Hoofstuk 30

“Babilon die Grote het geval!”

1. Wat kondig die tweede engel aan, en wie is Babilon die Grote?

DIT is die uur van God se oordeel! Luister dan na die goddelike boodskap: “En ’n ander, ’n tweede engel, het gevolg en gesê: ‘Sy het geval! Babilon die Grote het geval, sy wat al die nasies van die wyn van die toorn van haar hoerery laat drink het!’” (Openbaring 14:8). Vir die eerste keer, maar nie die laaste nie, vestig Openbaring die aandag op Babilon die Grote. Later sal hoofstuk 17 haar as ’n wellustige hoer beskryf. Wie is sy? Sy is, soos ons sal sien, ’n wêreldwye ryk, sy is godsdienstig en sy is Satan se valse stelsel wat hy gebruik om teen die saad van God se vrou te stry (Openbaring 12:17). Babilon die Grote is die hele wêreldryk van valse godsdiens. Sy sluit alle godsdienste in wat die godsdiensleringe en -gebruike van eertydse Babilon aanhang en wat sy gees openbaar.

2. (a) Hoe is Babiloniese godsdiens na alle dele van die aarde verstrooi? (b) Wat is die prominentste deel van Babilon die Grote, en wanneer het dit as ’n magtige organisasie verskyn?

² Dit was in Babilon, meer as 4 000 jaar gelede, dat Jehovah die tale van die voornemende bouers van die Toring van Babel verwar het. Die verskillende taalgroepe is na die uithoeke van die aarde verstrooi, en hulle het die afvallige opvattings en gebruike wat vandag nog die grondslag van die meeste godsdienste vorm, met hulle saamgeneem (Genesis 11:1-9). Babilon die Grote is die godsdiensdeel van Satan se organisasie. (Vergelyk Johannes 8:43-47.) Vandag is haar prominentste deel die afvallige Christendom, wat in die vierde eeu ná Christus as ’n magtige, wettelose organisasie verskyn het, met geloofsbelydenisse en vormlike gebruike wat nie van die Bybel nie, maar hoofsaaklik van Babiloniese godsdiens afkomstig is.—2 Tessalonisense 2:3-12.

3. Hoe kan daar gesê word dat Babilon die Grote geval het?

³ Jy vra moontlik: ‘Aangesien godsdiens nog steeds ’n groot invloed op die aarde uitoefen, waarom kondig die engel aan dat Babilon die Grote geval het?’ Wel, wat het ná 539 v.G.J. gebeur toe eertydse Babilon geval het? Israel is bevry om na sy vaderland terug te keer en ware aanbidding daar te herstel! Die herstel van geestelike Israel in 1919 tot luisterryke geestelike voorspoed, wat vandag nog voortduur en uitbrei, is dus ’n bewys dat Babilon die Grote in daardie jaar geval het. Sy het nie meer die mag om God se volk te beperk nie. Bowendien het sy groot probleme in haar eie geledere. Sedert 1919 is haar korrupsie, oneerlikheid en onsedelikheid wyd en syd blootgelê. In die grootste deel van Europa gaan min mense nog kerk toe, en in party sosialistiese lande word godsdiens as “die opium van die volk” beskou. Babilon die Grote is tot skande gemaak in die oë van alle liefhebbers van God se Woord van waarheid en wag nou as ’t ware in die dodesel dat Jehovah se regverdige oordeel aan haar voltrek word.

Babilon se skandelike val

4-6. Hoe het “Babilon die Grote . . . al die nasies van die wyn van die toorn van haar hoerery laat drink”?

⁴ Laat ons die omringende omstandighede van Babilon die Grote se skandelike val van naderby ondersoek. Die engel deel ons hier mee dat “Babilon die Grote . . . al die nasies van die wyn van die toorn van haar hoerery laat drink het”. Wat beteken dit? Dit hou verband met verowering. Jehovah het byvoorbeeld vir Jeremia gesê: “Neem hierdie beker van die wyn van woede uit my hand, en jy moet al die nasies na wie toe ek jou stuur, dit laat drink. En hulle sal drink en heen en weer skud en soos waansinniges optree weens die swaard wat ek onder hulle stuur” (Jeremia 25:15, 16). In die sesde en sewende eeu v.G.J. het Jehovah eertydse Babilon gebruik om ’n simboliese beker van verdrukking uit te giet waaruit baie nasies moes drink, met inbegrip van afvallige Juda, sodat selfs sy eie volk in ballingskap weggevoer is. Toe het Babilon op sy beurt geval omdat sy koning hom teen Jehovah, “die Here van die hemel”, verhef het.—Daniël 5:23.

⁵ Babilon die Grote het ook oorwinnings behaal, maar hierdie oorwinnings was merendeels subtieler. Sy het ‘al die nasies laat drink’ deur die liste van ’n prostituut te gebruik en godsdienstige hoerery met hulle te pleeg. Sy het politieke maghebbers verlok om bondgenootskappe en vriendskappe met haar te sluit. Deur godsdienslokmiddels het sy politieke, handels- en ekonomiese onderdrukking beplan. Sy het om uitsluitlik politieke en handelsredes godsdiensvervolging en godsdiensoorloë en kruistogte, sowel as burgeroorloë, aangestook. En sy het hierdie oorloë geheilig deur te sê dat dit God se wil is.

⁶ Godsdiens se betrokkenheid by die oorloë en politiek van die 20ste eeu is algemeen bekend—soos in Sjintoïstiese Japan, Hindoeïstiese Indië, Boeddhistiese Viëtnam, “Christelike” Noord-Ierland en Latyns-Amerika, sowel as elders—om nie te praat van die aandeel van die veldkapelane aan beide kante van die twee wêreldoorloë wat jong manne aangehits het om mekaar uit te moor nie. ’n Tipiese voorbeeld van Babilon die Grote se ontrouheid is haar aandeel aan die Spaanse Burgeroorlog van 1936-39, waarin minstens 600 000 mense doodgemaak is. Hierdie bloedvergieting is deur ondersteuners van die Katolieke geestelikes en hulle bondgenote veroorsaak, deels omdat die rykdom en posisie van die kerk deur Spanje se wettige regering bedreig is.

7. Wie was die hoofteiken van Babilon die Grote, en watter metodes het sy teen hierdie teiken gebruik?

⁷ Aangesien Babilon die Grote die godsdiensdeel van Satan se saad is, het sy nog altyd Jehovah se “vrou”, “die Jerusalem daar bo”, haar hoofteiken gemaak. In die eerste eeu is die gemeente van gesalfde Christene duidelik as die vrou se saad geïdentifiseer (Genesis 3:15; Galasiërs 3:29; 4:26). Babilon die Grote het hard probeer om hierdie kuis gemeente te oorwin deur dit te verlei om godsdienstige hoerery te pleeg. Die apostels Paulus en Petrus het gewaarsku dat baie daarvoor sou swig en dat dit ’n groot afvalligheid tot gevolg sou hê (Handelinge 20:29, 30; 2 Petrus 2:1-3). Jesus se boodskappe aan die sewe gemeentes het aangedui dat Babilon die Grote teen die einde van Johannes se lewe ’n mate van vooruitgang gemaak het in haar pogings om te verderf (Openbaring 2:6, 14, 15, 20-23). Maar Jesus het reeds getoon hoe ver sy toegelaat sou word om te gaan.

Die koring en die onkruid

8, 9. (a) Wat het Jesus se gelykenis van die koring en die onkruid aangedui? (b) Wat het gebeur “terwyl die mense geslaap het”?

⁸ In sy gelykenis van die koring en die onkruid het Jesus gepraat van ’n man wat goeie saad in ’n saailand gesaai het. Maar “terwyl die mense geslaap het”, het ’n vyand gekom en onkruid daaroor gesaai. Gevolglik is die koring deur die onkruid verberg. Jesus het sy gelykenis met hierdie woorde uitgelê: “Die saaier van die goeie saad is die Seun van die mens; die saailand is die wêreld; wat die goeie saad betref, dit is die kinders van die koninkryk; maar die onkruid is die kinders van die bose, en die vyand wat dit gesaai het, is die Duiwel.” Toe het hy getoon dat die koring en die onkruid toegelaat sou word om tot “die voleinding van die stelsel van dinge” saam te groei, wanneer die engele die simboliese onkruid sou “bymekaarmaak”.—Matteus 13:24-30, 36-43.

⁹ Die dinge waarteen Jesus en die apostels Paulus en Petrus gewaarsku het, het gebeur. “Terwyl die mense geslaap het”, nadat die apostels gesterf het of toe Christenopsieners lomerig geword het terwyl hulle die kudde van God opgepas het, het Babiloniese afvalligheid binne-in die gemeente ontstaan (Handelinge 20:31). Die onkruid was gou baie meer as die koring en het dit verberg. Etlike eeue lank het dit gelyk of die saad van die vrou geheel en al deur Babilon die Grote verswelg is.

10. Wat het teen die 1870’s plaasgevind, en hoe het Babilon die Grote hierop gereageer?

¹⁰ Teen die 1870’s het gesalfde Christene doelgerigte pogings begin aanwend om hulle van Babilon die Grote se hoeragtige weë te distansieer. Hulle het valse leerstellings wat die Christendom uit die heidendom ingebring het, laat vaar en die Bybel moedig gebruik om te verkondig dat die tye van die nasies in 1914 sou eindig. Die hoofwerktuig van Babilon die Grote, die geestelikes van die Christendom, het hierdie tekens van die herstel van ware aanbidding teëgestaan. Gedurende die Eerste Wêreldoorlog het hulle die oorlogshisterie uitgebuit in ’n poging om hierdie groepie getroue Christene uit te wis. In 1918, toe hulle bedrywighede feitlik heeltemal onderdruk is, het dit gelyk asof Babilon die Grote sukses behaal het. Sy het oënskynlik oor hulle geseëvier.

11. Wat het die val van eertydse Babilon tot gevolg gehad?

¹¹ Soos ons vroeër opgemerk het, het die trotse stad Babilon in 539 v.G.J. op rampspoedige wyse uit ’n magsposisie geval. Toe is die uitroep gehoor: “Dit het geval! Babilon het geval!” Die groot setel van die wêreldryk is deur die leërs van Medo-Persië onder Kores die Grote verower. Hoewel die stad self deur die verowering heen behoue gebly het, het hy waarlik uit sy magsposisie geval, en dit het die vrylating van sy Joodse gevangenes tot gevolg gehad. Hulle het na Jerusalem teruggekeer om ware aanbidding daar te herstel.—Jesaja 21:9; 2 Kronieke 36:22, 23; Jeremia 51:7, 8.

12. (a) Hoe kan daar in ons tyd gesê word dat Babilon die Grote geval het? (b) Wat bewys dat Jehovah die Christendom heeltemal verwerp het?

¹² In ons tyd is die uitroep dat Babilon die Grote geval het, ook gehoor! Die Babiloniese Christendom se tydelike sukses in 1918 is in 1919 heeltemal omgekeer toe die oorblyfsel van die gesalfdes, die Johannes-klas, deur ’n geestelike opstanding herstel is. Babilon die Grote het geval sover dit enige houvas op God se volk betref. Christus se gesalfde broers het soos sprinkane uit die afgrond geswerm, gereed vir aksie (Openbaring 9:1-3; 11:11, 12). Hulle was die hedendaagse “getroue en verstandige slaaf”, en die Heer het hulle oor al sy besittings op die aarde aangestel (Matteus 24:45-47). Die feit dat hulle op hierdie manier gebruik is, het bewys dat Jehovah die Christendom heeltemal verwerp het, ondanks haar bewering dat sy hom op die aarde verteenwoordig. Rein aanbidding is herstel, en die verseëling van die oorblyfsel van die 144 000—die oorblywendes van die saad van die vrou, die eeue oue vyand van Babilon die Grote—kon nou voltooi word. Dit alles het ’n verpletterende nederlaag vir hierdie sataniese godsdiensorganisasie beteken.

Volharding vir die heiliges

13. (a) Wat kondig die derde engel aan? (b) Hoe oordeel Jehovah dié wat die merk van die wilde dier ontvang?

¹³ Nou praat die derde engel. Luister! “En ’n ander engel, ’n derde, het hulle gevolg en met ’n harde stem gesê: ‘As iemand die wilde dier en sy beeld aanbid en ’n merk op sy voorkop of op sy hand ontvang, sal hy ook van die wyn van die toorn van God drink wat onverdun in die beker van sy gramskap ingeskink is’” (Openbaring 14:9, 10a). In Openbaring 13:16, 17 is daar geopenbaar dat dié wat die beeld van die wilde dier nie aanbid nie, gedurende die dag van die Here sou ly—selfs doodgemaak sou word. Nou hoor ons dat Jehovah besluit het om oordeel te voltrek aan dié “wat die merk het, die naam van die wilde dier of die getal van sy naam”. Hulle sal verplig wees om ’n bitter ‘beker van gramskap’ van Jehovah se toorn te drink. Wat sal dit vir hulle beteken? In 607 v.G.J., toe Jehovah Jerusalem verplig het om “sy beker van woede” te drink, het die stad “plundering en verbreking, en honger en swaard” deur die toedoen van die Babiloniërs ervaar (Jesaja 51:17, 19). Wanneer aanbidders van die aarde se politieke magte en hulle beeld, die Verenigde Nasies, die beker van Jehovah se gramskap drink, sal die gevolg ook vir hulle rampspoedig wees (Jeremia 25:17, 32, 33). Hulle sal heeltemal vernietig word.

14. Wat moet dié wat die wilde dier en sy beeld aanbid, selfs voor hulle vernietiging ondergaan, en hoe beskryf Johannes dit?

¹⁴ Maar selfs voordat dit gebeur, moet diegene met die merk van die dier die pynigende gevolge van Jehovah se misnoeë ondergaan. Die engel praat van die aanbidder van die wilde dier en sy beeld en deel Johannes mee: “En hy sal ten aanskoue van die heilige engele en ten aanskoue van die Lam met vuur en swael gepynig word. En die rook van hulle pyniging styg vir ewig en altyd op, en hulle het dag en nag geen rus nie, dié wat die wilde dier en sy beeld aanbid, en elkeen wat die merk van sy naam ontvang.”—Openbaring 14:10b, 11.

15, 16. Wat is die betekenis van die woorde “vuur en swael” in Openbaring 14:10?

¹⁵ Party het hierdie vermelding van vuur en swael beskou as ’n bewys dat ’n helse vuur bestaan. Maar ’n vlugtige ondersoek van ’n soortgelyke profesie toon wat hierdie woorde werklik in hierdie konteks beteken. In die dae van Jesaja het Jehovah die nasie Edom gewaarsku dat hulle gestraf sou word weens hulle vyandigheid teenoor Israel. Hy het gesê: “Sy strome sal in pik verander word en sy stof in swael; en sy land sal soos brandende pik word. Dit sal nie snags of bedags uitgeblus word nie; tot onbepaalde tyd sal sy rook bly opstyg. Van geslag tot geslag sal dit verskroei wees; vir ewig en altyd sal niemand daardeur trek nie.”—Jesaja 34:9, 10.

¹⁶ Is Edom in ’n mitiese helse vuur gegooi om vir ewig te brand? Natuurlik nie. Die nasie het eerder heeltemal van die wêreldtoneel verdwyn asof dit geheel en al deur vuur en swael verteer is. Die eindresultaat van die straf was nie ewige pyniging nie, maar “leegheid . . . woestheid . . . niks” (Jesaja 34:11, 12). Die rook ‘wat tot onbepaalde tyd opstyg’, beeld dit treffend uit. Wanneer ’n huis afbrand, kom daar ’n hele ruk nadat die vlamme uitgebrand het, nog rook uit die as, wat vir toeskouers ’n bewys is dat daar ’n verwoestende brand was. God se volk onthou vandag nog die les wat uit die vernietiging van Edom geleer moet word. In hierdie sin styg ‘die rook van sy verbranding’ nog steeds simbolies op.

17, 18. (a) Wat is die gevolg vir dié wat die merk van die wilde dier ontvang? (b) In watter sin word aanbidders van die wilde dier gepynig? (c) Hoe ‘styg die rook van hulle pyniging vir ewig en altyd op’?

¹⁷ Dié wat die merk van die wilde dier het, sal ook geheel en al vernietig word, asof deur vuur. Soos die profesie later openbaar, sal hulle lyke onbegrawe gelaat word sodat die diere en voëls dit kan eet (Openbaring 19:17, 18). Dit spreek dus vanself dat hulle nie letterlik vir ewig gepynig word nie! Hoe word hulle dan “met vuur en swael gepynig”? In die sin dat die verkondiging van die waarheid hulle aan die kaak stel en hulle van God se komende oordeel waarsku. Daarom belaster hulle God se volk en, waar moontlik, oorreed hulle die politieke wilde dier op listige wyse om Jehovah se Getuies te vervolg en selfs dood te maak. As ’n klimaks sal hierdie teenstanders asof met vuur en swael vernietig word. Dan ‘styg die rook van hulle pyniging vir ewig en altyd op’ in die sin dat God se veroordeling van hulle as ’n presedent sal dien indien Jehovah se regmatige soewereiniteit ooit weer betwis word. Hierdie geskil sal vir ewig besleg wees.

¹⁸ Wie verkondig vandag die pynigende boodskap? Onthou, die simboliese sprinkane het gesag om die mense te pynig wat nie die seël van God op hulle voorkoppe het nie (Openbaring 9:5). Klaarblyklik is hierdie sprinkane onder engeleleiding die pynigers. Die simboliese sprinkane volhard in so ’n mate dat ‘dié wat die wilde dier en sy beeld aanbid, en elkeen wat die merk van sy naam ontvang, dag en nag geen rus het nie’. En uiteindelik, ná hulle vernietiging, sal die indrukwekkende bewys van hierdie regverdiging van Jehovah se soewereiniteit, “die rook van hulle pyniging”, vir ewig en altyd opstyg. Mag die Johannes-klas volhard totdat hierdie regverdiging voltooi is! Soos die engel ten slotte sê: “Hiér beteken dit volharding vir die heiliges, dié wat die gebooie van God en die geloof van Jesus bewaar.”—Openbaring 14:12.

19. Waarom word volharding van die heiliges vereis, en wat sê Johannes wat hulle versterk?

¹⁹ Ja, “volharding vir die heiliges” beteken dat hulle Jehovah deur middel van Jesus Christus met uitsluitlike toegewydheid aanbid. Hulle boodskap is nie gewild nie. Dit lei tot teenstand, vervolging en selfs ’n marteldood. Maar hulle word versterk deur wat Johannes vervolgens sê: “En ek het ’n stem uit die hemel hoor sê: ‘Skryf: Gelukkig is die dooies wat van nou af in eenheid met die Here sterf. Ja, sê die gees, laat hulle van hulle arbeid rus, want die dinge wat hulle gedoen het, gaan met hulle saam.’”—Openbaring 14:13.

20. (a) Hoe stem die belofte waarvan Johannes vertel, ooreen met Paulus se profesie oor Jesus se teenwoordigheid? (b) Watter spesiale voorreg word die gesalfdes beloof wat sterf nadat Satan uit die hemel gewerp is?

²⁰ Hierdie belofte stem goed ooreen met Paulus se profesie oor Jesus se teenwoordigheid: “Dié wat dood is in eenheid met Christus, sal eerste opstaan. Daarna sal ons, die lewendes wat oorbly [die gesalfdes wat nog in die dag van die Here lewe], saam met hulle in wolke weggeruk word om die Here in die lug te ontmoet” (1 Tessalonisense 4:15-17). Nadat Satan uit die hemel gewerp is, het dié wat dood was in eenheid met Christus, eerste opgestaan. (Vergelyk Openbaring 6:9-11.) Daarna word die gesalfdes wat gedurende die dag van die Here sterf, ’n spesiale voorreg beloof. Hulle opstanding tot geeslewe in die hemel is oombliklik, “in ’n oogwink” (1 Korintiërs 15:52). Hoe wonderlik is dit tog! En hulle regverdige werke word in die hemelse ryk voortgesit.

Die oes van die aarde

21. Wat vertel Johannes ons omtrent “die oes van die aarde”?

²¹ Ander sal ook in hierdie oordeelsdag bevoordeel word, soos Johannes verder vir ons sê: “En ek het gesien, en kyk! ’n wit wolk, en op die wolk het iemand soos ’n seun van die mens gesit, met ’n goue kroon op sy kop en ’n skerp sekel in sy hand. En ’n ander engel [die vierde] het uit die tempelheiligdom te voorskyn gekom en met ’n harde stem geroep na die een wat op die wolk sit: ‘Steek u sekel in en maai, omdat die uur gekom het om te maai, want die oes van die aarde is heeltemal ryp.’ En die een wat op die wolk sit, het sy sekel op die aarde ingesteek, en die aarde is gemaai.”—Openbaring 14:14-16.

22. (a) Wie is die een wat ’n goue kroon dra en op die wit wolk sit? (b) Wanneer bereik die oeswerk ’n klimaks, en hoe?

²² Daar is geen twyfel oor die identiteit van die een wat op die wit wolk sit nie. Aangesien hy op ’n wit wolk sit, soos ’n seun van die mens lyk en ’n goue kroon het, is hy ongetwyfeld Jesus, die Messiaanse Koning wat ook deur Daniël in ’n visioen gesien is (Daniël 7:13, 14; Markus 14:61, 62). Maar wat is die oes wat hier voorspel word? Terwyl Jesus op die aarde was, het hy die werk om dissipels te maak, vergelyk met die insameling van die wêreldveld van die mensdom (Matteus 9:37, 38; Johannes 4:35, 36). Hierdie oeswerk bereik ’n klimaks in die dag van die Here, wanneer Jesus as Koning gekroon word en namens sy Vader oordeel voltrek. Sy bewind, sedert 1914, is dus ook die vreugdevolle tyd wanneer die oes ingesamel word.—Vergelyk Deuteronomium 16:13-15.

23. (a) Van wie af kom die bevel om te begin maai? (b) Watter insameling het van 1919 tot nou toe plaasgevind?

²³ Hoewel hy ’n Koning en ’n Regter is, wag Jesus vir ’n bevel van Jehovah sy God voordat hy begin maai. Hierdie bevel kom by monde van ’n engel uit “die tempelheiligdom”. Jesus gehoorsaam dit onmiddellik. Eers laat hy, van 1919 af, sy engele die insameling van die 144 000 voltooi (Matteus 13:39, 43; Johannes 15:1, 5, 16). Vervolgens vind die insameling van die groot menigte ander skape plaas (Johannes 10:16; Openbaring 7:9). Die geskiedenis toon dat ’n aansienlike aantal van hierdie ander skape tussen 1931 en 1935 begin verskyn het. In 1935 het Jehovah die Johannes-klas in staat gestel om die ware identiteit van die groot menigte van Openbaring 7:9-17 te verstaan. Sedertdien is die insameling van hierdie menigte sterk beklemtoon. Teen die jaar 2005 het hulle reeds meer as sesmiljoen getel, en hulle word steeds meer. Die een soos ’n seun van die mens het inderdaad gedurende hierdie tyd van die einde ’n oorvloedige, vreugdevolle oes ingesamel.—Vergelyk Eksodus 23:16; 34:22.

Die wingerdstok van die aarde word getrap

24. Wat is in die hande van die vyfde engel, en wat roep die sesde engel uit?

²⁴ Wanneer die oes van redding voltooi is, breek die tyd vir ’n ander oes aan. Johannes vertel: “En nog ’n ander engel [die vyfde] het uit die tempelheiligdom wat in die hemel is, te voorskyn gekom, en hy het ook ’n skerp sekel gehad. En nog ’n ander engel [die sesde] het uit die altaar te voorskyn gekom, en hy het gesag oor die vuur gehad. En hy het met ’n harde stem uitgeroep na die een wat die skerp sekel gehad het en gesê: ‘Steek jou skerp sekel in en samel die trosse van die wingerdstok van die aarde in, want sy druiwe het ryp geword’” (Openbaring 14:17, 18). Aan die engeleskare word gedurende die dag van die Here baie oeswerk toevertrou, waarin hulle die goeies van die slegtes skei!

25. (a) Wat word aangedui deur die feit dat die vyfde engel uit die tempelheiligdom gekom het? (b) Waarom is dit gepas dat die bevel om te begin maai, van ’n engel kom wat “uit die altaar te voorskyn gekom” het?

²⁵ Die vyfde engel kom uit Jehovah se teenwoordigheid in die tempelheiligdom; die finale oes vind dus ook volgens Jehovah se wil plaas. Die engel word beveel om sy werk te begin deur middel van ’n boodskap wat oorgedra word deur ’n ander engel wat “uit die altaar te voorskyn gekom” het. Hierdie feit is uiters betekenisvol, aangesien getroue siele onder die altaar gevra het: “Tot wanneer, Soewereine Heer, heilig en waaragtig, weerhou u u daarvan om te oordeel en ons bloed te wreek op dié wat op die aarde woon?” (Openbaring 6:9, 10). Wanneer die wingerdstok van die aarde geoes word, sal hierdie geroep om wraak verhoor word.

26. Wat is “die wingerdstok van die aarde”?

²⁶ Maar wat is “die wingerdstok van die aarde”? In die Hebreeuse Geskrifte is die Joodse nasie Jehovah se wingerdstok genoem (Jesaja 5:7; Jeremia 2:21). Jesus Christus en dié wat saam met hom in God se Koninkryk sal dien, word ook ’n wingerdstok genoem (Johannes 15:1-8). Teen hierdie agtergrond is die betekenisvolle kenmerk van ’n wingerdstok dat dit vrugte voortbring, en die ware Christelike wingerdstok het ’n oorvloed vrugte tot lof van Jehovah voortgebring (Matteus 21:43). “Die wingerdstok van die aarde” is dus beslis nie hierdie ware wingerdstok nie, maar Satan se nabootsing daarvan, sy verdorwe sigbare regeringstelsel oor die mensdom, met die verskillende “trosse” demoniese vrugte wat dit deur die eeue heen voortgebring het. Babilon die Grote, waarin die afvallige Christendom so prominent is, het groot invloed oor hierdie giftige wingerdstok uitgeoefen.—Vergelyk Deuteronomium 32:32-35.

27. (a) Wat vind plaas wanneer die engel met die sekel die wingerdstok van die aarde oes? (b) Watter profesieë in die Hebreeuse Geskrifte dui die grootte van die oes aan?

²⁷ Die oordeel moet voltrek word! “En die engel het sy sekel in die aarde ingesteek en die wingerdstok van die aarde geoes, en hy het dit in die groot wynpers van die toorn van God geslinger. En die wynpers is buitekant die stad getrap, en bloed het uit die wynpers uitgekom tot aan die tooms van die perde, vir ’n afstand van duisend-seshonderd stadie” (Openbaring 14:19, 20). Jehovah se verontwaardiging teen hierdie wingerdstok is lankal aangekondig (Sefanja 3:8). ’n Profesie in die boek Jesaja laat ons in geen twyfel dat hele nasies vernietig sal word wanneer die wynpers getrap word nie (Jesaja 63:3-6). Joël het ook voorspel dat groot “menigtes”, hele nasies, in “die wynpers”, in “die laagvlakte van die beslissing”, getrap en sodoende vernietig sou word (Joël 3:12-14). Dit is werklik ’n ontsaglike oes waarvan die gelyke nooit weer sal plaasvind nie! Volgens Johannes se visioen word nie net die druiwe geoes nie, maar word die hele simboliese wingerdstok afgesny en in die wynpers gegooi om getrap te word. Só sal die wingerdstok van die aarde uitgeroei word en sal dit nooit weer kan groei nie.

28. Wie trap die wingerdstok van die aarde, en wat beteken dit dat die wynpers “buitekant die stad getrap” word?

²⁸ In die visioen doen perde die trapwerk, want die bloed wat uit die wingerdstok getrap word, kom tot aan “die tooms van die perde”. Aangesien die term “perde” gewoonlik na oorlogsverrigtinge verwys, moet dit ’n oorlogstyd wees. Daar word gesê dat die leërs van die hemele wat Jesus in die finale oorlog teen Satan se stelsel van dinge volg, “die wynpers van die toorn van die gramskap van God die Almagtige” trap (Openbaring 19:11-16). Dit is onteenseglik hulle wat die wingerdstok van die aarde trap. Die wynpers word “buitekant die stad getrap”, dit wil sê buitekant hemelse Sion. Dit is inderdaad gepas dat die wingerdstok van die aarde op die aarde getrap word. Maar dit sal ook “buitekant die stad getrap” word in die sin dat die oorblywendes van die vrou se saad, wat die hemelse Sion op die aarde verteenwoordig, geen kwaad aangedoen sal word nie. Hulle sal saam met die groot menigte veilig in Jehovah se aardse organisatoriese reëling verskuil wees.—Jesaja 26:20, 21.

29. Hoe diep is die bloed uit die wynpers, hoe ver strek dit, en wat dui dit alles aan?

²⁹ Hierdie treffende visioen het ’n parallel in die verbryseling van die koninkryke van die aarde deur die Koninkryksklip wat in Daniël 2:34, 44 beskryf word. Daar sal ’n uitwissing wees. Die rivier van bloed uit die wynpers is baie diep, tot aan die tooms van die perde, en dit strek oor ’n afstand van 1 600 stadie.a Hierdie groot syfer, wat verkry word wanneer die vierkant van vier met die vierkant van tien vermenigvuldig word (4 x 4 x 10 x 10), dra nadruklik die boodskap oor dat die bewys van die vernietiging oor die hele aarde aangetref sal word (Jesaja 66:15, 16). Die vernietiging sal volkome en onherroeplik wees. Nooit, nee, nooit weer sal Satan se wingerdstok van die aarde wortelskiet nie!—Psalm 83:17, 18.

30. Wat is die vrugte van Satan se wingerdstok, en wat moet ons vaste voorneme wees?

³⁰ Aangesien ons diep in die tyd van die einde lewe, is die visioen van hierdie twee oeste baie betekenisvol. Ons hoef net om ons rond te kyk om die vrugte van Satan se wingerdstok te sien. Aborsies en ander vorme van moord; homoseksualiteit, egbreuk en ander vorme van onsedelikheid; oneerlikheid en ’n gebrek aan natuurlike liefde—al hierdie dinge maak hierdie wêreld afskuwelik in Jehovah se oë. Satan se wingerdstok dra “die vrug van ’n gifplant en als”. Die verderflike, afgodiese handelswyse daarvan doen die mensdom se Grootse Skepper oneer aan (Deuteronomium 29:18; 32:5; Jesaja 42:5, 8). Wat ’n voorreg is dit tog om aktief saam met die Johannes-klas deel te neem aan die insameling van heilsame vrugte wat Jesus tot lof van Jehovah voortbring! (Lukas 10:2). Mag dit ons almal se vaste voorneme wees om nooit deur die wingerdstok van hierdie wêreld besmet te word nie sodat ons nie saam met die wingerdstok van die aarde getrap word wanneer Jehovah se ongunstige oordeel voltrek word nie.

[Voetnoot]

[Venster op bladsy 208]

‘Die wyn van haar hoerery’

’n Prominente deel van Babilon die Grote is die Rooms-Katolieke Kerk. Die kerk word bestuur deur die pous in Rome en beweer dat elke pous ’n opvolger van die apostel Petrus is. Hier volg enkele gepubliseerde feite oor hierdie sogenaamde opvolgers:

Formosus (891-96): “Nege maande ná sy dood is Formosus se lyk uit die pouslike grafkelder gehaal en voor ’n ‘lykraad’ onder voorsitterskap van Stefanus [die nuwe pous] verhoor. Die afgestorwe pous is beskuldig van buitensporige ambisie vir die pouslike amp en al sy dade is ongeldig verklaar. . . . Die pouslike gewaad is van die lyk verwyder; die vingers van die regterhand is afgesit.”—New Catholic Encyclopedia.

Stefanus VI (896-97): “Binne ’n paar maande [ná die verhoor van Formosus se lyk] het ’n gewelddadige reaksie die pousskap van pous Stefanus beëindig; hy is die pouslike onderskeidingstekens ontneem, in die gevangenis gegooi en verwurg.”—New Catholic Encyclopedia.

Sergius III (904-11): “Sy twee onmiddellike voorgangers . . . is in die gevangenis verwurg. . . . In Rome is hy ondersteun deur die Theophylactus-familie, by wie se een dogter, Marozia, hy glo ’n seun gehad het (later pous Johannes XI).”—New Catholic Encyclopedia.

Stefanus VII (928-31): “In die laaste jare van sy pousskap het pous Johannes X . . . hom die gramskap van Marozia, die Donna Senatrix van Rome, op die hals gehaal en is hy in die gevangenis gegooi en vermoor. Marozia het die pousdom toe aan pous Leo VI toegeken, wat na 6 1/2 maande in die amp gesterf het. Stefanus VII het hom opgevolg, waarskynlik weens Marozia se invloed. . . . Gedurende sy 2 jaar as pous was hy magteloos onder die oorheersing van Marozia.”—New Catholic Encyclopedia.

Johannes XI (931-35): “Ná die dood van Stefanus VII . . . het Marozia, van die Huis van Theophylactus, die pousdom vir haar seun Johannes, ’n jong man in sy vroeë 20’s, bekom. . . . As pous is Johannes deur sy moeder oorheers.”—New Catholic Encyclopedia.

Johannes XII (955-64): “Hy was skaars agtien, en eietydse verslae praat almal van sy gebrek aan belangstelling in geestelike sake, verslawing aan onverfynde genietinge en uiters losbandige lewe.”—The Oxford Dictionary of Popes.

Benedictus IX (1032-44; 1045; 1047-48): “Hy was berug vir die feit dat hy die pousdom aan sy peetvader verkoop het en die amp daarna twee maal teruggeëis het.”—The New Encyclopædia Britannica.

Pleks van die voorbeeld van die getroue Petrus te volg, was hierdie en ander pouse dus ’n bose invloed. Hulle het toegelaat dat bloedskuld en geestelike en fisiese hoerery, sowel as ’n Isebel-invloed, die kerk verderf waaroor hulle geheers het (Jakobus 4:4). In 1917 het die Bybelstudente se boek The Finished Mystery baie van hierdie feite in naakte besonderhede vermeld. Dit was een manier waarop die Bybelstudente in daardie dae ‘die aarde met allerhande plae getref het’.—Openbaring 11:6; 14:8; 17:1, 2, 5.

[Prent op bladsy 206]

Die gekroonde Christus voltrek oordeel met engelesteun

[Prent op bladsy 207]

Nadat Babilon in 539 v.G.J. geval het, is sy gevangenes vrygelaat

Hoofstuk 31

Jehovah se werke—groot en wonderbaar

Visioen 10—Openbaring 15:1–16:21

Onderwerp: Jehovah in sy heiligdom; die sewe bakke van sy gramskap word op die aarde uitgegooi

Tyd van vervulling: 1919 tot Armageddon

1, 2. (a) Van watter derde teken vertel Johannes? (b) Van watter rol van die engele is Jehovah se knegte al lank bewus?

’N VROU wat geboorte gee aan ’n manlike kind! ’n Groot draak wat daardie kind wil verslind! Hierdie twee hemelse tekens, wat so treffend in Openbaring hoofstuk 12 uitgebeeld word, het ons laat verstaan dat die eeue oue geskil waarby die Saad van God se vrou en Satan en sy demoniese saad betrokke is, sy klimaks bereik. Johannes het hierdie simbole na vore gebring deur te sê: “En ’n groot teken is in die hemel gesien . . . En nog ’n teken is . . . gesien” (Openbaring 12:1, 3, 7-12). Nou vertel Johannes van ’n derde teken: “En ek het in die hemel ’n ander teken gesien, groot en wonderbaar: sewe engele met sewe plae. Dit is die laastes, want deur middel daarvan word die toorn van God tot ’n einde gebring” (Openbaring 15:1). Hierdie derde teken het ook lewensbelangrike betekenis vir Jehovah se knegte.

² Let op die belangrike rol wat engele weer in die uitvoering van God se wil speel. Jehovah se knegte is al lank van hierdie feit bewus. Trouens, die eertydse psalmis het onder inspirasie selfs met sulke engele gepraat en hulle aangespoor: “Loof Jehovah, o sy engele, magtig in krag, wat sy woord uitvoer, deur na die stem van sy woord te luister”! (Psalm 103:20). In hierdie nuwe toneel word engele nou aangesê om die sewe laaste plae uit te gooi.

3. Wat is die sewe plae, en waarop wys die feit dat dit uitgegooi word?

³ Wat is hierdie plae? Soos die sewe trompetstote is dit snydende oordeelsboodskappe wat Jehovah se beskouing van verskeie aspekte van hierdie wêreld bekend maak en van die uiteindelike gevolg van sy regterlike beslissings waarsku (Openbaring 8:1–9:21). Die feit dat dit uitgegooi word, wys op die voltrekking van hierdie oordele, wanneer die voorwerpe van Jehovah se gramskap in die dag van sy brandende toorn vernietig word (Jesaja 13:9-13; Openbaring 6:16, 17). Ja, deur middel van hierdie plae “word die toorn van God tot ’n einde gebring”. Maar voordat Johannes bespreek hoe die plae uitgegooi word, vertel hy ons van party mense wat nie daardeur benadeel sal word nie. Hierdie lojales het die merk van die wilde dier geweier en sing lofliedere aan Jehovah terwyl hulle sy dag van wraak verkondig.—Openbaring 13:15-17.

