’n Goddelike eienskap wat kosbaarder is as diamante

Haykanush, ’n ongedoopte verkondiger in Armenië, het ’n paspoort naby haar huis opgetel. In die paspoort was ’n paar debietkaarte en ’n groot som geld. Sy het vir haar man, wat ook ’n ongedoopte verkondiger is, vertel wat sy gevind het.

Die egpaar het groot finansiële probleme gehad en was diep in die skuld. Maar hulle het besluit om die geld te neem na die adres wat op die paspoort was. Die man wat dit verloor het, sowel as sy gesin, was verbaas. Haykanush en haar man het verduidelik dat hulle eerlik is omdat hulle die Bybel studeer. Hulle het toe van die geleentheid gebruik gemaak om die gesin meer van Jehovah se Getuies te vertel en vir hulle lektuur te gee.

Die gesin wou vir Haykanush ’n geldelike beloning gee, maar sy wou dit nie aanvaar nie. Die volgende dag het die vrou na Haykanush en haar man se huis gegaan, en om te toon hoe dankbaar sy is, het sy daarop aangedring dat Haykanush ’n diamantring aanvaar.

Baie mense sal, net soos daardie gesin, verbaas wees oor Haykanush en haar man se eerlikheid. Maar was Jehovah verbaas? Hoe het hy hulle eerlikheid beskou? Was dit vir hulle die moeite werd om eerlik te wees?

EIENSKAPPE WAT KOSBAARDER IS AS MATERIËLE DINGE

Die antwoorde op hierdie vrae is nie moeilik nie. Waarom nie? Omdat God se knegte weet dat die eienskappe wat hulle in navolging van Jehovah openbaar, vir hom kosbaarder is as diamante, goud of ander materiële dinge. Ja, die dinge wat Jehovah as kosbaar beskou, is nie noodwendig vir alle mense kosbaar nie (Jesaja 55:8, 9). Maar Jehovah se knegte weet van watter groot waarde dit is om sy eienskappe na te volg.

Kyk byvoorbeeld wat die Bybel daaroor sê as ons onderskeidingsvermoë en wysheid verkry. Spreuke 3:13-15 sê: “Gelukkig is die mens wat wysheid gevind het en die mens wat onderskeidingsvermoë verkry, want om dit as gewin te hê, is beter as om silwer as gewin te hê, en om dit as opbrengs te hê, beter as goud. Dit is kosbaarder as korale, en al jou ander verlustiginge kan nie daarmee gelykgestel word nie.” Dit is dus duidelik dat hierdie eienskappe vir Jehovah kosbaarder is as enige materiële skatte.

Maar wat van eerlikheid?

Jehovah is eerlik. Hy “kan [nie] lieg nie” (Titus 1:2). En hy het die apostel Paulus geïnspireer om die volgende aan die Hebreeuse Christene in die eerste eeu te skryf: “Hou aan om vir ons te bid, want ons vertrou dat ons ’n eerlike gewete het, aangesien ons ons in alles eerlik wil gedra.”—Hebreërs 13:18.

Jesus Christus het ’n goeie voorbeeld gestel wat eerlikheid betref. Byvoorbeeld, toe die hoëpriester Kajafas gesê het: “Ek stel jou onder eed by die lewende God om vir ons te sê of jy die Christus, die Seun van God, is!”, was Jesus eerlik en het hy erken dat hy die Messias is. Hy het die waarheid gepraat, al het hy geweet dat die Sanhedrin hom van godslastering kon beskuldig en dat dit tot sy teregstelling kon lei.—Matteus 26:63-67.

Wat van ons? Gestel ons bevind ons in ’n situasie waar ons materiële voordele kan kry as ons nie al die feite oordra nie of die feite effens verdraai. Sal ons eerlik bly?

DIE UITDAGING OM EERLIK TE BLY

Dit kan moeilik wees om eerlik te bly in hierdie laaste dae waarin baie mense “liefhebbers van hulleself” en “liefhebbers van geld” is (2 Timoteus 3:2). Tydens ’n finansiële krisis of wanneer dit moeilik is om werk te kry, meen baie dat dit nie verkeerd is om te steel of ander oneerlike dinge te doen nie. Baie dink dat ’n mens oneerlik moet wees as jy materiële voordele wil verkry. Selfs party Christene het al slegte besluite geneem en hulle goeie naam in die gemeente verloor omdat hulle op ’n oneerlike manier geld wou maak.—1 Timoteus 3:8; Titus 1:7.

