Wat sê die Bybel oor voedseltekorte in ons dag?

“Geen mense wat honger ly nie.” Dit is wat wêreldleiers hoop om te bereik om een van die mensdom se grootste probleme op te los – om kos aan almal op die planeet te voorsien.a Maar sal daar ooit ’n tyd wees wanneer niemand in die wêreld honger ly nie? Wat sê die Bybel?

Die Bybel het voedseltekorte vir ons dag voorspel

Die Bybel het voorspel dat daar voedseltekorte sou wees in ons tyd, ’n tydperk wat “die laaste dae” genoem word (2 Timoteus 3:1). God is nie verantwoordelik vir hierdie voedseltekorte nie, maar hy het ons daaroor gewaarsku (Jakobus 1:13). Kyk na twee Bybelprofesieë.

“Daar sal voedseltekorte . . . op die een plek ná die ander wees” (Matteus 24:7). Hierdie Bybelprofesie het voorspel dat daar hongersnood op baie plekke sou wees. Dit is betekenisvol dat ’n onlangse verslag deur mense wat kosvoorsiening monitor, sê: “Die situasie in die wêreld met betrekking tot hongersnood en die tekort aan gesonde of genoeg kos word al hoe erger.”b Honderde miljoene mense in baie lande kan nie die kos kry wat hulle nodig het nie. As gevolg hiervan oorleef baie van hulle ongelukkig nie.

“Ek het gekyk en ’n swart perd gesien, en die een wat daarop sit, het ’n weegskaal in sy hand gehad” (Openbaring 6:5). In hierdie profesie stel die simboliese perd en sy ruiter hongersnood in die laaste dae voor.c Die weegskaal in die ruiter se hand is om die beperkte kos af te weeg sodat almal ’n bietjie kan kry. Terwyl hierdie perderuiter ry, kondig ’n stem aan dat kos baie duur sou wees en mense word gewaarsku om nie basiese kositems te mors nie (Openbaring 6:6). Dit is ’n akkurate voorstelling van die wêreldwye voedselkrisis vandag, waar miljarde mense nie gesonde kos kan kry of kan bekostig nie.

Hoe voedseltekorte sal eindig

Kenners sê dat ons planeet meer as genoeg kos produseer vir almal wat daarop woon. So watter probleme dra by tot voedseltekorte? En wat sê die Bybel sal ons Skepper, Jehovah,d doen om hierdie probleme op te los?

Probleem: Regerings kan nie ’n einde maak aan armoede en ongeregtighede wat veroorsaak dat mense honger ly nie.

Oplossing: Onvolmaakte menseregerings sal vervang word deur ’n volmaakte regering – God se Koninkryk (Daniël 2:44; Matteus 6:10). Vandag sukkel baie arm mense om kos te bekostig, maar onder God se Koninkryk sal dit verander. Die Bybel sê oor Jesus Christus, die Koning van God se Koninkryk: “Hy sal die arme red wat om hulp roep, en ook enigiemand wat geen helper het nie. . . . Daar sal volop graan op die aarde wees. Op die top van die berge sal daar ’n oorvloed wees.” – Psalm 72:12, 16.

Probleem: Oorloë veroorsaak verwoesting en ekonomiese onsekerheid, en as gevolg hiervan word dit vir mense moeiliker om die kos te kry wat hulle nodig het.

Oplossing: “[Jehovah] maak regoor die aarde ’n einde aan oorloë. Hy breek die boog en vernietig die spies. Hy verbrand die militêre waens met vuur” (Psalm 46:9). God sal oorlogswapens en mense wat oorlog veroorsaak, vernietig. As gevolg hiervan sal dit veilig en maklik vir almal wees om kos te kry. Die Bybel belowe: “Die regverdige sal . . . floreer, en daar sal ’n oorvloed van vrede wees.” – Psalm 72:7.

Probleem: Uiterste weerstoestande en natuurrampe vernietig oeste en veroorsaak dat vee doodgaan.

Oplossing: God sal die aarde se natuurkragte beheer en ideale toestande skep sodat kos kan groei. Die Bybel sê: “[Jehovah] laat die windstorm bedaar, en die golwe van die see word stil. . . . Hy verander die woestyn in waterpoele vol riete, en droë grond in waterfonteine. Hy laat dié wat honger is, daar woon . . . Hulle saai saad in landerye en plant wingerde wat oorvloedige oeste oplewer.” – Psalm 107:29, 35-37.

Probleem: Gierige en korrupte mense produseer kos wat nie veilig is om te eet nie of verhoed dat die kos diegene bereik wat dit nodig het.

Oplossing: God se Koninkryk sal alle oneerlike en korrupte mense verwyder (Psalm 37:10, 11; Jesaja 61:8). Die Bybel beskryf Jehovah God as “die Een wat geregtigheid gee aan dié wat uitgebuit is, die Een wat brood gee aan dié wat honger is”. – Psalm 146:7.

Probleem: ’n Derde van die wêreld se kosvoorraad word gemors of gaan elke jaar verlore.

Oplossing: Onder God se Koninkryk sal kosvoorraad behoorlik beheer word. Terwyl Jesus op aarde was, was hy versigtig om nie kos te mors nie. Byvoorbeeld, by een geleentheid het hy deur middel van ’n wonderwerk ’n groep van meer as 5 000 mense kos gegee. Later het hy sy dissipels beveel: “Maak die oorskietstukke bymekaar sodat niks gemors word nie.” – Johannes 6:5-13.

Omdat God se Koninkryk die probleme sal verwyder wat veroorsaak dat mense honger ly, sal alle mense ’n oorvloed goeie, gesonde kos geniet (Jesaja 25:6). Om uit te vind wanneer God se Koninkryk dit sal doen, sien die artikel “Wanneer sal God se Koninkryk oor die aarde regeer?”