Die lied van Moses en van die Lam

4. Wat sien Johannes nou?

⁴ Johannes sien nou ’n merkwaardige panorama: “En ek het iets gesien wat soos ’n glasagtige see gemeng met vuur lyk, en dié wat oor die wilde dier en oor sy beeld en oor die getal van sy naam seëvier en by die glasagtige see staan, met harpe van God.”—Openbaring 15:2.

5. Wat word afgebeeld deur die “glasagtige see gemeng met vuur”?

⁵ Die “glasagtige see” is dieselfde as die een wat Johannes vroeër voor die troon van God gesien het (Openbaring 4:6). Dit is soortgelyk aan “die gegote see” (waterhouer) van Salomo se tempel, waar die priesters water gekry het om hulleself te reinig (1 Konings 7:23). Dit is dus ’n goeie voorstelling van “die waterbad”, dit wil sê God se Woord, waardeur Jesus die priesterlike gemeente van gesalfde Christene reinig (Efesiërs 5:25, 26; Hebreërs 10:22). Hierdie glasagtige see is “gemeng met vuur”, wat aandui dat hierdie gesalfdes getoets en gesuiwer word terwyl hulle vashou aan die hoë standaard wat vir hulle gestel word. Verder herinner dit ons daaraan dat God se Woord ook uitinge van vurige oordele teen sy vyande bevat (Deuteronomium 9:3; Sefanja 3:8). Party van hierdie vurige oordele word geopenbaar in die sewe laaste plae wat spoedig uitgegooi gaan word.

6. (a) Wie is die sangers wat voor die hemelse glasagtige see staan, en hoe weet ons dit? (b) Hoe “seëvier” hulle?

⁶ Die feit dat die gegote see in Salomo se tempel vir die gebruik van die priesters was, dui aan dat die sangers wat voor die hemelse glasagtige see staan, ’n priesterlike klas is. Hulle het “harpe van God”, en daarom verbind ons hulle met die 24 ouderlinge en die 144 000, aangesien hierdie groepe ook met harpbegeleiding sing (Openbaring 5:8; 14:2). Die sangers wat Johannes sien, ‘seëvier oor die wilde dier en oor sy beeld en oor die getal van sy naam’. Hulle moet dus die lede van die 144 000 wees wat gedurende die laaste dae op die aarde lewe. As ’n groep seëvier hulle inderdaad. Hulle weier al byna 90 jaar lank, sedert 1919, om die merk van die wilde dier te aanvaar of om op sy beeld te vertrou as die mens se enigste hoop op vrede. Baie van hulle het reeds getrou volhard tot in die dood en is nou in die hemel, waar hulle ongetwyfeld met besondere genot luister na die sang van hulle broers wat nog op die aarde is.—Openbaring 14:11-13.

7. Hoe is die harp in eertydse Israel gebruik, en watter uitwerking behoort die teenwoordigheid van harpe van God in Johannes se visioen op ons te hê?

⁷ Hierdie lojale oorwinnaars het harpe van God. In hierdie opsig is hulle soos die eertydse tempel-Leviete, wat Jehovah met sang en harpbegeleiding aanbid het. Party het ook met harpbegeleiding geprofeteer (1 Kronieke 15:16; 25:1-3). Die pragtige klanke van die harp het Israel se liedere van vreugde en gebede van lof en danksegging tot Jehovah welluidender gemaak (1 Kronieke 13:8; Psalm 33:2; 43:4; 57:7, 8). In tye van neerslagtigheid of gevangenskap is die harp nie gehoor nie (Psalm 137:2). Die teenwoordigheid van harpe van God in hierdie visioen moet ons afwagting wek vir ’n jubelende, triomfantlike lof- en danklied aan ons God.a

8. Watter lied word gesing, en wat is die woorde daarvan?

⁸ Johannes sê: “En hulle sing die lied van Moses, die slaaf van God, en die lied van die Lam en sê: ‘Groot en wonderbaar is u werke, Jehovah God, die Almagtige. Regverdig en waaragtig is u weë, Koning van die ewigheid. Wie sal u nie werklik vrees nie, Jehovah, en u naam nie verheerlik nie, want u alleen is lojaal? Want al die nasies sal kom en voor u aanbid, omdat u regverdige verordeninge openbaar gemaak is.’”—Openbaring 15:3, 4.

9. Waarom word die lied onder andere “die lied van Moses” genoem?

⁹ Hierdie oorwinnaars sing “die lied van Moses”, dit wil sê ’n lied wat ooreenkom met die een wat Moses in soortgelyke omstandighede gesing het. Nadat die Israeliete die tien plae in Egipte en die vernietiging van die Egiptiese leërs in die Rooi See aanskou het, het Moses hulle in so ’n triomfantlike loflied aan Jehovah gelei en gesê: “Jehovah sal as koning heers tot onbepaalde tyd, ja, vir ewig” (Eksodus 15:1-19). Hoe gepas is dit tog dat die sangers in Johannes se visioen, wat oor die wilde dier seëvier en die sewe laaste plae verkondig, ook tot “die Koning van die ewigheid” sing!—1 Timoteus 1:17.

10. Watter ander lied is deur Moses gekomponeer, en hoe hou die laaste vers daarvan met die hedendaagse groot menigte verband?

¹⁰ In ’n ander lied, wat gekomponeer is toe die Israeliete hulle vir die verowering van Kanaän gereedgemaak het, het die bejaarde Moses vir daardie nasie gesê: “Ek sal die naam van Jehovah bekend maak. Skryf grootheid toe aan ons God!” Die laaste vers van hierdie lied het ook aanmoediging vir nie-Israeliete bevat, en Moses se geïnspireerde woorde geld vir die hedendaagse groot menigte: “Wees bly, o nasies, saam met sy volk.” En waarom moet hulle bly wees? Omdat Jehovah nou “die bloed van sy knegte [sal] wreek, en hy sal wraak op sy teenstanders uitoefen”. Hierdie voltrekking van regverdige oordeel sal almal wat op Jehovah hoop, laat jubel.—Deuteronomium 32:3, 43; Romeine 15:10-13; Openbaring 7:9.

11. Hoe word die lied wat Johannes gehoor het, nog steeds vervul?

¹¹ Hoe verheug sou Moses tog gewees het om nou in die dag van die Here te wees en saam met die hemelse koor te sing: “Al die nasies sal kom en voor u aanbid”! Hierdie allesoortreffende lied word vandag nog in ’n wonderlike sin vervul terwyl ons, nie net in ’n visioen nie, maar as ’n lewende werklikheid, sien hoe die miljoene uit “die nasies” nou vreugdevol na Jehovah se aardse organisasie stroom.

12. Waarom word die lied van die seëvierendes ook “die lied van die Lam” genoem?

¹² Nietemin is dit nie net die lied van Moses nie, maar ook “van die Lam”. Hoe so? Moses was Jehovah se profeet vir Israel, maar Moses het self voorspel dat Jehovah ’n profeet soos hy sou verwek. Hierdie profeet was die Lam, Jesus Christus. Terwyl Moses “die slaaf van God” was, was Jesus God se Seun, in werklikheid die Grotere Moses (Deuteronomium 18:15-19; Handelinge 3:22, 23; Hebreërs 3:5, 6). Die sangers sing derhalwe ook “die lied van die Lam”.

13. (a) Hoe is Jesus, hoewel hy groter is as Moses, soos hy? (b) Hoe kan ons ons met die sangers verenig?

¹³ Soos Moses het Jesus God in die openbaar geloof en voorspel dat Hy oor alle vyande sal seëvier (Matteus 24:21, 22; 26:30; Lukas 19:41-44). Jesus het ook uitgesien na die tyd wanneer die nasies sou inkom om Jehovah te loof, en as die selfopofferende “Lam van God” het hy sy menselewe afgelê om dit moontlik te maak. (Johannes 1:29; Openbaring 7:9; vergelyk Jesaja 2:2-4; Sagaria 8:23.) En net soos Moses God se naam, Jehovah, waardeer en verheerlik het, het Jesus God se naam openbaar gemaak (Eksodus 6:2, 3; Psalm 90:1, 17; Johannes 17:6). Aangesien Jehovah lojaal is, sal sy glorieryke beloftes beslis vervul word. Ons is dit dan sekerlik eens met hierdie lojale sangers, met die Lam en met Moses deur die woorde van die lied te onderskryf: “Wie sal u nie werklik vrees nie, Jehovah, en u naam nie verheerlik nie?”

Die engele met die bakke

14. Wie sien Johannes uit die heiligdom te voorskyn kom, en wat word vir hulle gegee?

¹⁴ Dit is gepas dat ons die lied van hierdie gesalfde oorwinnaars hoor. Waarom? Omdat hulle op die aarde die oordele bekend gemaak het wat in die bakke vol van die toorn van God was. Maar meer as blote mense is daarby betrokke om hierdie bakke uit te gooi, soos Johannes verder toon: “En ná hierdie dinge het ek gesien, en die heiligdom van die tent van die getuienis is in die hemel oopgemaak, en die sewe engele met die sewe plae het uit die heiligdom te voorskyn gekom, geklee in skoon, blink linne en om hulle bors omgord met goue gordels. En een van die vier lewende wesens het vir die sewe engele sewe goue bakke gegee, wat vol was van die toorn van God, wat vir ewig en altyd lewe.”—Openbaring 15:5-7.

15. Waarom is dit nie verbasend dat die sewe engele uit die heiligdom te voorskyn kom nie?

¹⁵ In die Israelitiese tempel, wat voorstellings van hemelse dinge bevat het, kon net die hoëpriester in die Allerheiligste, wat hier “die heiligdom” genoem word, ingaan (Hebreërs 9:3, 7). Dit stel die plek van Jehovah se teenwoordigheid in die hemel voor. Maar in die hemel self het nie net die Hoëpriester Jesus Christus die voorreg om voor Jehovah in te gaan nie, maar ook die engele (Matteus 18:10; Hebreërs 9:24-26). Dit is dus nie verbasend dat sewe engele in die visioen uit die heiligdom in die hemel kom nie. Hulle het ’n opdrag van Jehovah God self: Gooi die bakke vol van die toorn van God uit.—Openbaring 16:1.

16. (a) Wat toon dat die sewe engele ten volle bevoeg is vir hulle werk? (b) Wat dui aan dat ander betrokke is by die groot taak om die simboliese bakke uit te gooi?

¹⁶ Hierdie engele is ten volle bevoeg vir hierdie werk. Hulle is geklee in skoon, blink linne, wat toon dat hulle geestelik rein en heilig is, regverdig in Jehovah se oë. Hulle dra ook goue gordels. Gordels word gewoonlik gebruik wanneer iemand hom omgord om ’n taak te verrig (Levitikus 8:7, 13; 1 Samuel 2:18; Lukas 12:37; Johannes 13:4, 5). Die engele is dus omgord om ’n taak uit te voer. Wat meer is, hulle gordels is van goud. In die eertydse tabernakel is goud gebruik om goddelike, hemelse dinge voor te stel (Hebreërs 9:4, 11, 12). Dit beteken dat hierdie engele ’n kosbare, goddelike diensopdrag het om uit te voer. Ander is ook by hierdie groot taak betrokke. Een van die vier lewende wesens oorhandig die bakke aan hulle. Dit was ongetwyfeld die eerste lewende wese, wat soos ’n leeu gelyk het en ’n simbool was van die vrymoedigheid en onoorwinlike moed wat nodig is om Jehovah se oordele aan te kondig.—Openbaring 4:7.

Jehovah in sy heiligdom

17. Wat sê Johannes vir ons omtrent die heiligdom, en hoe herinner dit ons aan die heiligdom in eertydse Israel?

¹⁷ Johannes sluit hierdie deel van die visioen af deur vir ons te sê: “En die heiligdom het vol rook geword weens die heerlikheid van God en weens sy krag, en niemand kon in die heiligdom ingaan totdat die sewe plae van die sewe engele voleindig was nie” (Openbaring 15:8). Daar was geleenthede in Israel se geskiedenis toe ’n wolk die letterlike heiligdom bedek het, en hierdie openbaring van Jehovah se heerlikheid het die priesters verhinder om daar in te gaan. (1 Konings 8:10, 11; 2 Kronieke 5:13, 14; vergelyk Jesaja 6:4, 5.) Dit was tye toe Jehovah daadwerklik by gebeure op die aarde betrokke was.

18. Wanneer sal die sewe engele terugkeer om aan Jehovah verslag te doen?

¹⁸ Jehovah stel ook intens belang in dinge wat nou op die aarde gebeur. Hy wil hê dat die sewe engele hulle taak moet voltooi. Dit is ’n beslissende tyd van oordeel, soos in Psalm 11:4-6 beskryf word: “Jehovah is in sy heilige tempel. Jehovah—in die hemel is sy troon. Sy oë sien, sy stralende oë ondersoek die mensekinders. Jehovah ondersoek die regverdige sowel as die goddelose, en Sy siel haat beslis elkeen wat geweld liefhet. Hy sal valstrikke, vuur en swael op die goddeloses laat reën, en ’n verskroeiende wind, as die deel van hulle beker.” Die sewe engele sal nie na Jehovah se verhewe teenwoordigheid terugkeer totdat hierdie sewe plae op die goddeloses uitgegooi is nie.

19. (a) Watter bevel word gegee, en deur wie? (b) Wanneer is daar begin om die simboliese bakke uit te gooi?

¹⁹ Die ontsagwekkende bevel weerklink: “En ek het ’n harde stem uit die heiligdom vir die sewe engele hoor sê: ‘Gaan gooi die sewe bakke van die toorn van God op die aarde uit’” (Openbaring 16:1). Wie gee hierdie bevel? Dit moet Jehovah self wees, aangesien die glorie van sy heerlikheid en mag verhoed het dat enigiemand anders in die heiligdom ingaan. Jehovah het in 1918 na sy geestelike tempel gekom om te oordeel (Maleagi 3:1-5). Dit moes dus kort ná daardie jaar gewees het dat hy die bevel gegee het om die bakke van die toorn van God uit te gooi. Trouens, die oordele in die simboliese bakke is van 1922 af kragtig verkondig. En die verkondiging daarvan bereik vandag ’n crescendo.

Die bakke en die trompetstote

20. Wat openbaar die bakke van Jehovah se toorn, waarvan waarsku hulle, en hoe word hulle uitgegooi?

²⁰ Die bakke van Jehovah se toorn openbaar aspekte van die wêreldtoneel soos Jehovah dit sien en waarsku van oordele wat Jehovah sal voltrek. Die engele gooi die bakke uit deur middel van die gemeente van gesalfde Christene op die aarde, dié wat die lied van Moses en die lied van die Lam sing. Terwyl die Johannes-klas die Koninkryk as goeie nuus verkondig, openbaar hulle moedig die inhoud van hierdie bakke vol toorn (Matteus 24:14; Openbaring 14:6, 7). Hulle tweeledige boodskap is dus vreedsaam in die sin dat dit bevryding vir die mensdom verkondig, maar ’n oorlogsboodskap in die sin dat dit waarsku van “die dag van die wraak van ons God”.—Jesaja 61:1, 2.

21. Hoe stem die teikens van die eerste vier bakke van God se toorn ooreen met dié van die eerste vier trompetstote, en hoe verskil hulle?

²¹ Die teikens van die eerste vier bakke van God se toorn stem ooreen met dié van die eerste vier trompetstote, dit wil sê die aarde, die see, die riviere en waterfonteine, en die hemelse ligbronne (Openbaring 8:1-12). Maar die trompetstote het plae oor “’n derde” aangekondig, terwyl die geheel getref word wanneer die bakke van God se toorn uitgegooi word. Hoewel die Christendom, as “’n derde”, eerste aandag ontvang het gedurende die dag van die Here, is geen deel van Satan se stelsel dus vrygestel van teistering deur Jehovah se plaende oordeelsboodskappe en die smarte wat dit meebring nie.

22. Hoe was die laaste drie trompetstote anders, en hoe hou hulle verband met die laaste drie bakke van Jehovah se toorn?

²² Die laaste drie trompetstote was anders, want hulle is weë genoem (Openbaring 8:13; 9:12). Die eerste twee van hierdie weë het in die besonder uit die sprinkane en die leërs van ruiters bestaan, terwyl die derde wee die geboorte van Jehovah se Koninkryk ingelui het (Openbaring 9:1-21; 11:15-19). Soos ons sal sien, sluit die laaste drie bakke van sy gramskap ook party van hierdie aspekte in, maar hulle verskil ietwat van die drie weë. Laat ons nou noukeurig aandag skenk aan die dramatiese onthullings wat volg wanneer die bakke van Jehovah se toorn uitgegooi word.

[Voetnoot]

Hoofstuk 32

God se toorn word tot ’n einde gebring

1. Wat sal plaasgevind het wanneer die sewe bakke geheel en al uitgegooi is, en watter vrae ontstaan nou in verband met die bakke?

JOHANNES het reeds die engele aan ons voorgestel wat beveel is om die sewe bakke uit te gooi. Hy sê vir ons dat dit “die laastes [is], want deur middel daarvan word die toorn van God tot ’n einde gebring” (Openbaring 15:1; 16:1). Hierdie plae, wat Jehovah se strafmaatreëls teen goddeloosheid op die aarde openbaar, moet geheel en al uitgegooi word. Wanneer dit verby is, sal God se oordele voltrek wees. Satan se wêreld sal nie meer bestaan nie! Wat beteken hierdie plae vir die mensdom en die heersers van die teenswoordige goddelose stelsel? Hoe kan Christene voorkom dat hulle saam met hierdie gedoemde wêreld geteister word? Dit is lewensbelangrike vrae, en hulle gaan nou beantwoord word. Almal wat daarna smag dat regverdigheid seëvier, sal lewendige belangstelling toon in wat Johannes vervolgens sien.

Jehovah se toorn teen “die aarde”

2. Wat gebeur wanneer die eerste engel sy bak op die aarde uitgooi, en wat word deur “die aarde” gesimboliseer?

² Die eerste engel gaan oor tot aksie! “En die eerste het weggegaan en sy bak op die aarde uitgegooi. En ’n skadelike en kwaadaardige sweer het aan die mense gekom wat die merk van die wilde dier gehad en wat sy beeld aanbid het” (Openbaring 16:2). Soos in die geval van die eerste trompetstoot simboliseer “die aarde” hier die oënskynlik bestendige politieke stelsel wat Satan in Nimrod se tyd, meer as 4 000 jaar gelede, hier op die aarde begin bou het.—Openbaring 8:7.

3. (a) Hoe het baie regerings van hulle onderdane dinge vereis wat op aanbidding neerkom? (b) Wat het die nasies as ’n plaasvervanger van God se Koninkryk voortgebring, en wat is die uitwerking op dié wat dit aanbid?

³ In hierdie laaste dae het baie regerings van hulle onderdane dinge vereis wat op aanbidding neerkom en volgehou dat die Staat bo God of enige ander lojaliteit verhef moet word. (2 Timoteus 3:1; vergelyk Lukas 20:25; Johannes 19:15.) Sedert 1914 het dit iets algemeens geword dat nasies hulle jeug vir diensplig oproep sodat die nasies in staat of gereed is om die soort totale oorloë te voer wat die bladsye van die hedendaagse geskiedenis met soveel bloed bevlek het. Gedurende die dag van die Here het die nasies ook die beeld van die dier—die Volkebond en sy opvolger, die Verenigde Nasies—as ’n plaasvervanger van God se Koninkryk voortgebring. Hoe lasterlik is dit tog om te verklaar, soos sommige pouse onlangs gedoen het, dat hierdie mensgemaakte liggaam die nasies se enigste hoop op vrede is! Dit staan God se Koninkryk onversetlik teë. Dié wat dit aanbid, word geestelik onrein, vol swere, net soos die Egiptenaars wat Jehovah in Moses se dag teëgestaan het, met letterlike sere en swere geteister is.—Eksodus 9:10, 11.

4. (a) Waarop lê die inhoud van die eerste bak van die toorn van God sterk klem? (b) Hoe beskou Jehovah dié wat die merk van die wilde dier aanvaar?

⁴ Die inhoud van hierdie bak lê sterk klem op die keuse waarvoor mense staan. Hulle moet óf die wêreld se misnoeë óf Jehovah se verontwaardiging verduur. Dwang word op die mensdom uitgeoefen om die merk van die wilde dier te aanvaar, sodat “niemand sal kan koop of verkoop nie, behalwe iemand wat die merk het, die naam van die wilde dier of die getal van sy naam” (Openbaring 13:16, 17). Maar ’n prys moet hiervoor betaal word! Jehovah beskou dié wat die merk aanvaar, as mense wat met “’n skadelike en kwaadaardige sweer” getref is. Sedert 1922 is hulle in die openbaar gemerk as mense wat die lewende God verwerp het. Hulle politieke planne misluk, en hulle is beangs. Geestelik is hulle onrein. Tensy hulle berou toon, sal hierdie “skadelike” siekte tot die dood lei, want dit is nou Jehovah se oordeelsdag. Daar is geen neutrale posisie nie—’n mens is óf deel van die wêreld se stelsel van dinge óf jy dien Jehovah aan die kant van sy Christus.—Lukas 11:23; vergelyk Jakobus 4:4.

Die see word bloed

5. (a) Wat vind plaas wanneer die tweede bak uitgegooi word? (b) Hoe beskou Jehovah dié wat in die simboliese see woon?

⁵ Die tweede bak van God se toorn moet nou uitgegooi word. Wat sal dit vir die mensdom beteken? Johannes sê vir ons: “En die tweede het sy bak in die see uitgegooi. En dit het bloed geword soos van ’n dooie, en elke lewende siel het gesterf, ja, die dinge in die see” (Openbaring 16:3). Soos die tweede trompetstoot word hierdie bak gerig teen “die see”—die siedende, opstandige mensemassa wat van Jehovah vervreemd is (Jesaja 57:20, 21; Openbaring 8:8, 9). In Jehovah se oë is hierdie “see” soos bloed, ongeskik vir enigiets om in te lewe. Daarom moet Christene geen deel van die wêreld wees nie (Johannes 17:14). Wanneer die tweede bak van God se toorn uitgegooi word, openbaar dit dat alle mense wat in hierdie see woon, in Jehovah se oë dood is. As gevolg van gemeenskapsverantwoordelikheid is die mensdom skuldig aan die grootskaalse vergieting van onskuldige bloed. Wanneer Jehovah se dag van toorn aanbreek, sal hulle letterlik sterf deur die toedoen van sy teregstellingsmagte.—Openbaring 19:17, 18; vergelyk Efesiërs 2:1; Kolossense 2:13.

Hulle word bloed gegee om te drink

6. Wat vind plaas wanneer die derde bak uitgegooi word, en watter woorde sê ’n engel en die altaar?

⁶ Die derde bak van God se toorn het, soos die derde trompetstoot, ’n uitwerking op varswaterbronne. “En die derde het sy bak in die riviere en die waterfonteine uitgegooi. En hulle het bloed geword. En ek het die engel wat oor die waters is, hoor sê: ‘U, die Een wat is en wat was, die Een wat lojaal is, is regverdig, omdat u hierdie beslissings gegee het, want hulle het die bloed van heiliges en van profete uitgestort, en u het vir hulle bloed gegee om te drink. Hulle verdien dit.’ En ek het die altaar hoor sê: ‘Ja, Jehovah God, die Almagtige, waaragtig en regverdig is u regterlike beslissings.’”—Openbaring 16:4-7.

7. Wat word afgebeeld deur “die riviere en die waterfonteine”?

⁷ Hierdie “riviere en die waterfonteine” beeld die sogenaamde vars bronne van leiding en wysheid af wat deur hierdie wêreld aanvaar word, soos die politieke, ekonomiese, wetenskaplike, opvoedkundige, maatskaplike en godsdiensfilosofieë wat mense se handelswyse en besluite rig. Pleks dat mense op Jehovah, die Fontein van die lewe, vertrou vir lewegewende waarheid, het hulle ‘vir hulle stukkende reënputte uitgekap’ en ‘die wysheid van hierdie wêreld wat dwaasheid by God is’, ingedrink.—Jeremia 2:13; 1 Korintiërs 1:19; 2:6; 3:19; Psalm 36:9.

8. Op watter maniere het die mensdom hom bloedskuld op die hals gehaal?

⁸ Sulke besoedelde “waters” het mense bloedskuldig laat word deur hulle byvoorbeeld aan te spoor om op groot skaal bloed te vergiet in oorloë, wat in die afgelope eeu meer as honderdmiljoen lewens geëis het. Veral in die Christendom, waar die twee wêreldoorloë uitgebreek het, was mense “haastig om onskuldige bloed te vergiet”, en dit het die bloed van God se eie getuies ingesluit (Jesaja 59:7; Jeremia 2:34). Die mensdom het hom ook bloedskuld op die hals gehaal deur die misbruik van groot hoeveelhede bloed vir oortappings, wat in stryd is met Jehovah se regverdige wette (Genesis 9:3-5; Levitikus 17:14; Handelinge 15:28, 29). Om dié rede het hulle reeds smart gemaai deur die geweldige toename van vigs, hepatitis en ander siektes weens bloedoortappings. Die volle vergelding vir alle bloedskuld sal binnekort kom wanneer oortreders die doodstraf ondergaan deurdat hulle in “die groot wynpers van die toorn van God” vertrap word.—Openbaring 14:19, 20.

9. Wat behels dit wanneer die derde bak uitgegooi word?

⁹ Toe die Nylrivier in Moses se dag in bloed verander is, kon die Egiptenaars aan die lewe bly deur ander waterbronne te soek (Eksodus 7:24). Maar vandag, gedurende die geestelike plaag, kan mense nêrens in Satan se wêreld lewegewende waters vind nie. Wanneer hierdie derde bak uitgegooi word, behels dit die aankondiging dat die wêreld se “riviere en die waterfonteine” soos bloed is en geestelike dood meebring vir almal wat daarvan drink. Tensy mense hulle tot Jehovah keer, maai hulle sy ongunstige oordeel.—Vergelyk Esegiël 33:11.

10. Wat maak “die engel wat oor die waters is”, bekend, en watter getuienis voeg “die altaar” by?

¹⁰ “Die engel wat oor die waters is”, dit wil sê die engel wat hierdie bak op die waters uitgooi, verheerlik Jehovah as die Universele Regter, wie se regverdige beslissings absoluut is. Gevolglik sê hy van hierdie oordeel: “Hulle verdien dit.” Die engel het ongetwyfeld self baie van die bloedvergieting en wreedheid aanskou wat deur duisende jare heen deur die valse leerstellings en filosofieë van hierdie goddelose wêreld aangestook is. Hy weet derhalwe dat Jehovah se regterlike beslissing reg is. Selfs God se “altaar” praat. Openbaring 6:9, 10 sê dat die siele van dié wat ’n marteldood gesterf het, aan die voet van hierdie altaar is. “Die altaar” voeg dus kragtige getuienis by met betrekking tot die geregtigheid en regverdigheid van Jehovah se beslissings.a Dit is beslis gepas dat dié wat soveel bloed vergiet en misbruik het, self gedwing word om bloed te drink, as simbool van die feit dat Jehovah hulle ter dood veroordeel.

Mense word met vuur verskroei

11. Wat is die teiken van die vierde bak van die toorn van God, en wat vind plaas wanneer dit uitgegooi word?

¹¹ Die teiken van die vierde bak van die toorn van God is die son. Johannes sê vir ons: “En die vierde het sy bak op die son uitgegooi; en aan die son is dit gegee om die mense met vuur te verskroei. En die mense is met groot hitte verskroei, maar hulle het die naam van God gelaster, wat die gesag oor hierdie plae het, en hulle het nie berou getoon om aan hom heerlikheid te gee nie.”—Openbaring 16:8, 9.

12. Wat is hierdie wêreld se “son”, en wat word aan hierdie simboliese son gegee?

¹² Vandag, aan die voleinding van die stelsel van dinge, skyn Jesus se geestelike broers “so helder soos die son . . . in die koninkryk van hulle Vader” (Matteus 13:40, 43). Jesus self is “die son van regverdigheid” (Maleagi 4:2). Maar die mensdom het hulle eie “son”, hulle eie heersers wat in verset teen God se Koninkryk probeer skyn. Die vierde trompetstoot het aangekondig dat die ‘son, maan en sterre’ in die Christendom se hemele in werklikheid bronne van duisternis is, nie van lig nie (Openbaring 8:12). Die vierde bak van God se toorn toon nou dat die wêreld se “son” ondraaglik warm sou word. Dié wat as sonagtige leiers beskou word, sou die mensdom “verskroei”. Dít sou aan die simboliese son gegee word. Met ander woorde, Jehovah sou dit toelaat as deel van sy vurige oordeel oor die mensdom. In watter sin het hierdie verskroeiing plaasgevind?

13. In watter sin het sonagtige heersers van hierdie wêreld die mensdom “verskroei”?

¹³ Ná die Eerste Wêreldoorlog het die heersers van hierdie wêreld die Volkebond gestig in ’n poging om die probleem van wêreldveiligheid op te los, maar dit het misluk. Gevolglik is ander eksperimentele vorme van heerskappy, soos Fascisme en Nazisme, op die proef gestel. Kommunisme het aangehou om uit te brei. Pleks van die mensdom se lot te verbeter, het die sonagtige heersers in hierdie stelsels begin om ‘die mense met groot hitte te verskroei’. Oorloë in Spanje, Etiopië en Mantsjoerye het aanleiding gegee tot die Tweede Wêreldoorlog. Die hedendaagse geskiedenis toon dat Mussolini, Hitler en Stalin as diktators direk en indirek verantwoordelik was vir die dood van tienmiljoene mense, insluitende baie van hulle eie burgers. Meer onlangs het internasionale of burgerlike konflikte die mense van lande soos Viëtnam, Kampuchea, Iran, Libanon en Ierland, sowel as lande in Latyns-Amerika en Afrika, “verskroei”. Voeg hierby die voortgesette stryd tussen die supermoondhede, wie se verskriklike kernwapens die hele mensdom tot as kan verbrand. In hierdie laaste dae is die mensdom beslis aan ’n verskroeiende “son”, hulle onregverdige heersers, blootgestel. Wanneer die vierde bak van God se toorn uitgegooi word, word hierdie geskiedenisfeite uitgewys, en God se volk het dit oor die hele aarde verkondig.

14. Wat het Jehovah se Getuies deurgaans verkondig as die enigste oplossing vir die mensdom se probleme, en hoe het die mensdom as geheel daarop gereageer?

¹⁴ Jehovah se Getuies het deurgaans verkondig dat die enigste oplossing vir die mensdom se verbysterende probleme God se Koninkryk is, waardeur Jehovah van voorneme is om sy naam te verheerlik (Psalm 83:4, 17, 18; Matteus 6:9, 10). Maar die mensdom as geheel het hulle ore gesluit vir hierdie oplossing. Baie wat die Koninkryk verwerp, laster ook die naam van God, net soos Farao toe hy geweier het om Jehovah se soewereiniteit te erken (Eksodus 1:8-10; 5:2). Aangesien hierdie teenstanders glad nie in die Messiaanse Koninkryk belangstel nie, kies hulle om onder hulle eie versengende “son” van onderdrukkende menseheerskappy te ly.

Die troon van die wilde dier

15. (a) Waarop word die vyfde bak uitgegooi? (b) Wat is “die troon van die wilde dier”, en wat behels dit wanneer die bak daarop uitgegooi word?

¹⁵ Waarop gooi die volgende engel sy bak uit? “En die vyfde het sy bak op die troon van die wilde dier uitgegooi” (Openbaring 16:10a). “Die wilde dier” is Satan se regeringstelsel. Dit het nie ’n letterlike troon nie, net so min as wat die wilde dier self letterlik is. Maar die melding van ’n troon toon dat die wilde dier koninklike gesag oor die mensdom uitoefen; dit strook met die feit dat daar ’n koninklike kroon op elkeen van die dier se horings is. Trouens, “die troon van die wilde dier” is die grondslag, of bron, van hierdie gesag.b Die Bybel openbaar die ware oorsprong van die koninklike gesag van die wilde dier wanneer dit sê dat “die draak . . . aan die dier sy krag en sy troon en groot gesag gegee” het (Openbaring 13:1, 2; 1 Johannes 5:19). Wanneer die bak op die troon van die wilde dier uitgegooi word, behels dit dus ’n aankondiging wat openbaar watter rol Satan werklik daarin gespeel het en nog steeds daarin speel om die wilde dier te ondersteun en te begunstig.

16. (a) Wie dien die nasies, of hulle dit nou besef of nie? Verduidelik. (b) Hoe weerspieël die wêreld Satan se persoonlikheid? (c) Wanneer sal die troon van die wilde dier omvergewerp word?

¹⁶ Hoe word hierdie verhouding tussen Satan en die nasies gehandhaaf? Toe Satan Jesus versoek het, het hy hom in ’n visioen al die koninkryke van die wêreld gewys en hom “al hierdie gesag en hulle heerlikheid” aangebied. Maar daar was ’n voorwaarde—Jesus moes eers ’n daad van aanbidding voor Satan verrig (Lukas 4:5-7). Kan ons ons voorstel dat die regerings van die wêreld hulle gesag teen ’n laer prys ontvang? Glad nie. Volgens die Bybel is Satan die god van hierdie stelsel van dinge, sodat die nasies hom dien, of hulle dit nou besef of nie (2 Korintiërs 4:3, 4).c Hierdie situasie blyk uit die samestelling van die teenswoordige wêreldstelsel, wat op enge nasionalisme, haat en eiebelang gegrond is. Dit is georganiseer soos Satan dit wil hê—om die mensdom onder sy beheer te hou. Die korrupsie in regerings, die magswellus, die leuenagtige diplomasie, die wapenwedloop—dit alles weerspieël Satan se verdorwe persoonlikheid. Die wêreld onderskryf Satan se onregverdige standaarde en maak hom sodoende sy god. Die troon van die wilde dier sal omvergewerp word wanneer hierdie dier uitgewis word en die Saad van God se vrou Satan self uiteindelik in die afgrond werp.—Genesis 3:15; Openbaring 19:20, 21; 20:1-3.

Duisternis en knaende pyn

17. (a) Watter verband bestaan tussen die vyfde bak wat uitgegooi word en die geestelike duisternis waarin die koninkryk van die wilde dier nog altyd gehul was? (b) Hoe reageer mense wanneer die vyfde bak van God se toorn uitgegooi word?

¹⁷ Die koninkryk van hierdie wilde dier verkeer sedert die begin daarvan in geestelike duisternis. (Vergelyk Matteus 8:12; Efesiërs 6:11, 12.) Die vyfde bak bring ’n verskerpte openbare aankondiging van hierdie duisternis mee. Dit dramatiseer dit selfs, in die sin dat hierdie bak van God se toorn op die troon van die simboliese wilde dier uitgegooi word. “En sy koninkryk het verduisterd geword, en hulle het hulle tonge begin kou van die pyn, maar hulle het die God van die hemel gelaster weens hulle pyne en weens hulle swere, en hulle het nie berou gehad oor hulle werke nie.”—Openbaring 16:10b, 11.

18. Watter ooreenkoms is daar tussen die vyfde trompetstoot en die vyfde bak van God se toorn?

¹⁸ Die vyfde trompetstoot is nie presies dieselfde as die vyfde bak van God se toorn nie, aangesien die trompetstoot ’n sprinkaanplaag aangekondig het. Maar let daarop dat die son en die lug verduister is toe hierdie sprinkaanplaag losgelaat is (Openbaring 9:2-5). En in Eksodus 10:14, 15 lees ons van die sprinkane waarmee Jehovah Egipte geteister het: “Hulle was ’n baie swaar las. Voor hulle het sulke sprinkane nog nooit so verskyn nie, en ná hulle sal sulke sprinkane nooit weer so verskyn nie. En hulle het die sigbare oppervlak van die hele land bedek, en die land het donker geword.” Ja, duisternis! Vandag het die wêreld se geestelike duisternis baie duidelik geword as gevolg van die vyfde trompetstoot en die vyfde bak van God se toorn wat uitgegooi is. Die snydende boodskap wat deur die hedendaagse sprinkaanswerm verkondig word, het foltering en pyn tot gevolg vir die goddeloses wat “eerder die duisternis as die lig liefgehad het”.—Johannes 3:19.

19. Wat word in ooreenstemming met Openbaring 16:10, 11 deur die openbare ontmaskering van Satan as die god van hierdie stelsel van dinge veroorsaak?