Maar die meeste Christene volg Jesus na. Hulle besef dat hulle goddelike eienskappe moet openbaar en dat dit baie belangriker is as enige rykdom of voordele. Daarom is jong Christene nie oneerlik wanneer hulle eksamen skryf nie (Spreuke 20:23). ’n Mens ontvang dalk nie altyd, soos Haykanush, ’n beloning as jy eerlik is nie. Maar God verwag dat ons eerlik moet wees, en dit help ons om ’n skoon gewete te hê, iets wat werklik kosbaar is.

Gagik se voorbeeld toon dat dit die geval is. Hy sê: “Voordat ek ’n Christen geword het, het ek vir ’n groot maatskappy gewerk, maar die eienaar het belasting ontduik deur net ’n klein gedeelte van die maatskappy se wins te verklaar. Daar is van my as die besturende direkteur verwag om ‘’n ooreenkoms’ te bereik met die belastingagent. Ek moes hom omkoop sodat hy sy oë sou sluit vir die maatskappy se oneerlikheid. Gevolglik was ek bekend as ’n oneerlike man. Toe ek in die waarheid kom, het ek geweier om daarmee voort te gaan, al het ek ’n goeie salaris verdien. Ek het eerder my eie besigheid begin. Van die begin af het ek my maatskappy wetlik geregistreer en al my belasting betaal.”—2 Korintiërs 8:21.

Gagik sê: “Omdat ek die helfte minder verdien het as vroeër, was dit ’n uitdaging om vir my gesin te sorg. Maar ek is nou gelukkiger en het ’n skoon gewete voor Jehovah. Ek stel ’n goeie voorbeeld vir my twee seuns, en ek het voorregte in die gemeente gekry. Belastingouditeurs en ander met wie ek besigheid doen, weet nou dat ek ’n eerlike man is.”

JEHOVAH HELP ONS

Jehovah is lief vir diegene wat sy wonderlike eienskappe, insluitende eerlikheid, navolg (Titus 2:10). Hy het koning Dawid geïnspireer om ons die volgende versekering te gee: “Ek was eens ’n jong man, ook het ek oud geword, en tog het ek geen regverdige heeltemal verlate gesien of dat sy nageslag brood soek nie.”—Psalm 37:25.

Die ondervinding van die getroue Rut bewys dit. Sy het nie haar bejaarde skoonma, Naomi, verlaat nie, maar was eerder lojaal en het by haar gebly. Rut het na Israel getrek, waar sy die ware God kon aanbid (Rut 1:16, 17). Sy was eerlik en het hard gewerk om oesoorblyfsels in te samel, ’n voorsiening wat die Wet gemaak het vir die armes. En in ooreenstemming met Dawid se woorde hierbo, het Jehovah Rut en Naomi nooit verlaat nie (Rut 2:2-18). Maar Jehovah het Rut nie net geseën deur materieel vir haar te sorg nie. Hy het haar ook gekies om ’n voorouer te wees van koning Dawid en selfs van die beloofde Messias!—Rut 4:13-17; Matteus 1:5, 16.

Dit kan vir party van Jehovah se knegte baie moeilik wees om genoeg geld te verdien om in hulle basiese behoeftes te voorsien. Eerder as om ’n maklike maar oneerlike oplossing te vind, is hulle fluks en hardwerkend. Sodoende openbaar hulle God se wonderlike eienskappe, insluitende eerlikheid, wat vir hulle baie kosbaarder is as enige materiële dinge.—Spreuke 12:24; Efesiërs 4:28.

Soos Rut het Christene regoor die wêreld die vertroue dat Jehovah hulle sal help. Hulle stel geloof in God en sy belofte: “Ek sal jou hoegenaamd nie verlaat of jou ooit versaak nie” (Hebreërs 13:5). Jehovah het keer op keer getoon dat hy diegene wat te alle tye eerlik is, kan en sal help. Hy het nog altyd sy belofte gehou om in die basiese behoeftes van sy knegte te voorsien.—Matteus 6:33.

Ja, mense beskou diamante en ander materiële dinge dalk as kosbaar. Maar ons kan daarvan seker wees dat ons eerlikheid en ander goeie eienskappe vir ons hemelse Vader baie kosbaarder is as enige edelsteen!