Christelike geloof sal op die proef gestel word
“Geloof is nie iets wat alle mense besit nie.”—2 TESSALONISENSE 3:2.
1. Hoe het die geskiedenis getoon dat nie alle mense ware geloof het nie?
DEUR die geskiedenis heen was daar mans, vrouens en kinders met ware geloof. Die byvoeglike naamwoord “ware” is gepas omdat miljoene ander ’n soort geloof geopenbaar het wat soos liggelowigheid is, ’n gewilligheid om te glo sonder ’n geldige grondslag of rede. Sulke geloof het dikwels valse gode of vorme van aanbidding ingesluit wat nie in ooreenstemming met die Almagtige, Jehovah, en sy geopenbaarde Woord is nie. Die apostel Paulus het dus geskryf: “Geloof is nie iets wat alle mense besit nie.”—2 Tessalonisense 3:2.
2. Waarom is dit noodsaaklik dat ons ons eie geloof ondersoek?
2 Maar Paulus se verklaring impliseer dat daar wel sommige was wat destyds ware geloof gehad het, en by implikasie het sommige vandag ook ware geloof. Die meeste lesers van hierdie tydskrif wil graag sulke ware geloof hê en daarin toeneem—geloof in ooreenstemming met juiste kennis van Goddelike waarheid (Johannes 18:37; Hebreërs 11:6). Is dit waar van jou? Dan is dit uiters belangrik dat jy besef dat jou geloof op die proef gestel gaan word en dat jy voorbereid daarop moet wees. Waarom kan dit gesê word?
3, 4. Waarom moet ons na Jesus kyk wanneer ons geloof beproef word?
3 Ons moet erken dat Jesus Christus die kern van ons geloof is. Trouens, die Bybel praat van hom as die Vervolmaker van ons geloof. Dit is as gevolg van wat Jesus gesê en gedoen het, veral hoe hy profesieë vervul het. Hy het die fondament waarop mense ware geloof kan grond, versterk (Hebreërs 12:2; Openbaring 1:1, 2). Tog lees ons dat Jesus “in alle opsigte soos ons op die proef gestel is, maar sonder sonde” (Hebreërs 4:15). Ja, Jesus se geloof is op die proef gestel. Dit behoort ons nie te ontmoedig of bevrees te maak nie, inteendeel, dit behoort ons te vertroos.
4 Jesus het “gehoorsaamheid geleer” deur swaar beproewinge deur te maak, selfs tot die dood aan die folterpaal (Hebreërs 5:8). Hy het bewys dat mense ware geloof kan naleef ondanks enige beproewinge wat hulle moontlik moet verduur. Dit word van besondere belang wanneer ons dink aan wat Jesus oor sy volgelinge gesê het: “Hou die woord wat ek tot julle gespreek het in gedagte: ’n Slaaf is nie groter as sy heer nie” (Johannes 15:20). Trouens, Jesus het aangaande sy volgelinge in ons tyd voorspel: “Julle sal weens my naam vir al die nasies voorwerpe van haat wees.”—Matteus 24:9.
5. Hoe toon die Skrif dat ons beproef sal word?
5 Vroeg in hierdie eeu het die oordeel by die huis van God begin. Die Skrif het voorspel: “Dit is die vasgestelde tyd vir die oordeel om by die huis van God te begin. As dit dan nou eers by ons begin, wat sal die einde wees van dié wat nie aan die goeie nuus van God gehoorsaam is nie? ‘En as die regverdige met moeite gered word, waar sal die goddelose en die sondaar dan verskyn?’”—1 Petrus 4:17, 18.
Toetse van geloof—Waarom?
6. Waarom is beproefde geloof van onskatbare waarde?
6 Geloof wat nie getoets is nie, het in sekere sin geen beproefde waarde nie, en die gehalte daarvan is nog onbekend. ’n Mens kan dit vergelyk met ’n tjek wat nog nie gewissel is nie. Jy het moontlik al ’n tjek ontvang vir werk wat jy gedoen het, vir goedere wat jy gelewer het of selfs as ’n geskenk. Miskien lyk die tjek goed, maar is dit? Is dit werklik die bedrag werd wat daarop verskyn? Ons geloof moet eweneens nie net ’n skyn of ’n blote belydenis wees nie. Dit moet op die proef gestel word as ons wil bewys dat dit bestaan en van goeie gehalte is. Wanneer ons geloof op die proef gestel word, vind ons dalk dat dit sterk en kosbaar is. ’n Beproewing kan ook aan die lig bring waar ons geloof gelouter of versterk moet word.