¹⁹ As wêreldheerser het Satan baie ongelukkigheid en lyding veroorsaak. Hongersnood, oorloë, geweld, misdaad, dwelmmisbruik, onsedelikheid, seksueel oordraagbare siektes, oneerlikheid, godsdienshuigelary—dit is ’n paar van die dinge waardeur Satan se stelsel gekenmerk word. (Vergelyk Galasiërs 5:19-21.) Nogtans het die openbare ontmaskering van Satan as die god van hierdie stelsel van dinge pyn en verleentheid veroorsaak vir dié wat volgens sy standaarde leef. “Hulle het hulle tonge begin kou van die pyn”, veral in die Christendom. Baie voel gegrief omdat die waarheid hulle lewenstyl blootlê. Party voel bedreig daardeur, en hulle vervolg dié wat dit bekend maak. Hulle verwerp God se Koninkryk en smaad Jehovah se heilige naam. Hulle siek, versweerde godsdienstoestand word blootgelê, sodat hulle die God van die hemel laster. Nee, hulle “het nie berou . . . oor hulle werke nie”. Ons kan dus nie ’n massabekering voor die einde van hierdie stelsel van dinge verwag nie.—Jesaja 32:6.

Die Eufraatrivier het opgedroog

20. Hoe word die Eufraatrivier geraak deur die sesde trompetstoot sowel as die sesde bak wat uitgegooi word?

²⁰ Die sesde trompetstoot het die loslating aangekondig van “die vier engele . . . wat by die groot rivier, die Eufraat, vasgebind is” (Openbaring 9:14). Geskiedkundig was Babilon die groot stad wat aan die Eufraatrivier geleë was. En in 1919 het die loslating van die simboliese vier engele met ’n betekenisvolle val van Babilon die Grote gepaardgegaan (Openbaring 14:8). Dit is derhalwe opmerkenswaardig dat die sesde bak van God se toorn ook die Eufraatrivier raak: “En die sesde het sy bak op die groot rivier, die Eufraat, uitgegooi, en sy water is opgedroog, sodat die weg vir die konings wat van die sonsopgang af kom, berei kon word” (Openbaring 16:12). Ook dit is slegte nuus vir Babilon die Grote!

21, 22. (a) Hoe het die beskermende waters van die Eufraatrivier in 539 v.G.J. vir Babilon opgedroog? (b) Wat is die “waters” waarop Babilon die Grote sit, en hoe is hierdie simboliese waters nou reeds besig om op te droog?

²¹ In die bloeityd van eertydse Babilon was die oorvloedige waters van die Eufraat ’n belangrike deel van sy verdedigingstelsel. In 539 v.G.J. het hierdie waters opgedroog toe dit deur die Persiese leier Kores weggekeer is. Sodoende kon Kores die Pers en Darius die Meder, die konings wat van “die sonsopgang” af (dit wil sê die ooste) gekom het, Babilon binnedring en dit verower. In die kritieke uur kon die Eufraatrivier nie hierdie groot stad beskerm nie (Jesaja 44:27–45:7; Jeremia 51:36). Iets soortgelyks gaan met hedendaagse Babilon, die wêreldstelsel van valse godsdiens, gebeur.

²² Babilon die Grote ‘sit op baie waters’. Volgens Openbaring 17:1, 15 simboliseer hierdie waters “volke en menigtes en nasies en tale”—hordes aanhangers wat sy as ’n beskerming beskou het. Maar die “waters” is besig om op te droog! In Wes-Europa, waar sy vroeër groot invloed gehad het, is daar honderdmiljoene mense wat godsdiens vandag openlik ignoreer. In party lande was daar baie jare lank ’n uitgesproke beleid om die invloed van godsdiens te probeer vernietig. Die volksmassa in hierdie lande het haar nie verdedig nie. Wanneer die tyd vir Babilon die Grote se vernietiging aanbreek, sal haar kwynende aantal aanhangers ook glad nie ’n beskerming wees nie (Openbaring 17:16). Hoewel sy beweer dat sy ’n ledetal van duisendmiljoene het, sal Babilon die Grote vind dat sy weerloos is teen “die konings wat van die sonsopgang af kom”.

23. (a) Wie was die konings wat in 539 v.G.J. van “die sonsopgang” af gekom het? (b) Wie is gedurende die dag van die Here “die konings wat van die sonsopgang af kom”, en hoe sal hulle Babilon die Grote vernietig?

²³ Wie is hierdie konings? In 539 v.G.J. was dit Darius die Meder en Kores die Pers, wat deur Jehovah gebruik is om die eertydse stad Babilon te verower. In hierdie dag van die Here sal die valse godsdiensstelsel van Babilon die Grote ook deur menseheersers vernietig word. Maar dit sal weer eens ’n goddelike oordeel wees. Jehovah God en Jesus Christus, “die konings wat van die sonsopgang af kom”, sal die “gedagte” in die harte van menseheersers gesit het om teen Babilon die Grote te draai en haar geheel en al te vernietig (Openbaring 17:16, 17). Wanneer die sesde bak uitgegooi word, word dit in die openbaar aangekondig dat hierdie oordeel spoedig voltrek gaan word!

24. (a) Hoe is die inhoud van die eerste ses bakke van Jehovah se toorn bekend gemaak, en met watter gevolg? (b) Wat maak Openbaring bekend voordat dit ons van die oorblywende bak van God se toorn vertel?

²⁴ Hierdie eerste ses bakke van Jehovah se toorn bevat ’n boodskap wat ’n mens tot nadenke stem. God se aardse knegte, wat deur die engele ondersteun word, het die inhoud van hierdie bakke regoor die aarde bekend gemaak. Sodoende is alle dele van Satan se wêreldstelsel behoorlik gewaarsku en het Jehovah individue ’n geleentheid gebied om hulle tot regverdigheid te wend en te bly lewe (Esegiël 33:14-16). Maar nog een bak van God se toorn bly oor. Voordat Openbaring ons egter daarvan vertel, maak dit eers bekend hoe Satan en sy aardse agente probeer om die bekendmaking van Jehovah se oordele teë te werk.

Vir Armageddon versamel

25. (a) Wat vertel Johannes ons omtrent onrein, padda-agtige “geïnspireerde uitinge”? (b) Hoe is daar in die dag van die Here ’n weersinwekkende padda-agtige plaag van “onrein geïnspireerde uitinge”, en met watter gevolg?

²⁵ Johannes sê vir ons: “En ek het drie onrein geïnspireerde uitinge wat soos paddas gelyk het, uit die bek van die draak en uit die bek van die wilde dier en uit die mond van die valse profeet sien kom. Hulle is in werklikheid uitinge wat deur demone geïnspireer is en doen tekens, en hulle gaan uit na die konings van die hele bewoonde aarde, om hulle te versamel vir die oorlog van die groot dag van God die Almagtige” (Openbaring 16:13, 14). In Moses se dag het Jehovah ’n walglike plaag van paddas oor Farao se Egipte gebring, sodat ‘die land begin stink het’ (Eksodus 8:5-15). Gedurende die dag van die Here is daar ook ’n weersinwekkende padda-agtige plaag, hoewel uit ’n ander bron. Dit bestaan uit Satan se “onrein geïnspireerde uitinge”, ’n duidelike simbool van die propaganda wat bedoel is om alle menseheersers, “konings”, te manipuleer om Jehovah God teë te staan. Daardeur verseker Satan dat hulle nie van standpunt verander wanneer die bakke van God se toorn uitgegooi word nie, maar dat hulle onwrikbaar aan Satan se kant is wanneer “die oorlog van die groot dag van God die Almagtige” begin.

26. (a) Uit watter drie bronne kom sataniese propaganda? (b) Wat is “die valse profeet”, en hoe weet ons dit?

²⁶ Die propaganda kom van “die draak” (Satan) en “die wilde dier” (Satan se aardse politieke stelsel), diere waarmee ons reeds in Openbaring kennis gemaak het. Maar wat is “die valse profeet”? Net sy naam is nuut. Ons het vroeër ’n wilde dier met twee horings soos ’n lam gesien wat groot tekens voor die wilde dier met die sewe koppe gedoen het. Hierdie bedrieglike dier het soos ’n profeet vir daardie wilde dier opgetree. Hy het die aanbidding van die wilde dier bevorder en selfs ’n beeld daarvoor laat oprig (Openbaring 13:11-14). Hierdie wilde dier met die twee horings soos ’n lam moet dieselfde wees as “die valse profeet” wat hier gemeld word. Ter bevestiging hiervan lees ons later dat die valse profeet, soos die simboliese wilde dier met die twee horings, “voor [die wilde dier met die sewe koppe] die tekens gedoen het waarmee hy dié mislei het wat die merk van die wilde dier ontvang het en dié wat sy beeld aanbid”.—Openbaring 19:20.

27. (a) Watter tydige waarskuwing gee Jesus Christus self? (b) Watter waarskuwing het Jesus gegee toe hy op die aarde was? (c) Hoe het die apostel Paulus Jesus se waarskuwing herhaal?

²⁷ Met soveel sataniese propaganda aan die werk is die volgende woorde wat Johannes opteken, inderdaad tydig: “Kyk! Ek kom soos ’n dief. Gelukkig is die een wat wakker bly en sy boklere bewaar, sodat hy nie naak sal loop en mense sy skande sien nie” (Openbaring 16:15). Wie kom “soos ’n dief”? Jesus self, wat op ’n onverwagte tyd as Jehovah se Skerpregter kom (Openbaring 3:3; 2 Petrus 3:10). Terwyl Jesus nog op die aarde was, het hy ook sy koms met dié van ’n dief vergelyk en gesê: “Hou dus aan waak, want julle weet nie op watter dag julle Here kom nie. Daarom moet julle ook gereed wees, want die Seun van die mens kom op ’n uur waarvan julle dit nie dink nie” (Matteus 24:42, 44; Lukas 12:37, 40). Die apostel Paulus het hierdie waarskuwing herhaal: “Jehovah se dag [kom] net soos ’n dief in die nag . . . Wanneer hulle ook al sê: ‘Vrede en veiligheid!’ dan sal skielike vernietiging oombliklik oor hulle kom.” Satan sit agter enige sodanige valse uitroep van “Vrede en veiligheid!”—1 Tessalonisense 5:2, 3.

28. Watter waarskuwing het Jesus gegee van hoe wêreldse druk weerstaan moet word, en wat is “dié dag” wat Christene nie wil hê “soos ’n strik” oor hulle moet kom nie?

²⁸ Jesus het ook gewaarsku teen die soort druk wat hierdie wêreld, deurdrenk van propaganda, op Christene sal uitoefen. Hy het gesê: “Let op julleself dat julle harte nooit beswaar word met oormatige etery en strawwe drinkery en sorge van die lewe, en dié dag skielik, in ’n oomblik, oor julle kom soos ’n strik nie. . . . Bly dus wakker en doen te alle tye smeekbedes dat julle daarin sal slaag om te ontkom aan al hierdie dinge wat bestem is om te gebeur en om voor die Seun van die mens te staan” (Lukas 21:34-36). “Dié dag” is “die groot dag van God die Almagtige” (Openbaring 16:14). Namate “dié dag” van die regverdiging van Jehovah se soewereiniteit nader kom, word dit al hoe moeiliker om die sorge van die lewe die hoof te bied. Christene moet waaksaam en op hulle hoede wees en wakker bly totdat daardie dag aanbreek.

29, 30. (a) Wat impliseer Jesus se waarskuwing dat dié wat aan die slaap gevind word, beskaam sou word deurdat hulle hulle “boklere” sou verloor? (b) As wat identifiseer boklere die draers daarvan? (c) Hoe kan ’n persoon sy simboliese boklere verloor, en met watter gevolg?

²⁹ Maar wat impliseer die waarskuwing dat dié wat aan die slaap gevind word, beskaam sou word deurdat hulle hulle “boklere” sou verloor? In eertydse Israel het enige priester of Leviet wat by die tempel wag gestaan het, ’n groot verantwoordelikheid gehad. Joodse kommentators vertel ons dat as enigiemand betrap is terwyl hy tydens sulke wagdiens geslaap het, sy klere van hom weggeneem en verbrand is, sodat hy in die openbaar beskaam is.

³⁰ Jesus waarsku hier dat iets soortgelyks vandag kan gebeur. Die priesters en Leviete het Jesus se gesalfde broers voorafgeskadu (1 Petrus 2:9). Maar Jesus se waarskuwing geld by uitbreiding ook vir die groot menigte. Die boklere wat hier gemeld word, identifiseer die draer daarvan as ’n Christengetuie van Jehovah. (Vergelyk Openbaring 3:18; 7:14.) As persone sou toelaat dat die druk van Satan se wêreld hulle aan die slaap sus of onbedrywig laat word, sal hulle waarskynlik hierdie boklere verloor—met ander woorde, hulle sal hulle rein identiteit as Christene verloor. So ’n situasie sou skandelik wees. ’n Mens sou dan gevaar loop om alles te verloor.

31. (a) Hoe beklemtoon Openbaring 16:16 dat Christene moet wakker bly? (b) Wat het party godsdiensleiers aangaande Armageddon bespiegel?

³¹ Dit raak selfs dringender dat Christene moet wakker bly namate die volgende vers van Openbaring sy vervulling nader: “En hulle [die demoongeïnspireerde uitinge] het hulle [die aardse konings, of heersers] versamel na die plek wat in Hebreeus Har–Magedon genoem word” (Openbaring 16:16). Hierdie naam, wat meer dikwels as Armageddon weergegee word, kom net een keer in die Bybel voor. Maar dit het die mensdom se verbeelding aangegryp. Wêreldleiers het teen ’n moontlike kern-Armageddon gewaarsku. Armageddon is ook al verbind met die eertydse stad Megiddo, die plek waar talle beslissende veldslae in Bybeltye plaasgevind het, en party godsdiensleiers het derhalwe bespiegel dat die finale oorlog op die aarde in daardie beperkte gebied sal plaasvind. In hierdie opsig het hulle dit heeltemal mis.

32, 33. (a) In plaas van ’n letterlike plek te wees, wat stel die naam Har–Magedon, of Armageddon, voor? (b) Watter ander Bybelterme is soortgelyk aan “Armageddon” of hou daarmee verband? (c) Wanneer sal dit tyd wees vir die sewende engel om die laaste bak van die toorn van God uit te gooi?

³² Die naam Har–Magedon beteken “die berg Megiddo”. Maar in plaas van ’n letterlike plek te wees, stel dit die wêreldsituasie voor waarin alle nasies wat in verset teen Jehovah God is, versamel word en waar hy hulle finaal sal vernietig. Dit omvat die hele aarde (Jeremia 25:31-33; Daniël 2:44). Dit kom ooreen met “die groot wynpers van die toorn van God” en “die laagvlakte van die beslissing”, of “die Josafatlaagvlakte”, waar die nasies versamel word om deur Jehovah tereggestel te word (Openbaring 14:19; Joël 3:12, 14). Dit hou ook verband met “die land van Israel” waar die sataniese leërs van Gog van Magog vernietig word en die plek “tussen die groot see en die heilige Sieraadberg” waar die koning van die noorde as gevolg van die optrede van Migael, die groot vors, “geheel en al tot sy einde . . . kom”.—Esegiël 38:16-18, 22, 23; Daniël 11:45–12:1.

³³ Wanneer die nasies tot in hierdie situasie gemanipuleer is deur die kwakende propaganda wat van Satan en sy aardse agente uitgaan, sal dit tyd wees vir die sewende engel om die laaste bak van die toorn van God uit te gooi.

“Dit het geskied!”

34. Waarop gooi die sewende engel sy bak uit, en watter aankondiging kom “uit die heiligdom, van die troon af”?

³⁴ “En die sewende het sy bak op die lug uitgegooi. Hierop het ’n harde stem uit die heiligdom, van die troon af, gekom en gesê: ‘Dit het geskied!’”—Openbaring 16:17.

35. (a) Wat is “die lug” van Openbaring 16:17? (b) Wat openbaar die sewende engel deur sy bak op die lug uit te gooi?

³⁵ “Die lug” is die laaste lewensonderhoudende element wat geteister word. Maar dit is nie die letterlike lug nie. Daar is niks omtrent die letterlike lug wat maak dat dit Jehovah se ongunstige oordele verdien nie, net so min as wat die letterlike aarde, see, varswaterbronne of son verdien om deur Jehovah geoordeel te word. Dit is eerder “die lug” wat Paulus bespreek het toe hy Satan “die heerser van die gesag van die lug” genoem het (Efesiërs 2:2). Dit is die sataniese “lug” wat die wêreld vandag inasem, die gees, of algemene geestesneiging, wat sy hele goddelose stelsel van dinge kenmerk, die sataniese denke waarvan elke aspek van die lewe buite Jehovah se organisasie deurtrek is. Deur sy bak op die lug uit te gooi, openbaar die sewende engel dus God se gramskap teen Satan, sy organisasie en alles wat die mensdom beweeg om Satan te ondersteun in sy teenstand teen Jehovah se soewereiniteit.

36. (a) Wat maak die sewe plae uit? (b) Wat word aangedui deur Jehovah se verklaring: “Dit het geskied!”?

³⁶ Hierdie plaag en die vorige ses maak al Jehovah se oordele teen Satan en sy stelsel uit. Hulle is ’n aankondiging van ondergang vir Satan en sy saad. Wanneer hierdie laaste bak uitgegooi is, sê Jehovah self: “Dit het geskied!” Daar is niks meer om te sê nie. Wanneer die inhoud van die bakke van God se toorn tot Jehovah se bevrediging bekend gemaak is, sal daar geen uitstel wees in sy voltrekking van die oordele wat deur hierdie boodskappe aangekondig is nie.

37. Hoe beskryf Johannes wat plaasvind nadat die sewende bak van die toorn van God uitgegooi is?

³⁷ Johannes sê verder: “En daar het weerligstrale en stemme en donderslae gekom, en ’n groot aardbewing het plaasgevind soos daar nie plaasgevind het sedert daar mense op die aarde gekom het nie, só ’n omvangryke aardbewing, só groot. En die groot stad het in drie dele geskeur, en die stede van die nasies het geval; en Babilon die Grote is voor die aangesig van God in herinnering gebring, om haar die beker van die wyn van die toorn van sy gramskap te gee. En elke eiland het gevlug, en berge is nie gevind nie. En ’n groot hael, met elke steen omtrent ’n talent swaar, het uit die hemel op die mense geval, en die mense het God gelaster weens die plaag van die hael, want die plaag daarvan was buitengewoon groot.”—Openbaring 16:18-21.

38. Wat word gesimboliseer deur (a) die “groot aardbewing”? (b) die feit dat “die groot stad”, Babilon die Grote, in “drie dele” skeur? (c) die feit dat ‘elke eiland gevlug het, en berge nie gevind is nie’? (d) “die plaag van die hael”?

³⁸ Jehovah tree weer eens op onmiskenbare wyse teenoor die mensdom op, en dit word aangedui deur “weerligstrale en stemme en donderslae”. (Vergelyk Openbaring 4:5; 8:5.) Die mensdom sal geskud word soos nog nooit tevore nie, asof deur ’n verwoestende aardbewing. (Vergelyk Jesaja 13:13; Joël 3:16.) Hierdie ontsaglike skudding sal “die groot stad”, Babilon die Grote, verpletter, sodat dit in “drie dele” skeur—simbolies van die stad se ineenstorting tot onherroeplike ondergang. “Die stede van die nasies” sal ook val. “Elke eiland” asook “berge”—instellings en organisasies wat in hierdie stelsel so blywend lyk—sal verdwyn. “’n Groot hael”, baie groter as dié wat Egipte tydens die sewende plaag geteister het, met elke haelkorrel wat omtrent ’n talent weeg, sal pynlik neerkom op die mensdom (Eksodus 9:22-26).d Hierdie swaar stortbui bevrore water beeld waarskynlik buitengewoon swaar mondelinge uitinge van Jehovah se oordele af wat aandui dat die einde van hierdie stelsel van dinge uiteindelik aangebreek het! Jehovah sal heel moontlik ook letterlike hael in sy vernietigingswerk gebruik.—Job 38:22, 23.

39. Hoe sal die meeste mense optree ondanks die sewe plae wat uitgegooi word?

³⁹ So sal Satan se wêreld Jehovah se regverdige oordeel ondergaan. Tot die einde toe sal die meeste mense aanhou om hulle teen God te verset en hom te laster. Soos dit met Farao van ouds die geval was, sal hulle harte nie deur die herhaalde plae of deur die finale dodelike klimaks van hierdie plae versag word nie (Eksodus 11:9, 10). Daar sal nie op die laaste nippertjie ’n grootskaalse verandering van gesindheid wees nie. Met hulle laaste asem sal hulle uitvaar teen die God wat sê: “Hulle sal moet weet dat ek Jehovah is” (Esegiël 38:23). Nietemin sal die soewereiniteit van Jehovah God die Almagtige geregverdig wees.

[Voetnote]

[Venster op bladsy 221]

“Op die aarde”

Die Johannes-klas het Jehovah se gramskap teen “die aarde” bekend gemaak met verklarings soos die volgende:

“Na eeue van inspanning het politieke partye bewys dat hulle nie teen die huidige toestande opgewasse is nie en die onrusbarende probleme nie kan oplos nie. Ekonome en staatsmanne, wat die vraag noukeurig ondersoek het, vind dat hulle niks kan doen nie.”—Daar leef miljoene vandag wat nooit sal sterf nie, 1920, bladsy 67.

“Daar is vandag nie een regering op aarde wat aan die verlange van ’n redelike gedeelte van die wêreld voldoen nie. Baie volke word deur diktators geregeer. Die hele wêreld is so te sê bankrot.”—’n Gewenste regering, 1924, bladsy 5.

“Om . . . aan hierdie stelsel van dinge ’n einde te maak, is die enigste manier om die wêreld van kwaad te bevry en die plek in te ruim vir vrede en geregtigheid om te bloei.”—“Hierdie goeie nuus van die koninkryk”, 1954, bladsy 24.

“Die teenswoordige wêreldbestel het hom onderskei deur toenemende sonde, ongeregtigheid en opstand teen God en sy wil. . . . Dit is onvatbaar vir verbetering. Dit moet dus weg!”—Die Wagtoring, 1 Februarie 1982, bladsy 6.

[Venster op bladsy 223]

“In die see”

Die volgende is net ’n paar van die verklarings wat die Johannes-klas deur die jare heen gepubliseer het om God se gramskap teen die rustelose, opstandige “see” van goddelose mense wat van Jehovah vervreemd is, bekend te maak:

“Die geskiedenis van elke nasie toon dat dit ’n stryd tussen die klasse was. Dit was ’n paar teen die meerderheid. . . . Hierdie stryde het tot talle revolusies, groot lyding en baie bloedvergieting gelei.”—Government, 1928, bladsy 244.

In die nuwe wêreld sal “die simboliese ‘see’ van die rustelose, opstandige, goddelose volke waaruit die simboliese wilde dier lank gelede opgekom het om deur die Duiwel gebruik te word . . . weg wees”.—Die Wagtoring, 1 Desember 1967, bladsy 534.

“Die mensegemeenskap is vandag geestelik siek en krank. Nie een van ons kan hom red nie, want God se Woord toon dat die siekte daarvan ’n siekte tot die dood is.”—Ware vrede en veiligheid—Uit watter bron?, 1975, bladsy 131.

[Venster op bladsy 224]

“In die riviere en die waterfonteine”

Die derde plaag het “die riviere en die waterfonteine” blootgelê deur verklarings soos die volgende:

“Die geestelikes, wat beweer dat hulle [Christus se] leringe verkondig, het oorlog geheilig, dit tot iets heiligs verklaar. Hulle het behae daarin geskep om hulle portrette en standbeelde langs dié van bebloede soldate te laat vertoon.”—The Watch Tower, 15 September 1924, bladsy 275.

“Spiritisme is gegrond op ’n groot onwaarheid, die leuen van oorlewing ná die dood en van die onsterflikheid van die mensesiel.”—What Do the Scriptures Say About “Survival After Death”?, 1955, bladsy 51.

“Mensefilosofieë, politieke teoretici, maatskaplike organiseerders, ekonomiese raadgewers en voorstanders van godsdienstradisies het geen werklik lewegewende verkwikking meegebring nie . . . Sulke waters het die drinkers daarvan selfs beweeg om die Skepper se wet aangaande die heiligheid van bloed te skend en aan godsdiensvervolging deel te neem.”—Resolusie wat by die “Ewige Goeie Nuus”- Internasionale Byeenkoms in 1963 aangeneem is.

“Nie die wetenskaplike redding nie, maar die vernietiging van die mensdom is wat van die mens self verwag kan word. . . . Ons kan nie verwag dat selfs al die sielkundiges en psigiaters in die wêreld die mensdom se denkwyse sal verander nie . . . Ons kan nie daarop staatmaak dat enige internasionale polisiemag gestig sal word . . . en hierdie aarde ’n veilige plek sal maak om in te lewe nie.”—Saving the Human Race—In the Kingdom Way, 1970, bladsy 5.

[Venster op bladsy 225]

“Op die son”

Terwyl die “son” van menseheerskappy die mensdom gedurende die dag van die Here “verskroei” het, het die Johannes-klas, met verklarings soos die volgende, die aandag gevestig op wat gebeur:

“Vandag bedreig Hitler en Mussolini, die eiemagtige diktators, die vrede van die hele wêreld, en die Rooms-Katolieke Hiërargie ondersteun hulle ten volle in hulle vernietiging van vryheid.”—Fascism or Freedom, 1939, bladsy 12.

“Die hele geskiedenis deur was die beleid wat deur diktators gevolg is, Regeer of ruïneer! Maar die regulasie wat nou deur God se geïnstalleerde Koning, Jesus Christus, op die hele aarde toegepas gaan word, is, Word geregeer of geruïneer.”—Wanneer alle nasies verenig onder God se koninkryk, 1964, bladsy 24.

“Sedert 1945 is meer as 25 miljoen mense gedood in sowat 150 oorloë wat rondom die aardbol gevoer is.”—Die Wagtoring, 1 April 1980, bladsy 7.

“Die nasies rondom die wêreld . . . steur hulle weinig aan internasionale verantwoordelikheid of gedragsreëls. Sommige nasies dink dat hulle die volste reg het om enige middel te gebruik wat hulle nodig ag om hulle doelstellings te bereik—menseslagtings, sluipmoorde, skakings, bomaanvalle, en so meer . . . Hoe lank sal die nasies mekaar nog verdra terwyl hulle hulle aan sulke sinnelose en onverantwoordelike gedrag skuldig maak?”—Die Wagtoring, 15 Februarie 1985, bladsy 4.

[Venster op bladsy 227]

“Op die troon van die wilde dier”

Jehovah se Getuies het die troon van die wilde dier blootgelê en Jehovah se veroordeling daarvan bekend gemaak met verklarings soos die volgende:

“Die regeerders en politieke gidse van die nasies [word] beïnvloed . . . deur boosaardige bomenslike magte wat hulle onweerstaanbaar aandrywe in ’n selfmoord-optog na die beslissende stryd van Armageddon.”—Na Armageddon—God se nuwe wêreld, 1954, bladsy 8.

“Die ‘wilde dier’ van onteokratiese menslike regering het sy mag, gesag en troon van die Draak gekry. Daarom moet hy hom hou aan die partybeleid, die Draak-beleid.”—Na Armageddon—God se nuwe wêreld, 1954, bladsy 14.

“Die Heidense nasies kan hulle alleenlik aan . . . die kant van God se Hoofteenstander, Satan die Duiwel, skaar.”—Resolusie wat by die “Goddelike Oorwinning”- Internasionale Byeenkoms in 1973 aangeneem is.

[Venster op bladsy 229]

“Sy water is opgedroog”

Nou reeds is steun vir Babiloniese godsdiens op baie plekke besig om op te droog, en dit is ’n aanduiding van wat sal gebeur wanneer “die konings wat van die sonsopgang af kom”, tot die aanval oorgaan.

“’n Landwye opname het getoon dat 75 persent van diegene wat in munisipale gebiede [van Thailand] woon, glad nie na Boeddhistiese tempels gaan om na preke te luister nie, terwyl die aantal op die platteland wat die tempels wel besoek, geleidelik besig is om af te neem tot omtrent vyftig persent.”—Bangkok Post, 7 September 1987, bladsy 4.

“Taoïsme het sy betowering verloor in die land [China] waar dit sowat twee millenniums gelede gestig is. . . . Sonder die towermiddels waarmee lede van die priesterdom en hulle voorgangers voorheen ’n groot aanhang verkry het, vind hulle dat hulle nie opvolgers het nie en dus voor die feitlike ondergang van Taoïsme as ’n georganiseerde geloof op die vasteland staan.”—The Atlanta Journal and Constitution, 12 September 1982, bladsy 36-A.

“Japan . . . het een van die grootste konsentrasies buitelandse sendelinge ter wêreld, byna 5 200, maar . . . minder as 1% van die bevolking is Christene. . . . ’n Fransiskaanse priester wat sedert die 1950’s hier werk, . . . is van mening dat ‘die dag van die buitelandse sendeling in Japan verby is’.”—The Wall Street Journal, 9 Julie 1986, bladsy 1.

In Engeland is daar gedurende die afgelope drie dekades “byna 2 000 van die 16 000 Anglikaanse kerke weens onbruik gesluit. Die bywoningsyfer het so ver gedaal dat dit een van die laagste is in die lande wat as Christelik geklassifiseer word. . . . ‘Engeland is nie nou ’n Christelike land nie’, het [die biskop van Durham] gesê.”—The New York Times, 11 Mei 1987, bladsy A4.

“Ná ure van driftige beraadslaging het [Griekeland se] Parlement vandag wetgewing goedgekeur wat die Sosialistiese Regering in staat stel om groot eiendomme oor te neem wat deur die Grieks-Ortodokse Kerk besit word . . . Bowendien verleen die wet niegeestelikes beheer oor kerkrade en komitees belas met die administrasie van kosbare kerkbeleggings, waaronder hotelle, marmergroewe en kantoorgeboue.”—The New York Times, 4 April 1987, bladsy 3. 

[Prente op bladsy 222]

Die eerste vier bakke van die toorn van God veroorsaak plae wat ooreenkom met dié wat op die eerste vier trompetstote volg

[Prent op bladsy 226]

Die vyfde bak lê die troon van die wilde dier bloot

as die gesag wat Satan aan die wilde dier gegee het

[Prent op bladsy 231]

Demoniese propaganda versamel die aarde se heersers tot die brandpuntsituasie, Har–Magedon, waar Jehovah se oordele op hulle uitgegooi sal word

[Prent op bladsy 233]

Dié wat deur Satan se besoedelde “lug” aangedryf word, moet die voltrekking van Jehovah se regverdige oordele ondergaan

Hoofstuk 33

Die oordeel oor die berugte hoer

Visioen 11—Openbaring 17:1-18

Onderwerp: Babilon die Grote ry op ’n skarlakenkleurige wilde dier wat haar uiteindelik aanval en vernietig

Tyd van vervulling: Vanaf 1919 tot die groot verdrukking

1. Wat openbaar een van die sewe engele aan Johannes?

JEHOVAH se regverdige toorn moet geheel en al uitgegooi word, sewe bakke daarvan! Toe die sesde engel sy bak op die ligging van eertydse Babilon uitgegooi het, was dit ’n gepaste simbool van die plae wat Babilon die Grote sou tref namate gebeure vinnig na die finale oorlog van Armageddon beweeg (Openbaring 16:1, 12, 16). Dit is waarskynlik hierdie selfde engel wat nou openbaar waarom en hoe Jehovah sy regverdige oordele voltrek. Johannes is verstom oor wat hy vervolgens hoor en sien: “En een van die sewe engele wat die sewe bakke gehad het, het gekom en met my gepraat en gesê: ‘Kom, ek sal jou die oordeel wys oor die groot hoer wat op baie waters sit, met wie die konings van die aarde hoerery gepleeg het, terwyl dié wat die aarde bewoon, dronk gemaak is met die wyn van haar hoerery.’”—Openbaring 17:1, 2.

2. Watter getuienis is daar dat “die groot hoer” (a) nie eertydse Rome is nie? (b) nie die handel is nie? (c) ’n godsdiensentiteit is?

² “Die groot hoer”! Waarom so ’n skokkende naam? Wie is sy? Party het hierdie simboliese hoer met eertydse Rome geïdentifiseer. Maar Rome was ’n politieke moondheid. Hierdie hoer pleeg hoerery met die konings van die aarde, en dit sluit blykbaar die konings van Rome in. Bowendien word daar gesê dat “die konings van die aarde” ná haar vernietiging oor haar ondergang treur. Sy kan derhalwe nie ’n politieke moondheid wees nie (Openbaring 18:9, 10). En aangesien die wêreld se handelaars ook oor haar treur, kan sy nie die handel afbeeld nie (Openbaring 18:15, 16). Maar ons lees dat ‘al die nasies deur haar spiritistiese gebruike mislei is’ (Openbaring 18:23). Dít toon duidelik dat die groot hoer ’n wêreldwye godsdiensentiteit moet wees.

3. (a) Waarom moet die groot hoer meer as die Rooms-Katolieke Kerk of selfs die hele Christendom simboliseer? (b) Watter Babiloniese leerstellings kom in die meeste Oosterse godsdienste sowel as in die sektes van die Christendom voor? (c) Wat het die Rooms-Katolieke kardinaal John Henry Newman oor die oorsprong van baie van die Christendom se leerstellings, seremonies en gebruike erken? (Sien voetnoot.)

³ Watter godsdiensentiteit? Is sy die Rooms-Katolieke Kerk, soos party beweer het? Of is sy die hele Christendom? Nee, sy moet selfs groter as dit wees as sy al die nasies mislei. Sy is in werklikheid die hele wêreldryk van valse godsdiens. Haar oorsprong in die verborgenhede van Babilon blyk uit die feit dat baie Babiloniese leerstellings en gebruike in godsdienste regoor die aarde voorkom. Byvoorbeeld, geloof in die inherente onsterflikheid van die mensesiel, ’n hel van pyniging en ’n drie-eenheid van gode kom in die meeste Oosterse godsdienste sowel as in die sektes van die Christendom voor. Valse godsdiens, wat meer as 4 000 jaar gelede in die eertydse stad Babilon voortgebring is, het ontwikkel tot die hedendaagse gedrog wat gepas Babilon die Grote genoem word.a Maar waarom word sy met die afstootlike term “die groot hoer” beskryf?

4. (a) Hoe het eertydse Israel hoerery gepleeg? (b) Hoe het Babilon die Grote by uitstek hoerery gepleeg?

⁴ Babilon (of Babel, wat “Verwarring” beteken) het in Nebukadnesar se tyd sy bloeityd bereik. Dit was ’n polities-godsdienstige staat met meer as duisend tempels en kapelle. Sy priesterdom het groot mag uitgeoefen. Hoewel Babilon lankal nie meer as ’n wêreldmoondheid bestaan nie, bestaan godsdienstige Babilon die Grote wel, en in navolging van die eertydse patroon probeer sy nog steeds om politieke aangeleenthede te beïnvloed en te vorm. Maar keur God godsdiens in die politiek goed? In die Hebreeuse Geskrifte is daar gesê dat Israel prostitusie gepleeg het toe hulle by valse aanbidding betrokke geraak het en toe hulle, in plaas van op Jehovah te vertrou, bondgenootskappe met die nasies aangegaan het (Jeremia 3:6, 8, 9; Esegiël 16:28-30). Babilon die Grote pleeg ook hoerery. Sy het by uitstek gedoen wat sy ook al raadsaam geag het om invloed en mag oor die heersende konings van die aarde te verkry.—1 Timoteus 4:1.

5. (a) Waarvan hou die geestelikes? (b) Waarom is ’n begeerte na wêreldse vernaamheid reëlreg in stryd met Jesus Christus se woorde?

⁵ Godsdiensleiers voer vandag dikwels ’n verkiesingsveldtog vir hoë regeringsampte, en in sommige lande het hulle ’n aandeel aan staatsbestuur en beklee hulle selfs kabinetsposte. In 1988 was twee bekende Protestantse geestelikes kandidate vir die presidentskap van die Verenigde State. Leiers in Babilon die Grote hou daarvan om in die kalklig te wees; foto’s van hulle saam met vooraanstaande politici verskyn dikwels in die koerante. In teenstelling hiermee het Jesus van politieke betrokkenheid weggeskram en het hy van sy dissipels gesê: “Hulle is geen deel van die wêreld nie, net soos ek geen deel van die wêreld is nie.”—Johannes 6:15; 17:16; Matteus 4:8-10; sien ook Jakobus 4:4.

Hedendaagse ‘hoerery’

6, 7. (a) Hoe het Hitler se Nazi-party in Duitsland aan die bewind gekom? (b) Hoe het die konkordaat wat die Vatikaan met Nazi-Duitsland gesluit het, Hitler in sy strewe na wêreldoorheersing gehelp?

