Jehovah se ondersteuning.
Die naderende Groot Oorlog, wat later die Eerste Wêreldoorlog genoem is, sou die wêreld van sy optimisme beroof. Tegnologiese vooruitgang sou nie die antwoord wees op die probleme wat die mensdom in die gesig gestaar het nie. Die volgende jaar sou ’n jaar van groot verandering wees vir die Bybelstudente—en vir die hele wêreld.