7, 8. Uit watter bron kom toetse van ons geloof?
7 God laat toe dat ons vervolging ondergaan en ons geloof getoets word. Ons lees: “Laat niemand, wanneer hy beproef word, sê: ‘Ek word deur God beproef’ nie. Want met bose dinge kan God nie beproef word nie en beproef hy self ook niemand nie” (Jakobus 1:13). Wie of wat is verantwoordelik vir sulke beproewinge? Dit is Satan, die wêreld en ons eie onvolmaakte vlees.
8 Ons erken dalk dat Satan ’n kragtige invloed op die wêreld, op die wêreld se denke en weë uitoefen (1 Johannes 5:19). En ons weet waarskynlik dat hy vervolging teen Christene aanstig (Openbaring 12:17). Maar is ons net so oortuig daarvan dat Satan ons probeer mislei deur hom toe te spits op ons onvolmaakte vlees en ons met wêreldse lokmiddels te probeer verlei in die hoop dat ons die lokaas sal gryp, ongehoorsaam aan God sal wees en op die ou end deur Jehovah afgekeur sal word? Satan se metodes behoort ons natuurlik nie te verbaas nie, want hy het dieselfde taktiek gebruik toe hy Jesus probeer versoek het.—Matteus 4:1-11.
9. Hoe kan ons by voorbeelde van geloof baat vind?
9 Deur sy Woord en die Christengemeente hou Jehovah aan ons positiewe voorbeelde van geloof voor wat ons kan navolg. Paulus het gemaan: “Word eendragtig navolgers van my, broers, en hou julle oë gerig op dié wat op ’n wyse wandel wat ooreenkom met die voorbeeld wat julle in ons het” (Filippense 3:17). As een van God se gesalfde knegte in die eerste eeu het Paulus die leiding daarin geneem om werke van geloof te verrig ondanks die groot beproewinge wat hy ondervind het. Reg hier aan die einde van die 20ste eeu het ons nie ’n tekort aan soortgelyke voorbeelde van geloof nie. Die woorde van Hebreërs 13:7 is nóú net so van toepassing as toe Paulus dit geskryf het: “Hou dié in gedagte wat die leiding onder julle neem, wat die woord van God tot julle gespreek het, en namate julle die uiteinde van hulle gedrag aanskou, moet julle hulle geloof navolg.”
10. Watter spesifieke voorbeelde van geloof het ons in onlangse tye?
10 Daardie vermaning is veral kragtig wanneer ons kyk na wat die uiteinde van die gesalfde oorblyfsel se gedrag was. Ons kan hulle voorbeeld in oënskou neem en hulle geloof navolg. Hulle het ware geloof wat deur beproewinge gelouter is. Van ’n klein begin in die 1870’s het ’n wêreldwye Christenbroederskap ontwikkel. As vrugte van die geloof en volharding van die gesalfdes van daardie tyd af aan is daar nou meer as vyf en ’n half miljoen Getuies van Jehovah besig om die Koninkryk van God te verkondig en mense daarvan te leer. Die huidige wêreldwye gemeente van ywerige ware aanbidders is ’n bewys van beproefde geloof.—Titus 2:14.
Geloof beproef in verband met 1914
11. Hoe was 1914 betekenisvol vir C. T. Russell en sy metgeselle?
11 Jare voordat die Eerste Wêreldoorlog uitgebreek het, het die gesalfde oorblyfsel verkondig dat 1914 ’n betekenisvolle jaartal in Bybelprofesieë sou wees. Maar party van hulle verwagtinge was voortydig, en hulle beskouing van wat sou gebeur, was nie heeltemal reg nie. C. T. Russell, die eerste president van die Wagtoringgenootskap, en sy metgeselle kon byvoorbeeld sien dat ’n uitgebreide predikingswerk nodig was. Hulle het gelees: “Hierdie goeie nuus van die koninkryk sal in die hele bewoonde aarde verkondig word tot ’n getuienis vir al die nasies; en dan sal die einde kom” (Matteus 24:14). Maar hoe kon hulle betreklike klein groepie dit ooit doen?
