Trou “net in die Here” Is dit nog realisties?

Party ongetroude knegte van God het al iets soortgelyks gesê. Hulle weet dat Jehovah wil hê dat sy knegte “net in die Here”, oftewel net met ware Christene, moet trou (1 Korintiërs 7:39). Waarom sê hulle dan sulke dinge?

WAAROM PARTY TWYFEL

Christene wat sulke dinge sê, meen dalk dat daar meer ongetroude susters as ongetroude broers is. In baie lande is dit die geval. In Korea is 57 persent van ongetroude Christene susters en 43 persent broers. En in Colombia is 66 persent van Christene susters en 34 persent broers.

Op party plekke verwag ouers wat nie Getuies is nie, baie geld of ander duur geskenke van die man wat met hulle dogter wil trou. En party ongetroude broers kan dit dalk nie bekostig nie. Gevolglik is party susters bekommerd dat hulle miskien nooit ’n Christenman sal vind nie.a—Sien voetnoot.

VERTROUE IN JEHOVAH IS NOODSAAKLIK

As jy al ooit so gevoel het, kan jy seker wees dat Jehovah jou situasie verstaan en presies weet hoe jy voel.—2 Kronieke 6:29, 30.

Nietemin beveel Jehovah ons in die Bybel om net in die Here te trou. Waarom? Omdat hy weet wat die beste vir ons is en ons wil beskerm. Hy wil nie hê dat ons slegte besluite moet neem wat ons sal seermaak of ongelukkig sal maak nie. In Nehemia se dag het baie Jode met vroue getrou wat God nie gedien het nie. Daarom het Nehemia die slegte voorbeeld van Salomo gemeld. “Hy was geliefd by sy God, sodat God hom as koning oor die hele Israel aangestel het. [Maar] selfs hom het die uitlandse vrouens laat sondig” (Nehemia 13:23-26). Jehovah weet dat sy herinneringe goed is vir ons, en daarom beveel hy Christene om net in die Here te trou (Psalm 19:7-10; Jesaja 48:17, 18). Ons is baie dankbaar dat hy ons liefdevolle en betroubare raad gee. Wanneer ons Jehovah as ons Heerser gehoorsaam, erken ons dat hy die reg het om vir ons te sê wat om te doen.—Spreuke 1:5.

Jy wil sekerlik nie “onder ’n ongelyke juk kom nie”, dit wil sê met iemand trou wat nie vir Jehovah lief is nie. Daardie persoon kan veroorsaak dat jy ophou om God te dien (2 Korintiërs 6:14). God se raad werk altyd, en baie Christene van vandag het wyslik gekies om aan Jehovah gehoorsaam te wees. Maar ander het gekies om dit nie te doen nie.

DIT IS NOG REALISTIES

’n Suster in Australië met die naam Maggy het met ’n ongelowige begin uitgaan.b (Sien voetnoot.) Sy sê: “Ek het van baie vergaderinge weggebly net om by hom te wees. My geestelikheid het baie verswak.” In Indië het ’n ander jong vrou met die naam Ratana met ’n klasmaat uitgegaan wat die Bybel begin studeer het. Maar hy het net gestudeer sodat hy met haar kon uitgaan. Uiteindelik het sy opgehou om Jehovah te dien en by ’n ander godsdiens aangesluit sodat sy met hom kon trou.

Ndenguè van Kameroen was 19 jaar oud toe sy met ’n man getrou het wat Jehovah nie gedien het nie. Voordat hulle getrou het, het hy belowe dat sy ’n Getuie kon bly. Maar twee weke ná hulle troue het hy haar verbied om gemeentelike vergaderinge by te woon. Sy sê: “Ek was eensaam en het baie gehuil. Ek het besef dat ek beheer oor my lewe verloor het. Ek het myself heeltyd verwyt.”

Party Christene het weliswaar met iemand getrou wat Jehovah nie dien nie, maar wat nietemin goedhartig en redelik is. Maar watter uitwerking sal dit op jou verhouding met Jehovah hê, al is jou ongelowige maat goedhartig? Hoe sal jy voel omdat jy nie ag geslaan het op die raad wat Hy jou gegee het sodat jy gelukkig kan wees nie? En bowenal, hoe sal Jehovah voel oor wat jy gedoen het?—Spreuke 1:33.

