Laat jy die Groot Pottebakker toe om jou te vorm?

1, 2. Waarom het God Daniël beskou as ’n “besonder geliefde man”, en hoe kan ons soos Daniël gehoorsaam wees?

TOE die Jode in ballingskap in Babilon was, was hulle omring deur afgode en deur mense wat bose geeste aanbid het. Tog het getroue Jode, soos Daniël en sy drie vriende, geweier om deur die mense van Babilon gevorm te word (Daniël 1:6, 8, 12; 3:16-18). Daniël en sy vriende het Jehovah as hulle Pottebakker aanvaar en aangehou om slegs hom te aanbid. Alhoewel Daniël die grootste gedeelte van sy lewe in ’n slegte omgewing was, het God se engel gesê dat hy ’n “besonder geliefde man” was.—Daniël 10:11, 19.

² In Bybeltye het ’n pottebakker klei soms in ’n persvorm gedruk om ’n spesifieke vorm te kry. Vandag weet ware aanbidders dat Jehovah die Heerser van die heelal is en dat hy die gesag het om die nasies te vorm. (Lees Jeremia 18:6.) God het ook die gesag om elkeen van ons te vorm. Maar Jehovah dwing niemand om te verander nie. Hy wil eerder hê dat ons hom toelaat om ons te vorm. In hierdie artikel sal ons leer hoe ons soos sagte klei in God se hande kan bly. Ons sal die volgende drie vrae bespreek: (1) Hoe kan ons eienskappe vermy wat kan veroorsaak dat ons God se raad verwerp en soos harde klei word? (2) Hoe kan ons eienskappe aankweek wat ons kan help om gehoorsaam en soos sagte klei te bly? (3) Hoe kan Christenouers met God saamwerk wanneer hulle hulle kinders vorm?

VERMY EIENSKAPPE WAT JOU HART KAN VERHARD

3. Watter eienskappe kan ons hart verhard? Gee ’n voorbeeld.

³ “Bewaak jou hart meer as enigiets anders wat bewaar moet word, want daaruit is die oorspronge van die lewe”, sê Spreuke 4:23. Om te voorkom dat ons hart verhard, moet ons negatiewe eienskappe soos trots, die beoefening van sonde en ’n gebrek aan geloof vermy. As ons nie versigtig is nie, kan hierdie eienskappe veroorsaak dat ons ongehoorsaam en opstandig word (Daniël 5:1, 20; Hebreërs 3:13, 18, 19). Dit het met koning Ussia van Juda gebeur. (Lees 2 Kronieke 26:3-5, 16-21.) Aanvanklik was Ussia gehoorsaam en het hy ’n goeie verhouding met God gehad, en daarom het God hom voorspoedig gemaak. Maar “toe hy sterk geword het, het sy hart . . . hoogmoedig geword”. Hy het so trots geword dat hy reukwerk in die tempel probeer brand het, al was net die priesters veronderstel om dit te doen. Toe die priesters vir hom sê dat hy dit nie mag doen nie, het Ussia baie kwaad geword! Jehovah het die trotse koning verneder, en hy was ’n melaatse tot sy dood toe.—Spreuke 16:18.

4, 5. Wat kan gebeur as ons nie waak teen trots nie? Gee ’n voorbeeld.

⁴ As ons trots is, kan ons begin dink dat ons beter is as ander en die raad wat ons uit die Bybel ontvang, begin verwerp (Spreuke 29:1; Romeine 12:3). Dit is wat met ’n ouer man met die naam Jim gebeur het. Hy het nie met die ander ouer manne oor ’n situasie in die gemeente saamgestem nie. Jim sê: “Ek het vir die broers gesê dat hulle nie liefdevol is nie, en ek het die vergadering verlaat.” Omtrent ses maande later het hy na ’n ander gemeente gegaan, maar hy is nie daar as ’n ouer man aangestel nie. Jim was baie teleurgesteld. Hy was so oortuig dat hy reg is dat hy opgehou het om Jehovah te dien en tien jaar lank onbedrywig was. Hy sê: “Ek was trots en het Jehovah begin blameer vir wat gebeur het. Deur die jare heen het die broers my besoek en met my probeer redeneer, maar ek het hulle hulp geweier.”

⁵ Jim sê: “Na my mening was die ander verkeerd, en ek kon net nie ophou om daaraan te dink nie.” Sy voorbeeld toon dat trots kan veroorsaak dat ons ons verkeerde gedrag verdedig. Wanneer dit gebeur, is ons nie meer soos sagte klei nie (Jeremia 17:9). Het ’n broer of suster jou al ooit aanstoot gegee? Was jy al ooit ontevrede omdat jy ’n voorreg verloor het? Hoe het jy gereageer? Het jy trots geword, of het jy besef dat vrede met jou broer en lojaliteit teenoor Jehovah van die grootste belang is?—Lees Psalm 119:165; Kolossense 3:13.