⁶ Deur haar inmenging in die politiek het die groot hoer eindelose verdriet vir die mensdom veroorsaak. Beskou byvoorbeeld die feite oor hoe Hitler in Duitsland aan die bewind gekom het—lelike feite wat party graag uit die geskiedenisboeke wil uitwis. In Mei 1924 het die Nazi-party 32 setels in die Duitse Ryksdag gehad. Teen Mei 1928 het dit tot 12 setels verminder. Maar die Groot Depressie het die wêreld in 1930 verswelg; onmiddellik hierna het die Nazi’s merkwaardig herstel en 230 uit die 608 setels in die Duitse verkiesings van Julie 1932 verkry. ’n Kort rukkie later het die voormalige kanselier Franz von Papen, ’n Pouslike Ridder, die Nazi’s te hulp gekom. Volgens geskiedskrywers het Von Papen gedroom van ’n nuwe Heilige Romeinse Ryk. Sy kort ampstermyn as kanselier was ’n mislukking, en hy het derhalwe nou gehoop dat hy deur die Nazi’s mag sou verkry. Teen Januarie 1933 het hy onder die nywerheidsmagnate steun vir Hitler verkry en deur listige intriges verseker dat Hitler op 30 Januarie 1933 Duitsland se kanselier word. Hý is as visekanselier aangestel en deur Hitler gebruik om die steun van die Katolieke dele van Duitsland te wen. Binne twee maande nadat hy aan die bewind gekom het, het Hitler die parlement ontbind, duisende opposisieleiers na konsentrasiekampe gestuur en ’n openlike veldtog geloods om die Jode te onderdruk.

⁷ Op 20 Julie 1933 het die Vatikaan sy belangstelling in die opkomende mag van Nazisme getoon toe kardinaal Pacelli (wat later pous Pius XII geword het) in Rome ’n konkordaat tussen die Vatikaan en Nazi-Duitsland onderteken het. Von Papen het die dokument as Hitler se verteenwoordiger onderteken, en Pacelli het die hoë pouslike ereteken, die Grootkruis van die Orde van Pius, daar aan Von Papen toegeken.b In sy boek Satan in Top Hat skryf Tibor Koeves die volgende hieroor: “Die Konkordaat was ’n groot oorwinning vir Hitler. Dit was die eerste morele steun wat hy uit die buitewêreld ontvang het, en dít uit die mees verhewe bron.” Die konkordaat het vereis dat die Vatikaan sy steun aan Duitsland se Katolieke Sentrumparty onttrek en sodoende Hitler se eenparty- “totalitêre staat” goedkeur.c Verder het artikel 14 daarvan gesê: “Die aanstelling van aartsbiskoppe, biskoppe en dies meer sal geskied eers nadat die goewerneur, wat deur die Ryk aangestel is, behoorlik vasgestel het dat geen twyfel oor algemene politieke oorwegings bestaan nie.” Teen die einde van 1933 (wat deur pous Pius XI tot ’n “Heilige Jaar” uitgeroep is) het die Vatikaan se steun ’n belangrike faktor in Hitler se strewe na wêreldoorheersing geword.

8, 9. (a) Hoe het die Vatikaan sowel as die Katolieke Kerk en sy geestelikes op die Nazi-tirannie gereageer? (b) Watter verklaring het die Duitse Katolieke biskoppe aan die begin van die Tweede Wêreldoorlog uitgereik? (c) Waartoe het betrekkinge tussen godsdiens en die politiek gelei?

⁸ Hoewel ’n handjievol priesters en nonne teen Hitler se gruweldade beswaar gemaak het—en daarvoor moes boet—het die Vatikaan sowel as die Katolieke Kerk en sy leër van geestelikes óf aktiewe óf stilswyende steun aan die Nazi-tirannie gegee, wat na hulle mening ’n skans teen die opmars van wêreldkommunisme was. Pous Pius XII het, vanuit sy gunstige posisie in die Vatikaan, die Slagting van die Jode en die wrede vervolging van Jehovah se Getuies en ander sonder kritiek laat voortgaan. Dit is ironies dat pous Johannes Paulus II, tydens sy besoek aan Duitsland in Mei 1987, een opregte priester se verset teen die Nazi’s geprys het. Wat het die duisende ander Duitse geestelikes tydens Hitler se skrikbewind gedoen? ’n Herderlike brief wat die Duitse Katolieke biskoppe aan die begin van die Tweede Wêreldoorlog in September 1939 uitgereik het, werp lig hierop. Dit lui ten dele: “In hierdie beslissende uur vermaan ons ons Katolieke soldate om hulle plig in gehoorsaamheid aan die Führer te doen en gereed te wees om hulle hele individualiteit op te offer. Ons doen ’n beroep op die Gelowiges om vurig te bid dat die Goddelike Voorsienigheid hierdie oorlog tot geseënde sukses lei.”

⁹ Sulke Katolieke diplomasie lig die soort hoerery toe waaraan godsdiens haar oor die afgelope 4 000 jaar skuldig gemaak het terwyl sy die politieke Staat verlei het om mag en voordeel te verkry. Sulke betrekkinge tussen godsdiens en die politiek het oorlog, vervolging en eindelose menslike ellende veroorsaak. Hoe verheug kan die mensdom tog wees dat Jehovah se oordeel oor die groot hoer op hande is. Mag dit spoedig voltrek word!

Sy sit op baie waters

10. Wat is die “baie waters” waarop Babilon die Grote vir beskerming vertrou, en wat gebeur daarmee?

¹⁰ Eertydse Babilon het op baie waters gesit—die Eufraatrivier en talryke kanale. Dit was vir die stad ’n beskerming sowel as ’n bron van handel wat rykdom meegebring het, totdat dit in een nag opgedroog het (Jeremia 50:38; 51:9, 12, 13). Babilon die Grote vertrou ook op “baie waters” om haar te beskerm en te verryk. Hierdie simboliese waters is “volke en menigtes en nasies en tale”, dit wil sê al die duisendmiljoene mense wat sy oorheers het en uit wie sy materiële steun geput het. Maar hierdie waters droog ook op, of onttrek hulle steun.—Openbaring 17:15; vergelyk Psalm 18:4; Jesaja 8:7.

11. (a) Hoe het eertydse Babilon “die hele aarde dronk gemaak”? (b) Hoe het Babilon die Grote “die hele aarde dronk gemaak”?

¹¹ Verder is eertydse Babilon beskryf as ‘’n goue beker in die hand van Jehovah, waardeur die hele aarde dronk gemaak is’ (Jeremia 51:7). Eertydse Babilon het omliggende nasies verplig om uitinge van Jehovah se toorn te sluk toe dit hulle met militêre mag oorwin en hulle so swak soos dronk mense gemaak het. In hierdie opsig was dit Jehovah se werktuig. Babilon die Grote het ook soveel oorwinnings behaal dat sy ’n wêreldryk geword het. Maar sy is beslis nie God se werktuig nie. Sy dien eerder “die konings van die aarde” met wie sy godsdienshoerery pleeg. Sy het hierdie konings bevredig deur die mensemassa, “dié wat die aarde bewoon”, deur middel van haar leuenagtige leerstellings en verslawende gebruike so swak soos dronk mense te hou, in passiewe onderdanigheid aan hulle heersers.

12. (a) Hoe was ’n deel van Babilon die Grote in Japan gedurende die Tweede Wêreldoorlog vir baie bloedvergieting verantwoordelik? (b) Hoe het “waters” wat Babilon die Grote gesteun het, in Japan gesak, en met watter gevolg?

¹² Sjintoïstiese Japan is ’n treffende voorbeeld hiervan. Die geïndoktrineerde Japannese soldaat het dit as die hoogste eer beskou om sy lewe vir die keiser—die hoogste Sjinto-god—af te lê. Gedurende die Tweede Wêreldoorlog het sowat 1 500 000 Japannese soldate in gevegte gesneuwel; feitlik almal het oorgawe as ’n skande beskou. Maar as gevolg van Japan se nederlaag was keiser Hirohito verplig om afstand te doen van sy aanspraak op goddelikheid. Dit het daartoe gelei dat die “waters” wat die Sjintoïstiese deel van Babilon die Grote gesteun het, opmerklik gesak het—helaas, eers nadat Sjintoïsme die vergieting van emmers bloed aan die oorlogsfront in die Stille Oseaan goedgekeur het! Hierdie verswakking van Sjintoïstiese invloed het ook in onlangse jare die weg gebaan vir meer as 200- 000 Japannese, waarvan die meeste vroeër Sjintoïste en Boeddhiste was, om toegewyde, gedoopte bedienaars van die Soewereine Heer Jehovah te word.

Die hoer ry op ’n dier

13. Watter verstommende toneel sien Johannes wanneer die engel hom in die krag van die gees na ’n wildernis wegvoer?

¹³ Wat onthul die profesie nog oor die groot hoer en haar lot? Soos Johannes nou vertel, sien hy nog ’n treffende toneel: “En hy [die engel] het my in die krag van die gees na ’n wildernis weggevoer. En ek het ’n vrou op ’n skarlakenkleurige wilde dier sien sit, wat vol lasterlike name was en wat sewe koppe en tien horings gehad het.”—Openbaring 17:3.

14. Waarom is dit gepas dat Johannes na ’n wildernis weggevoer is?

¹⁴ Waarom word Johannes na ’n wildernis weggevoer? ’n Vroeëre oordeel teen eertydse Babilon is beskryf as ’n oordeel “teen die wildernis van die see” (Jesaja 21:1, 9). Dit het gewaarsku dat eertydse Babilon, ten spyte van al sy beskermende waters, ’n lewelose woesteny sou word. Dit is dus gepas dat Johannes in sy visioen na ’n wildernis weggevoer word om die lot van Babilon die Grote te aanskou. Sy moet ook verlate en woes word (Openbaring 18:19, 22, 23). Maar Johannes staan verstom oor wat hy daar sien. Die groot hoer is nie alleen nie! Sy sit op ’n monsteragtige wilde dier!

15. Watter verskille is daar tussen die wilde dier van Openbaring 13:1 en die een van Openbaring 17:3?

¹⁵ Hierdie wilde dier het sewe koppe en tien horings. Is hy dan dieselfde as die wilde dier wat Johannes vroeër gesien het, wat ook sewe koppe en tien horings het? (Openbaring 13:1). Nee, daar is verskille. Hierdie wilde dier is skarlakenkleurig, en anders as in die geval van die vorige wilde dier word daar nie van hom gesê dat hy krone het nie. Pleks van lasterlike name net op sy sewe koppe te hê, is hy “vol lasterlike name”. En tog moet daar ’n verband tussen hierdie nuwe wilde dier en die vorige een wees; die ooreenkomste tussen hulle is te opvallend om toevallig te wees.

16. Wat is die identiteit van die skarlakenkleurige wilde dier, en wat is oor sy doel gesê?

¹⁶ Wat is hierdie nuwe skarlakenkleurige wilde dier dan? Hy moet die beeld van die wilde dier wees wat voortgebring is op aandrang van die Anglo-Amerikaanse wilde dier wat twee horings soos ’n lam het. Nadat die beeld gemaak is, is die wilde dier met die twee horings toegelaat om asem aan die beeld van die wilde dier te gee (Openbaring 13:14, 15). Johannes sien nou die lewende beeld wat asemhaal. Dit beeld die Volkebond-organisasie af wat in 1920 deur die wilde dier met die twee horings in die lewe geroep is. Amerikaanse president Wilson het verwag dat die Volkebond “’n forum sou wees wat geregtigheid vir alle mense sou verseker en die bedreiging van oorlog vir ewig sou uitwis”. Toe die beeld ná die Tweede Wêreldoorlog as die Verenigde Nasies opgewek is, was sy doel volgens sy handves “om internasionale vrede en veiligheid te bewaar”.

17. (a) In watter opsig is die simboliese skarlakenkleurige wilde dier vol lasterlike name? (b) Wie ry op die skarlakenkleurige wilde dier? (c) Hoe het Babiloniese godsdiens haar uit die staanspoor met die Volkebond en sy opvolger verbind?

¹⁷ In watter opsig is hierdie simboliese wilde dier vol lasterlike name? In die sin dat mense hierdie veelvolkige afgod as ’n plaasvervanger van God se Koninkryk opgerig het—om te doen wat God sê sy Koninkryk alleen kan doen (Daniël 2:44; Matteus 12:18, 21). Maar wat opmerkenswaardig is omtrent Johannes se visioen, is dat Babilon die Grote op die skarlakenkleurige wilde dier ry. In ooreenstemming met die profesie het Babiloniese godsdiens haar, veral in die Christendom, met die Volkebond en sy opvolger verbind. Reeds op 18 Desember 1918 het die liggaam wat nou as die Nasionale Raad van die Kerke van Christus in Amerika bekend staan, ’n verklaring aangeneem wat onder meer gesê het: “So ’n Volkebond is nie bloot ’n politieke middel tot ’n doel nie; dit is eerder die politieke beliggaming van die Koninkryk van God op aarde. . . . Die Kerk kan welwillendheid toon, waarsonder geen Volkebond kan bly bestaan nie. . . . Die Volkebond is op die Evangelie gegrond. Soos die Evangelie is sy oogmerk ‘vrede op aarde en welwillendheid teenoor mense’.”

18. Hoe het die Christendom se geestelikes hulle steun van die Volkebond getoon?

¹⁸ Op 2 Januarie 1919 was die voorbladopskrif in die San Francisco Chronicle: “Pous pleit om goedkeuring van Wilson se Volkebond.” Op 16 Oktober 1919 is ’n petisie wat deur 14 450 geestelikes van die vernaamste kerkgenootskappe onderteken is, aan die Amerikaanse Senaat voorgelê, waarin daardie liggaam aangespoor is “om die vredesverdrag van Parys, wat die handves van die volkebond insluit, te bekragtig”. Hoewel die Amerikaanse Senaat nie die verdrag bekragtig het nie, het die Christendom se geestelikes aangehou om hulle vir die Volkebond te beywer. En hoe is die Volkebond ingewy? ’n Nuusberig uit Switserland, gedateer 15 November 1920, het gelui: “Die opening van die eerste vergadering van die Volkebond is om elfuur vanoggend deur die gelui van al die kerkklokke in Genève aangekondig.”

19. Wat het die Johannes-klas gedoen toe die skarlakenkleurige wilde dier verskyn het?

¹⁹ Het die Johannes-klas, die een groep op die aarde wat die inkomende Messiaanse Koninkryk gretig aanvaar het, saam met die Christendom hulde bewys aan die skarlakenkleurige wilde dier? Glad nie! Op Sondag 7 September 1919 is die openbare toespraak “Die hoop vir die geteisterde mensdom” tydens die byeenkoms van Jehovah se volk in Cedar Point, Ohio, gehou. Die volgende dag het die Star-Journal van Sandusky berig dat J. F. Rutherford sowat 7 000 mense toegespreek het en “beweer het dat die Volkebond beslis besoek sal word met die Here se misnoeë . . . omdat die geestelikes—Katoliek en Protestant—wat beweer dat hulle God se verteenwoordigers is, sy plan laat vaar het en die Volkebond gesteun en verwelkom het as ’n politieke beliggaming van Christus se koninkryk op aarde”.

20. Waarom was dit lasterlik vir die geestelikes om die Volkebond as “die politieke beliggaming van die Koninkryk van God op aarde” te begroet?

²⁰ Die jammerlike mislukking van die Volkebond moes vir die geestelikes ’n teken gewees het dat sulke mensgemaakte instansies geen deel van ’n Koninkryk van God op aarde is nie. So ’n bewering is inderdaad lasterlik! Dit laat dit lyk asof God iets te doen gehad het met die groot mislukking wat die Volkebond in werklikheid was. Wat God betref, “volmaak is sy werk”. Jehovah se hemelse Koninkryk onder Christus—en nie ’n vereniging van twistende politici, waarvan baie ateïste is nie—is die middel waardeur hy vrede sal inbring en sy wil op die aarde soos in die hemel sal laat geskied.—Deuteronomium 32:4; Matteus 6:10.

21. Wat toon dat die groot hoer die Volkebond se opvolger, die Verenigde Nasies, steun en bewonder?

²¹ Wat van die Volkebond se opvolger, die Verenigde Nasies? Sedert die stigting van hierdie liggaam het die groot hoer ook op sy rug gery deur haar sigbaar met hom te verbind en sy lot te probeer beskik. Byvoorbeeld, tydens die herdenking van sy 20-jarige bestaan, in Junie 1965, het verteenwoordigers van die Rooms-Katolieke Kerk en die Oosters-Ortodokse Kerk, tesame met Protestante, Jode, Hindoes, Boeddhiste en Moslems—wat glo tweemiljard van die aarde se bevolking verteenwoordig het—in San Francisco vergader om hulle steun van en bewondering vir die VN te vier. Tydens sy besoek aan die VN in Oktober 1965 het pous Paulus VI dit “die grootste van alle internasionale organisasies” genoem en bygevoeg: “Die volke van die aarde wend hulle tot die Verenigde Nasies as die laaste hoop op harmonie en vrede.” ’n Ander pouslike besoeker, pous Johannes Paulus II, het die VN in Oktober 1979 toegespreek en gesê: “Ek hoop dat die Verenigde Nasies altyd die hoogste forum vir vrede en geregtigheid sal bly.” Dit is betekenisvol dat die pous in sy toespraak bitter min aandag aan Jesus Christus of aan God se Koninkryk geskenk het. Volgens The New York Times het Johannes Paulus gedurende sy besoek aan die Verenigde State in September 1987 “uitgewei oor die positiewe rol van die Verenigde Nasies in die bevordering van . . . ‘nuwe wêreldwye solidariteit’”.

’n Naam, ’n verborgenheid

22. (a) Watter soort dier het die groot hoer gekies om op te ry? (b) Hoe beskryf Johannes die simboliese hoer Babilon die Grote?

²² Die apostel Johannes gaan spoedig uitvind dat die groot hoer ’n gevaarlike dier gekies het om op te ry. Maar eers gee hy aandag aan Babilon die Grote self. Sy is ryklik versier, maar o, hoe afstootlik is sy tog! “En die vrou was geklee in purper en skarlaken en was versier met goud en edelstene en pêrels en het in haar hand ’n goue beker gehad wat vol walglike dinge en die onrein dinge van haar hoerery was. En op haar voorkop was ’n naam geskrywe, ’n verborgenheid: ‘Babilon die Grote, die moeder van die hoere en van die walglike dinge van die aarde.’ En ek het gesien dat die vrou dronk was van die bloed van die heiliges en van die bloed van die getuies van Jesus.”—Openbaring 17:4-6a.

23. Wat is die volle naam van Babilon die Grote, en wat beteken dit?

²³ Volgens die gebruik in eertydse Rome word hierdie prostituut deur die naam op haar voorkop geïdentifiseer.d Dit is ’n lang naam: “Babilon die Grote, die moeder van die hoere en van die walglike dinge van die aarde.” Hierdie naam is “’n verborgenheid”, iets met ’n verskuilde betekenis. Maar op God se bestemde tyd sal die verborgenheid verduidelik word. Trouens, die engel gee Johannes genoeg inligting om Jehovah se knegte vandag in staat te stel om die volle betekenis van hierdie beskrywende naam te onderskei. Ons herken Babilon die Grote as valse godsdiens in die geheel. Sy is “die moeder van die hoere” omdat al die individuele valse godsdienste ter wêreld, waaronder die talle sektes in die Christendom, soos haar dogters is en haar navolg deur geestelike hoerery te pleeg. Sy is ook die moeder van “walglike dinge” in die sin dat sy sulke afskuwelike kinders soos afgodediens, spiritisme, waarsêery, astrologie, handlesery, menseoffers, tempelprostitusie, dronkenskap tot eer van valse gode en ander onwelvoeglike gebruike gebaar het.

24. Waarom is dit gepas dat Babilon die Grote in die visioen in “purper en skarlaken” geklee en “met goud en edelstene en pêrels” versier is?

²⁴ Babilon die Grote is geklee in “purper en skarlaken”, die kleure van koningskap, en is “versier met goud en edelstene en pêrels”. Hoe gepas! Dink net aan al die manjifieke geboue, seldsame standbeelde en skilderye, kosbare ikone en ander godsdienstoebehore, sowel as die astronomiese hoeveelheid eiendom en kontant, wat hierdie wêreld se godsdienste vergaar het. Hetsy in die Vatikaan, in die TV-ryk van evangelisasie met sy middelpunt in die Verenigde State of in die eksotiese tempels van die Ooste, Babilon die Grote het ongelooflike rykdom opgegaar—en soms verloor.

25. (a) Wat word gesimboliseer deur die inhoud van die ‘goue beker wat vol walglike dinge was’? (b) In watter sin is die simboliese hoer dronk?

²⁵ Kyk nou na wat die hoer in haar hand het. Johannes het sekerlik na sy asem gesnak toe hy dit sien—’n goue beker “vol walglike dinge en die onrein dinge van haar hoerery”! Dit is die beker met “die wyn van die toorn van haar hoerery” waarmee sy al die nasies dronk gemaak het (Openbaring 14:8; 17:4). Dit lyk pragtig van buite, maar die inhoud daarvan is walglik en onrein. (Vergelyk Matteus 23:25, 26.) Dit bevat al die vieslike gebruike en leuens wat die groot hoer gebruik het om die nasies te verlei en hulle onder haar invloed te bring. Selfs afskuweliker, Johannes sien dat die hoer self besope is, dronk van die bloed van God se knegte! Trouens, ons lees later dat ‘die bloed van profete en van heiliges en van almal wat op die aarde doodgemaak is, in haar gevind is’ (Openbaring 18:24). Watter ontsaglike bloedskuld!

26. Watter getuienis is daar van Babilon die Grote se bloedskuld?

²⁶ Deur die eeue heen het die wêreldryk van valse godsdiens oseane van bloed vergiet. Byvoorbeeld, in Middeleeuse Japan is tempels in Kioto in vestings verander, en soldate-monnike wat “die heilige naam van Boeddha” aangeroep het, het teen mekaar geveg totdat die strate vol bloed was. In die 20ste eeu het die geestelikes van die Christendom saam met die leërs van hulle lande gemarsjeer, en hierdie leërs het mekaar uitgemoor, met die verlies van ten minste honderdmiljoen lewens. In Oktober 1987 het die voormalige Amerikaanse president Nixon gesê: “Die 20ste eeu was die bloedigste in die geskiedenis. Meer mense is in die oorloë van hierdie eeu doodgemaak as in al die oorloë wat voor die begin van die eeu gevoer is.” Die godsdienste van die wêreld word deur God veroordeel vir hulle aandeel hieraan; Jehovah verfoei “hande wat onskuldige bloed vergiet” (Spreuke 6:16, 17). Johannes het vroeër ’n uitroep van die altaar af gehoor: “Tot wanneer, Soewereine Heer, heilig en waaragtig, weerhou u u daarvan om te oordeel en ons bloed te wreek op dié wat op die aarde woon?” (Openbaring 6:10). Babilon die Grote, die moeder van die hoere en van die walglike dinge van die aarde, sal diep daarby betrokke wees wanneer die tyd aanbreek om hierdie vraag te beantwoord.

[Voetnote]

In plaas van sulke afgodediens te heilig, vermaan “Jehovah die Almagtige” Christene: “Gaan . . . onder hulle uit en sonder julle af, . . . en hou op om wat onrein is, aan te raak.”—2 Korintiërs 6:14-18.

[Venster op bladsy 237]

Churchill lê “hoerery” bloot

In sy boek The Gathering Storm (1948) sê Winston Churchill dat Hitler Franz von Papen as Duitse minister in Wene aangestel het om “vooraanstaande persone in die Oostenrykse politiek te ondermyn of oor te haal”. Churchill haal die Amerikaanse minister in Wene se woorde oor Von Papen aan: “Op die vermetelste en siniesste wyse . . . het Von Papen vir my gesê dat . . . hy van plan is om sy reputasie as ’n goeie Katoliek te gebruik om invloed by Oostenrykers soos kardinaal Innitzer te verkry.”

Nadat Oostenryk voorwaardelik oorgegee en Hitler se stormtroepe in Wene ingemarsjeer het, het die Katolieke kardinaal Innitzer beveel dat alle Oostenrykse kerke die swastikavlag hys, hulle klokke lui en vir Adolf Hitler bid ter ere van sy verjaarsdag.

[Venster/Prent op bladsy 238]

Onder hierdie opskrif het die volgende artikel in die eerste uitgawe van The New York Times van 7 Desember 1941 verskyn:

‘OORLOGSGEBED’ VIR DIE RYK

“Katolieke biskoppe in Fulda vra seën en oorwinning . . . Die Konferensie van Duitse Katolieke biskoppe wat in Fulda vergader het, het aanbeveel dat ’n spesiale ‘oorlogsgebed’ ingevoer word wat aan die begin en einde van alle kerkdienste gelees moet word. Die gebed smeek die Voorsienigheid om Duitse leërs met oorwinning te seën en die lewe en gesondheid van alle soldate te beskerm. Die biskoppe het Katolieke geestelikes verder gelas om Duitse soldate ‘op land, op see en in die lug’ ten minste een keer per maand in ’n spesiale Sondagpreek in gedagte te hou.”

Die artikel is aan latere uitgawes van die koerant onttrek. Dit was op 7 Desember 1941 dat Nazi-Duitsland se bondgenoot, Japan, die Amerikaanse vloot in Pearl Harbor aangeval het.

[Venster op bladsy 244]

“Lasterlike name”

Toe die wilde dier met die twee horings die Volkebond ná die Eerste Wêreldoorlog ondersteun het, het sy talle godsdiensminnaresse onmiddellik godsdiensgoedkeuring aan hierdie optrede probeer heg. Gevolglik het die nuwe vredesorganisasie “vol lasterlike name” geword.

“Die Christelike godsdiens kan die welwillendheid, die stukrag agter die [volke]bond voorsien en sodoende die verdrag van ’n stukkie papier in ’n werktuig van die koninkryk van God verander.”—The Christian Century, VSA, 19 Junie 1919, bladsy 15.

“Die Volkebond-idee is die uitbreiding tot internasionale betrekkinge van die idee van die Koninkryk van God as ’n wêreldorde van welwillendheid. . . . Dit is waarvoor alle Christene bid wanneer hulle sê: ‘Laat u Koninkryk kom.’”—The Christian Century, VSA, 25 September 1919, bladsy 7.

“Die Bindmiddel van die Volkebond is die Bloed van Christus.”—Dr. Frank Crane, Protestantse predikant, VSA.

“Die [Nasionale] Raad [van Kongregasionalistiese Kerke] ondersteun die Handves [van die Volkebond] as die enigste politieke werktuig tans beskikbaar waardeur die Gees van Jesus Christus in groter mate prakties op die aangeleenthede van nasies toegepas kan word.”—The Congregationalist and Advance, VSA, 6 November 1919, bladsy 642.

“Die konferensie doen ’n beroep op alle Metodiste om die ideale [van die Volkebond] te verdedig en ywerig te bevorder as ’n uiting van die gedagte van God die Vader en God se aardse kinders.”—Die Wesleyaanse Metodistekerk, Brittanje.

“Wanneer ons die strewes, die moontlikhede en die voornemens van hierdie ooreenkoms beskou, sien ons dat dit die kern van Jesus Christus se leringe bevat: Die Koninkryk van God en sy regverdigheid . . . Dit is niks minder as dit nie.”—Preek deur die Aartsbiskop van Kantelberg tydens die opening van die Vergadering van die Volkebond in Genève, 3 Desember 1922.

“Die Volkebond het in hierdie land dieselfde heilige reg as enige humanitêre sendinggenootskap, want dit is tans die doeltreffendste werktuig van die heerskappy van Christus as die Vredevors onder die nasies.”—Dr. Garvie, Kongregasionalistiese predikant, Brittanje.

[Kaart op bladsy 236]

(Sien publikasie vir oorspronklike teksuitleg)

Babilon

Drie-eenhede of triades gode

Die mensesiel lewe ná die dood voort

Spiritisme—kommunikasie met die “dooies”

Die gebruik van beelde in aanbidding

Die gebruik van towerspreuke om demone te paai

Oorheersing deur ’n magtige priesterdom

Valse leerstellings wat wêreldwyd geglo word, het in Babilon ontstaan

[Prente op bladsy 239]

Eertydse Babilon het op baie waters gesit

[Prent op bladsy 239]

Die groot hoer sit vandag ook op “baie waters”

[Prent op bladsy 241]

Babilon die Grote sit op ’n gevaarlike wilde dier

[Prent op bladsy 242]

Die godsdienshoer het hoerery gepleeg met die konings van die aarde

[Prente op bladsy 245]

Die vrou is ‘dronk van die bloed van die heiliges’

Hoofstuk 34

’n Ontsagwekkende verborgenheid onthul

1. (a) Hoe reageer Johannes wanneer hy die groot hoer sien en die skrikwekkende dier waarop sy ry, en waarom? (b) Hoe reageer die Johannes-klas vandag namate gebeure ter vervulling van die profetiese visioen plaasvind?

HOE reageer Johannes wanneer hy die groot hoer sien en die skrikwekkende dier waarop sy ry? Hy antwoord self: “Wel, toe ek haar sien, het ek my verwonder met groot verwondering” (Openbaring 17:6b). Blote menseverbeelding kan nooit so ’n toneel versin nie. En tog, daar is dit—ver weg in ’n wildernis—’n verdorwe prostituut wat op ’n aaklige, skarlakenkleurige wilde dier sit! (Openbaring 17:3). Die Johannes-klas verwonder hulle vandag ook met groot verwondering namate gebeure ter vervulling van die profetiese visioen plaasvind. As mense van die wêreld dit kon sien, sou hulle uitroep: ‘Ongelooflik!’, en die wêreld se heersers sou sê: ‘Ondenkbaar!’ Maar die visioen word in ons dag ’n skrikwekkende werklikheid. God se volk het reeds ’n merkwaardige aandeel aan die visioen se vervulling gehad, en dit verseker hulle dat die profesie tot sy verstommende klimaks sal voortgaan.

2. (a) Wat sê die engel vir Johannes in reaksie op sy verbasing? (b) Wat is aan die Johannes-klas geopenbaar, en hoe?

² Die engel merk Johannes se verbasing op. “Daarop”, sê Johannes verder, “het die engel vir my gesê: ‘Waarom het jy jou verwonder? Ek sal jou die verborgenheid vertel van die vrou en van die wilde dier wat haar dra en wat die sewe koppe en die tien horings het’” (Openbaring 17:7). A, die engel sal nou die verborgenheid ophelder! Hy verduidelik aan die verbaasde Johannes die verskillende aspekte van die visioen en die dramatiese gebeure wat op die punt staan om plaas te vind. Aangesien die waaksame Johannes-klas vandag onder engeleleiding dien, is die begrip van die profesie ook aan hulle geopenbaar. “Is uitleggings nie ’n saak van God nie?” Soos die getroue Josef glo ons dat dit die geval is. (Genesis 40:8; vergelyk Daniël 2:29, 30.) God se volk word as ’t ware in die middel van die aksie geplaas terwyl Jehovah die betekenis van die visioen en die uitwerking daarvan op hulle lewens aan hulle uitlê (Psalm 25:14). Hy het dit presies op tyd vir hulle moontlik gemaak om die verborgenheid van die vrou en van die wilde dier te verstaan.—Psalm 32:8.

3, 4. (a) Watter openbare toespraak is in 1942 deur N. H. Knorr gehou, en hoe het dit die skarlakenkleurige wilde dier geïdentifiseer? (b) Watter woorde van die engel aan Johannes is deur N. H. Knorr bespreek?

³ Van 18 tot 20 September 1942, toe die Tweede Wêreldoorlog op sy ergste was, het Jehovah se Getuies in die Verenigde State hulle Nuwe Wêreld- Teokratiese Byeenkoms gehou. Die sleutelstad, Cleveland, Ohio, is per telefoon met meer as 50 ander byeenkomsstede verbind, sodat daar ’n opkomshoogtepunt van 129 699 was. Waar oorlogstoestande dit toegelaat het, is die program by ander byeenkomste regoor die aarde herhaal. Destyds het baie van Jehovah se volk verwag dat die oorlog sou ontwikkel tot God se oorlog van Armageddon; gevolglik het die titel van die openbare toespraak, “Vrede—Kan dit voortduur?” baie nuuskierigheid gewek. Hoe kon die nuwe president van die Wagtoringgenootskap, N. H. Knorr, dan nou oor vrede praat terwyl dit gelyk het of presies die teenoorgestelde vir die nasies voorlê?a Omdat die Johannes-klas “meer as die gewone aandag” aan God se profetiese Woord geskenk het.—Hebreërs 2:1; 2 Petrus 1:19.

⁴ Watter lig het die toespraak “Vrede—Kan dit voortduur?” op die profesie gewerp? N. H. Knorr het die skarlakenkleurige wilde dier van Openbaring 17:3 duidelik as die Volkebond geïdentifiseer en toe die stormagtige loopbaan daarvan bespreek op grond van die engel se volgende woorde aan Johannes: “Die wilde dier wat jy gesien het, was, maar is nie, en staan tog op die punt om uit die afgrond op te kom, en hy moet in die vernietiging weggaan.”—Openbaring 17:8a.

5. (a) Hoe is dit dat ‘die wilde dier was’ en dan ‘nie is nie’? (b) Wat was N. H. Knorr se antwoord op die vraag: “Sal die Volkebond in die afgrond bly?”

⁵ ‘Die wilde dier was.’ Ja, dit het van 10 Januarie 1920 af as die Volkebond bestaan, met 63 nasies wat op die een of ander tyd deel daarvan was. Maar Japan, Duitsland en Italië het hulle die een ná die ander daaraan onttrek, en die voormalige Sowjetunie is uit die Volkebond geskors. In September 1939 het die Nazi-diktator van Duitsland die Tweede Wêreldoorlog ontketen.b Omdat die Volkebond nie vrede in die wêreld kon bewaar nie, het dit in ’n afgrond van onbedrywigheid ingegaan. Teen 1942 was dit iets van die verlede. Nie voor dié tyd en ook nie later nie—maar juis op hierdie kritieke tydstip—het Jehovah die volle betekenis van die visioen aan sy volk uitgelê! By die Nuwe Wêreld- Teokratiese Byeenkoms kon N. H. Knorr, in ooreenstemming met die profesie, sê dat ‘die wilde dier nie is nie’. Toe het hy die vraag gestel: “Sal die Volkebond in die afgrond bly?” Hy het Openbaring 17:8 aangehaal en geantwoord: “Die bond van wêreldse nasies sal weer verrys.” Dit is presies wat gebeur het—ter regverdiging van Jehovah se profetiese Woord!

Hy kom uit die afgrond op

6. (a) Wanneer het die skarlakenkleurige wilde dier uit die afgrond verrys, en met watter nuwe naam? (b) Waarom is die Verenigde Nasies in werklikheid ’n herlewing van die skarlakenkleurige wilde dier?

⁶ Die skarlakenkleurige wilde dier het inderdaad uit die afgrond verrys. Op 26 Junie 1945, in San Francisco, VSA, het 50 nasies met luide trompetgeskal gestem vir die aanvaarding van die Handves van die Verenigde Nasies. Hierdie liggaam moes “internasionale vrede en veiligheid bewaar”. Die Volkebond en die VN was in baie opsigte eenders. The World Book Encyclopedia sê: “In sommige opsigte stem die VN ooreen met die Volkebond wat ná die Eerste Wêreldoorlog georganiseer is . . . Baie van die nasies wat die VN gestig het, het ook vroeër die Volkebond gestig. Soos die Volkebond is die VN gestig om vrede tussen nasies te bewaar. Die vernaamste instansies van die VN is baie soos dié van die Volkebond.” Die VN is dus in werklikheid ’n herlewing van die skarlakenkleurige wilde dier. Sy ledetal van ongeveer 190 nasies is baie groter as die Volkebond se ledetal van 63; hy het ook groter verantwoordelikhede as sy voorganger op hom geneem.

7. (a) Hoe het die bewoners van die aarde hulle met bewondering verbaas oor die skarlakenkleurige wilde dier wat herlewe het? (b) Watter doelwit het die VN ontwyk, en wat het die VN se sekretaris-generaal in hierdie verband gesê?

⁷ Aanvanklik is hoë verwagtinge van die VN gekoester. Dit was ter vervulling van die engel se woorde: “En wanneer dié wat op die aarde woon, sien hoe die wilde dier was, maar nie is nie, en tog teenwoordig sal wees, sal hulle hulle met bewondering verbaas, maar hulle name is van die grondlegging van die wêreld af nie in die boekrol van die lewe geskryf nie” (Openbaring 17:8b). Die bewoners van die aarde het hierdie nuwe reus bewonder wat vanuit sy indrukwekkende hoofkwartier aan New York se Eastrivier opgetree het. Maar ware vrede en veiligheid het die VN ontwyk. Gedurende die grootste deel van die 20ste eeu is wêreldvrede net bewaar deur die bedreiging van “wedersyds versekerde vernietiging”, en die wapenwedloop neem nog steeds baie vinnig toe. Ná byna 40 jaar van inspanning deur die Verenigde Nasies het sy destydse sekretaris-generaal, Javier Pérez de Cuéllar, in 1985 geweeklaag: “Ons lewe in nog ’n tydperk van fanatici, en ons weet nie wat om daaromtrent te doen nie.”