Broers en susters regoor die wêreld wat gehoorsaam was aan Jehovah se raad om “net in die Here” te trou, is oortuig daarvan dat dit die beste besluit was. Ongetroude broers en susters is vasbeslote om Jehovah gelukkig te maak deur met iemand te trou wat hom aanbid. Mitsjiko van Japan was vasbeslote om aan God gehoorsaam te bly, al het haar familielede haar probeer oorreed om met iemand te trou wat nie vir Jehovah lief is nie. En dit was vir haar moeilik om te sien dat party van haar vriende met ware Christene trou, terwyl sy nog ongetroud was. Sy sê: “Ek het heeltyd vir myself gesê: ‘Jehovah is ’n “gelukkige God”, en daarom hoef ons nie getroud te wees om gelukkig te wees nie.’ Ek glo ook dat hy ons die begeertes van ons hart gee. As ons dus nie ’n maat kan vind nie, al wil ons trou, is dit beter vir ons om intussen ongetroud te bly” (1 Timoteus 1:11). Mitsjiko het later met ’n goeie broer getrou, en sy is bly dat sy na Jehovah se raad geluister het.

Daar is ook broers wat vir die regte huweliksmaat gewag het. Bill van Australië erken dat hy soms aangetrokke was tot vroue wat nie Getuies was nie. Maar hy het nie met hulle vriende gemaak nie omdat hy nie ’n verhouding wou begin wat daartoe sou lei dat hy “onder ’n ongelyke juk” met ’n ongelowige kom nie. Oor die jare het hy ook in ’n paar susters belanggestel, maar hulle het nie in hom belanggestel nie. Bill het 30 jaar lank gewag voordat hy ’n Christenvrou gevind het met dieselfde doelwitte as hy. Hy sê: “Ek is glad nie spyt nie. Ek voel geseënd omdat ons saam in die bediening uitgaan, saam studeer en saam aanbid. Ek geniet dit om my vrou se vriende te ontmoet en om met hulle te assosieer omdat hulle almal aanbidders van Jehovah is. Ons pas Bybelbeginsels toe, en dit versterk ons huwelik.”

BLY BESIG IN JEHOVAH SE DIENS

Wat kan jy doen terwyl jy op Jehovah se raad vertrou en wag vir ’n huweliksmaat wat hom dien? Jy kan dink aan waarom jy nie getroud is nie. As dit weens jou begeerte is om Jehovah se bevel te gehoorsaam, kan jy seker wees dat dit Jehovah bly maak (1 Samuel 15:22; Spreuke 27:11). Hou ook aan om gereeld tot Jehovah te bid en sê vir hom presies hoe jy voel (Psalm 62:8). Terwyl jy jou bes doen om versoeking te weerstaan en teen verkeerde begeertes te stry, sal jou verhouding met Jehovah dag ná dag sterker word. Wees verseker dat jou begeertes en behoeftes vir Jehovah belangrik is omdat jy vir hom kosbaar is. Hy belowe nie dat hy vir almal ’n maat sal gee nie. Maar as jy werklik ’n huweliksmaat nodig het, weet Jehovah wat die beste manier is om jou behoeftes te bevredig.—Psalm 145:16; Matteus 6:32.

Soms voel jy moontlik soos Dawid, wat gesê het: “Antwoord my, o Jehovah. My gees het tot ’n einde gekom. Moenie u aangesig vir my verberg nie” (Psalm 143:5-7, 10). Moenie moed opgee nie. Gee Jehovah tyd om vir jou te toon wat hy wil hê jy moet doen. Luister na Jehovah deur die Bybel te lees en diep na te dink oor wat jy gelees het. Dit sal jou help om te besef wat Jehovah van jou vereis en om te sien hoe hy sy knegte in die verlede gehelp het. En dit alles sal jou die vertroue gee om aan hom gehoorsaam te bly.

Wat kan jy nog doen om gelukkig en besig te bly terwyl jy ongetroud is? Jy kan jou verhouding met Jehovah versterk en ’n goeie reputasie opbou. Jy kan ook leer om ’n vrygewige, hardwerkende en aangename persoon te wees sowel as om lojaal aan Jehovah te wees. Hierdie eienskappe is noodsaaklik vir ’n gelukkige huwelik (Genesis 24:16-21; Rut 1:16, 17; 2:6, 7, 11; Spreuke 31:10-27). Soek eers die Koninkryk deur bedrywig in die bediening en in jou gemeente te bly. Al hierdie dinge sal jou teen onwyse besluite beskerm. Bill sê van die jare dat hy ongetroud was: “Dit het so vinnig verbygegaan! Ek het die tyd gebruik om Jehovah as ’n pionier te dien.”

Jehovah se bevel om “net in die Here” te trou, is nie outyds nie. As ons kies om met ’n ware Christen te trou, eer ons Jehovah en sal ons gelukkig wees. Die Bybel sê: “Gelukkig is die man wat Jehovah vrees, in wie se gebooie hy baie groot behae geskep het. Waardevolle dinge en rykdom is in sy huis; en sy regverdigheid hou vir ewig stand” (Psalm 112:1, 3). Wees dus vasbeslote om gehoorsaam te wees aan God se bevel om “net in die Here” te trou.