12. Hoe het een van Russell se metgeselle op Bybelwaarheid gereageer?
12 Kyk byvoorbeeld hoe dit A. H. Macmillan, ’n metgesel van Russell, geraak het. Macmillan, wat in Kanada gebore is, was nog nie 20 nie toe hy Russell se boek The Plan of the Ages (1886) gekry het. (Hierdie boek, wat ook The Divine Plan of the Ages genoem is, het Deel 1 van die stel Studies in the Scriptures geword wat ’n groot verspreiding geniet het. Deel 2, The Time Is at Hand [1889], het gesê dat 1914 die einde van die “tye van die nasies” sou wees. [Lukas 21:24]) Daardie selfde aand toe Macmillan begin lees het, het hy gedink: “Wel, dit klink soos die waarheid!” In die noordelike somer van 1900 het hy Russell ontmoet by ’n byeenkoms van die Bybelstudente, soos Jehovah se Getuies destyds genoem is. Macmillan is kort daarna gedoop en het saam met broer Russell by die Genootskap se hoofkwartier in New York begin werk.
13. Watter probleem het Macmillan en ander gesien wat die vervulling van Matteus 24:14 betref?
13 Gebaseer op wat daardie gesalfde Christene in die Bybel gelees het, het hulle daarop gewys dat 1914 ’n keerpunt in God se voorneme sou wees. Maar Macmillan en ander het gewonder hoe die verkondigingswerk, wat in Matteus 24:14 voorspel is, in die kort oorblywende tyd onder die nasies gedoen kon word. Hy het later gesê: “Ek onthou dat ek dit dikwels met broer Russell bespreek het, en hy het dan gesê: ‘Wel, broer, hier in New York het ons meer Jode as wat daar in Jerusalem is. Daar is meer Iere hier as in Dublin. En ons het meer Italianers hier as wat daar in Rome is. As ons húlle dus hier bereik, sal ons die wêreld met die boodskap bereik.’ Maar dit het ons verstand nie heeltemal tevrede gestel nie. So het ons dus die idee gekry om die ‘Fotodrama’ te maak.”
14. Watter uitsonderlike projek is voor 1914 aangepak?
14 Wat ’n baanbrekersprojek was die “Fotodrama van die Skepping” tog! Dit het rolprente en gekleurde glasskyfies gekombineer, wat met Bybeltoesprake en musiek op grammofoonplate gesinchroniseer was. In 1913 het The Watch Tower die volgende gesê oor ’n byeenkoms in Arkansas, VSA: “Daar is eenparig besluit dat die tyd aangebreek het om rolprente te gebruik om mense Bybelwaarhede te leer. . . . [Russell] het verduidelik dat hy al drie jaar aan hierdie einste plan werk en nou honderde pragtige prente amper gereed het, wat ongetwyfeld groot skares sal lok en die Evangelie sal verkondig, en die publiek sal help om weer geloof in God te stel.”
15. Watter soort resultate het die “Fotodrama” opgelewer?
15 Dit is presies wat die “Fotodrama” ná sy eerste vertoning in Januarie 1914 gedoen het. Hier volg verslae uit The Watch Tower van 1914:
April: “Nadat ’n priester twee dele daarvan gesien het, het hy gesê: ‘Ek het net die helfte van die FOTODRAMA VAN DIE SKEPPING gesien, maar ek het reeds meer daaruit omtrent die Bybel geleer as in my driejaarkursus aan die teologiese kweekskool.’ ’n Jood het die volgende gesê nadat hy dit gesien het: ‘Ek is nou ’n beter Jood as wat ek was toe ek hier ingekom het.’ Verskeie Katolieke priesters en nonne het die DRAMA kom sien en het groot waardering daarvoor uitgespreek. . . . Tot op hede het ons slegs twaalf volledige stelle van die DRAMA . . . Ons het nietemin reeds een-en-dertig stede bereik wat ons nou bedien . . . Meer as vyf-en-dertigduisend mense per dag sien, hoor, bewonder, dink en word geseën.”