8, 9. (a) Waarom het die VN nie die oplossings vir die wêreld se probleme nie, en wat sal binnekort volgens God se besluit daarmee gebeur? (b) Waarom is die name van die VN se stigters en bewonderaars nie in God se “boekrol van die lewe” opgeteken nie? (c) Wat sal Jehovah se Koninkryk met welslae doen?

⁸ Die VN het nie die oplossings nie. En waarom nie? Omdat die Lewegewer van die hele mensdom nie die lewegewer van die VN is nie. Die VN se lewensduur sal kort wees, want hy sal volgens God se besluit “in die vernietiging weggaan”. Die name van die VN se stigters en bewonderaars is nie in God se boekrol van die lewe opgeteken nie. Hoe kan sondige, sterflike mense, waarvan baie God se naam bespot, deur middel van die VN bereik wat Jehovah God verklaar het hy binnekort gaan doen, nie deur menslike middele nie, maar deur die Koninkryk van sy Christus?—Daniël 7:27; Openbaring 11:15.

⁹ Die VN is in werklikheid ’n lasterlike namaaksel van God se Messiaanse Koninkryk deur sy Vredevors, Jesus Christus—aan wie se vorstelike heerskappy daar geen einde sal wees nie (Jesaja 9:6, 7). Selfs al sou die VN die een of ander tydelike vrede bewerkstellig, sal oorloë gou weer uitbreek. Dit is die sondige mens se geaardheid. “Hulle name is van die grondlegging van die wêreld af nie in die boekrol van die lewe geskryf nie.” Jehovah se Koninkryk deur Christus sal nie net ewige vrede op die aarde tot stand bring nie, maar sal die dooies, die regverdiges en die onregverdiges wat in God se geheue is, op grond van Jesus se losprysoffer opwek (Johannes 5:28, 29; Handelinge 24:15). Dit sluit almal in wat ondanks die aanvalle van Satan en sy saad standvastig gebly het, en ander wat nog moet toon dat hulle gehoorsaam is. God se boekrol van die lewe sal natuurlik nooit die name bevat van hardnekkige aanhangers van Babilon die Grote of van enigiemand wat aangehou het om die wilde dier te aanbid nie.—Eksodus 32:33; Psalm 86:8-10; Johannes 17:3; Openbaring 16:2; 17:5.

Vrede en veiligheid—’n ydele hoop

10, 11. (a) Tot wat het die VN 1986 uitgeroep, en wat was die reaksie daarop? (b) Hoeveel “godsdiensfamilies” het in Assisi, Italië, vergader om vir vrede te bid, en verhoor God sulke gebede? Verduidelik.

¹⁰ In ’n poging om die mensdom nuwe hoop te gee, het die Verenigde Nasies 1986 tot ’n “Internasionale Vredesjaar” uitgeroep, met die tema “Om vrede en die toekoms van die mensdom te bewaar”. ’n Beroep is op strydende nasies gedoen om hulle wapens neer te lê, minstens ’n jaar lank. Wat was hulle reaksie? Volgens ’n verslag van die Internasionale Vredesnavorsingsinstituut het tot vyfmiljoen mense gedurende 1986 alleen as gevolg van oorloë gesterf! Hoewel ’n paar spesiale muntstukke en gedenkseëls uitgereik is, het die meeste nasies in daardie jaar min gedoen om die ideaal van vrede na te streef. Nietemin het die wêreld se godsdienste—wat altyd gretig is om goeie betrekkinge met die VN te behou—op verskeie maniere publisiteit aan die jaar gegee. Op 1 Januarie 1986 het pous Johannes Paulus II die werk van die VN geprys en die nuwe jaar aan vrede gewy. En op 27 Oktober het hy die leiers van baie van die wêreld se godsdienste in Assisi, Italië, byeengeroep om vir vrede te bid.

¹¹ Verhoor God sulke gebede vir vrede? Wel, tot watter God het daardie godsdiensleiers gebid? As jy hulle gevra het, sou elke groep ’n ander antwoord gegee het. Is daar ’n panteon van miljoene gode wat versoeke wat op talle verskillende maniere gedoen word, kan hoor en toestaan? Baie van die deelnemers het die Christendom se Drie-eenheid aanbid.c Boeddhiste, Hindoes en ander het gebede tot tallose gode gerig. Altesaam 12 “godsdiensfamilies” het vergader, verteenwoordig deur sulke vername persone soos die Anglikaanse Aartsbiskop van Kantelberg, Boeddhisme se Dalai Lama, ’n Russies-Ortodokse aartsbiskop, die president van Tokio se Vereniging van Sjintoïstiese heiligdomme, animiste uit Afrika en twee Indiane met geveerde hooftooisels. Dit was ’n kleurryke groep, om die minste te sê, wat skouspelagtige TV-dekking moontlik gemaak het. Een groep het 12 uur lank onophoudelik gebid. (Vergelyk Lukas 20:45-47.) Maar het enige van hierdie gebede verder gegaan as die reënwolke wat oor die vergadering gehang het? Nee, om die volgende redes:

12. Om watter redes het God nie die godsdiensleiers van die wêreld se gebede vir vrede verhoor nie?

¹² In teenstelling met dié wat “in die naam van Jehovah . . . wandel”, het nie een van daardie godsdiensbeoefenaars tot Jehovah, die lewende God, wie se naam sowat 7 000 keer in die oorspronklike teks van die Bybel voorkom, gebid nie (Miga 4:5; Jesaja 42:8, 12).d As ’n groep het hulle God nie in die naam van Jesus genader nie, aangesien die meeste van hulle nie eens in Jesus Christus glo nie (Johannes 14:13; 15:16). Nie een van hulle doen God se wil vir ons dag nie, naamlik om wêreldwyd te verkondig dat God se inkomende Koninkryk—nie die VN nie—die ware hoop vir die mensdom is (Matteus 7:21-23; 24:14; Markus 13:10). Hulle godsdiensorganisasies was in die meeste gevalle betrokke by die bloedige oorloë van die geskiedenis, met inbegrip van die twee wêreldoorloë van die 20ste eeu. God sê vir sulke mense: “Selfs al doen julle baie gebede, luister ek nie; julle hande is vol bloedvergieting.”—Jesaja 1:15; 59:1-3.

13. (a) Waarom is dit betekenisvol dat die wêreld se godsdiensleiers saam met die VN om vrede roep? (b) Op watter goddelik voorspelde klimaks sal die geroep om vrede uitloop?

¹³ Dit is verder baie betekenisvol dat die wêreld se godsdiensleiers nou saam met die Verenigde Nasies om vrede roep. Hulle sal die VN graag tot hulle eie voordeel wou beïnvloed, veral in hierdie moderne eeu wanneer so baie van hulle mense godsdiens die rug toekeer. Soos die ontroue leiers in eertydse Israel roep hulle uit: “‘Daar is vrede! Daar is vrede!’ terwyl daar geen vrede is nie” (Jeremia 6:14). Hulle geroep om vrede sal ongetwyfeld voortduur en al hoe harder word ter ondersteuning van die klimaks waarvan die apostel Paulus voorspel het: “Jehovah se dag [kom] net soos ’n dief in die nag . . . Wanneer hulle ook al sê: ‘Vrede en veiligheid!’ dan sal skielike vernietiging oombliklik oor hulle kom net soos die barenswee oor ’n swanger vrou; en hulle sal hoegenaamd nie ontkom nie.”—1 Tessalonisense 5:2, 3.

14. Watter vorm kan die uitroep “Vrede en veiligheid!” aanneem, en hoe kan ’n mens voorkom dat jy daardeur mislei word?

¹⁴ In onlangse jare het politici die uitdrukking “vrede en veiligheid” gebruik om verskeie mensestrewes te beskryf. Maak hierdie pogings deur wêreldleiers die begin uit van die vervulling van 1 Tessalonisense 5:3? Of het Paulus slegs na ’n spesifieke gebeurtenis van sulke dramatiese afmetings verwys dat dit die hele wêreld se aandag sal trek? Aangesien Bybelprofesieë dikwels eers ten volle verstaan word nadat dit vervul is of terwyl dit besig is om vervul te word, sal ons moet wag en sien. Intussen weet Christene dat niks werklik sal verander het nie, ongeag watter mate van vrede en veiligheid die nasies skynbaar bereik het. Selfsug, haat, misdaad, gesinsverbrokkeling, onsedelikheid, siekte, droefheid en die dood sal nog steeds daar wees. Dit is waarom geen uitroep van “vrede en veiligheid” jou hoef te mislei as jy wakker bly ten opsigte van die betekenis van wêreldgebeure en ag slaan op die profetiese waarskuwings in God se Woord nie.—Markus 13:32-37; Lukas 21:34-36.

[Voetnote]

[Venster op bladsy 250]

Die paradoks van “vrede”

Hoewel 1986 deur die VN tot Internasionale Vredesjaar uitgeroep is, het die noodlottige wapenwedloop toegeneem. World Military and Social Expenditures 1986 verskaf hierdie skokkende besonderhede:

In 1986 het wêreldwye militêre besteding $900 miljard bereik.

Een uur se wêreldwye militêre besteding sou genoeg gewees het om die 3,5 miljoen mense wat jaarliks aan voorkombare besmetlike siektes gesterf het, in te ent.

Wêreldwyd het een persoon uit elke vyf in nypende armoede gelewe. Al hierdie uitgehongerde mense sou ’n jaar lank gevoed kon word met die bedrag wat die wêreld in twee dae aan wapens bestee het.

Die ontploffingskrag in die wêreld se voorraadstapel kernwapens was 160 000 000 keer groter as dié van die Tsjernobil-ontploffing.

’n Kernbom kon afgevuur word waarvan die ontploffingskrag meer as 500 keer groter was as die bom wat in 1945 op Hirosjima gewerp is.

Kernarsenale het die ekwivalent van meer as eenmiljoen Hirosjimas bevat. Hulle het 2 700 keer die ontploffingskrag verteenwoordig wat in die Tweede Wêreldoorlog vrygestel is, toe 38 miljoen mense gesterf het.

Oorloë het meer dikwels voorgekom en was dodeliker. Daar was in die 18de eeu altesaam 4,4 miljoen oorlogsterftes, 8,3 miljoen in die 19de eeu en 98,8 miljoen in die eerste 86 jaar van die 20ste eeu. Sedert die 18de eeu het oorlogsterftes meer as ses keer vinniger as die wêreldbevolking toegeneem. Daar was tien keer soveel sterftes per oorlog in die 20ste eeu as in die 19de eeu.

[Prent op bladsy 247]

Soos oor die skarlakenkleurige wilde dier voorspel is, het die Volkebond gedurende die Tweede Wêreldoorlog in die afgrond ingegaan, maar het dit as die Verenigde Nasies herlewe

[Prente op bladsy 249]

Ter ondersteuning van die VN se “Vredesjaar” het verteenwoordigers van die wêreld se godsdienste in Assisi, Italië, ’n deurmekaarspul van gebede gedoen, maar nie een van hulle het tot die lewende God, Jehovah, gebid nie

Hoofstuk 35

Die teregstelling van Babilon die Grote

1. Hoe beskryf die engel die skarlakenkleurige wilde dier, en watter soort wysheid is nodig om die simbole van Openbaring te verstaan?

DIE engel beskryf die skarlakenkleurige wilde dier van Openbaring 17:3 verder en sê vir Johannes: “Hiér is dit ’n kwessie van die intelligensie wat wysheid het: Die sewe koppe beteken sewe berge, waarop die vrou sit. En daar is sewe konings: vyf het geval, een is, die ander een het nog nie gekom nie, maar wanneer hy wel kom, moet hy ’n kort tydjie bly” (Openbaring 17:9, 10). Die engel dra hier wysheid van bo oor, die enigste wysheid wat ons kan help om die simbole in Openbaring te verstaan (Jakobus 3:17). Hierdie wysheid verskaf verligting aan die Johannes-klas en hulle metgeselle aangaande die erns van die tye waarin ons lewe. Dit bou in toegewyde harte waardering vir Jehovah se oordele, wat binnekort voltrek gaan word, en skerp ’n heilsame vrees vir Jehovah in. Soos Spreuke 9:10 sê: “Die vrees van Jehovah is die begin van wysheid, en die kennis van die Allerheiligste is verstand.” Wat openbaar goddelike wysheid aan ons omtrent die wilde dier?

2. Wat beteken die sewe koppe van die skarlakenkleurige wilde dier, en hoe is dit dat ‘vyf geval het en een is’?

² Die sewe koppe van hierdie wrede dier staan vir sewe “berge”, of sewe “konings”. Albei terme word in die Skrif vir regeringsmagte gebruik (Jeremia 51:24, 25; Daniël 2:34, 35, 44, 45). In die Bybel word ses wêreldmoondhede gemeld wat ’n invloed op die aangeleenthede van God se volk gehad het: Egipte, Assirië, Babilon, Medo-Persië, Griekeland en Rome. Vyf hiervan het reeds gekom en gegaan toe Johannes Openbaring ontvang het, terwyl Rome nog baie beslis ’n wêreldmoondheid was. Dit kom goed ooreen met die woorde “vyf het geval, een is”. Maar wat van “die ander een” wat sou kom?

3. (a) Hoe is die Romeinse Ryk verdeel? (b) Watter verwikkelinge was daar in die Weste? (c) Hoe moet die Heilige Romeinse Ryk beskou word?

³ Die Romeinse Ryk het nog honderde jare ná Johannes se dag voortbestaan en selfs uitgebrei. In 330 G.J. het keiser Konstantyn sy hoofstad verskuif van Rome na Bisantium, wat hy tot Konstantinopel hernoem het. In 395 G.J. is die Romeinse Ryk verdeel in ’n Oostelike en Westelike deel. In 410 G.J. is Rome ingeneem deur Alarik, koning van die Wes-Gote (’n Germaanse stam wat hulle tot die Ariaanse vorm van die “Christelike godsdiens” bekeer het). Germaanse stamme (ook “Christelik”) het Spanje en ’n groot deel van Rome se gebied in Noord-Afrika verower. Daar was eeue van omwenteling, onrus en herskikking in Europa. Vername keisers het in die Weste verskyn, byvoorbeeld Karel die Grote, wat in die 9de eeu ’n bondgenootskap met pous Leo III gesluit het, en Frederik II, wat in die 13de eeu geheers het. Maar hoewel hulle ryk die Heilige Romeinse Ryk genoem is, was dit baie kleiner as dié van die vroeëre Romeinse Ryk toe hy op sy magtigste was. Dit was eerder ’n herstel of ’n voortsetting van hierdie eertydse moondheid as ’n nuwe ryk.

4. Watter oorwinnings het die Oostelike Ryk behaal, maar wat het met baie van die voormalige gebied van eertydse Rome in Noord-Afrika, Spanje en Sirië gebeur?

⁴ Rome se Oostelike Ryk, met Konstantinopel as sy hoofstad, het ietwat gespanne betrekkinge met die Westelike Ryk gehad. In die sesde eeu het die Oostelike keiser Justinianus I ’n groot deel van Noord-Afrika herower, en hy het ook in Spanje en Italië tussenbeide getree. In die sewende eeu het Justinianus II gebiede van Masedonië wat deur Slawiese stamme verower is, vir die Ryk herwin. Maar teen die agtste eeu was baie van die voormalige gebied van eertydse Rome in Noord-Afrika, Spanje en Sirië onder die oorheersing van die nuwe ryk van Islam en is dit derhalwe nie meer deur Konstantinopel en Rome beheer nie.

5. Hoewel die stad Rome in 410 G.J. geval het, waarom het dit nog baie eeue geduur voordat alle spore van die politieke Romeinse Ryk van die wêreldtoneel verdwyn het?

⁵ Die stad Konstantinopel self het ietwat langer voortbestaan. Dit het herhaalde aanvalle deur Perse, Arabiere, Bulgare en Russe deurstaan totdat dit uiteindelik in 1203 verower is—nie deur Moslems nie, maar deur Kruisvaarders uit die Weste. In 1453 het dit egter onder die mag van die Ottomaanse Moslemheerser Mehmet II gekom en spoedig die hoofstad van die Ottomaanse, of Turkse, Ryk geword. Hoewel die stad Rome in 410 G.J. geval het, het dit dus nog baie eeue geduur voordat alle spore van die politieke Romeinse Ryk van die wêreldtoneel verdwyn het. En selfs toe was sy invloed nog steeds waarneembaar in godsdiensryke wat op die pousdom van Rome en die Oosters-Ortodokse kerke gegrond was.

6. Watter splinternuwe ryke het ontstaan, en watter ryk het die suksesvolste geword?

⁶ Maar teen die 15de eeu het party lande splinternuwe ryke opgebou. Hoewel party van hierdie nuwe keiserlike moondhede in die gebied van voormalige Romeinse kolonies voorgekom het, was hulle ryke nie bloot voortsettings van die Romeinse Ryk nie. Portugal, Spanje, Frankryk en Nederland het almal setels van wydgestrekte ryke geword. Maar die suksesvolste ryk was Brittanje, wat die septer geswaai het oor ’n ontsaglike ryk waaroor ‘die son nooit ondergegaan het nie’. Hierdie ryk het op verskillende tye oor groot dele van Noord-Amerika, Afrika, Indië en Suidoos-Asië, sowel as die uitgestrektheid van die Stille Suidsee, uitgebrei.

7. Hoe het ’n soort tweeledige wêreldmoondheid ontstaan, en hoe lank het Johannes gesê sou die sewende ‘kop’, of wêreldmoondheid, bestaan?

⁷ Teen die 19de eeu het party van die kolonies in Noord-Amerika hulle reeds van Brittanje afgeskei om die onafhanklike Verenigde State van Amerika te vorm. ’n Mate van politieke konflik het tussen die nuwe nasie en die voormalige moederland voortgeduur. Nietemin het die Eerste Wêreldoorlog albei lande verplig om hulle gemene belange te erken en het dit hulle in ’n spesiale verhouding verbind. Sodoende het ’n soort tweeledige wêreldmoondheid ontstaan, saamgestel uit die Verenigde State van Amerika, tans die rykste nasie ter wêreld, en Groot-Brittanje, die setel van die grootste ryk ter wêreld. Hier is dan die sewende ‘kop’, of wêreldmoondheid, wat tot in die tyd van die einde bestaan en in wie se gebiede die hedendaagse Getuies van Jehovah aanvanklik gevestig geraak het. In vergelyking met die lang heerskappy van die sesde kop bly die sewende net “’n kort tydjie”, totdat God se Koninkryk alle volksentiteite vernietig.

Waarom word hy ’n agtste koning genoem?

8, 9. Wat noem die engel die simboliese skarlakenkleurige wilde dier, en in watter sin spruit hy uit die sewe voort?

⁸ Die engel verduidelik verder aan Johannes: “En die wilde dier wat was, maar nie is nie, hy is ook self ’n agtste koning, maar spruit uit die sewe voort, en hy gaan in die vernietiging weg” (Openbaring 17:11). Die simboliese skarlakenkleurige wilde dier ‘spruit voort’ uit die sewe koppe; dit wil sê, hy kom voort uit, of het sy bestaan te danke aan, daardie koppe van die oorspronklike “wilde dier uit die see”, waarvan die skarlakenkleurige wilde dier ’n beeld is. In watter sin? Wel, in 1919 was die Anglo-Amerikaanse moondheid die oorheersende kop. Die vorige ses koppe het geval, en hierdie tweeledige kop het die posisie van oorheersende wêreldmoondheid oorgeneem. Hierdie sewende kop, as die huidige verteenwoordiger van die opeenvolging van wêreldmoondhede, was die stukrag agter die stigting van die Volkebond en is nog steeds die vernaamste voorstander en geldelike ondersteuner van die Verenigde Nasies. Die skarlakenkleurige wilde dier—die agtste koning—“spruit” dus simbolies uit die oorspronklike sewe koppe “voort”. Volgens hierdie beskouing strook die verklaring dat dit uit die sewe voortgespruit het, goed met die vroeëre openbaring dat die wilde dier met twee horings soos ’n lam (die Anglo-Amerikaanse Wêreldmoondheid, die sewende kop van daardie oorspronklike wilde dier) mense aangespoor het om die beeld te maak en lewe daaraan gegee het.—Openbaring 13:1, 11, 14, 15.

⁹ Bowendien het regerings wat vanuit die setels van party van die vorige koppe geheers het, naamlik Griekeland, Iran (Persië) en Italië (Rome), tesame met Groot-Brittanje, onder die oorspronklike lede van die Volkebond getel. Later het regerings wat oor die gebied van die vorige ses wêreldmoondhede geheers het, ondersteunende lede van die beeld van die wilde dier geword. In hierdie sin kan daar ook gesê word dat hierdie skarlakenkleurige wilde dier uit die sewe wêreldmoondhede voortgespruit het.

10. (a) Hoe kan daar gesê word dat die skarlakenkleurige wilde dier “ook self ’n agtste koning” is? (b) Hoe het ’n leier van die voormalige Sowjetunie steun vir die Verenigde Nasies uitgespreek?

¹⁰ Let daarop dat die skarlakenkleurige wilde dier “ook self ’n agtste koning” is. Die Verenigde Nasies van vandag is derhalwe ontwerp om soos ’n wêreldregering te lyk. Dit het soms al selfs soos een opgetree deur leërs in die oorlogsveld uit te stuur om internasionale geskille te beëindig, soos in Korea, die Sinai-skiereiland, sommige Afrikalande en Libanon. Maar dit is slegs die beeld van ’n koning. Soos ’n godsdiensbeeld het dit geen werklike invloed of mag buiten wat daaraan verleen is deur dié wat dit geskep het en dit aanbid nie. Soms lyk hierdie simboliese wilde dier swak; maar dit is nog nooit op groot skaal deur diktatoriale lede verlaat nie—iets wat die Volkebond tot in die afgrond laat steier het (Openbaring 17:8). Hoewel sy menings op ander gebiede geheel en al verskil, het ’n vooraanstaande leier van die voormalige Sowjetunie hom in 1987 by die pouse van Rome aangesluit deur steun vir die VN uit te spreek. Hy het selfs “’n omvattende stelsel van internasionale veiligheid” wat op die VN gegrond is, bepleit. Soos Johannes spoedig uitvind, sal die tyd aanbreek wanneer die VN met aansienlike gesag sal optree. Dan sal dit, op sy beurt, ‘in die vernietiging weggaan’.

Tien konings een uur lank

11. Wat sê Jehovah se engel omtrent die tien horings op die simboliese skarlakenkleurige wilde dier?

¹¹ In die vorige hoofstuk van Openbaring het die sesde en sewende engel bakke van die toorn van God uitgegooi. Ons is sodoende in kennis gestel dat die aarde se konings vir God se oorlog by Armageddon versamel word en dat ‘Babilon die Grote voor die aangesig van God in herinnering gebring gaan word’ (Openbaring 16:1, 14, 19). Nou sal ons meer besonderhede ontvang oor hoe God se oordele aan hulle voltrek gaan word. Luister weer na Jehovah se engel wanneer hy met Johannes praat. “En die tien horings wat jy gesien het, beteken tien konings, wat nog nie ’n koninkryk ontvang het nie, maar hulle ontvang een uur lank gesag as konings saam met die wilde dier. Hulle het een gedagte, en daarom gee hulle hulle mag en gesag aan die wilde dier. Hulle sal teen die Lam veg, maar die Lam sal hulle oorwin omdat hy Here van die here en Koning van die konings is. Ook sal die geroepenes en uitverkorenes en getroues wat saam met hom is, oorwin.”—Openbaring 17:12-14.

12. (a) Wat beeld die tien horings af? (b) Hoe het die simboliese tien horings ‘nog nie ’n koninkryk ontvang nie’? (c) Hoe het die simboliese tien horings nou “’n koninkryk”, en vir hoe lank?

¹² Die tien horings beeld al die politieke magte af wat tans op die wêreldtoneel heerskappy voer en wat die beeld van die wilde dier steun. Baie min van die lande wat nou bestaan, was in Johannes se dag bekend. En dié wat was, soos Egipte en Persië (Iran), het vandag ’n heeltemal ander politieke stelsel. In die eerste eeu het die ‘tien horings dus nog nie ’n koninkryk ontvang nie’. Maar nou, in die dag van die Here, het hulle “’n koninkryk”, of politieke gesag. Met die ineenstorting van die groot koloniale ryke, veral sedert die Tweede Wêreldoorlog, het baie nuwe nasies ontstaan. Hulle, sowel as die ouer moondhede, moet ’n kort rukkie—net “een uur lank”—saam met die wilde dier regeer voordat Jehovah alle wêreldse politieke gesag by Armageddon beëindig.

13. In watter sin het die tien horings “een gedagte”, en watter gesindheid teenoor die Lam word hierdeur verseker?

¹³ Nasionalisme is vandag een van die sterkste dryfkragte agter hierdie tien horings. Hulle het “een gedagte” in die sin dat hulle liewer hulle nasionale soewereiniteit wil bewaar as om God se Koninkryk te aanvaar. Dit was hulle hele doel toe hulle die Volkebond en die Verenigde Nasies in die eerste plek onderskryf het—om wêreldvrede te bewaar en sodoende hulle eie bestaan te verseker. So ’n gesindheid verseker dat die horings die Lam, die “Here van die here en Koning van die konings”, sal teëstaan, want dit is Jehovah se voorneme dat sy Koninkryk onder Jesus Christus binnekort al hierdie koninkryke sal vervang.—Daniël 7:13, 14; Matteus 24:30; 25:31-33, 46.

14. Hoe kan die heersers van die wêreld teen die Lam veg, en wat sal die gevolg wees?

¹⁴ Daar is natuurlik niks wat die heersers van hierdie wêreld teen Jesus self kan doen nie. Hy is in die hemel, ver buite hulle bereik. Maar Jesus se broers, die oorblywendes van die vrou se saad, is nog op die aarde en is oënskynlik kwesbaar (Openbaring 12:17). Baie van die horings het reeds bittere vyandigheid teenoor hulle getoon, en op hierdie manier het hulle teen die Lam geveg (Matteus 25:40, 45). Maar dit sal binnekort tyd wees vir God se Koninkryk om “al hierdie koninkryke [te] verbrysel en daar ’n einde aan [te] maak” (Daniël 2:44). Dan sal die konings van die aarde dit met die Lam uitveg, soos ons binnekort sal sien (Openbaring 19:11-21). Maar hier leer ons genoeg om te besef dat die nasies nie suksesvol sal wees nie. Hoewel hulle en die skarlakenkleurige wilde dier, die VN, hulle “een gedagte” het, kan hulle nie die groot “Here van die here en Koning van die konings” oorwin nie, en hulle kan ook nie “die geroepenes en uitverkorenes en getroues wat saam met hom is”, oorwin nie, wat sy gesalfde volgelinge insluit wat nog op die aarde is. Ook laasgenoemdes sal oorwin het deur hulle onkreukbaarheid te handhaaf in antwoord op Satan se gemene aantygings.—Romeine 8:37-39; Openbaring 12:10, 11.

Die verwoesting van die hoer

15. Wat sê die engel omtrent die hoer en omtrent die gesindheid en optrede van die tien horings en die wilde dier teenoor haar?

¹⁵ God se volk is nie die enigste teikens van die vyandigheid van die tien horings nie. Die engel vestig nou weer Johannes se aandag op die hoer: “En hy sê vir my: ‘Die waters wat jy gesien het, waar die hoer sit, beteken volke en menigtes en nasies en tale. En die tien horings wat jy gesien het, en die wilde dier, hulle sal die hoer haat en sal haar verwoes en naak maak, en hulle sal haar vlesige dele opeet en haar heeltemal met vuur verbrand.’”—Openbaring 17:15, 16.

16. Waarom sal Babilon die Grote nie vir beskermende steun op haar waters kan staatmaak wanneer politieke regerings teen haar draai nie?

¹⁶ Net soos eertydse Babilon op sy beskermende waters staatgemaak het, maak Babilon die Grote vandag staat op haar ontsaglike ledetal wat uit “volke en menigtes en nasies en tale” bestaan. Die engel vestig tereg ons aandag hierop voordat hy van ’n skokkende verwikkeling vertel: Politieke regerings van hierdie aarde sal Babilon die Grote met geweld aanval. Wat sal al hierdie “volke en menigtes en nasies en tale” dan doen? God se volk waarsku Babilon die Grote alreeds dat die water van die Eufraatrivier sal opdroog (Openbaring 16:12). Daardie waters sal uiteindelik heeltemal wegvloei. Hulle sal die weersinwekkende ou hoer geen doeltreffende steun kan gee wanneer sy in die grootste nood verkeer nie.—Jesaja 44:27; Jeremia 50:38; 51:36, 37.

17. (a) Waarom sal die rykdom van Babilon die Grote haar nie red nie? (b) Hoe sal die einde van Babilon die Grote allesbehalwe waardig wees? (c) Wat benewens die tien horings, of individuele nasies, sal ook aan die verwoesting van Babilon die Grote deelneem?

¹⁷ Die ontsaglike materiële rykdom van Babilon die Grote sal haar beslis nie red nie. Dit kan haar verwoesting selfs bespoedig, want die visioen toon dat die wilde dier en die tien horings haar koninklike gewade en al haar juwele sal verwyder wanneer hulle aan hulle haat uiting gee. Hulle sal haar rykdom plunder. Hulle ‘maak haar naak’ deur haar ware karakter tot haar skande te ontbloot. Wat ’n verwoesting sal dit tog wees! Haar einde is ook allesbehalwe waardig. Hulle vernietig haar, ‘eet haar vlesige dele op’ en maak haar ’n lewelose geraamte. Ten slotte ‘verbrand hulle haar heeltemal met vuur’. Sy word soos ’n draer van die pes verbrand, sonder om eens behoorlik begrawe te word! Dit is nie die nasies alleen, wat deur die tien horings voorgestel word, wat die groot hoer vernietig nie, maar “die wilde dier”, naamlik die VN self, neem saam met hulle aan hierdie verwoesting deel. Dit sal die vernietiging van valse godsdiens goedkeur. Baie van die meer as 190 nasies in die VN het reeds deur hulle stempatroon vyandigheid teenoor godsdiens getoon, veral teenoor dié van die Christendom.

18. (a) Watter potensiaal vir die nasies om teen Babiloniese godsdiens te draai, is reeds gesien? (b) Wat sal die basiese rede vir die hewige aanval teen die groot hoer wees?

¹⁸ Waarom behandel die nasies hulle voormalige minnares so wreed? Ons het in die onlangse geskiedenis die potensiaal gesien vir die nasies om so teen Babiloniese godsdiens te draai. Amptelike staatsteenkanting het die invloed van godsdiens in lande soos die voormalige Sowjetunie en China grootliks verminder. In Protestantse dele van Europa staan die kerke weens wydverspreide onverskilligheid en twyfel leeg, sodat godsdiens feitlik dood is. Die uitgestrekte Katolieke ryk word verdeel deur opstand en onenigheid, wat haar leiers nie tot bedaring kan bring nie. Ons moet egter nie uit die oog verloor dat hierdie finale, hewige aanval teen Babilon die Grote ’n blyk is van God se onveranderlike oordeel oor die groot hoer nie.

Die uitvoering van God se gedagte

19. (a) Hoe kan die voltrekking van Jehovah se oordeel aan die groot hoer toegelig word deur sy oordeel oor afvallige Jerusalem in 607 v.G.J.? (b) Wat het die verlate, onbewoonde toestand van Jerusalem ná 607 v.G.J. vir ons dag voorafgeskadu?

¹⁹ Hoe voltrek Jehovah hierdie oordeel? Dit kan toegelig word deur Jehovah se optrede teen sy afvallige volk in die ou tyd, van wie hy gesê het: “By die profete van Jerusalem het ek afskuwelike dinge gesien: hulle pleeg egbreuk en wandel in leuens; en hulle het die hande van die kwaaddoeners versterk, sodat hulle nie sou terugkeer, elkeen van sy slegtheid nie. Hulle het almal vir my soos Sodom geword, en sy inwoners soos Gomorra” (Jeremia 23:14). In 607 v.G.J. het Jehovah Nebukadnesar gebruik om ‘die klere uit te trek en die pragtige voorwerpe weg te neem’ van daardie geestelik owerspelige stad en dit ‘naak en ontbloot agter te laat’ (Esegiël 23:4, 26, 29). Eertydse Jerusalem was ’n patroon van die hedendaagse Christendom, en soos Johannes in vroeëre visioene gesien het, sal Jehovah die Christendom en die res van valse godsdiens op soortgelyke wyse straf. Die verlate, onbewoonde toestand van Jerusalem ná 607 v.G.J. toon hoe godsdienstige Christendom sal lyk nadat sy van haar rykdom gestroop en tot haar skande ontbloot is. En die res van Babilon die Grote sal niks beter vaar nie.

20. (a) Hoe toon Johannes dat Jehovah weer menseheersers sal gebruik om oordeel te voltrek? (b) Wat is God se “gedagte”? (c) Hoe sal die nasies hulle “een gedagte” uitvoer, maar wie se gedagte sal in werklikheid uitgevoer word?

²⁰ Jehovah gebruik weer menseheersers om oordeel te voltrek. “Want God het dit in hulle harte gesit om sy gedagte uit te voer, ja, om hulle een gedagte uit te voer deur hulle koninkryk aan die wilde dier te gee, totdat die woorde van God volbring sal wees” (Openbaring 17:17). Wat is God se “gedagte”? Om te reël dat die skerpregters van Babilon die Grote verenig om haar heeltemal te vernietig. Die heersers se beweegrede vir hulle aanval teen haar sal natuurlik wees om húlle “een gedagte” uit te voer. Hulle sal dink dat dit in hulle nasionalistiese belang is om die groot hoer aan te val. Hulle sal moontlik die voortbestaan van georganiseerde godsdiens binne hulle grense as ’n bedreiging vir hulle soewereiniteit beskou. Maar dit sal in werklikheid Jehovah wees wat sake manipuleer; hulle sal sy gedagte uitvoer deur sy eeue oue, owerspelige vyand met een slag te vernietig!—Vergelyk Jeremia 7:8-11, 34.

21. Aangesien die skarlakenkleurige wilde dier gebruik sal word om Babilon die Grote te vernietig, wat sal die nasies klaarblyklik met betrekking tot die Verenigde Nasies doen?

²¹ Ja, die nasies sal die skarlakenkleurige wilde dier, die Verenigde Nasies, gebruik om Babilon die Grote te vernietig. Hulle handel nie op eie inisiatief nie, want Jehovah sit dit in hulle harte “om hulle een gedagte uit te voer deur hulle koninkryk aan die wilde dier te gee”. Wanneer die tyd aanbreek, sal die nasies dit klaarblyklik nodig ag om die Verenigde Nasies te versterk. Hulle sal dit as ’t ware tande gee deur al hulle gesag en mag daaraan te verleen sodat dit valse godsdiens kan aanval en met welslae teen haar kan stry “totdat die woorde van God volbring sal wees”. Op dié manier sal die eeue oue hoer heeltemal vernietig word. En dankie tog daarvoor!

22. (a) Wat word in Openbaring 17:18 aangedui deur die manier waarop die engel sy getuienis afsluit? (b) Hoe reageer Jehovah se Getuies op die opheldering van die verborgenheid?

²² Asof hy die sekerheid van Jehovah se voltrekking van oordeel aan die wêreldryk van valse godsdiens wil beklemtoon, sluit die engel sy getuienis af met die woorde: “En die vrou wat jy gesien het, beteken die groot stad wat ’n koninkryk oor die konings van die aarde het” (Openbaring 17:18). Soos Babilon van Belsasar se tyd is Babilon die Grote “op die weegskaal geweeg en te lig bevind” (Daniël 5:27). Haar teregstelling sal vinnig en beslissend wees. En hoe reageer Jehovah se Getuies op die opheldering van die verborgenheid van die groot hoer en van die skarlakenkleurige wilde dier? Hulle verkondig Jehovah se dag van oordeel ywerig, terwyl hulle opregte waarheidsoekers op ‘aangename’ wyse antwoord (Kolossense 4:5, 6; Openbaring 17:3, 7). Soos ons volgende hoofstuk sal toon, moet almal wat behoue wil bly wanneer die groot hoer tereggestel word, optree, en dít sonder versuim!

[Prente op bladsy 252]

Die opeenvolging van sewe wêreldmoondhede

EGIPTE

ASSIRIË

BABILON

MEDO-PERSIË

GRIEKELAND

ROME

ANGLO-AMERIKA

[Prent op bladsy 254]

“Hy is ook self ’n agtste koning”

[Prent op bladsy 255]

Hulle keer die Lam die rug toe en ‘gee hulle mag en gesag aan die wilde dier’

[Prent op bladsy 257]

Die Christendom sal, as die vernaamste deel van Babilon die Grote, soos eertydse Jerusalem volkome verwoes wees

Hoofstuk 36

Die groot stad word verwoes

Visioen 12—Openbaring 18:1–19:10

Onderwerp: Die val en vernietiging van Babilon die Grote; die huwelik van die Lam word aangekondig

Tyd van vervulling: Vanaf 1919 tot ná die groot verdrukking

1. Waardeur sal die begin van die groot verdrukking aangedui word?

SKIELIK, skokkend, verwoestend—dit is hoe die ondergang van Babilon die Grote sal wees! Dit sal een van die rampspoedigste gebeure in die hele geskiedenis wees en die begin aandui van die “groot verdrukking . . . soos daar sedert die begin van die wêreld tot nou toe nie plaasgevind het nie, nee, en ook nie weer sal plaasvind nie”.—Matteus 24:21.