6. Wat kan gebeur as ons sonde beoefen?

⁶ Wanneer iemand sonde beoefen of selfs in die geheim sondig, kan dit vir hom moeilik wees om goddelike raad te aanvaar. Dit kan dan makliker word om te sondig. Een broer het gesê dat sy verkeerde gedrag hom later nie meer gepla het nie (Prediker 8:11). ’n Ander broer, wat ’n ruk lank die gewoonte gehad het om na pornografie te kyk, het later gesê: “Ek het gevind dat ek ’n kritiese gesindheid teenoor die ouer manne begin ontwikkel het.” Hierdie gewoonte het sy verhouding met Jehovah geskaad. Toe ander daarvan uitvind, het hy hulp van die ouer manne ontvang. Ons almal is natuurlik onvolmaak. Maar as ons krities word teenoor diegene wat ons raad gee of as ons verskonings maak wanneer ons iets verkeerds doen eerder as om God te vra om ons te vergewe en ons te help, kan ons hart begin verhard.

7, 8. (a) Hoe toon die voorbeeld van die eertydse Israeliete dat ’n gebrek aan geloof ons hart kan verhard? (b) Wat is die les vir ons?

⁷ Toe Jehovah die Israeliete uit Egipte bevry het, het hulle hom baie wonderwerke sien verrig. Ten spyte hiervan het hulle harte verhard toe hulle naby die Beloofde Land was. Waarom? Hulle het nie geloof in God gehad nie. In plaas daarvan om op Jehovah te vertrou, het hulle bang geword en teen Moses gemurmureer. Hulle wou selfs teruggaan na Egipte waar hulle slawe was! Jehovah was diep seergemaak en het gesê: “Hoe lank sal hierdie volk my met minagting bejeën?” (Numeri 14:1-4, 11; Psalm 78:40, 41). Daardie Israeliete het in die wildernis gesterf weens hulle harte wat verhard het en hulle gebrek aan geloof.

⁸ Vandag is ons baie naby aan die nuwe wêreld, en ons geloof word getoets. Ons moet die gehalte van ons geloof ondersoek. Hoe kan ons seker maak dat ons geloof sterk is? Ons kan Jesus se woorde in Matteus 6:33 ondersoek. Vra jou af: ‘Toon my doelwitte en besluite dat ek Jesus se woorde werklik glo? Sal ek van vergaderinge of velddiens wegbly om meer geld te maak? Wat sal ek doen as my werk meer van my tyd en energie begin vereis? Sal ek toelaat dat hierdie wêreld my vorm en my selfs verhoed om Jehovah te dien?’

9. Waarom moet ons ‘voortdurend toets’ of ons in die geloof is, en hoe kan ons dit doen?

⁹ As ons nie toepas wat die Bybel sê oor slegte assosiasie, uitsetting of ontspanning nie, kan ons hart begin verhard. Wat moet jy doen as dit met jou begin gebeur? Dit is dringend dat jy jou geloof ondersoek! Die Bybel sê: “Toets voortdurend of julle in die geloof is, stel julleself voortdurend op die proef” (2 Korintiërs 13:5). Wees eerlik met jouself en gebruik God se Woord gereeld om jou denke reg te stel.

BLY SOOS SAGTE KLEI

10. Wat kan ons help om soos sagte klei in Jehovah se hande te wees?

¹⁰ Om ons te help om soos sagte klei te bly, het God ons sy Woord, die Christengemeente en die bediening gegee. As ons daagliks die Bybel lees en daaroor peins, sal dit ons help om soos sagte klei in Jehovah se hande te wees sodat hy ons kan vorm. Jehovah het die konings van Israel beveel om ’n afskrif van God se Wet te maak en elke dag daarin te lees (Deuteronomium 17:18, 19). Die apostels het geweet dat hulle die Skrif moes lees en daaroor moes peins as hulle suksesvol in hulle bediening wou wees. Hulle het gedeeltes uit die Hebreeuse Geskrifte honderde kere in hulle geskrifte aangehaal, en wanneer hulle vir mense gepreek het, het hulle hulle aangespoor om ook die Skrif te gebruik (Handelinge 17:11). Ons besef ook dat dit belangrik is om God se Woord elke dag te lees en daaroor te peins (1 Timoteus 4:15). Dit help ons om nederig te bly, wat dit vir Jehovah moontlik maak om ons te vorm.

11, 12. Hoe kan Jehovah die Christengemeente gebruik om elkeen van ons te vorm? Gee ’n voorbeeld.

¹¹ Jehovah weet wat elkeen van ons nodig het, en hy gebruik die Christengemeente om ons te vorm. Jim, wat vroeër genoem is, het sy gesindheid begin verander toe ’n ouer man belangstelling in hom getoon het. Jim sê: “Hy het my nooit die skuld gegee vir my situasie of my gekritiseer nie. Hy het eerder positief gebly en gesê dat hy my graag wil help.” Ná omtrent drie maande het die ouer man Jim na ’n vergadering genooi. Jim sê dat die gemeente hom hartlik terugverwelkom het en dat hulle liefde hom gehelp het om sy denke te verander. Hy het tot die besef gekom dat sy gevoelens nie die hoofsaak is nie. Die ouer manne in die gemeente en Jim se vrou het hom aangemoedig, en hy het geleidelik weer sy verhouding met Jehovah versterk. Jim het ook baat gevind by artikels soos “Jehovah dra nie die skuld nie” en “Dien Jehovah lojaal”, in Die Wagtoring van 15 November 1992.

