Hy het ’n doel in die lewe gevind

TOE die 11-jarige José na Santo Domingo getrek het, het hy skoene gepolitoer en fyngemaakte ys en lemoene vir ’n inkomste verkoop. Teen die tyd dat hy ’n jong man was, het hy ’n reputasie as ’n baie harde werker opgebou. ’n Paar jaar later het sy broer, wat een van Jehovah se Getuies is, hom gevra om na sy huis te kyk. Op die eetkamertafel het José die boek Jy kan vir ewig in die Paradys op aarde lewe gesien, en hy het die hele nag wakker gebly om dit te lees. Hy het besef dat hy iets gevind het wat hom ’n doel in die lewe gee.

Die volgende naweek het José na die naaste Koninkryksaal gegaan en gesê dat hy een van Jehovah se Getuies is. Hy het vir die broers gesê dat hy geleer het dat hy vergaderinge moet bywoon en die goeie nuus moet verkondig. Hy het ook vir hulle gesê dat hy in die Paradys op aarde-boek gelees het van die dinge wat Christene nie moet doen nie, en hy het hulle verseker dat hy nie een van daardie dinge doen nie. Vyftien dae later is José as ’n verkondiger goedgekeur. En ses maande later is hy op die ouderdom van 21 gedoop.

Omdat José se werkrooster inbreuk gemaak het op sy vergaderingbywoning, het hy sy werk gelos vir ’n werk waar hy net ’n kwart betaal is van wat hy voorheen verdien het. Hy het toe ’n rooster gehad wat hom in staat gestel het om die vergaderinge by te woon en as ’n gewone pionier te dien. Later, toe hy getrou het en die pa van twee seuns geword het, moes hy egter ophou pionier.

José was vasbeslote om sy seuns van kleins af die waarheid te leer. Toe sy vrou, Josefina, dus drie maande swanger was met hulle eerste kind, Noé, het José My boek met Bybelverhale hardop begin lees, in die hoop dat die baba hom in die baarmoeder kon hoor. Teen die tyd dat Noé gebore is, het José al die hele boek vir hom gelees. Hy het dit ook met hulle tweede seun, Neftalí, gedoen.

Later het José die hoofbestuurder geword van ’n besigheid waar hy tien keer meer verdien het as by sy vorige werk. Maar in 2008, toe sy seuns 10 en 13 jaar oud was, het hy sy bestuurspos verlaat en weer gewone pionierdiens begin doen—dié keer saam met sy vrou en kinders. Aangesien sy inkomste aansienlik laer was, moes die hele gesin saamspan om die uitgawes laag te hou. Hulle vier hou elke maand altesaam omtrent 30 Bybelstudies. Jesus verseker ons dat Jehovah ons sal seën as ons die Koninkryk eerste stel (Matt. 6:33). José en sy gesin het nog altyd op hierdie belofte vertrou en persoonlik ondervind dat Jehovah sy woord vervul.