2. Watter soort ryk het bly bestaan, al het politieke ryke opgekom en ondergegaan?

² Valse godsdiens is al lank aanwesig. Dit bestaan ononderbroke sedert die dae van die bloeddorstige Nimrod, wat Jehovah teëgestaan en mense die Toring van Babel laat begin bou het. Toe Jehovah die tale van daardie rebelle verwar en hulle oor die aarde verstrooi het, het Babilon se valse godsdiens saam met hulle versprei (Genesis 10:8-10; 11:4-9). Sedertdien het politieke ryke opgekom en ondergegaan, maar Babiloniese godsdiens het bly bestaan. Dit het baie gestaltes en vorme aangeneem en ’n wêreldryk van valse godsdiens geword, die voorspelde Babilon die Grote. Die prominentste deel daarvan is die Christendom, wat ontstaan het uit ’n samesmelting van vroeë Babiloniese opvattings en afvallige “Christelike” leerstellings. Omdat Babilon die Grote so ’n lang, lang geskiedenis het, is dit vir baie mense moeilik om te glo dat dit ooit vernietig sal word.

3. Hoe bevestig Openbaring die ondergang van valse godsdiens?

³ Dit is derhalwe gepas dat Openbaring die ondergang van valse godsdiens bevestig deur aan ons twee uitvoerige beskrywings te gee van haar val en van verdere gebeure wat tot haar algehele verwoesting lei. Ons het haar reeds as “die groot hoer” gesien wat uiteindelik deur haar voormalige minnaars van die politieke ryk verwoes word (Openbaring 17:1, 15, 16). Nou, in nog ’n visioen, gaan ons haar as ’n stad sien, die godsdienstige antitipe van eertydse Babilon.

Babilon die Grote val

4. (a) Watter visioen sien Johannes vervolgens? (b) Hoe kan ons die engel identifiseer, en waarom is dit gepas dat hy die val van Babilon die Grote aankondig?

⁴ Johannes sit die verslag voort en deel ons mee: “Ná hierdie dinge het ek ’n ander engel uit die hemel sien neerdaal, met groot gesag; en die aarde is deur sy heerlikheid verlig. En hy het met ’n sterk stem uitgeroep en gesê: ‘Sy het geval! Babilon die Grote het geval’” (Openbaring 18:1, 2a). Dit is die tweede keer dat Johannes hierdie aankondiging deur ’n engel hoor. (Sien Openbaring 14:8.) Maar hierdie keer word die belangrikheid daarvan beklemtoon deur die luisterrykheid van die hemelse engel, want sy heerlikheid verlig die hele aarde! Wie kan hy wees? Eeue tevore het die profeet Esegiël van ’n hemelse visioen gepraat en gesê: “Die aarde het geblink weens sy [Jehovah se] heerlikheid” (Esegiël 43:2). Die enigste engel wat skyn met heerlikheid wat vergelykbaar is met dié van Jehovah, is die Here Jesus, wat “die weerspieëling van [God se] heerlikheid en die presiese afdruksel van sy wese” is (Hebreërs 1:3). In 1914 het Jesus ’n hemelse Koning geword, en sedertdien het hy as Jehovah se mede-Koning en mede-Regter gesag oor die aarde uitgeoefen. Dit is dus gepas dat hy die val van Babilon die Grote aankondig.—Matteus 25:31, 32.

5. (a) Wie word deur die engel gebruik om die val van Babilon die Grote bekend te maak? (b) Hoe het die Christendom gevaar toe die oordeel begin het by dié wat bely dat hulle “die huis van God” is?

⁵ Wie word deur hierdie engel met groot gesag gebruik om sulke verbasende nuus aan die mensdom bekend te maak? Dieselfde mense wat as gevolg van hierdie val bevry word, die oorblywende gesalfdes op die aarde, die Johannes-klas. Van 1914 tot 1918 het hulle baie gely weens die optrede van Babilon die Grote, maar in 1918 het die Here Jehovah en sy “boodskapper van die [Abrahamitiese] verbond”, Jesus Christus, by “die huis van God”, dit wil sê by dié wat bely dat hulle Christene is, begin oordeel. Sodoende het die afvallige Christendom tereggestaan (Maleagi 3:1; 1 Petrus 4:17). Die ontsaglike bloedskuld wat sy haar gedurende die Eerste Wêreldoorlog op die hals gehaal het, haar medepligtigheid aan die vervolging van Jehovah se getroue getuies en haar Babiloniese geloofsbelydenisse het haar nie in die tyd van oordeel gehelp nie; en ook geen ander deel van Babilon die Grote het God se goedkeuring verdien nie.—Vergelyk Jesaja 13:1-9.

6. Waarom kan daar gesê word dat Babilon die Grote reeds teen 1919 geval het?

⁶ Teen 1919 het Babilon die Grote dus reeds geval, wat die weg gebaan het vir God se volk om, as ’t ware op een dag, vrygelaat en in hulle land van geestelike voorspoed herstel te word (Jesaja 66:8). Teen daardie jaar het Jehovah God en Jesus Christus, die Grotere Darius en die Grotere Kores, sake so bewerkstellig dat valse godsdiens nie meer ’n houvas op Jehovah se volk kon behou nie. Dit kon hulle nie meer verhinder om Jehovah te dien en aan almal wat wil hoor, bekend te maak dat die hoeragtige Babilon die Grote gedoem en die regverdiging van Jehovah se soewereiniteit op hande is nie!—Jesaja 45:1-4; Daniël 5:30, 31.

7. (a) Hoe het Jehovah Babilon die Grote beskou, hoewel sy nie in 1919 vernietig is nie? (b) Wat was die gevolg vir Jehovah se volk toe Babilon die Grote in 1919 geval het?

⁷ Babilon die Grote is weliswaar nie in 1919 vernietig nie—net so min as wat die eertydse stad Babilon in 539 v.G.J. vernietig is toe dit deur die leërs van Kores die Pers ingeneem is. Maar uit Jehovah se oogpunt het daardie organisasie geval. Sy was geregtelik veroordeel en het op teregstelling gewag; valse godsdiens kon Jehovah se volk dus nie meer gevange hou nie. (Vergelyk Lukas 9:59, 60.) Hulle is vrygelaat om as die Heer se getroue en verstandige slaaf te dien deur geestelike voedsel op die regte tyd te voorsien. Hulle het ’n oordeel van “Mooi so” ontvang en is beveel om weer in Jehovah se werk bedrywig te word.—Matteus 24:45-47; 25:21, 23; Handelinge 1:8.

8. Watter gebeurtenis verkondig die wag van Jesaja 21:8, 9, en wie word vandag deur hierdie wag voorafgeskadu?

⁸ Millenniums gelede het Jehovah ander profete gebruik om hierdie epogmakende gebeurtenis te voorspel. Jesaja het gepraat van ’n wag wat “soos ’n leeu uitgeroep [het]: ‘Op die wagtoring, o Jehovah, staan ek voortdurend in die dag, en op my wagpos staan ek al die nagte.’” En watter gebeurtenis onderskei en verkondig hierdie wag met leeuemoed? Dít: “Dit het geval! Babilon het geval, en al die gesnede beelde van sy gode het Hy [Jehovah] teen die grond verbrysel!” (Jesaja 21:8, 9). Hierdie wag is ’n gepaste voorafskaduwing van die waaksame Johannes-klas van vandag, wat Die Wagtoring en ander teokratiese publikasies gebruik om die nuus dat Babilon geval het, wyd en syd te verkondig.

Die agteruitgang van Babilon die Grote

9, 10. (a) Hoe het die invloed van Babiloniese godsdiens sedert die Eerste Wêreldoorlog afgeneem? (b) Hoe beskryf die magtige engel die gevalle toestand van Babilon die Grote?

⁹ Eertydse Babilon se val in 539 v.G.J. was die begin van ’n lang agteruitgang wat met sy verwoesting geëindig het. Net so het die invloed van Babiloniese godsdiens sedert die Eerste Wêreldoorlog oor die hele aarde opvallend afgeneem. In Japan is Sjintoïstiese keiseraanbidding ná die Tweede Wêreldoorlog verbied. In China beheer die Kommunistiese regering alle godsdiensaanstellings en -bedrywighede. In Protestantse Noord-Europa staan die meeste mense nou onverskillig teenoor godsdiens. En die Rooms-Katolieke Kerk is onlangs deur skeurings en interne meningsverskille in sy wêreldryk verswak.—Vergelyk Markus 3:24-26.

¹⁰ Al hierdie tendense maak ongetwyfeld deel uit van die ‘opdroging van die Eufraatrivier’ ter voorbereiding vir die komende militaristiese aanval teen Babilon die Grote. Hierdie ‘opdroging’ word ook weerspieël in die pous se aankondiging in Oktober 1986 dat die kerk “weer moet begin bedel”—weens ontsaglike tekorte (Openbaring 16:12). Veral sedert 1919 is Babilon die Grote in die openbaar blootgelê as ’n geestelike woesteny, net soos die magtige engel hier aankondig: “En sy het ’n woonplek geword van demone en ’n skuilplek van elke onrein uitwaseming en ’n skuilplek van elke onrein en gehate voël!” (Openbaring 18:2b). Sy sal binnekort letterlik so ’n woesteny wees, so verlate soos die ruïnes van Babilon in hedendaagse Irak.—Sien ook Jeremia 50:25-28.

11. In watter sin het Babilon die Grote ‘’n woonplek van demone’ en ‘’n skuilplek van onrein uitwasemings en van onrein voëls’ geword?

¹¹ Die woord “demone” hier is waarskynlik ’n weergawe van die woord “demone in bokgedaantes” (se‘i·rimʹ) in Jesaja se beskrywing van gevalle Babilon: “En die bewoners van waterlose streke sal beslis daar gaan lê, en hulle huise sal vol ooruile wees. En die volstruise sal daar bly, en demone in bokgedaantes sal daar rondhuppel” (Jesaja 13:21). Dit verwys moontlik nie na letterlike demone nie, maar eerder na ruigharige woestyndiere wie se voorkoms mense aan demone laat dink het. In die ruïnes van Babilon die Grote dui die figuurlike bestaan van sulke diere, sowel as dooie, giftige lug (“onrein uitwaseming”) en onrein voëls, op haar geestelik dooie toestand. Sy bied die mensdom hoegenaamd geen vooruitsig op lewe nie.—Vergelyk Efesiërs 2:1, 2.

12. Hoe pas die situasie van Babilon die Grote by Jeremia se profesie in hoofstuk 50?

¹² Haar situasie pas ook by Jeremia se profesie: “‘Daar is ’n swaard teen die Galdeërs’, is die woord van Jehovah, ‘en teen die inwoners van Babilon en teen sy vorste en teen sy wyses. . . . Daar is ’n verwoesting oor sy waters, en dit sal opdroog. Want dit is ’n land van gesnede beelde, en weens hulle skrikwekkende visioene bly hulle waansinnig optree. Daarom sal die bewoners van waterlose streke saam met die huilende diere bly, en die volstruise sal daarin bly; en dit sal nooit weer bewoon word nie, en ook sal dit van geslag tot geslag nie bly bestaan nie.’” Afgodediens en gebede wat oor en oor opgesê word, kan Babilon die Grote nie red van ’n vergelding wat ooreenstem met God se omverwerping van Sodom en Gomorra nie.—Jeremia 50:35-40.

Hartstogwekkende wyn

13. (a) Hoe vestig die magtige engel ons aandag op die groot omvang van Babilon die Grote se hoerery? (b) Watter onsedelikheid wat in eertydse Babilon algemeen was, word ook in Babilon die Grote aangetref?

¹³ Die magtige engel vestig vervolgens ons aandag op die groot omvang van Babilon die Grote se hoerery en sê: “Want weens die hartstogwekkende wyn van haar hoererya het al die nasies slagoffers geword, en die konings van die aarde het met haar hoerery gepleeg, en die reisende koopmanne van die aarde het ryk geword weens die mag van haar skaamtelose weelde” (Openbaring 18:3). Sy het al die nasies van die mensdom met haar onrein godsdienstige weë geïndoktrineer. Volgens die Griekse geskiedskrywer Herodotus moes elke meisie in eertydse Babilon haar maagdelikheid in tempelaanbidding opoffer. Walglike geslagsverdorwenheid word vandag nog uitgebeeld deur die oorlogbeskadigde beeldhouwerke by Angkor Wat in Kampuchea en in die tempels in Khajuraho, Indië, waar die Hindoegod Wisjnoe omring is van vieslike erotiese tonele. In die Verenigde State toon die onthullings van onsedelikheid wat die wêreld van TV-evangeliste in 1987 en weer in 1988 geskud het, sowel as die onthulling van die algemene beoefening van homoseksualiteit deur geestelikes, dat selfs die Christendom skokkende gruwels van letterlike hoerery duld. En tog het al die nasies die slagoffers geword van ’n selfs ernstiger soort hoerery.

14-16. (a) Watter geestelik ongeoorloofde verhouding tussen godsdiens en die politiek het in Fascistiese Italië ontstaan? (b) Wat het biskoppe van die Rooms-Katolieke Kerk gesê toe Italië Abessinië binnegeval het?

¹⁴ Ons het reeds die ongeoorloofde verhouding tussen godsdiens en die politiek hersien wat meegebring het dat Hitler in Nazi-Duitsland aan die bewind gekom het. Ander nasies het ook gely as gevolg van godsdiens se inmenging in sekulêre aangeleenthede. Byvoorbeeld: In Fascistiese Italië is die Lateraanse Verdrag op 11 Februarie 1929 deur Mussolini en kardinaal Gasparri onderteken, waardeur die Vatikaanstad ’n soewereine staat gemaak is. Pous Pius XI het beweer dat hy “Italië aan God teruggegee het, en God aan Italië”. Was dit die waarheid? Beskou wat ses jaar later gebeur het. Op 3 Oktober 1935 het Italië Abessinië binnegeval onder die voorwendsel dat dit “’n barbaarse land [is] wat nog steeds slawerny beoefen”. Wie was in werklikheid barbaars? Het die Katolieke Kerk Mussolini se barbaarsheid veroordeel? Terwyl die pous dubbelsinnige verklarings gedoen het, het sy biskoppe die strydkragte van hulle Italiaanse “vaderland” openlik geseën. In die boek The Vatican in the Age of the Dictators sê Anthony Rhodes:

¹⁵ “In sy Herderlike Brief van 19 Oktober [1935] het die biskop van Udine [Italië] geskryf: ‘Dit is nóg tydig nóg gepas dat ons uitspraak doen oor wat reg en verkeerd is in die saak. Ons plig as Italianers, en nog meer as Christene, is om tot die sukses van ons wapens by te dra.’ Die biskop van Padua het op 21 Oktober geskryf: ‘In die moeilike ure wat ons deurmaak, vra ons julle om geloof te stel in ons staatsmanne en strydkragte.’ Op 24 Oktober het die biskop van Cremona etlike regimentsvaandels geheilig en gesê: ‘Die seën van God sy op al hierdie soldate wat, op die bodem van Afrika, nuwe en vrugbare lande vir die Italiaanse vernuf sal verower en sodoende die Romeinse en Christelike kultuur aan hulle sal bring. Mag Italië weer eens as die Christelike leidsman van die hele wêreld staan.’”

¹⁶ Abessinië is verower, met die seën van die Rooms-Katolieke geestelikes. Kon enige van hulle in enige sin beweer dat hulle soos die apostel Paulus “rein [was] van die bloed van alle mense”?—Handelinge 20:26.

17. Hoe het Spanje gely omdat sy geestelikes versuim het om ‘van hulle swaarde ploegskare te smee’?

¹⁷ Voeg by Duitsland, Italië en Abessinië nog ’n nasie wat die slagoffer van Babilon die Grote se hoerery geword het—Spanje. Die Burgeroorlog van 1936-39 in daardie land is deels ontketen deur die demokratiese regering se optrede om die groot mag van die Rooms-Katolieke Kerk te verminder. Toe die oorlog begin het, het die Katolieke Fascistiese leier van die revolusionêre troepe, Franco, homself “die Christelike Hoofgeneraal van die Heilige Kruistog” genoem, ’n titel waarvan hy later afstand gedoen het. Honderdduisende Spanjaarde het in die gevegte omgekom. Daarbenewens het Franco se Nasionaliste, volgens ’n konserwatiewe raming, 40 000 lede van die Volksfront vermoor, terwyl laasgenoemde 8 000 geestelikes—monnike, priesters, nonne en novises—vermoor het. Dit is die afgryse en tragedie van burgeroorlog, wat toelig hoe verstandig dit is om ag te gee op Jesus se woorde: “Sit jou swaard terug in sy plek, want almal wat die swaard opneem, sal deur die swaard vergaan” (Matteus 26:52). Hoe weersinwekkend is dit tog dat die Christendom by sulke ontsaglike bloedvergieting betrokke raak! Haar geestelikes het inderdaad geheel en al versuim om ‘van hulle swaarde ploegskare te smee’!—Jesaja 2:4.

Die reisende koopmanne

18. Wie is “die reisende koopmanne van die aarde”?

¹⁸ Wie is “die reisende koopmanne van die aarde”? Ons sal hulle ongetwyfeld vandag handelaars, handelsreuse, uitgeslape entrepreneurs van die sakewêreld noem. Dit beteken nie dat dit verkeerd is om wettige sake te doen nie. Die Bybel verskaf goeie raad vir sakemanne en waarsku teen oneerlikheid, gierigheid en dies meer (Spreuke 11:1; Sagaria 7:9, 10; Jakobus 5:1-5). Die grootste voordeel is “godvrugtige toegewydheid tesame met vergenoegdheid” (1 Timoteus 6:6, 17-19). Maar Satan se wêreld volg nie regverdige beginsels nie. Verdorwenheid vier hoogty. Dit kom voor in godsdiens, in die politiek—en in die sakewêreld. Van tyd tot tyd onthul die nuusmedia skandale, soos verduistering deur hooggeplaaste staatsamptenare en onwettige wapenhandel.

19. Watter feit omtrent die wêreldekonomie verklaar waarom die koopmanne van die aarde in Openbaring ongunstig vermeld word?

¹⁹ Die internasionale wapenhandel beloop elke jaar baie meer as $1 000 000 000 000, terwyl honderdmiljoene mense nie eens die lewensbenodigdhede het nie. Dit is erg genoeg. Maar wapentuig is blykbaar ’n steunpilaar van die wêreldekonomie. Op 11 April 1987 het ’n artikel in Londen se Spectator berig: “As net nywerhede wat regstreeks daarmee verband hou, getel word, is sowat 400 000 betrekkings in die VSA en 750 000 in Europa daarby betrokke. Maar vreemd genoeg, namate die maatskaplike en ekonomiese rol van wapenvervaardiging toegeneem het, het die werklike vraag, naamlik of die produsente hulle goed kan verdedig, op die agtergrond geraak.” Groot winste word gemaak terwyl bomme en ander wapentuig oor die hele aarde verhandel word, selfs aan potensiële vyande. Eendag sal daardie bomme dalk terugkom om dié wat dit verkoop, in ’n vurige slagting te vernietig. Wat ’n paradoks! Voeg hierby die knoeiery in die wapenbedryf. In die Verenigde State alleen, sê die Spectator, “verloor die Pentagon elke jaar op onverklaarbare wyse wapens en toerusting ter waarde van $900 miljoen”. Dit is geen wonder dat die koopmanne van die aarde in Openbaring ongunstig vermeld word nie!

20. Watter voorbeeld toon godsdiens se betrokkenheid by verdorwe sakepraktyke?

²⁰ Soos die glorieryke engel voorspel het, is godsdiens diep betrokke by sulke verdorwe sakepraktyke. Daar is byvoorbeeld die Vatikaan se betrokkenheid by die ineenstorting van Italië se Banco Ambrosiano in 1982. Die saak het deur die 1980’s gesloer, en die onbeantwoorde vraag was: Wat het van die geld geword? In Februarie 1987 het magistrate in Milaan lasbriewe uitgereik vir die inhegtenisneming van drie Vatikaanse geestelikes, onder andere ’n Amerikaanse aartsbiskop, op aanklagte van medepligtigheid aan oneerlike bankrotskap, maar die Vatikaan het ’n uitleweringsversoek verwerp. In Julie 1987, te midde van groot protes, het Italië se hoogste Appèlhof die lasbriewe ongeldig verklaar op grond van ’n ou verdrag tussen die Vatikaan en die Italiaanse regering.

21. Hoe weet ons dat Jesus nie by verdagte sakepraktyke van sy dag betrokke was nie, maar wat sien ons vandag in Babiloniese godsdiens?

²¹ Was Jesus betrokke by verdagte sakepraktyke van sy dag? Nee. Hy het nie eens eiendom besit nie, want hy het ‘geen plek gehad om sy kop neer te lê nie’. Jesus het ’n ryk jong heerser aangeraai: “Verkoop alles wat jy het en deel dit aan die armes uit, en jy sal ’n skat in die hemele hê; en kom word my volgeling.” Dit was goeie raad, want dit kon meegebring het dat hy van al sy bekommernisse oor sakeaangeleenthede ontslae raak (Lukas 9:58; 18:22). Babiloniese godsdiens daarenteen het dikwels uiters onvanpaste bande met die sakewêreld. In 1987 het die Albany Times Union byvoorbeeld berig dat die finansiële bestuurder van die Katolieke aartsbisdom van Miami, Florida, VSA, erken het dat die kerk aandele besit in maatskappye wat kernwapens, rolprente met hoë ouderdomsbeperkings en sigarette vervaardig.

“Gaan uit haar uit, my volk”

22. (a) Wat sê ’n stem uit die hemel? (b) Wat het God se volk in 537 v.G.J. en in 1919 G.J. vreugde verskaf?

²² Johannes se volgende woorde wys op ’n verdere vervulling van die profetiese patroon: “En ek het ’n ander stem uit die hemel hoor sê: ‘Gaan uit haar uit, my volk, as julle nie met haar in haar sondes wil deel nie, en as julle geen deel van haar plae wil ontvang nie’” (Openbaring 18:4). Profesieë in die Hebreeuse Geskrifte oor die val van eertydse Babilon sluit ook Jehovah se bevel aan sy volk in: “Vlug uit Babilon uit” (Jeremia 50:8, 13). Net so word God se volk nou, met die oog op die komende verwoesting van Babilon die Grote, aangespoor om te vlug. In 537 v.G.J. was die getroue Israeliete baie verheug oor die geleentheid om uit Babilon te vlug. Die vrylating van God se volk uit Babiloniese gevangenskap in 1919 het hulle ook groot vreugde verskaf (Openbaring 11:11, 12). En sedertdien het miljoene ander die bevel om te vlug, gehoorsaam.

23. Hoe beklemtoon die stem uit die hemel die dringendheid daarvan om uit Babilon die Grote te vlug?

²³ Is dit werklik so dringend om uit Babilon die Grote te vlug, deur lidmaatskap van die wêreld se godsdienste op te sê en jou heeltemal af te skei? Dit is, want ons moet God se beskouing van hierdie eeue oue godsdiensmonster, Babilon die Grote, hê. Hy het nie doekies omgedraai toe hy haar die groot hoer genoem het nie. Daarom lig die stem uit die hemel Johannes verder aangaande hierdie hoer in: “Want haar sondes het tot aan die hemel opgehoop en God het haar ongeregtighede onthou. Vergeld haar net soos sy self vergeld het, en doen aan haar twee keer soveel, ja, twee keer die aantal dinge wat sy gedoen het; sit in die beker waarin sy ’n mengsel gesit het, vir haar twee keer soveel van die mengsel. In die mate waarin sy haarself verheerlik en in skaamtelose weelde gelewe het, gee haar in dié mate pyniging en verdriet. Want in haar hart bly sy sê: ‘Ek sit as koningin, en ek is geen weduwee nie, en ek sal nooit verdriet sien nie.’ Daarom sal haar plae in een dag kom: dood en verdriet en hongersnood, en sy sal heeltemal met vuur verbrand word, want Jehovah God, wat haar geoordeel het, is sterk.”—Openbaring 18:5-8.

24. (a) God se volk moet uit Babilon die Grote vlug om wat te vermy? (b) In watter sondes deel dié wat nie uit Babilon die Grote vlug nie?

²⁴ Dit is harde woorde! Optrede is dus nodig. Jeremia het die Israeliete in sy dag aangespoor om op te tree en gesê: “Vlug uit Babilon uit, . . . want dit is die tyd van wraak wat aan Jehovah behoort. Hy vergeld hom sy handelswyse. Gaan uit hom uit, o my volk, en laat elkeen aan sy siel ontkoming verskaf van die brandende toorn van Jehovah” (Jeremia 51:6, 45). Die stem uit die hemel waarsku God se volk vandag ook om uit Babilon die Grote te vlug sodat hulle geen deel van haar plae ontvang nie. Jehovah se plaagagtige oordele oor hierdie wêreld, met inbegrip van Babilon die Grote, word nou verkondig (Openbaring 8:1–9:21; 16:1-21). God se volk moet hulle van valse godsdiens afskei as hulle nie self hierdie plae wil ontvang en uiteindelik saam met haar wil sterf nie. Bowendien sal hulle in haar sondes deel as hulle in hierdie organisasie bly. Hulle sou net so skuldig soos sy wees aan geestelike egbreuk en aan die vergieting van die bloed “van almal wat op die aarde doodgemaak is”.—Openbaring 18:24; vergelyk Efesiërs 5:11; 1 Timoteus 5:22.

25. Op watter maniere het God se volk uit eertydse Babilon uitgegaan?

²⁵ Maar hoe gaan God se volk uit Babilon die Grote uit? In die geval van eertydse Babilon moes die Jode letterlik van die stad Babilon na die Beloofde Land reis. Maar dit het meer as dit behels. Jesaja het die Israeliete profeties meegedeel: “Vertrek, vertrek, gaan daar uit, raak aan niks wat onrein is nie; gaan uit hom uit, hou julle rein, julle wat die voorwerpe van Jehovah dra” (Jesaja 52:11). Ja, hulle moes afsien van alle onrein gebruike van Babiloniese godsdiens wat hulle aanbidding van Jehovah kon besoedel.

26. Hoe het die Korintiese Christene die woorde gehoorsaam: ‘Gaan onder hulle uit en hou op om wat onrein is, aan te raak’?

²⁶ Die apostel Paulus het Jesaja se woorde in sy brief aan die Korintiërs aangehaal en gesê: “Moenie saam met ongelowiges onder ’n ongelyke juk kom nie. Want watter gemeenskap het regverdigheid en wetteloosheid? Of watter deelgenootskap het lig met duisternis? . . . ’Gaan dus onder hulle uit en sonder julle af’, sê Jehovah, ‘en hou op om wat onrein is, aan te raak.’” Dit was nie vir die Korintiese Christene nodig om Korinte te verlaat om daardie bevel te gehoorsaam nie. Maar hulle moes die onrein tempels van valse godsdiens letterlik vermy en hulle ook geestelik afskei van die onrein dade van daardie afgodedienaars. In 1919 het God se volk op hierdie manier uit Babilon die Grote begin vlug deur hulle van enige oorblywende onrein leerstellings en gebruike te reinig. Hulle kon hom derhalwe as sy gesuiwerde volk dien.—2 Korintiërs 6:14-17; 1 Johannes 3:3.

27. Watter ooreenkomste is daar tussen die oordele oor eertydse Babilon en dié oor Babilon die Grote?

²⁷ Eertydse Babilon se ondergang en uiteindelike verwoesting was ’n straf vir sy sondes. “Want sy oordeel het tot aan die hemel gereik” (Jeremia 51:9). Die sondes van Babilon die Grote het ook “tot aan die hemel opgehoop”, sodat dit onder Jehovah se aandag gekom het. Sy is skuldig aan ongeregtigheid, afgodediens, onsedelikheid, onderdrukking, diefstal en moord. Die val van eertydse Babilon was deels wraak vir wat hy aan Jehovah se tempel en sy ware aanbidders gedoen het (Jeremia 50:8, 14; 51:11, 35, 36). Net so is die val van Babilon die Grote en haar uiteindelike vernietiging ’n blyk van wraak vir wat sy deur die eeue heen aan ware aanbidders gedoen het. Ja, haar finale vernietiging is die begin van “die dag van die wraak van ons God”.—Jesaja 34:8-10; 61:2; Jeremia 50:28.

28. Watter regstandaard pas Jehovah op Babilon die Grote toe, en waarom?

²⁸ Onder die Mosaïese Wet moes ’n Israeliet wat van sy landgenote gesteel het, ten minste dubbel soveel terugbetaal as vergoeding (Eksodus 22:1, 4, 7, 9). In die komende vernietiging van Babilon die Grote sal Jehovah ’n vergelykbare regstandaard toepas. Sy sal twee keer soveel ontvang as wat sy gegee het. Geen barmhartigheid sal bewys word nie, want Babilon die Grote het geen barmhartigheid aan haar slagoffers bewys nie. Sy het soos ’n parasiet op die volke van die aarde geteer om haar in “skaamtelose weelde” te onderhou. Nou sal sy lyding en verdriet ondervind. Eertydse Babilon het gedink dat haar posisie absoluut veilig was en het gespog: “Ek sal nie as weduwee sit nie, en ek sal nie die verlies van kinders ken nie” (Jesaja 47:8, 9, 11). Babilon die Grote voel ook veilig. Maar haar vernietiging, verorden deur Jehovah wat ‘sterk is’, sal gou plaasvind, asof “in een dag”!

[Voetnoot]

[Venster op bladsy 263]

“Die konings . . . het met haar hoerery gepleeg”

In die vroeë 1800’s het Europese handelaars groot hoeveelhede opium in China ingesmokkel. In Maart 1839 het Chinese amptenare die onwettige handel probeer stopsit deur op 20 000 kiste van die dwelmmiddel by Britse handelaars beslag te lê. Dit het spanning tussen Brittanje en China tot gevolg gehad. Namate betrekkinge tussen die twee lande versleg het, het etlike Protestantse sendelinge Brittanje met verklarings soos die volgende aangespoor om oorlog te verklaar:

“Hoe verbly hierdie probleme tog my hart, omdat ek van mening is dat die Engelse regering moontlik woedend sal raak en dat God, in Sy mag, dalk die hindernisse uit die weg sal ruim wat voorkom dat die evangelie van Christus China bereik.”—Henrietta Shuck, sendeling van die Suidelike Baptistekerk.

Uiteindelik het oorlog uitgebreek—die oorlog wat vandag bekend staan as die Opiumoorlog. Sendelinge het Brittanje van ganser harte aangespoor met kommentare soos hierdie:

“Ek voel my genoodsaak om op die huidige toedrag van sake terug te kyk, nie soseer as ’n opium- of ’n Engelse aangeleentheid nie, maar as die groot plan van die Voorsienigheid om die goddeloosheid van die mens bevorderlik te maak vir Sy voornemens van barmhartigheid teenoor China deur sy muur van uitsluiting te verbreek.”—Peter Parker, Kongregasionalistiese sendeling.

’n Ander Kongregasionalistiese sendeling, Samuel W. Williams, het bygevoeg: “Die hand van God kan duidelik gesien word in alles wat op merkwaardige wyse plaasgevind het, en ons twyfel nie daaraan dat Hy wat gesê het dat Hy gekom het om ’n swaard op die aarde te bring, hierheen gekom het om Sy vyande spoedig te vernietig en Sy eie koninkryk op te rig nie. Hy sal verslaan en verslaan totdat Hy die Vredevors ingestel het.”

Aangaande die verskriklike slagting van Chinese burgers het sendeling J. Lewis Shuck geskryf: “Ek beskou sulke tonele . . . as die regstreekse werktuie van die Here om die vullis uit die weg te ruim wat die vooruitgang van Goddelike Waarheid belemmer.”

Kongregasionalistiese sendeling Elijah C. Bridgman het bygevoeg: “God het dikwels die sterk arm van burgerlike mag gebruik om die weg vir Sy koninkryk te baan . . . Die middel in hierdie groot oomblikke is menslik; die leidende mag goddelik. Die groot regeerder van al die nasies het Engeland gebruik om China te straf en te verneder.”—Aanhalings geneem uit “Ends and Means” (“Oogmerke en middele”), 1974, ’n verhandeling deur Stuart Creighton Miller, wat gepubliseer is in The Missionary Enterprise in China and America (’n Harvard-studie onder redaksie van John K. Fairbank).

[Venster op bladsy 264]

“Die reisende koopmanne . . . het ryk geword”

“Tussen 1929 en die begin van die Tweede Wêreldoorlog het [Bernadino] Nogara [die Vatikaan se finansiële bestuurder] Vatikaanse kapitaal en Vatikaanse agente gebruik om op verskillende gebiede van Italië se ekonomie te werk—veral op die gebiede van elektrisiteit, telefoonkommunikasie, krediet en die bankwese, klein spoorweë en die vervaardiging van landbougereedskap, sement en kunsmatige tekstielvesels. Baie van hierdie ondernemings was lonend.

“Nogara het etlike maatskappye oorgeneem, waaronder La Società Italiana della Viscosa, La Supertessile, La Società Meridionale Industrie Tessili en La Cisaraion. Hy het hulle in een maatskappy saamgesmelt, wat hy CISA-Viscosa genoem en onder die beheer van baron Francesco Maria Oddasso, een van die Vatikaan se mees vertroude leke, geplaas het. Daarna het Nogara die inlywing van die nuwe maatskappy by Italië se grootste tekstielvervaardiger, SNIA-Viscosa, bewerkstellig. Uiteindelik het die Vatikaan se aandeel in SNIA-Viscosa al hoe groter geword, en mettertyd het die Vatikaan die beheer oorgeneem—wat bevestig word deur die feit dat baron Oddasso later visepresident geword het.

“So het Nogara die tekstielnywerheid binnegedring. Hy het ander nywerhede op ander maniere binnegedring, want Nogara het baie slim planne gehad. Hierdie onselfsugtige man . . . het waarskynlik meer as enige ander sakeman in Italië se geskiedenis gedoen om lewe in die Italiaanse ekonomie te blaas . . . Benito Mussolini kon nooit die ryk tot stand bring waarvan hy gedroom het nie, maar hy het die Vatikaan en Bernadino Nogara in staat gestel om ’n ander soort ryk te skep.”—The Vatican Empire, deur Nino lo Bello, bladsye 71-3.

Dit is net een voorbeeld van die noue samewerking tussen die koopmanne van die aarde en Babilon die Grote. Geen wonder dat hierdie koopmanne sal treur wanneer hulle sakevennoot nie meer bestaan nie!

[Prent op bladsy 259]

Namate mense oor die hele aarde versprei het, het hulle Babiloniese godsdiens saam met hulle geneem

[Prent op bladsy 261]

Die Johannes-klas verkondig soos ’n wag dat Babilon geval het

[Prent op bladsy 266]

Die ruïnes van eertydse Babilon is ’n voorteken van die komende verwoesting van Babilon die Grote

Hoofstuk 37

Droefheid en vreugde oor Babilon se einde

1. Hoe sal “die konings van die aarde” op die skielike vernietiging van Babilon die Grote reageer?

BABILON se einde is goeie nuus vir Jehovah se volk, maar hoe beskou die nasies dit? Johannes deel ons mee: “En die konings van die aarde wat hoerery met haar gepleeg het en in skaamtelose weelde geleef het, sal huil en hulleself in droefheid oor haar slaan wanneer hulle na die rook van haar verbranding kyk, terwyl hulle uit vrees vir haar pyniging op ’n afstand staan en sê: ‘Hoe jammer, hoe jammer, o groot stad, Babilon, die sterk stad, want in een uur het jou oordeel gekom!’”—Openbaring 18:9, 10.

2. (a) Waarom treur “die konings van die aarde” oor Babilon die Grote se einde, aangesien die simboliese tien horings van die skarlakenkleurige wilde dier haar vernietig? (b) Waarom staan die bedroefde konings op ’n afstand van die gedoemde stad?

² Die nasies se reaksie lyk dalk verbasend in die lig van die feit dat Babilon deur die simboliese tien horings van die skarlakenkleurige wilde dier vernietig is (Openbaring 17:16). Maar wanneer Babilon weg is, sal “die konings van die aarde” blykbaar besef hoe nuttig sy vir hulle was deurdat sy die mense kalm en onderworpe gehou het. Die geestelikes het oorloë heilig verklaar, as werwingsbeamptes opgetree en jong manne as ’t ware tot op die slagveld gepreek. Godsdiens het ’n skerm van heiligheid voorsien waaragter verdorwe heersers gewerk het om die gewone mense te onderdruk. (Vergelyk Jeremia 5:30, 31; Matteus 23:27, 28.) Maar let daarop dat hierdie bedroefde konings nou op ’n afstand van die gedoemde stad staan. Hulle kom nie naby genoeg om haar te help nie. Hulle is hartseer om haar te sien ondergaan, maar nie hartseer genoeg om kanse ter wille van haar te waag nie.