Junie: “Die prente het my yweriger gemaak om die Waarheid te verkondig en het my liefde vir die hemelse Vader en ons liewe ouer broer Jesus laat toeneem. Ek bid elke dag dat God die FOTODRAMA VAN DIE SKEPPING en almal wat by die aanbieding daarvan betrokke is ryklik sal seën . . . Ek is julle kneg in Hom, F. W. KNOCHE.—Iowa.”
Julie: “Ons is bly om julle mee te deel watter besonders gunstige indruk die prente in hierdie stad gemaak het, en ons is oortuig dat hierdie getuienis aan die wêreld ook gebruik word om baie in te samel wat bewys lewer dat hulle juwele is wat die Here self uitgekies het. Ons weet van heelparty ernstige Bybelstudente wat nou by ons Klas aangesluit het weens die Fotodrama-werk. . . . Julle suster in die Here, EMMA L. BRICKER.”
November: “Ons is seker dat julle bly sal wees om te hoor van die uitstekende getuienis wat deur middel van die FOTODRAMA VAN DIE SKEPPING by die Londense operagebou, Kingsway, gegee is. Die leidende hand van die Here is so wonderlik waarneembaar in elke besonderheid van hierdie vertoning dat die broers hulle grootliks verbly . . . Ons gehore het uit mense van alle klasse en soorte bestaan; ons het gesien dat baie van die geestelikes teenwoordig was. Een predikant . . . het vir kaartjies gevra sodat hy en sy vrou dit weer kon sien. ’n Rektor van die Anglikaanse Kerk het die DRAMA al verskeie kere bygewoon en . . . het baie van sy vriende gebring om dit te sien. Twee biskoppe was ook al teenwoordig, en verskeie getiteldes.”
Desember: “Ek en my vrou is innig dankbaar teenoor ons hemelse Vader vir die groot en kosbare seëning wat ons deur middel van u ontvang het. Dit was u pragtige FOTODRAMA wat ons die Waarheid laat sien en laat aanneem het . . . Ons het u ses bundels van STUDIES IN THE SCRIPTURES. Hulle help baie.”
Reaksie op destydse beproewinge
16. Waarom het 1914 ’n toets van geloof meegebring?
16 Maar wat het gebeur toe sulke opregte en toegewyde Christene gevind het dat hulle verwagting om in 1914 by die Here aan te sluit nie verwesenlik is nie? Daardie gesalfdes het ’n uiters beproewende tydperk deurgemaak. The Watch Tower van 1 November 1914 het gesê: “Laat ons onthou dat ons in ’n tyd van toetsing is.” Die boek Jehovah se Getuies—verkondigers van God se Koninkryk (1993) sê in verband hiermee: “Die jare 1914 tot 1918 was inderdaad ‘’n tyd van toetsing’ vir die Bybelstudente.” Sou hulle toelaat dat hulle geloof gelouter en hulle denke verander word sodat hulle die groot werk kon aanpak wat voorgelê het?
17. Hoe het die getroue gesalfdes gereageer op die feit dat hulle ná 1914 nog steeds op die aarde was?
17 The Watch Tower van 1 September 1916 het gesê: “Ons het gedink dat die oeswerk om die Kerk [van gesalfdes] in te samel voor die einde van die heidense tye klaar sou wees; maar niks in die Bybel het so gesê nie. . . . Is ons spyt dat die oeswerk voortgaan? . . . Ons huidige gesindheid, liewe broers, moet blyk gee van innige dank teenoor God, van groter waardering vir die wonderlike waarheid wat Hy ons die voorreg gegee het om te sien en mee geïdentifiseer te word, asook van groter ywer om ander te help om daardie waarheid te leer.” Hulle geloof is beproef, maar hulle het daardie toets verduur en met welslae oorkom. Maar ons as Christene moet besef dat daar baie en verskillende vorme van toetse van ons geloof kan wees.
18, 19. Voor watter ander toetse van geloof het God se volk kort ná broer Russell se dood te staan gekom?
