“Julle is die beste bure”

OP 7 en 8 Mei 2016 het daar groot opgewondenheid geheers in die voorportaal van die wêreldhoofkwartier by Columbia Heights 25, Brooklyn, New York. Hoewel daar nie meer toere oor naweke is nie, is die bure wat in die gebied om Bethel woon, na ’n ope dag genooi om na ons geskiedkundige Bybeluitstalling te kom kyk.

Die uitnodigingskampanje het ’n wonderlike getuienis in die gemeenskap gegee en dit was baie opbouend vir diegene wat daaraan deelgeneem het. Dit was veral aanmoedigend om die positiewe kommentare te hoor van hierdie mense wat al so lank ons bure is.

“Ek bly al sedert die 1960’s op verskillende plekke in die [gebied om Bethel] en julle is die beste bure”, het ’n man gesê. “Ons gaan julle beslis mis en wens julle wil nie trek nie.”

“Sonder julle sou die buurt nie so goed ontwikkel het nie”, het ’n vrou gesê. “Ons is baie dankbaar dat ons jare lank bure soos julle kon hê.”

Baie van die pioniers wat die gebied gedek het, was bly dat die bure so vriendelik en ontvanklik was. ’n Man wat ’n lid van ’n buurtwag is, het gesê dat hy groot waardering vir ons organisasie het en dat hy regtig jammer is dat hy nie tydens die ope dag daar kon wees nie.

Hierdie geleentheid het goeie resultate gelewer. Altesaam 48 besoekers wat nie Getuies is nie, het tydens die twee dae na die Bybeluitstalling kom kyk. ’n Hele aantal lede van die Bethelgesin het tydens die ope dag besoekers in die voorportaal verwelkom en met hulle gesels.

Sally, ’n jong vrou in haar laat 20’s, was omtrent ’n halfuur by die uitstalling. Toe sy opdaag, was die pioniers wat haar uitgenooi het toevallig in die voorportaal. Sally het gesê dat sy nooit geweet het dat die Bybels daar uitgestal word nie. Die pioniers het vir haar genoem hoe lekker dit is om ’n jong beroepsvrou te ontmoet wat waardering vir die Bybel het. Sally het daarop geantwoord: “Dis so belangrik. Die Bybel is die enigste plek waar ons God se boodskap kan vind. Dis ’n lewende gids vir die mens.”

Sally het gemeld dat sy, weens haar waardering vir die Bybel, Latyn en Grieks gestudeer het en dat sy baie in vertaling belangstel. Sy voel dat korrekte vertaling belangrik is, want die boodskap moenie verander word sodat dit iemand se persoonlike sienswyse weergee nie. Toe die pioniers vir Sally noem dat daar Bybelse inligting in meer as 800 tale op ons webwerf jw.org is, kon sy dit skaars glo. Nadat die susters vir haar verduidelik het wat vertalers met Jehovah se naam gedoen het, was sy geskok en het sy gevra: “Hoekom is Jehovah se naam uit die Bybel gehaal?” Toe sy gaan, het Sally gesê: “Ek woon al my hele lewe hier, en julle is die beste bure.”

Die Maandag ná die ope dag het ’n predikant na John, ’n Betheliet wat by ’n lektuurtrollie naby Bethel gestaan het, gekom. Hy het vir John vertel dat hy die ope dag werklik geniet het en dat hy dit waardeer dat ons die Bybel volg. Nadat hy ’n rukkie gesels het, het hy skielik uitgeroep: “Ek’s sommer kwaad vir die Getuies!” John was bietjie dronkgeslaan en het gevra waarom. “Want julle trek mos! BLY HIER! Koop groter geboue, of bou net wat julle wil, maar bly hier. Julle maak hierdie buurt ’n beter plek. Ek’s so omgekrap omdat julle wegtrek!”

Die uitnodigingskampanje en die ope dag om na die Bybeluitstalling te kyk, was ’n goeie getuienis vir die gemeenskap. Nog nooit tevore is God se naam só onder ons bure beklemtoon nie.