Koopmanne huil en treur

3. Wie anders betreur die ondergang van Babilon die Grote, en watter redes verstrek Johannes hiervoor?

³ Die konings van die aarde is nie die enigstes wat Babilon die Grote se ondergang betreur nie. “Ook huil en treur die reisende koopmanne van die aarde oor haar, omdat daar niemand meer is om hulle volle voorraad te koop nie, ’n volle voorraad goud en silwer en edelstene en pêrels en fyn linne en purper en sy en skarlaken; en alles van geurige hout en allerhande ivoorvoorwerpe en allerhande voorwerpe van baie kosbare hout en van koper en van yster en van marmer; ook kaneel en Indiese speserye en reukwerk en welriekende olie en wierook en wyn en olyfolie en fynmeel en koring en beeste en skape en perde en koetse en slawe en mensesiele. Ja, die goeie vrug wat jou siel begeer het, het van jou [Babilon die Grote] gewyk, en al die keurige dinge en die skitterende dinge het vir jou verlore gegaan, en nooit weer sal mense dit vind nie.”—Openbaring 18:11-14.

4. Waarom huil en treur “die reisende koopmanne” oor die einde van Babilon die Grote?

⁴ Ja, Babilon die Grote was ’n intieme vriendin en ’n goeie klant van ryk koopmanne. Die kloosters en kerke in die Christendom het byvoorbeeld deur die eeue heen ontsaglike hoeveelhede goud, silwer, edelgesteentes, waardevolle hout en ander vorme van materiële rykdom verkry. Verder het godsdiens ’n seën uitgespreek oor die kwistige kopery en fuifpartye wat met die viering van die Christus-onterende Kersfees en ander sogenaamd heilige dae gepaardgaan. Die Christendom se sendelinge het verafgeleë lande binnegedring en nuwe markte vir “die reisende koopmanne” van hierdie wêreld geopen. In 17de-eeuse Japan het Katolisisme, wat saam met die handelaars gekom het, selfs by feodale oorlogvoering betrokke geraak. The Encyclopædia Britannica sê die volgende oor ’n beslissende veldslag net buite die mure van die Osaka-kasteel: “Die Tokoegawa-troepe het gevind dat hulle teen ’n vyand veg wie se vaandels versier was met die kruis en met afbeeldings van die Verlosser en St. Jakobus, die beskermheilige van Spanje.” Die seëvierende party het Katolisisme in daardie land beveg en feitlik uitgewis. Net so sal die kerk se betrokkenheid by wêreldaangeleenthede vandag vir haar geen seën meebring nie.

5. (a) Hoe beskryf die stem uit die hemel verder die getreur van “die reisende koopmanne”? (b) Waarom staan die koopmanne ook “op ’n afstand”?

⁵ Die stem uit die hemel sê verder: “Die reisende koopmanne van hierdie dinge, wat van haar ryk geword het, sal uit vrees vir haar pyniging op ’n afstand staan en sal huil en treur en sê: ‘Hoe jammer, hoe jammer—die groot stad, geklee in fyn linne en purper en skarlaken, en ryklik versier met goue sierade en edelstene en pêrels, want in een uur is sulke groot rykdom verwoes!’” (Openbaring 18:15-17a). Wanneer Babilon die Grote vernietig word, treur die “koopmanne” oor die verlies van hierdie handelsvennoot. Ja, “hoe jammer, hoe jammer” vir hulle. Maar let daarop dat die redes waarom hulle treur, heeltemal selfsugtig is en dat hulle—soos die konings—“op ’n afstand staan”. Hulle kom nie naby genoeg om Babilon die Grote enigsins te help nie.

6. Hoe beskryf die stem uit die hemel die getreur van skeepskapteine en matrose, en waarom huil hulle?

⁶ Die verslag gaan voort: “En elke skeepskaptein en elkeen wat êrens heen vaar, en matrose en almal wat ’n bestaan uit die see maak, het op ’n afstand gestaan en uitgeroep terwyl hulle na die rook van haar verbranding gekyk en gesê het: ‘Watter stad is soos die groot stad?’ En hulle het stof op hulle koppe gegooi en het met ’n gehuil en ’n getreur uitgeroep en gesê: ‘Hoe jammer, hoe jammer—die groot stad, waarin almal wat bote op see het, ryk geword het weens haar weelde, want in een uur is sy verwoes!’” (Openbaring 18:17b-19). Eertydse Babilon was ’n handelstad en het ’n groot vloot gehad. Babilon die Grote doen ook baie sake deur middel van die “baie waters” van haar mense. Dit verskaf werk vir baie van haar godsdiensonderdane. Wat ’n ekonomiese slag sal die vernietiging van Babilon die Grote tog vir hulle wees! Daar sal nooit weer ’n bron van lewensonderhoud soos sy wees nie.

Vreugde oor haar vernietiging

7, 8. Hoe bereik die stem uit die hemel die klimaks van sy boodskap aangaande Babilon die Grote, en wie sal op hierdie woorde reageer?

⁷ Toe eertydse Babilon deur die Meders en die Perse verower is, het Jeremia profeties gesê: “En oor Babilon sal die hemel en die aarde en alles wat in hulle is, beslis met vreugde uitroep” (Jeremia 51:48). Wanneer Babilon die Grote vernietig word, bereik die stem uit die hemel die klimaks van sy boodskap en sê dit van Babilon die Grote: “Wees bly oor haar, o hemel, ook julle, heiliges en apostels en profete, omdat God vir julle geregtelike straf aan haar voltrek het!” (Openbaring 18:20). Jehovah en die engele sal verheug wees om die vernietiging van God se eeue oue vyand te sien, en so ook die apostels en vroeë Christelike profete, wat nou al opgewek is en hulle posisie in die reëling van die 24 ouderlinge ingeneem het.—Vergelyk Psalm 97:8-12.

⁸ Ja, al die “heiliges”—hetsy hulle na die hemel opgewek is of nog op die aarde lewe—sal met vreugde uitroep, en so ook hulle metgeselle, die groot menigte ander skape. Mettertyd sal al die getroue manne van die ou tyd in die nuwe stelsel van dinge opgewek word, en hulle sal ook in die vreugde deel. God se volk het nie probeer wraak neem op hulle vervolgers in valse godsdiens nie. Hulle het Jehovah se woorde onthou: “Die wraak is myne; ek sal vergeld, sê Jehovah” (Romeine 12:19; Deuteronomium 32:35, 41-43). Wel, Jehovah het nou vergelding gebring. Al die bloed wat deur Babilon die Grote vergiet is, sal gewreek wees.

’n Groot meulsteen word geslinger

9, 10. (a) Wat doen en sê ’n sterk engel nou? (b) Watter handeling soortgelyk aan dié van die sterk engel van Openbaring 18:21 het in Jeremia se tyd plaasgevind, en wat het dit gewaarborg? (c) Wat waarborg die optrede van die sterk engel wat deur Johannes gesien word?

⁹ Wat Johannes volgende sien, bevestig dat Jehovah se oordeel oor Babilon die Grote finaal is: “En ’n sterk engel het ’n klip soos ’n groot meulsteen opgetel en dit in die see geslinger en gesê: ‘So sal Babilon, die groot stad, met ’n vaart neergeslinger word, en sy sal nooit weer gevind word nie’” (Openbaring 18:21). In Jeremia se tyd is ’n soortgelyke handeling met ’n kragtige profetiese betekenis uitgevoer. Jeremia is geïnspireer om “al die rampspoed . . . wat oor Babilon sou kom”, in ’n boek te skryf. Hy het die boek vir Seraja gegee en vir hom gesê om na Babilon te reis. Daar het Seraja volgens Jeremia se opdrag ’n verklaring teen die stad gelees: “O Jehovah, u het teen hierdie plek gespreek, om dit te verwoes sodat geen inwoner daarin sal wees nie, hetsy mens of mak dier, maar dat dit tot onbepaalde tyd net verlate woestenye sal word.” Toe het Seraja ’n klip aan die boek vasgebind en dit in die Eufraatrivier gegooi en gesê: “So sal Babilon sink en nooit weer opkom nie weens die rampspoed wat ek oor hom bring.”—Jeremia 51:59-64.

¹⁰ Die feit dat die boek met die aangehegte klip in die rivier gegooi is, was ’n waarborg dat Babilon in die vergetelheid sou verdwyn en nooit sou herstel nie. Net so is die feit dat die apostel Johannes ’n sterk engel ’n soortgelyke daad sien verrig, ’n kragtige waarborg dat Jehovah se voorneme met betrekking tot Babilon die Grote vervul sal word. Die heeltemal verwoeste toestand van eertydse Babilon getuig vandag op kragtige wyse van wat in die nabye toekoms met valse godsdiens sal gebeur.

11, 12. (a) Wat sê die sterk engel nou vir Babilon die Grote? (b) Wat het Jeremia oor afvallige Jerusalem voorspel, en wat het dit vir ons dag aangedui?

¹¹ Die sterk engel praat nou met Babilon die Grote en sê: “En die geluid van sangers wat hulleself op die harp begelei en van musikante en van fluitspelers en van trompetblasers sal nooit weer in jou gehoor word nie, en geen vakman van enige ambag sal ooit weer in jou gevind word nie, en geen geluid van ’n meulsteen sal ooit weer in jou gehoor word nie, en geen lig van ’n lamp sal ooit weer in jou skyn nie, en geen stem van ’n bruidegom en van ’n bruid sal ooit weer in jou gehoor word nie; want jou reisende koopmanne was die hooggeplaastes van die aarde, want deur jou spiritistiese gebruike is al die nasies mislei.”—Openbaring 18:22, 23.

¹² Jeremia het met soortgelyke woorde oor afvallige Jerusalem voorspel: “Ek sal uit hulle die geluid van verheuging en die geluid van blydskap, die stem van die bruidegom en die stem van die bruid, die geluid van die handmeul en die lig van die lamp laat verdwyn. En hierdie hele land sal ’n verwoeste plek word, ’n voorwerp van verbasing” (Jeremia 25:10, 11). As die vernaamste deel van Babilon die Grote sal die Christendom ’n lewelose puinhoop word, soos Jerusalem se verwoeste toestand ná 607 v.G.J. so treffend uitgebeeld het. Die Christendom wat haar vroeër lighartig verheug het en wat gegons het van alledaagse bedrywighede, sal vind dat sy verower en verlate is.

13. Watter skielike verandering ondergaan Babilon die Grote, en wat is die uitwerking daarvan op haar “reisende koopmanne”?

¹³ Trouens, soos die engel hier vir Johannes sê, sal die hele Babilon die Grote van ’n magtige, internasionale ryk in ’n droë, onherbergsame woesteny verander. Haar “reisende koopmanne”, waaronder hooggeplaaste miljoenêrs, het haar godsdiens vir persoonlike gewin of as ’n dekmantel gebruik, en die geestelikes het dit winsgewend gevind om die kalklig met hulle te deel. Maar hierdie handelaars sal Babilon die Grote nie meer as hulle handlanger hê nie. Sy sal die nasies van die aarde nie meer met haar mistieke godsdiensgebruike mislei nie.

Verskriklike bloedskuld

14. Watter rede verstrek die sterk engel vir die strengheid van Jehovah se oordeel, en watter soortgelyke woorde het Jesus gespreek toe hy op die aarde was?

¹⁴ Ten slotte sê die sterk engel waarom Jehovah Babilon die Grote so streng oordeel. “Ja”, sê die engel, “in haar is die bloed van profete en van heiliges gevind, en van almal wat op die aarde doodgemaak is” (Openbaring 18:24). Toe Jesus op die aarde was, het hy vir die godsdiensleiers in Jerusalem gesê dat hulle aanspreeklik is vir “al die regverdige bloed wat op die aarde vergiet is, . . . van die bloed van die regverdige Abel af”. Gevolglik is daardie verdorwe geslag in 70 G.J. vernietig (Matteus 23:35-38). Vandag is ’n ander geslag godsdiensbeoefenaars bloedskuldig weens hulle vervolging van God se knegte.

15. Hoe was die Katolieke Kerk in Nazi-Duitsland in twee opsigte bloedskuldig?

¹⁵ In sy boek The Catholic Church and Nazi Germany skryf Guenter Lewy: “Toe Jehovah se Getuies op 13 April [1933] in Beiere verbied is, het die Kerk selfs die opdrag aanvaar wat die Departement van Onderwys en Godsdiens hom gegee het, naamlik om enige lid van die sekte wat nog die verbode godsdiens beoefen het, te verkla.” Die Katolieke Kerk dra dus ook verantwoordelikheid vir die feit dat duisende Getuies na konsentrasiekampe gestuur is; sy hande is bevlek met die lewensbloed van honderde Getuies wat tereggestel is. Toe jong Getuies, soos Wilhelm Kusserow, getoon het dat hulle moedig voor ’n vuurpeloton kon sterf, het Hitler besluit dat die vuurpeloton te goed is vir gewetensbeswaardes; Wilhelm se broer Wolfgang het dus, op 20-jarige ouderdom, onder die guillotine gesterf. Terselfdertyd het die Katolieke Kerk jong Duitse Katolieke aangespoor om in die leër van die vaderland te sterf. Die bloedskuld van die kerk is onmiskenbaar!

16, 17. (a) Vir watter bloedskuld moet Babilon die Grote verantwoordelik gehou word, en hoe het die Vatikaan bloedskuldig geword met betrekking tot die Jode wat in Nazi-pogroms omgekom het? (b) Wat is een rede waarom valse godsdiens die skuld dra vir die dood van miljoene mense in honderde oorloë in hedendaagse tye?

¹⁶ Maar die profesie sê dat Babilon die Grote verantwoordelik gehou moet word vir die bloed van “almal wat op die aarde doodgemaak is”. Dit was beslis in hedendaagse tye die geval. Byvoorbeeld, aangesien Katolieke intrige daartoe bygedra het dat Hitler in Duitsland aan die bewind gekom het, is die Vatikaan deels verantwoordelik vir ’n verskriklike bloedskuld met betrekking tot die sesmiljoen Jode wat in Nazi-pogroms omgekom het. Verder is baie meer as honderdmiljoen mense in ons tyd in honderde oorloë doodgemaak. Dra valse godsdiens skuld in hierdie verband? Ja, om twee redes.

¹⁷ Die eerste is dat baie oorloë met godsdiensverskille verband hou. Byvoorbeeld, die geweld in Indië tussen Moslems en Hindoes in 1946-48 is deur godsdiens veroorsaak. Honderdduisende mense het omgekom. Die konflik tussen Irak en Iran in die 1980’s het met sektariese verskille verband gehou, en honderdduisende is doodgemaak. Geweld tussen Katolieke en Protestante in Noord-Ierland het duisende lewens geëis. Die rubriekskrywer C. L. Sulzberger het hierdie saak in oënskou geneem en in 1976 gesê: “Dit is ’n droewige waarheid dat waarskynlik die helfte of meer van die oorloë wat nou oor die hele wêreld gevoer word, óf openlike godsdienskonflikte is óf met godsdiensgeskille te doen het.” Dit was inderdaad dwarsdeur die veelbewoë geskiedenis van Babilon die Grote die geval.

18. Wat is die tweede rede waarom die wêreld se godsdienste bloedskuldig is?

¹⁸ Wat is die tweede rede? Uit Jehovah se oogpunt is die wêreld se godsdienste bloedskuldig omdat hulle hulle volgelinge nie op oortuigende wyse die waarheid aangaande Jehovah se vereistes vir sy knegte geleer het nie. Hulle het mense nie op oortuigende wyse geleer dat God se ware aanbidders Jesus Christus moet navolg en liefde aan ander moet betoon ongeag hulle nasionaliteit nie (Miga 4:3, 5; Johannes 13:34, 35; Handelinge 10:34, 35; 1 Johannes 3:10-12). Omdat die godsdienste wat Babilon die Grote uitmaak, nie hierdie dinge verkondig het nie, is hulle aanhangers in die draaikolk van internasionale oorlogvoering ingetrek. Hoe duidelik was dit tog in die twee wêreldoorloë van die eerste helfte van die 20ste eeu, oorloë wat albei in die Christendom begin het en tot gevolg gehad het dat lidmate van dieselfde godsdiens mekaar uitmoor! As almal wat beweer het dat hulle Christene is, by Bybelbeginsels gebly het, sou daardie oorloë nooit kon plaasgevind het nie.

19. Watter verskriklike bloedskuld dra Babilon die Grote?

¹⁹ Jehovah gee Babilon die Grote die skuld vir al hierdie bloedvergieting. As die godsdiensleiers, en veral dié in die Christendom, hulle mense Bybelwaarheid geleer het, sou sulke grootskaalse bloedvergieting nooit plaasgevind het nie. Babilon die Grote—die groot hoer en wêreldryk van valse godsdiens—moet dan waarlik, direk of indirek, aan Jehovah verantwoording doen, nie net vir “die bloed van profete en van heiliges” wat sy vervolg en doodgemaak het nie, maar vir die bloed “van almal wat op die aarde doodgemaak is”. Babilon die Grote dra inderdaad ’n verskriklike bloedskuld. Hoe dankbaar sal ons tog wees wanneer haar finale vernietiging plaasvind!

[Venster op bladsy 270]

Die prys van ’n kompromis

Guenter Lewy skryf in sy boek The Catholic Church and Nazi Germany: “As Duitse Katolisisme van die begin af ’n beleid van besliste teenstand teen die Nazi-ryk gevolg het, sou die wêreldgeskiedenis heel moontlik anders verloop het. Al het hierdie stryd uiteindelik nie tot Hitler se ondergang gelei en al sy misdade voorkom nie, sou dit myns insiens die morele aansien van die Kerk oneindig verhoog het. Die koste van sulke weerstand in terme van menselewens sou ongetwyfeld groot gewees het, maar hierdie opofferings sou vir die allergrootste saak gemaak gewees het. As die tuisfront onbetroubaar was, sou Hitler dit dalk nie gewaag het om oorlog te verklaar nie en sou letterlik miljoene lewens gespaar gewees het. . . . Toe duisende Duitse anti-Nazi’s in Hitler se konsentrasiekampe doodgemartel is, toe die Poolse intellektuele uitgemoor is, toe honderdduisende Russe gesterf het omdat hulle as Slawiese Untermenschen [ondermense] behandel is en toe 6 000 000 mense vermoor is omdat hulle ‘nie-Aries’ was, het amptenare van die Katolieke Kerk in Duitsland die ryk wat hierdie misdade gepleeg het, gesteun. Die Pous in Rome, die geestelike hoof en hoogste sede-onderrigter van die Rooms-Katolieke Kerk, het geswyg.”—Bladsye 320, 341.

[Prente op bladsy 268]

“Hoe jammer, hoe jammer”, sê die heersers

[Prent op bladsy 268]

“Hoe jammer, hoe jammer”, sê die koopmanne

Hoofstuk 38

Loof Jah vir sy oordele!

1. Watter woorde hoor Johannes “soos ’n harde stem van ’n groot menigte in die hemel”?

BABILON DIE GROTE bestaan nie meer nie! Dit is werklik verblydende nuus. Geen wonder dat Johannes vreugdevolle uitroepe van lof in die hemel hoor nie! “Ná hierdie dinge het ek iets gehoor wat soos ’n harde stem van ’n groot menigte in die hemel was. Hulle het gesê: ‘Halleluja!a Die redding en die heerlikheid en die mag behoort aan ons God, want sy oordele is waaragtig en regverdig. Want hy het oordeel voltrek aan die groot hoer wat die aarde met haar hoerery verderf het, en hy het die bloed van sy slawe op haar hand gewreek.’ En dadelik het hulle vir die tweede keer gesê: ‘Halleluja!b En die rook wat van haar kom, bly vir ewig en altyd opstyg.’”—Openbaring 19:1-3.

2. (a) Wat beteken die woord “Halleluja”, en wat toon die feit dat Johannes dit op hierdie stadium twee keer hoor? (b) Wie ontvang die heerlikheid vir die vernietiging van Babilon die Grote? Verduidelik.

² Ja, Halleluja! Die woord beteken “Loof Jah”, en “Jah” is die verkorte vorm van die goddelike naam, Jehovah. Ons word hier herinner aan die psalmis se aansporing: “Laat alles wat asemhaal, Jah loof. Loof Jah!” (Psalm 150:6). Die feit dat Johannes die jubelende hemelse koor op hierdie stadium in Openbaring twee keer “Halleluja!” hoor sing, toon die samehang van die goddelike openbaring van waarheid. Die God van die Christelike Griekse Geskrifte is dieselfde as die God van die vroeëre Hebreeuse Geskrifte, en Jehovah is sy naam. Die God wat die val van eertydse Babilon veroorsaak het, het Babilon die Grote nou geoordeel en vernietig. Skryf aan hom al die heerlikheid toe vir hierdie prestasie! Die krag wat haar ondergang bewerkstellig het, behoort aan hom en nie aan die nasies wat hy as werktuie gebruik het om haar te verwoes nie. Aan Jehovah alleen moet ons redding toeskryf.—Jesaja 12:2; Openbaring 4:11; 7:10, 12.

3. Waarom het die groot hoer haar oordeel dubbel en dwars verdien?

³ Waarom het die groot hoer hierdie oordeel dubbel en dwars verdien? Volgens die wet wat Jehovah aan Noag—en deur hom aan die hele mensdom—gegee het, vereis die moedswillige vergieting van bloed die doodsvonnis. Dit is in God se Wet aan Israel herhaal (Genesis 9:6; Numeri 35:20, 21). Bowendien het fisiese sowel as geestelike egbreuk volgens daardie Mosaïese Wet die dood verdien (Levitikus 20:10; Deuteronomium 13:1-5). Babilon die Grote is al duisende jare lank bloedskuldig, en sy is ’n skandelike hoer. Die Rooms-Katolieke Kerk se beleid om sy priesters te verbied om te trou, het byvoorbeeld daartoe gelei dat baie van hulle hulle aan growwe onsedelikheid skuldig maak, en heelwat van hulle doen vandag vigs op (1 Korintiërs 6:9, 10; 1 Timoteus 4:1-3). Maar haar grootste sondes, ‘wat tot aan die hemel ophoop’, is haar skokkende dade van geestelike hoerery—deur valshede te verkondig en haarself met verdorwe politici te verbind (Openbaring 18:5). Aangesien haar straf haar uiteindelik ingehaal het, laat die hemelse menigte nou ’n tweede Halleluja hoor.

4. Wat word gesimboliseer deur die feit dat die rook van Babilon die Grote ‘vir ewig en altyd bly opstyg’?

⁴ Babilon die Grote is aan die brand gesteek soos ’n verowerde stad, en haar rook “bly vir ewig en altyd opstyg”. Wanneer ’n letterlike stad deur verowerende leërs verbrand word, bly die rook opstyg solank die as warm is. Enigiemand wat dit probeer herbou terwyl dit nog rook, sal eenvoudig deur die smeulende puin gebrand word. Aangesien die rook van Babilon die Grote “vir ewig en altyd” sal opstyg as ’n teken van die finaliteit van haar oordeel, sal niemand hierdie verderflike stad ooit weer kan herstel nie. Valse godsdiens is vir ewig weg. Ja, Halleluja!—Vergelyk Jesaja 34:5, 9, 10.

5. (a) Wat doen en sê die 24 ouderlinge en die vier lewende wesens? (b) Waarom is die Halleluja-refrein baie meer melodieus as Halleluja-kore wat in die Christendom se kerke gesing is?

⁵ In ’n vroeëre visioen het Johannes vier lewende wesens rondom die troon gesien, saam met die 24 ouderlinge wat die Koninkrykserfgename in hulle glorieryke hemelse posisie afbeeld (Openbaring 4:8-11). Nou sien hy hulle weer wanneer hulle ’n derde Halleluja oor die vernietiging van Babilon die Grote laat weerklink: “En die vier-en-twintig ouderlinge en die vier lewende wesens het neergeval en God aanbid wat op die troon sit en gesê: ‘Amen! Halleluja!’”c (Openbaring 19:4). Hierdie pragtige Halleluja-koor is dus iets anders as die “nuwe lied” van lof aan die Lam (Openbaring 5:8, 9). Hulle sing nou die pragtige oorwinningsrefrein en skryf al die heerlikheid aan die Soewereine Heer Jehovah toe weens sy beslissende oorwinning oor die groot hoer, Babilon die Grote. Hierdie Hallelujas weerklink baie meer melodieus as enige Halleluja-kore wat in die Christendom se kerke gesing is, waar Jehovah, of Jah, onteer en verag is. Sulke skynheilige sang wat Jehovah se naam oneer aandoen, is nou vir ewig stilgemaak!

6. Wie se “stem” word gehoor, watter aansporing gee dit, en wie reageer almal daarop?

⁶ Dit was in 1918 dat Jehovah ‘dié wat sy naam vrees, klein en groot,’ begin beloon het—waarvan die eerstes die gesalfde Christene was wat getrou gesterf het en wat hy opgewek en in die hemelse geledere van die 24 ouderlinge geplaas het (Openbaring 11:18). Ander sing die Hallelujas saam met hulle, want Johannes sê: “En ’n stem het uit die troon uitgegaan en gesê: ‘Loof ons God, al sy slawe wat hom vrees, klein en groot’” (Openbaring 19:5). Dit is die “stem” van Jehovah se Mondstuk, sy eie Seun, Jesus Christus, wat “in die middel van die troon” staan (Openbaring 5:6). Nie net in die hemel nie, maar ook hier op die aarde sing “al sy slawe” saam, terwyl die gesalfde Johannes-klas op die aarde die voortou neem. Hoe vreugdevol gehoorsaam hulle tog die bevel: “Loof ons God”!

7. Wie sal Jehovah loof nadat Babilon die Grote vernietig is?

⁷ Ja, die lede van die groot menigte tel ook onder hierdie slawe. Sedert 1935 het hulle uit Babilon die Grote gekom en die vervulling van God se belofte ondervind: “Hy sal dié seën wat Jehovah vrees, klein sowel as groot” (Psalm 115:13). Wanneer die hoeragtige Babilon vernietig word, sal miljoene van hulle ‘ons God loof’—saam met die Johannes-klas en die hele hemelse leërskare. Later sal dié wat op die aarde opgewek word, hetsy hulle voorheen prominent was of nie, ongetwyfeld verdere Hallelujas sing wanneer hulle hoor dat Babilon die Grote vir ewig vernietig is (Openbaring 20:12, 15). Alle lof aan Jehovah vir sy klinkende oorwinning oor die eeue oue hoer!

8. Wat moet die hemelse lofliedere wat Johannes gehoor het, ons nou aanvuur om te doen voordat Babilon die Grote vernietig word?

⁸ Hoe vuur dit alles ons tog aan om soveel moontlik in God se werk vir ons dag te doen! Mag alle knegte van Jah hulle met hart en siel daarop toespits om nou, voordat Babilon die Grote afgegooi en vernietig word, God se oordele, tesame met die wonderlike Koninkrykshoop, te verkondig.—Jesaja 61:1-3; 1 Korintiërs 15:58.

‘Halleluja—Jehovah is koning!’

9. Waarom is die laaste Halleluja so ’n vol, ryk geluid?

⁹ Daar is nog redes tot vreugde, soos Johannes ons verder meedeel: “En ek het iets gehoor wat soos ’n stem van ’n groot menigte was en soos ’n geluid van baie waters en soos ’n geluid van swaar donderslae. Hulle het gesê: ‘Halleluja,d want Jehovah ons God, die Almagtige, het as koning begin heers’” (Openbaring 19:6). Hierdie laaste Halleluja is die een wat die aankondiging vierkantig, of simmetries, maak. Dit is ’n magtige hemelse geluid, indrukwekkender as enige mensekoor, majestueuser as enige aardse waterval en vreesinboesemender as enige aardse donderstorm. Die tienduisende hemelse stemme vier die feit dat ‘Jehovah ons God, die Almagtige, as koning begin heers het’.

10. In watter sin kan daar gesê word dat Jehovah ná Babilon die Grote se verwoesting as koning begin heers?

¹⁰ Maar in watter sin begin Jehovah heers? Millenniums het verloop sedert die psalmis gesê het: “God [is] van lankal af my Koning” (Psalm 74:12). Jehovah se koningskap was selfs toe al baie oud. Hoe kan die universele koor dan sing dat ‘Jehovah as koning begin heers het’? In die sin dat Jehovah, wanneer Babilon die Grote vernietig word, nie meer hierdie vermetele teenstander sal hê wat gehoorsaamheid aan hom as die Universele Soewerein ondermyn nie. Valse godsdiens sal nie meer die aarde se heersers aanhits om hom teë te staan nie. Toe eertydse Babilon uit ’n posisie van wêreldoorheersing geval het, het Sion die seëvierende aankondiging gehoor: “Jou God het koning geword!” (Jesaja 52:7). Ná die geboorte van die Koninkryk in 1914 het die 24 ouderlinge uitgeroep: “Ons dank u, Jehovah God, . . . want u het u groot krag opgeneem en as koning begin heers” (Openbaring 11:17). Nou, ná die verwoesting van Babilon die Grote, word daar weer uitgeroep: “Jehovah . . . het as koning begin heers.” Daar is geen mensgemaakte god oor om die soewereiniteit van die ware God, Jehovah, te betwis nie!

Die Lam se huwelik is op hande!

11, 12. (a) Hoe het eertydse Jerusalem eertydse Babilon aangespreek, en watter patroon is sodoende met betrekking tot Nuwe Jerusalem en Babilon die Grote vasgestel? (b) Wat sing en kondig die hemelse menigtes ná die oorwinning oor Babilon die Grote aan?

¹¹ “My vyandin”! Dit is hoe Jerusalem, waar Jehovah se tempel van aanbidding geleë was, afgodsaanbiddende Babilon aangespreek het (Miga 7:8). Net so het “die heilige stad, Nuwe Jerusalem,” wat uit die bruid van 144 000 lede bestaan, alle rede gehad om Babilon die Grote as haar vyandin aan te spreek (Openbaring 21:2). Maar uiteindelik het teëspoed, rampspoed en verwoesting die groot hoer oorval. Haar spiritistiese gebruike en astroloë kon haar nie red nie. (Vergelyk Jesaja 47:1, 11-13.) Dit is inderdaad ’n groot oorwinning vir ware aanbidding!

¹² Noudat die afskuwelike hoer, Babilon die Grote, vir ewig uit die weg geruim is, kan daar aandag gegee word aan die maagdelike rein bruid van die Lam! Daarom sing die hemelse menigtes jubelend tot lof van Jehovah: “Laat ons bly wees en oorloop van vreugde, en laat ons hom die heerlikheid gee, want die huwelik van die Lam het gekom en sy vrou het haar gereedgemaak. Ja, aan haar is dit gegee om geklee te wees in blink, skoon, fyn linne, want die fyn linne beeld die regverdige dade van die heiliges af.”—Openbaring 19:7, 8.

13. Watter voorbereidings vir die huwelik van die Lam is deur die eeue heen getref?

¹³ Deur die eeue heen het Jesus liefdevolle voorbereidings getref vir hierdie hemelse huwelik (Matteus 28:20; 2 Korintiërs 11:2). Hy het die 144 000 lede van geestelike Israel gereinig sodat “hy die gemeente in die prag daarvan voor hom kon stel, sonder ’n vlek of ’n rimpel of iets dergeliks, maar dat dit heilig en sonder smet sou wees” (Efesiërs 5:25-27). Om “die prys van God se roeping na bo” te verkry, moes elke gesalfde Christen die ou persoonlikheid met sy gebruike aflê, hom met die nuwe Christelike persoonlikheid beklee en regverdige dade “met [sy] hele siel soos vir Jehovah” verrig.—Filippense 3:8, 13, 14; Kolossense 3:9, 10, 23.

14. Hoe het Satan die toekomstige lede van die Lam se vrou probeer besoedel?

¹⁴ Sedert Pinkster 33 G.J. het Satan Babilon die Grote as sy werktuig gebruik om die toekomstige lede van die Lam se vrou te probeer besoedel. Teen die einde van die eerste eeu het hy saadjies van Babiloniese godsdiens in die gemeente gesaai (1 Korintiërs 15:12; 2 Timoteus 2:18; Openbaring 2:6, 14, 20). Die apostel Paulus beskryf dié wat ander se geloof ondermyn het, met hierdie woorde: “Want sulke mense is valse apostels, bedrieglike werkers, wat hulleself in apostels van Christus verander. En geen wonder nie, want Satan self hou aan om hom in ’n engel van lig te verander” (2 Korintiërs 11:13, 14). In die daaropvolgende eeue het die afvallige Christendom, soos die res van Babilon die Grote, haar in die klere van rykdom en bevoorregting geklee, “purper en skarlaken en . . . goud en edelstene en pêrels” (Openbaring 17:4). Haar geestelikes en pouse het met bloeddorstige keisers, soos Konstantyn en Karel die Grote, omgegaan. Sy was nooit in “die regverdige dade van die heiliges” geklee nie. As ’n valse bruid was sy waarlik ’n meesterstuk van sataniese bedrog. Uiteindelik is sy vir ewig weg!

Die Lam se vrou het haar gereedgemaak

15. Hoe vind die verseëling plaas, en wat word van ’n gesalfde Christen vereis?

¹⁵ Nou, ná byna 2 000 jaar, het al 144 000 lede van die bruidsklas hulle dus voorberei. Maar op watter tydstip kan daar gesê word dat ‘die Lam se vrou haar gereedgemaak het’? Sedert Pinkster 33 G.J. is gelowige gesalfdes progressief “met die beloofde heilige gees verseël”, dít met die oog op ’n komende “dag van bevryding deur ’n losprys”. Soos die apostel Paulus dit gestel het, het God “ook sy seël op ons gedruk en ons die pand van wat gaan kom, dit wil sê die gees, in ons harte gegee” (Efesiërs 1:13; 4:30; 2 Korintiërs 1:22). Elke gesalfde Christen is ‘geroepe en uitverkore’, en hy het bewys dat hy ‘getrou’ is.—Openbaring 17:14.

16. (a) Wanneer was die apostel Paulus se verseëling voltooi, en hoe weet ons dit? (b) Wanneer sal die Lam se vrou haar ten volle “gereedgemaak” het?

¹⁶ Ná dekades van toetsing kon Paulus self sê: “Ek het die goeie stryd gestry, ek het die wedloop enduit gehardloop, ek het die geloof bewaar. Van nou af is die kroon van regverdigheid vir my weggelê, wat die Here, die regverdige regter, my in daardie dag as beloning sal gee, en tog, nie net aan my nie, maar ook aan almal wat sy openbaarwording liefgehad het” (2 Timoteus 4:7, 8). Dit lyk of die apostel se verseëling voltooi was, hoewel hy nog in die vlees was en later ’n marteldood sou ondergaan. Die tyd moet ook aanbreek wanneer alle oorblywende lede van die 144 000 op die aarde individueel verseël sal wees as persone wat aan Jehovah behoort (2 Timoteus 2:19). Op hierdie stadium sal die Lam se vrou haar ten volle gereedgemaak het—wanneer die meeste van die 144 000 reeds hulle hemelse beloning ontvang het en dié wat nog op die aarde is, finaal as getroue knegte goedgekeur en verseël is.

17. Wanneer kan die huwelik van die Lam plaasvind?

¹⁷ Dit is op hierdie tydstip in Jehovah se rooster, wanneer die verseëling van die 144 000 voltooi is, dat die engele die vier winde van die groot verdrukking loslaat (Openbaring 7:1-3). Eers word oordeel aan die hoeragtige Babilon die Grote voltrek. Die seëvierende Christus ruk dan vinnig op na Armageddon om die res van Satan se organisasie op die aarde te vernietig en, uiteindelik, om Satan en sy demone in die afgrond te werp (Openbaring 19:11–20:3). As enige gesalfdes nog op die aarde oorbly, sal hulle ongetwyfeld hulle hemelse beloning ontvang kort nadat Christus sy oorwinning voltooi het en sal hulle by hulle medelede van die bruidsklas aansluit. Dan, op God se bestemde tyd, kan die huwelik van die Lam plaasvind!

18. Hoe bevestig Psalm 45 die volgorde van gebeure met betrekking tot die huwelik van die Lam?

¹⁸ Die profetiese verslag in Psalm 45 beskryf die volgorde van gebeure. Eers ry die gekroonde Koning uit om sy vyande te oorwin (Verse 1-7). Dan vind die huwelik plaas, terwyl die hemelse bruid op die aarde bedien word deur haar maagdelike metgeselle, die groot menigte (Verse 8-15). Vervolgens word die huwelik vrugbaar deurdat die verrese mensdom onder toesig van “vorste op die hele aarde” tot volmaaktheid verhef word (Verse 16, 17). Watter glorieryke seëninge gaan tog met die huwelik van die Lam gepaard!