18 Die oorblyfsel het byvoorbeeld kort ná broer Charles T. Russell se dood voor ’n ander soort toets te staan gekom. Dit was ’n toets van hulle lojaliteit en geloof. Wie was ‘die getroue slaaf’ van Matteus 24:45? Party het gemeen dat dit broer Russell was, en hulle het geweier om met nuwe organisatoriese reëlings saam te werk. As hy wel die slaaf was, wat moes die broers doen noudat hy gesterf het? Moes hulle die een of ander nuut aangestelde persoon volg, of het die tyd nou aangebreek om te besef dat Jehovah nie net een persoon nie, maar ’n hele groep Christene as ’n instrument, of slaafklas, gebruik?
19 Ware Christene het in 1918 voor nog ’n toets te staan gekom toe wêreldse owerhede, wat deur die geestelikes van die Christendom aangepor is, ‘onheil deur die wet’ teen Jehovah se organisasie gestig het (Psalm 94:20, KJ). ’n Vlaag van gewelddadige vervolging is in Noord-Amerika sowel as in Europa teen die Bybelstudente ontketen. Die teenstand wat deur die geestelikes aangestig is, het op 7 Mei 1918 ’n klimaks bereik toe Amerikaanse federale lasbriewe uitgereik is vir die inhegtenisname van J. F. Rutherford en verskeie van sy intieme metgeselle, waaronder A. H. Macmillan. Hulle is valslik beskuldig van sedisie, en die owerheid het die feit dat hulle onskuldig gepleit het, geïgnoreer.
20, 21. Watter werk is onder die gesalfdes gedoen, soos in Maleagi 3:1-3 voorspel is?
20 Hoewel hulle dit nie destyds besef het nie, was ’n reinigingswerk aan die gang, soos beskryf word in Maleagi 3:1-3: “Wie kan die dag van sy koms verdra? En wie kan standhou as Hy verskyn? Want [die boodskapper van die verbond] sal wees soos die vuur van die smelter en soos die loog van die wassers. En Hy sal sit: ’n smelter en reiniger van silwer, en Hy sal die seuns van Levi reinig en hulle louter soos goud en soos silwer, sodat hulle aan die HERE in geregtigheid ’n offer sal bring.”
21 Namate die Eerste Wêreldoorlog ten einde geloop het, het sommige van die Bybelstudente voor nog ’n toets van geloof te staan gekom—of hulle streng neutraliteit in wêreldse militêre aangeleenthede sou handhaaf (Johannes 17:16; 18:36). Party het nie. In 1918 het Jehovah dus “die boodskapper van die verbond” (NW), Christus Jesus, na Sy geestelike tempelreëling gestuur om die groepie van Sy aanbidders van wêreldse onreinhede te reinig. Diegene wat vasbeslote was om ware geloof te openbaar, het uit die ondervinding geleer en vooruitgegaan deur ywerig met die predikingswerk aan te hou.
22. Wat moet nog in verband met toetse van geloof bespreek word?
22 Wat ons bespreek het, is nie net van verbygaande geskiedkundige belang nie. Dit hou direk verband met die huidige geestelike toestand van Jehovah se wêreldwye gemeente. Maar kom ons bespreek in die volgende artikel sommige van die toetse van geloof waarmee God se volk vandag te kampe het en kyk hoe ons dit suksesvol die hoof kan bied.
Onthou jy?
◻ Waarom moet Jehovah se volk verwag dat hulle geloof getoets sal word?
◻ Watter soort pogings is voor 1914 aangewend om God se boodskap te verkondig?
◻ Wat was die “Fotodrama”, en watter resultate het dit opgelewer?
◻ Hoe het gebeure van 1914-1918 die gesalfdes getoets?
[Prent op bladsy 12]
By die eeuwisseling het mense in baie lande die Bybel bestudeer met behulp van die reeks “Millennial Dawn”, wat later “Studies in the Scriptures” genoem is
[Prent op bladsy 13]
’n Brief van C. T. Russell met inleidende teks vir ’n opname waarin hy gesê het: “‘Die Fotodrama van die Skepping’ word deur die IBSA—Vereniging van Internasionale Bybelstudente—aangebied. Die doel daarvan is openbare onderrigting met ’n godsdiens-wetenskaplike strekking en om die Bybel te verdedig”
[Prent op bladsy 15]
Demetrius Papageorge het rondgereis en die “Fotodrama van die Skepping” vertoon. Later is hy opgesluit weens sy Christelike neutraliteit