Gesonde voedsel vir almal—Binnekort!
JY KAN praktiese stappe doen om jou voedsel veiliger te maak. Maar daar is baie faktore wat buite jou beheer is. Byvoorbeeld, jy kan nie alle voedsel persoonlik ondersoek voordat jy dit koop of voorberei nie. Dalk moet jy voedsel koop wat verwerk en van ver af vervoer is. En van die voedsel wat jy koop, is miskien deur gevaarlike chemikalieë in die lug, water of grond besmet.
In ’n verslag met die titel “Die beheer van voedselverwante siektes: ’n Transnasionale uitdaging” sê amptenare van die Wêreldgesondheidsorganisasie dat party probleme in verband met voedselveiligheid “nie deur nasionale regerings alleen opgelos kan word nie; dit vereis internasionale samewerking”. Voedselverwante siektes is ’n wêreldwye probleem!
Dit is te verstane dat baie mense sal wonder waarom ons met soveel vertroue kan sê dat daar binnekort gesonde voedsel vir almal sal wees. Dit is omdat “Jehovah, die Here van die hele aarde,” belowe om ’n oplossing vir die mensdom se voedselprobleme te voorsien (Josua 3:13). Party beweer moontlik dat onveilige voedsel bewys dat God nie vertrou kan word nie. Maar dink hieraan: Sal dit reg wees om die kok te blameer as ’n kelner agterlosig toelaat dat goeie kos bederf? Natuurlik nie.
Net so is dit mense—nie die Skepper nie—wat verantwoordelik is vir die verderwing van die aarde se voorraad van heilsame voedsel. Dit is deur die mens se toedoen dat baie voedsel vandag onveilig is. God belowe om “die verderwers van die aarde te verderf”.—Openbaring 11:18.
Die feit is dat God reeds bewys het dat die gehalte van ons voedsel vir hom belangrik is. Hy is die Een wat die aarde gevorm het en bome gemaak het wat nie net ‘begeerlik was om te sien’ nie, maar ook ‘goed was vir voedsel’ (Genesis 2:9). Selfs nadat siekte die mens begin teister het, het Jehovah God sy volk spesifieke riglyne gegee wat hulle voedsel en hulle liggaam sou beskerm.—Sien die venster “’n Stel gesondheidsreëls”.
Watter soort voedsel wil God hê moet ons geniet? Die Bybel sê vir ons: “Hy laat groen gras uitspruit vir die diere, en plante tot nut van die mens, om voedsel uit die aarde te laat voortkom, en wyn wat die hart van die sterflike mens vrolik maak, om die gesig te laat blink van olie, en brood wat die hart van die sterflike mens versterk” (Psalm 104:14, 15). Die Bybel sê ook dat ‘al die diere wat beweeg en lewe, as voedsel mag dien’.—Genesis 9:3.
Sy Woord belowe aangaande ons toekoms: “Hy sal beslis die reën gee vir jou saad waarmee jy die grond besaai, en as die opbrengs van die grond, brood, wat vet en olierig sal word. Jou vee sal in dié dag op ’n uitgestrekte weiveld wei” (Jesaja 30:23). Ja, vandag se onheilspellende nuusopskrifte sal binnekort vervang word met die aankondiging: “Gesonde voedsel vir almal!”
[Lokteks op bladsy 9]
Die Skepper belowe ons ’n blink toekoms met ’n oorvloed goeie voedsel
[Venster op bladsy 8]
‘’N STEL GESONDHEIDSREËLS’
Die Mosaïese Wet is omtrent 3 500 jaar gelede aan Israel gegee. Hierdie Wet het die Israeliete teen baie voedselverwante siektes beskerm. Beskou die volgende instruksies:
● Moenie besmette gereedskap en houers gebruik wat met ’n dooie dier in aanraking gekom het nie: “Enige houer wat gebruik word, moet in water gesit word, en dit sal tot die aand toe onrein wees en daarna rein wees.”—Levitikus 11:31-34.
● Moenie ’n dier eet wat vanself gevrek het nie: “Julle mag geen dier eet wat doodgegaan het nie.”—Deuteronomium 14:21.
● Eet oorskietkos binne ’n kort tydperk: “Wat daarvan oorbly, mag ook op die volgende dag geëet word. Maar wat op die derde dag van die vleis van die offerande oorbly, moet met vuur verbrand word.”—Levitikus 7:16-18.
A. Rendle Short, MD, het haar verbasing uitgespreek dat die Mosaïese Wet—in vergelyking met die destydse wette van omliggende nasies—“so ’n wyse en redelike stel gesondheidsreëls” bevat het.