¹² Later het Jim weer as ’n ouer man gedien. Sedertdien het hy ander broers gehelp om soortgelyke probleme op te los en hulle geloof te versterk. Hy sê hy het gedink dat hy ’n hegte verhouding met Jehovah gehad het, maar eintlik het hy nie! Hy is spyt dat hy weens trots eerder op ander se foute gekonsentreer het as op die belangriker dinge.—1 Korintiërs 10:12.

13. Watter eienskappe kan ons in die veldbediening aanleer, en met watter voordele?

¹³ Die veldbediening kan ons ook vorm en ons help om beter mense te word. Hoe so? Wanneer ons die goeie nuus verkondig, moet ons eienskappe soos nederigheid en die verskillende aspekte van die vrug van God se gees openbaar (Galasiërs 5:22, 23). Dink aan die goeie eienskappe wat jy al in die veldbediening aangeleer het. Wanneer ons Christus navolg, voel mense aangetrokke tot ons boodskap en kan dit hulle gesindheid teenoor ons verander. Byvoorbeeld, toe twee Getuies in Australië in die huis-tot-huis-bediening met ’n vrou probeer praat het, het sy baie kwaad geword en was sy onbeskof teenoor hulle. Maar die Getuies het respekvol teenoor haar gebly. Later was die vrou spyt oor haar optrede, en sy het ’n brief aan die takkantoor geskryf. Sy het om verskoning gevra vir haar gedrag. Sy het gesê: “Ek was dwaas om twee mense wat God se Woord verkondig, op so ’n manier weg te wys.” Hierdie ondervinding toon hoe belangrik dit is om sagmoedig te wees in die predikingswerk. Ja, ons bediening help ander, maar dit help ons ook om ons persoonlikheid te verbeter.

WERK SAAM MET GOD WANNEER JULLE JULLE KINDERS VORM

14. Wat moet ouers doen om hulle kinders op ’n suksesvolle wyse te vorm?

¹⁴ Die meeste jong kinders is nederig en gretig om te leer (Matteus 18:1-4). Dit sal dus verstandig wees van ouers om hulle kinders van kleins af die waarheid te leer en hulle te help om dit lief te kry (2 Timoteus 3:14, 15). Om suksesvol te wees, moet ouers self vir die waarheid lief wees en toepas wat die Bybel sê. As ouers dít doen, sal dit makliker vir hulle kinders wees om die waarheid lief te kry. En kinders sal verstaan dat die dissipline van hulle ouers bewys dat hulle ouers en Jehovah hulle liefhet.

15, 16. Hoe moet ouers toon dat hulle op God vertrou as hulle kind uitgesit word?

¹⁵ Al maak ouers hulle kinders in die waarheid groot, verlaat party kinders Jehovah of word hulle uitgesit. Wanneer dit gebeur, bring dit groot hartseer vir die familie mee. ’n Suster in Suid-Afrika het gesê: “Toe my broer uitgesit is, was dit asof hy gesterf het. Dit was hartverskeurend!” Maar wat het sy en haar ouers gedoen? Hulle het die riglyne in die Bybel gevolg. (Lees 1 Korintiërs 5:11, 13.) Die ouers het besef dat dit tot almal se voordeel sal wees as hulle God se raad gehoorsaam. Hulle het geweet dat uitsetting liefdevolle dissipline van Jehovah is. Daarom het hulle slegs met hulle seun in aanraking gekom wanneer baie belangrike familiesake hanteer moes word.

¹⁶ Hoe het die seun gevoel? Later het hy gesê: “Ek het geweet dat my familie my nie haat nie, maar dat hulle Jehovah en sy organisasie gehoorsaam.” Hy het ook gesê: “Wanneer jy gedwing word om Jehovah te smeek om jou te help en te vergewe, besef jy hoe nodig jy hom het.” Stel jou die familie se vreugde voor toe hierdie jong man na Jehovah teruggekeer het! Ja, ons sal gelukkig en suksesvol wees as ons God altyd gehoorsaam.—Spreuke 3:5, 6; 28:26.

17. Waarom moet ons Jehovah altyd gehoorsaam, en hoe sal ons daarby baat vind?

¹⁷ Die profeet Jesaja het voorspel dat die Jode in Babilon berou sou toon en sou sê: “O Jehovah, u is ons Vader. Ons is die klei, en u is ons Pottebakker; en ons is almal die werk van u hand.” Hulle sou Jehovah ook smeek: “Moenie vir ewig aan ons oortreding dink nie. Kyk tog asseblief: ons is almal u volk” (Jesaja 64:8, 9). Wanneer ons nederig is en Jehovah altyd gehoorsaam, word ons baie geliefd by hom, soos Daniël. Jehovah sal ons bly vorm deur middel van sy Woord, gees en organisasie sodat ons eendag volmaakte “kinders van God” sal word.—Romeine 8:21.