Gelukkig is dié wat genooi is

19. Hoe lui die vierde van die sewe geluksprekinge in Openbaring, en wie deel in hierdie besondere geluk?

¹⁹ Johannes teken nou die vierde van die sewe geluksprekinge in Openbaring op: “En hy [die engel wat hierdie dinge aan Johannes geopenbaar het] sê vir my: ‘Skryf: Gelukkig is dié wat na die aandmaal van die Lam se huwelik genooi is.’ Ook sê hy vir my: ‘Dit is die waaragtige woorde van God’” (Openbaring 19:9).e Dié wat na “die aandmaal van die Lam se huwelik” genooi word, is die lede van die bruidsklas. (Vergelyk Matteus 22:1-14.) Die hele gesalfde bruidsgeselskap is gelukkig omdat hulle hierdie uitnodiging ontvang het. Die meeste van die genooides het reeds hemel toe gegaan, waar die huweliksaandmaal gehou word. Dié wat nog op die aarde is, is ook gelukkig omdat hulle die uitnodiging het. Hulle plek by die huweliksaandmaal is seker (Johannes 14:1-3; 1 Petrus 1:3-9). Wanneer hulle na die hemel opgewek word, sal die hele, verenigde bruid saam met die Lam in hierdie uiters gelukkige huwelik deel.

20. (a) Wat beteken die woorde: “Dit is die waaragtige woorde van God”? (b) Watter uitwerking het die woorde van die engel op Johannes gehad, en hoe het die engel gereageer?

²⁰ Die engel voeg by: “Dit is die waaragtige woorde van God.” Hierdie woord ‘waaragtig’ gee die Griekse a·le·thi·nosʹ weer en beteken “eg” of “betroubaar”. Aangesien hierdie woorde in werklikheid van Jehovah af kom, is hulle getrou en betroubaar. (Vergelyk 1 Johannes 4:1-3; Openbaring 21:5; 22:6.) As ’n genooide na hierdie huweliksfees moes Johannes baie verheug gewees het om dit te hoor en om na te dink oor die seëninge wat vir die bruidsklas voorlê. Trouens, hy was so ontroer dat die engel hom raad moes gee, soos Johannes vertel: “Daarop het ek voor sy voete neergeval om hom te aanbid. Maar hy sê vir my: ‘Pas op! Moet dit nie doen nie! Ek is maar net ’n medeslaaf van jou en van jou broers wat die werk het om van Jesus te getuig. Aanbid God.’”—Openbaring 19:10a.

21. (a) Wat onthul Openbaring met betrekking tot die engele? (b) Watter gesindheid behoort Christene teenoor die engele te hê?

²¹ Die hele Openbaring getuig op merkwaardige wyse van die getrouheid en ywer van die engele. Hulle is betrokke by die kanaal van geopenbaarde waarheid (Openbaring 1:1). Hulle werk saam met mense om die goeie nuus te verkondig en die simboliese plae uit te gooi (Openbaring 14:6, 7; 16:1). Hulle het aan Jesus se sy geveg om Satan en sy engele uit die hemel te werp, en hulle sal weer by Armageddon aan sy sy veg (Openbaring 12:7; 19:11-14). Ja, hulle het toegang tot Jehovah self (Matteus 18:10; Openbaring 15:6). Nietemin is hulle bloot nederige slawe van God. Daar is geen plek in ware aanbidding vir die aanbidding van die engele of selfs vir relatiewe aanbidding nie, dit wil sê om God deur die een of ander “heilige” of engel te aanbid (Kolossense 2:18). Christene aanbid Jehovah alleen en rig hulle versoeke in Jesus se naam tot hom.—Johannes 14:12, 13.

Jesus se rol in profesieë

22. Wat sê die engel vir Johannes, en wat beteken die woorde?

²² Die engel sê dan: “Want dit is die aflegging van getuienis omtrent Jesus wat profesie inspireer” (Openbaring 19:10b). Hoe so? Dit beteken dat Jesus en die rol wat hy in Jehovah se voornemens speel, aanleiding gee tot alle geïnspireerde profesieë. Die eerste profesie in die Bybel het die koms van ’n saad beloof (Genesis 3:15). Jesus het daardie Saad geword. Verdere openbarings het ’n massa profetiese waarheid op hierdie basiese belofte gebou. Die apostel Petrus het vir die gelowige nie-Jood Kornelius gesê: “Van hom [Jesus] getuig al die profete” (Handelinge 10:43). Sowat 20 jaar later het die apostel Paulus gesê: “Ongeag hoeveel beloftes van God daar is, hulle het deur middel van hom [Jesus] Ja geword” (2 Korintiërs 1:20). Ná nog 43 jaar herinner Johannes self ons weer daaraan: “Die waarheid het deur middel van Jesus Christus gekom.”—Johannes 1:17.

23. Waarom doen die hoë posisie en gesag van Jesus nie afbreuk aan die aanbidding wat ons aan Jehovah gee nie?

²³ Doen dit enigsins afbreuk aan die aanbidding wat ons aan Jehovah gee? Nee. Onthou die engel se waarskuwende raad: “Aanbid God.” Jesus probeer nooit om met Jehovah te wedywer nie (Filippense 2:6). Al die engele word weliswaar beveel om ‘aan Jesus hulde te bewys’, en die hele skepping moet sy hoë posisie erken sodat “in die naam van Jesus elke knie sou buig”. Maar let op dat dit “tot die heerlikheid van God die Vader” en op sy bevel is (Hebreërs 1:6; Filippense 2:9-11). Jehovah het aan Jesus sy hoë gesag gegee, en deur hierdie gesag te erken, verheerlik ons God. As ons weier om ons aan Jesus se heerskappy te onderwerp, kom dit neer op ’n verwerping van Jehovah God self.—Psalm 2:11, 12.

24. Watter twee verstommende gebeure verwag ons, en watter woorde moet ons derhalwe uiter?

²⁴ Laat ons dan eensgesind die openingswoorde van Psalms 146 tot 150 uiter: “Loof Jah!” Mag die Halleluja-koor dawerend weerklink in afwagting van Jehovah se oorwinning oor die Babiloniese wêreldryk van valse godsdiens! En mag daar oorvloedige vreugde wees namate die huwelik van die Lam nader kom!

[Voetnote]

[Venster op bladsy 273]

“Brief aan Sodom en Gomorra”

Onder hierdie hoofopskrif het Londen se Daily Telegraph van 12 November 1987 verslag gedoen oor ’n mosie wat aan die Algemene Sinode van die Anglikaanse Kerk voorgelê is. Dit het bepleit dat homoseksuele “Christene” uit die kerk gesit word. Die rubriekskrywer Godfrey Barker het gesê: “Die Aartsbiskop van Kantelberg het gister droefgeestig sy mening uitgespreek: ‘As St. Paulus ’n brief aan die Anglikaanse Kerk sou skryf, kan ons ons tereg afvra watter soort brief dit sou wees.’” Mnr. Barker self het gesê: “’n Brief aan Sodom en Gomorra is die antwoord”, en hy het bygevoeg: “Dr. Runcie [die aartsbiskop] was van mening dat dit soos Romeine, Hfst. 1, sou lui.”

Die skrywer het Paulus se woorde in Romeine 1:26-32 aangehaal: “God het hulle in ooreenstemming met die welluste van hulle hart aan onreinhede oorgegee. . . . Mans het skaamtelose dade met mans gepleeg . . . hoewel hulle die verordening van God ken, naamlik dat dié wat sulke dinge doen, die dood verdien, doen hulle dit nie net self nie, maar gee hulle ook hulle goedkeuring aan dié wat dit doen.” Hy het ten slotte gesê: “St. Paulus was net bekommerd oor die ouens in die kerkbanke. Dr. Runcie se probleem is die ouens op die preekstoele.”

Waarom het die aartsbiskop so ’n probleem? Groot opskrifte in die Londense Daily Mail van 22 Oktober 1987 het gesê: “‘Een uit drie predikante homoseksueel’ . . . Veldtog om homoseksuele uit te dryf, ‘sal Anglikaanse Kerk sluit’.” Volgens die berigte het die “eerwaarde” hoofsekretaris van die Lesbiese en Homoseksuele Christelike Beweging gesê: “As hierdie mosie aanvaar word, sal dit die Kerk verwoes, en die Aartsbiskop van Kantelberg weet dit. Ons is van mening dat, om ’n benaderde syfer te gee, tussen 30 en 40 persent van Anglikaanse geestelikes homoseksueel is. En hulle is die bedrywigste mense wat tot die bediening van die Kerk bydra.” Die dalende aantal kerkgangers is ongetwyfeld deels ’n weerspieëling van walging vir daardie groeiende homoseksuele bediening.

Wat het die kerksinode besluit? ’n Oorweldigende meerderheid van 388 lede (95 persent van die geestelikes) het ten gunste van ’n afgewaterde mosie gestem. The Economist van 14 November 1987 het in hierdie verband berig: “Die Anglikaanse Kerk is gekant teen homoseksuele gebruike, maar nie sterk gekant daarteen nie. Die algemene sinode, die Kerk se parlement, het hierdie week, met homoseksuele geestelikes in gedagte, besluit dat homoseksuele dade, anders as hoerery en owerspel, nie ’n sonde is nie: daar is bloot gesê dat dit ‘te kort skiet aan die ideaal’ dat ‘geslagsomgang ’n daad van algehele verbintenis is wat na regte in ’n blywende huweliksverhouding hoort’.” The Economist het die standpunt van die Aartsbiskop van Kantelberg gekontrasteer met die apostel Paulus se reguit woorde in Romeine 1:26, 27 en ’n aanhaling van Paulus se woorde gepubliseer bokant die byskrif: “St. Paulus het geweet wat hy dink.”

Jesus Christus het ook geweet wat hy dink en het dit baie duidelik gestel. Hy het gesê dat dit “vir die land van Sodom draagliker [sal] wees op die Oordeelsdag” as vir die godsdiensbeoefenaars wat sy boodskap verwerp het (Matteus 11:23, 24). Jesus het hier ’n hiperbool gebruik om te toon dat die godsdiensleiers wat die Seun van God en sy leer verwerp het, selfs laakbaarder was as die Sodomiete. Judas 7 sê dat daardie Sodomiete “die regterlike straf van die ewige vuur”, dit wil sê ewige vernietiging, ondergaan het (Matteus 25:41, 46). Hoe streng sal die oordeel dan wees van sogenaamd Christelike leiers wat hulle verblinde kuddes blindelings van die hoë sedelike standaarde van God se Koninkryk weglei na die permissiewe, verdorwe weë van hierdie wêreld! (Matteus 15:14). Aangaande valse godsdiens, Babilon die Grote, roep die stem uit die hemel dringend uit: “Gaan uit haar uit, my volk, as julle nie met haar in haar sondes wil deel nie, en as julle geen deel van haar plae wil ontvang nie.”—Openbaring 18:2, 4. 

[Prente op bladsy 275]

Die hemel weerklink van vier Hallelujas, wat Jah loof vir sy finale oorwinning oor Babilon die Grote

Hoofstuk 39

Die Stryder-Koning seëvier by Armageddon

Visioen 13—Openbaring 19:11-21

Onderwerp: Jesus lei die leërs van die hemel om Satan se stelsel van dinge te vernietig

Tyd van vervulling: Ná die vernietiging van Babilon die Grote

1. Wat is Armageddon, en wat gaan dit vooraf?

ARMAGEDDON—’n skrikwekkende woord vir baie! Maar vir liefhebbers van regverdigheid dui dit die langverwagte dag aan wanneer Jehovah finale oordeel aan die nasies sal voltrek. Dit is nie die mens se oorlog nie, maar “die oorlog van die groot dag van God die Almagtige”—sy dag van wraak teen die aarde se heersers (Openbaring 16:14, 16; Esegiël 25:17). Die groot verdrukking sal reeds begin het met die verwoesting van Babilon die Grote. Dan sal die skarlakenkleurige wilde dier en sy tien horings, op aanstigting van Satan, hulle aanval op Jehovah se volk toespits. Die Duiwel, toorniger as ooit op God se gemalinorganisasie, is vasbeslote om sy nalopers te gebruik om tot die dood teen die oorblywendes van haar saad oorlog te voer (Openbaring 12:17). Dit is Satan se laaste kans!

2. Wie is Gog van Magog, en hoe manipuleer Jehovah hom om Sy volk aan te val?

² Die Duiwel se venynige aanval word in Esegiël hoofstuk 38 treffend beskryf. Daar word die verlaagde Satan “Gog van die land Magog” genoem. Jehovah sit figuurlike hake in Gog se kakebene en trek hom en sy talryke krygsmag na die aanval. Hoe doen hy dit? Deur te veroorsaak dat Gog Sy Getuies sien as ’n weerlose volk “wat uit die nasies versamel is, wat rykdom en eiendom versamel, dié wat op die middelpunt van die aarde woon”. Hulle is die middelpunt van belangstelling op die aarde as die een volk wat geweier het om die wilde dier en sy beeld te aanbid. Hulle geestelike krag en voorspoed maak Gog woedend. Gog en sy talryke krygsmag, insluitende die wilde dier uit die see met sy tien horings, ruk dus op vir die slagting. Maar in teenstelling met Babilon die Grote geniet God se rein volk goddelike beskerming!—Esegiël 38:1, 4, 11, 12, 15; Openbaring 13:1.

3. Hoe raak Jehovah van Gog se krygsmag ontslae?

³ Hoe raak Jehovah van Gog en sy hele menigte ontslae? Luister! “‘Ek sal deur my hele bergstreek ’n swaard teen hom oproep’, is die woord van die Soewereine Heer Jehovah. ‘Die swaard van elkeen sal teen sy eie broer wees.’” Maar nie kernwapens of konvensionele wapens sal in hierdie stryd van nut wees nie, want Jehovah sê: “Ek sal met hom in die gerig tree, met pes en met bloed; en ’n oorstromende stortreën en haelstene, vuur en swael sal ek op hom laat reën en op sy krygsbendes en op die baie volke wat saam met hom sal wees. En ek sal my beslis groot maak en my heilig en my bekend maak voor die oë van baie nasies; en hulle sal moet weet dat ek Jehovah is.”—Esegiël 38:21-23; 39:11; vergelyk Josua 10:8-14; Rigters 7:19-22; 2 Kronieke 20:15, 22-24; Job 38:22, 23.

Die Een wat “Getrou en Waaragtig” genoem word

4. Hoe beskryf Johannes Jesus Christus in oorlogsmondering?

⁴ Jehovah roep ’n swaard op. Wie hanteer hierdie swaard? As ons na Openbaring terugkeer, vind ons die antwoord in nog ’n opwindende visioen. Voor Johannes se oë gaan die hemele oop om iets werklik ontsagwekkends te openbaar—Jesus Christus self in oorlogsmondering! Johannes sê vir ons: “En ek het die hemel geopend gesien, en kyk! ’n wit perd. En die een wat daarop sit, word Getrou en Waaragtig genoem, en hy oordeel en voer oorlog in regverdigheid. Sy oë is ’n vuurvlam, en op sy kop is baie krone.”—Openbaring 19:11, 12a.

5, 6. Wat beteken (a) die “wit perd”? (b) die naam “Getrou en Waaragtig”? (c) oë soos “’n vuurvlam”? (d) “baie krone”?

⁵ Soos in die vroeëre visioen van die vier ruiters is hierdie “wit perd” ’n gepaste simbool van regverdige oorlogvoering (Openbaring 6:2). En wie van God se seuns kan regverdiger wees as hierdie magtige Stryder? Aangesien hy ‘Getrou en Waaragtig genoem word’, moet hy “die getroue en waaragtige getuie”, Jesus Christus, wees (Openbaring 3:14). Hy voer oorlog om Jehovah se regverdige oordele te voltrek. Hy tree dus op in sy hoedanigheid as Jehovah se aangestelde Regter, die “Magtige God” (Jesaja 9:6). Sy oë is vreeswekkend, soos “’n vuurvlam”, gevestig op die komende vurige vernietiging van sy vyande.

⁶ Daar is krone op die kop van hierdie Stryder-Koning. Die wilde dier wat Johannes uit die see sien kom het, het tien krone gehad, wat sy tydelike heerskappy oor die aarde afgebeeld het (Openbaring 13:1). Maar Jesus het “baie krone”. Sy glorieryke heerskappy is ongeëwenaard, aangesien hy “Koning [is] van dié wat as konings heers en Here van dié wat as here heers”.—1 Timoteus 6:15.

7. Wat is die geskrewe naam wat Jesus het?

⁷ Johannes se beskrywing sê verder: “Hy het ’n naam wat geskryf is wat niemand behalwe hy self ken nie” (Openbaring 19:12b). Die Bybel noem God se Seun reeds by name soos Jesus, Immanuel en Migael. Maar hierdie onvermelde “naam” staan blykbaar vir die posisie en voorregte wat Jesus gedurende die dag van die Here geniet. (Vergelyk Openbaring 2:17.) Jesaja sê in sy beskrywing van Jesus sedert 1914: “Hy sal genoem word: Wonderlike Raadgewer, Magtige God, Ewige Vader, Vredevors” (Jesaja 9:6). Die apostel Paulus het Jesus se naam met Sy uiters hoë diensvoorregte verbind toe hy geskryf het: “God [het Jesus] ook tot ’n hoër posisie verhef en hom goedgunstig die naam gegee wat bo elke ander naam is, sodat in die naam van Jesus elke knie sou buig.”—Filippense 2:9, 10.

8. Waarom kan net Jesus die geskrewe naam ken, en met wie deel hy party van sy verhewe voorregte?

⁸ Jesus se voorregte is uniek. Buiten Jehovah self kan net Jesus begryp wat dit beteken om so ’n hoë posisie te beklee. (Vergelyk Matteus 11:27.) Van al God se skepsele kan net Jesus derhalwe hierdie naam ten volle verstaan. Nietemin laat Jesus sy bruid in party van hierdie voorregte deel. Daarom beloof hy: “Die een wat oorwin . . . ek sal op hom . . . my nuwe naam [skryf].”—Openbaring 3:12.

9. Wat word aangedui deur die feit dat (a) Jesus ‘geklee is in ’n bokleed wat met bloed besprinkel is’? (b) Jesus “Die Woord van God” genoem word?

⁹ Johannes voeg by: “En hy is geklee in ’n bokleed wat met bloed besprinkel is, en sy naam is: Die Woord van God” (Openbaring 19:13). Wie se “bloed” is dit? Dit kan Jesus se lewensbloed wees, wat ten behoewe van die mensdom vergiet is (Openbaring 1:5). Maar in hierdie verband verwys dit meer waarskynlik na die bloed van sy vyande wat vergiet word wanneer Jehovah se oordele aan hulle voltrek word. Dit laat ons dink aan die vroeëre visioen waarin die wingerdstok van die aarde geoes en in die groot wynpers van die toorn van God getrap word totdat die bloed “tot aan die tooms van die perde” kom—’n afbeelding van ’n groot oorwinning oor God se vyande (Openbaring 14:18-20). Die bloed waarmee Jesus se bokleed besprinkel is, bevestig ook dat sy oorwinning beslissend en volkome is. (Vergelyk Jesaja 63:1-6.) Nou sê Johannes weer dat Jesus by ’n naam genoem word. Hierdie keer is dit ’n alombekende naam—“Die Woord van God”—wat hierdie Stryder-Koning as Jehovah se Vernaamste Woordvoerder en Voorstander van die waarheid identifiseer.—Johannes 1:1; Openbaring 1:1.

Jesus se medestryders

10, 11. (a) Hoe toon Johannes dat Jesus nie alleen is in die stryd nie? (b) Wat word aangedui deur die feit dat die perde wit is en dat die ruiters geklee is in “wit, skoon, fyn linne”? (c) Wie maak die hemelse “leërs” uit?

¹⁰ Jesus voer hierdie stryd nie alleen nie. Johannes sê vir ons: “Ook het die leërs wat in die hemel was, hom op wit perde gevolg, en hulle was geklee in wit, skoon, fyn linne” (Openbaring 19:14). Die feit dat die perde “wit” is, dui op regverdige oorlogvoering. “Fyn linne” is gepas vir die Koning se ruiters, en die helder, skoon witheid daarvan dui ’n rein, regverdige posisie voor Jehovah aan. Wie maak dan hierdie “leërs” uit? Dit sluit ongetwyfeld die heilige engele in. Vroeg in die dag van die Here het Migael en sy engele Satan en sy demone uit die hemel gewerp (Openbaring 12:7-9). Verder sal “al die engele” Jesus bedien terwyl hy op sy glorieryke troon sit en die nasies en bewoners van die aarde oordeel (Matteus 25:31, 32). In die beslissende oorlog, wanneer God se oordele finaal voltrek word, sal Jesus sekerlik weer deur sy engele vergesel word.

¹¹ Ander sal ook hierby betrokke wees. Toe Jesus sy boodskap aan die gemeente in Tiatira gestuur het, het hy beloof: “Aan hom wat oorwin en my dade tot die einde toe onderhou, sal ek gesag oor die nasies gee, en hy sal met ’n ysterstaf as herder teenoor die mense optree, sodat hulle soos kleivoorwerpe verbrysel sal word, net soos ek van my Vader ontvang het” (Openbaring 2:26, 27). Wanneer die tyd aanbreek, sal die broers van Christus wat reeds in die hemel is, ongetwyfeld ’n aandeel daaraan hê om met hierdie ysterstaf as herders teenoor mense en nasies op te tree.

12. (a) Sal God se knegte op die aarde aan die stryd by Armageddon deelneem? (b) Hoe is Jehovah se volk op die aarde by Armageddon betrokke?

¹² Maar wat van God se knegte hier op die aarde? Die Johannes-klas sal nie daadwerklik aan die stryd by Armageddon deelneem nie; en ook nie hulle lojale metgeselle, die mense uit al die nasies wat na Jehovah se geestelike huis van aanbidding stroom nie. Hierdie vredeliewende mense het reeds van hulle swaarde ploegskare gesmee (Jesaja 2:2-4). En tog is hulle grootliks hierby betrokke! Soos ons reeds gesien het, is dit Jehovah se skynbaar weerlose volk wat venynig deur Gog en sy hele menigte aangeval word. Dit is die teken vir Jehovah se Stryder-Koning, ondersteun deur die leërs in die hemel, om ’n uitwissingsoorlog teen daardie nasies te begin voer. (Esegiël 39:6, 7, 11; vergelyk Daniël 11:44–12:1.) God se volk op die aarde sal, as toeskouers, baie hierin belangstel. Armageddon sal hulle redding beteken, en hulle sal vir ewig lewe as ooggetuies van Jehovah se groot oorlog van regverdiging.

13. Hoe weet ons dat Jehovah se Getuies nie teen alle heerskappy is nie?

¹³ Beteken dit dat Jehovah se Getuies teen alle heerskappy is? Glad nie! Hulle gehoorsaam die apostel Paulus se raad: “Laat elke siel onderdanig wees aan die hoër owerhede.” Hulle besef dat hierdie “hoër owerhede”, solank die teenswoordige stelsel voortduur, met God se toestemming bestaan om ’n mate van orde in die mensegemeenskap te handhaaf. Jehovah se Getuies betaal dus hulle belasting, gehoorsaam die wette, respekteer verkeersreëls, laat hulle registreer, ensovoorts (Romeine 13:1, 6, 7). Verder lewe hulle Bybelbeginsels na deur waarheidliewend en eerlik te wees; naasteliefde te betoon; ’n sterk, sedelike gesin op te bou; en hulle kinders op te lei om voorbeeldige burgers te wees. Sodoende betaal hulle nie net ‘aan die keiser terug wat aan die keiser behoort nie, maar aan God wat aan God behoort’ (Lukas 20:25; 1 Petrus 2:13-17). Aangesien God se Woord toon dat die regeringsmagte van hierdie wêreld tydelik is, berei Jehovah se Getuies hulle nou voor vir die voller lewe, die werklike lewe, wat binnekort onder Christus se Koninkryksheerskappy geniet sal word (1 Timoteus 6:17-19). Hoewel hulle geen aandeel daaraan sal hê om die magte van hierdie wêreld omver te werp nie, het die Getuies eerbiedige ontsag vir wat God se geïnspireerde Woord, die Heilige Bybel, sê aangaande die oordeel wat Jehovah binnekort by Armageddon gaan voltrek.—Jesaja 26:20, 21; Hebreërs 12:28, 29.

Die finale stryd!

14. Wat word gesimboliseer deur die “skerp lang swaard” wat uit Jesus se mond kom?

¹⁴ Op watter gesag voltooi Jesus sy oorwinning? Johannes deel ons mee: “En uit sy mond kom ’n skerp lang swaard om die nasies mee te slaan, en hy sal met ’n ysterstaf as herder teenoor hulle optree” (Openbaring 19:15a). Hierdie “skerp lang swaard” stel Jesus se godgegewe gesag voor om te beveel dat almal wat weier om God se Koninkryk te ondersteun, tereggestel word (Openbaring 1:16; 2:16). Hierdie treffende simboliek stem ooreen met Jesaja se woorde: “Hy [Jehovah] het my mond soos ’n skerp swaard gemaak. In die skaduwee van sy hand het hy my weggesteek. En hy het my geleidelik ’n skerp pyl gemaak” (Jesaja 49:2). Hier het Jesaja Jesus voorafgeskadu, wat God se oordele bekend maak en voltrek, soos met ’n trefseker pyl.

15. Wie sal reeds op hierdie tydstip aan die kaak gestel en geoordeel wees, en waarvan dui dit die begin aan?

¹⁵ Op hierdie tydstip sal Jesus reeds ter vervulling van Paulus se woorde opgetree het: “Dan sal die wettelose inderdaad geopenbaar word, met wie die Here Jesus sal wegdoen deur die gees van sy mond en wat hy tot niet sal maak deur die openbaarwording van sy teenwoordigheid.” Ja, Jesus se teenwoordigheid (Grieks, pa·rou·siʹa) kan sedert 1914 gesien word aan die feit dat die mens van wetteloosheid, die geestelikes van die Christendom, aan die kaak gestel en geoordeel is. Hierdie teenwoordigheid sal treffend geopenbaar word wanneer die tien horings van die skarlakenkleurige wilde dier hierdie oordeel voltrek en die Christendom, tesame met die res van Babilon die Grote, verwoes (2 Tessalonisense 2:1-3, 8). Dit sal die begin van die groot verdrukking wees! Daarna sal Jesus aandag skenk aan wat van Satan se organisasie oorbly, ooreenkomstig die profesie: “Hy sal die aarde met die roede van sy mond slaan; en met die gees van sy lippe sal hy die goddelose doodmaak.”—Jesaja 11:4.

16. Hoe beskryf die Psalms en Jeremia die rol van Jehovah se aangestelde Stryder-Koning?

¹⁶ Die Stryder-Koning, wat deur Jehovah aangestel is, sal ’n onderskeid tref tussen dié wat behoue sal bly en dié wat sal sterf. Jehovah, wat profeties met hierdie Seun van God praat, sê: “Jy sal hulle [die aarde se heersers] met ’n ystersepter breek, asof hulle ’n pottebakkershouer is, sal jy hulle stukkend slaan.” En Jeremia rig die volgende woorde aan sulke verdorwe regeringsleiers en dié wat hulle slaafs volg: “Weeklaag, o herders, en skreeu! En rol rond, o vooraanstaandes van die kudde, want julle dae om geslag en verstrooi te word, is vervul, en julle sal val soos ’n begeerlike houer!” Hoe begeerlik hierdie heersers ook al vir ’n goddelose wêreld gelyk het, een hou van die Koning se ystersepter sal hulle verpletter, asof ’n mooi houer stukkend geslaan word. Dit sal wees net soos Dawid aangaande die Here Jesus voorspel het: “Die staf van u sterkte sal Jehovah uit Sion stuur en sê: ‘Gaan oorwin te midde van jou vyande.’ Jehovah aan u regterhand sal beslis konings verpletter op die dag van sy toorn. Hy sal oordeel voltrek onder die nasies; hy sal ’n oorvloed van lyke veroorsaak.”—Psalm 2:9, 12; 83:17, 18; 110:1, 2, 5, 6; Jeremia 25:34.

17. (a) Hoe beskryf Johannes die teregstellingsoptrede van die Stryder-Koning? (b) Meld ’n paar profesieë wat toon hoe rampspoedig die dag van God se toorn vir die nasies sal wees.

¹⁷ Hierdie magtige Stryder-Koning verskyn weer in die volgende toneel van die visioen: “Hy trap ook die wynpers van die toorn van die gramskap van God die Almagtige” (Openbaring 19:15b). In ’n vorige visioen het Johannes reeds gesien hoe die “wynpers van die toorn van God” getrap word (Openbaring 14:18-20). Jesaja beskryf ook ’n teregstellingswynpers, en ander profete vertel hoe rampspoedig die dag van God se toorn vir al die nasies sal wees.—Jesaja 24:1-6; 63:1-4; Jeremia 25:30-33; Daniël 2:44; Sefanja 3:8; Sagaria 14:3, 12, 13; Openbaring 6:15-17.

18. Wat onthul die profeet Joël in verband met Jehovah se oordeel oor al die nasies?

¹⁸ Die profeet Joël assosieer ’n wynpers met Jehovah se koms om “al die nasies rondom te oordeel”. En dit is Jehovah wat die bevel gee, ongetwyfeld aan Sy mede-Regter, Jesus, en sy hemelse leërs: “Steek ’n sekel in, want die oes het ryp geword. Kom, daal neer, want die wynpers het vol geword. Die parskuipe loop oor; want hulle slegtheid het oorvloedig geword. Menigtes, menigtes is in die laagvlakte van die beslissing, want die dag van Jehovah is naby in die laagvlakte van die beslissing. Die son en die maan sal beslis donker word, en die sterre sal hulle glans intrek. En uit Sion sal Jehovah brul, en uit Jerusalem sal hy sy stem laat hoor. En hemel en aarde sal beslis bewe; maar Jehovah sal ’n toevlug vir sy volk wees en ’n vesting vir die kinders van Israel. En julle sal moet weet dat ek Jehovah julle God is.”—Joël 3:12-17.

19. (a) Hoe sal die vraag in 1 Petrus 4:17 beantwoord word? (b) Watter naam is op Jesus se bokleed geskryf, en waarom sal dit gepas wees?

¹⁹ Dit sal inderdaad ’n dag van onheil wees vir ongehoorsame nasies en mense, maar ’n dag van verligting vir almal wat Jehovah en sy Stryder-Koning hulle toevlug gemaak het! (2 Tessalonisense 1:6-9). Die oordeel wat in 1918 by die huis van God begin het, sal sy klimaks bereik het en ’n antwoord verskaf het op die vraag in 1 Petrus 4:17: “Wat sal die einde wees van dié wat nie aan die goeie nuus van God gehoorsaam is nie?” Die glorieryke Oorwinnaar sal die wynpers klaar getrap het en sodoende bewys het dat hy die Verhewene is van wie Johannes sê: “En op sy bokleed, ja, op sy dy, het hy ’n naam wat geskryf is: Koning van die konings en Here van die here” (Openbaring 19:16). Hy het bewys dat hy oneindig magtiger is as enige aardse heerser, enige menslike koning of heer. Sy waardigheid en prag is allesoortreffend. Hy het gery “ter wille van waarheid en nederigheid en regverdigheid” en het vir altyd geseëvier! (Psalm 45:4). Op sy bloedbesprinkelde klere is die naam geskryf wat aan hom verleen is deur die Soewereine Heer Jehovah, vir wie hy as Regverdiger optree!

Die groot aandmaal van God

20. Hoe beskryf Johannes “die groot aandmaal van God”, en aan watter vroeëre, maar soortgelyke, profesie laat dit ons dink?

²⁰ In Esegiël se visioen word die voëls en die wilde diere ná die vernietiging van Gog se menigte na ’n fees genooi! Hulle verwyder die karkasse uit die landskap deur die lyke van Jehovah se vyande te eet (Esegiël 39:11, 17-20). Johannes se volgende woorde laat ons dadelik aan hierdie vroeëre profesie dink: “Ek het ook ’n engel in die son sien staan, en hy het met ’n harde stem uitgeroep en vir al die voëls wat in die middel van die hemel vlieg, gesê: ‘Kom hier, kom bymekaar vir die groot aandmaal van God, sodat julle die vlesige dele van konings en die vlesige dele van militêre bevelvoerders en die vlesige dele van sterk manne en die vlesige dele van perde en van dié wat op hulle sit, en die vlesige dele van almal, van vrygeborenes sowel as van slawe en van klein en groot, kan eet.’”—Openbaring 19:17, 18.

21. Wat word aangedui deur (a) die feit dat die engel ‘in die son staan’? (b) die feit dat die dooies bo-op die grond gelaat word? (c) die lys van dié wie se lyke op die grond gelaat sal word? (d) die uitdrukking “die groot aandmaal van God”?

²¹ Die engel ‘staan in die son’, ’n strategiese posisie om die aandag van die voëls te trek. Hy nooi hulle om gereed te wees om die vlees te verslind van dié wat binnekort deur die Stryder-Koning en sy hemelse leërs verslaan sal word. Die feit dat die dooies bo-op die grond gelaat sal word, toon dat hulle in openbare skande sal sterf. Soos eertydse Isebel sal hulle nie ’n eervolle begrafnis hê nie (2 Konings 9:36, 37). Die lys van dié wie se lyke daar gelaat sal word, toon die omvang van die vernietiging: konings, militêre bevelvoerders, sterk manne, vrygeborenes en slawe. Geen uitsonderings nie. Elke spoor van die opstandige wêreld wat Jehovah teëstaan, sal verwyder word. Hierna sal daar nie meer ’n rustelose see van verwarde mense wees nie (Openbaring 21:1). Dit is “die groot aandmaal van God”, aangesien dit Jehovah is wat die voëls daarheen nooi.

22. Hoe som Johannes die verloop van die finale oorlog op?

²² Johannes som die verloop van die finale oorlog op: “En ek het die wilde dier en die konings van die aarde en hulle leërs versamel gesien om die oorlog te voer teen die een wat op die perd sit en teen sy leër. En die wilde dier is gevang, en saam met hom die valse profeet wat voor hom die tekens gedoen het waarmee hy dié mislei het wat die merk van die wilde dier ontvang het en dié wat sy beeld aanbid. Hulle is albei lewend in die vuurpoel geslinger wat met swael brand. Maar die res is gedood met die lang swaard wat uitgaan uit die mond van die een wat op die perd sit. En al die voëls het versadig geword met hulle vlesige dele.”—Openbaring 19:19-21.

23. (a) In watter sin word “die oorlog van daardie groot dag van die almagtige God” by “Armageddon” gevoer? (b) Watter waarskuwing het “die konings van die aarde” verontagsaam, en met watter gevolg?

²³ Nadat die sesde bak van Jehovah se gramskap uitgegooi is, het Johannes gesê dat “die konings van die aarde en die hele wêreld” deur demoniese propaganda versamel word na “die oorlog van daardie groot dag van die almagtige God”. Dit word gevoer by Armageddon—nie ’n letterlike plek nie, maar die wêreldwye situasie wat die voltrekking van Jehovah se oordeel vereis (Openbaring 16:12, 14, 16, Ou Afrikaanse Bybelvertaling). Nou sien Johannes die gevegslinie. Daar, teen God opgestel, is al “die konings van die aarde en hulle leërs”. Hulle het hardnekkig geweier om hulle aan Jehovah se Koning te onderwerp. Hy het hulle ’n billike waarskuwing gegee in die geïnspireerde boodskap: “Kus die seun, sodat [Jehovah] nie vertoornd word en julle van die weg vergaan nie.” Omdat hulle hulle nie aan Christus se heerskappy onderwerp het nie, moet hulle sterf.—Psalm 2:12.

24. (a) Watter oordeel word aan die wilde dier en die valse profeet voltrek, en in watter sin is hulle “lewend”? (b) Waarom moet “die poel van vuur” figuurlik wees?

²⁴ Die wilde dier met die sewe koppe en tien horings wat uit die see gekom het en Satan se politieke organisasie voorstel, word vir ewig verdelg, en saam met hom die valse profeet, die sewende wêreldmoondheid (Openbaring 13:1, 11-13; 16:13). Terwyl hulle nog “lewend” is, of nog funksioneer in hulle eendragtige teenstand teen God se volk op die aarde, word hulle in “die poel van vuur” gewerp. Is dit ’n letterlike poel van vuur? Nee, net so min as wat die wilde dier en die valse profeet letterlike diere is. Dit is eerder ’n simbool van algehele, finale vernietiging, ’n plek waaruit daar geen terugkeer is nie. Later sal die dood en Hades, sowel as die Duiwel self, hierin gegooi word (Openbaring 20:10, 14). Dit is beslis nie ’n inferno van ewige pyniging vir die goddeloses nie, aangesien die blote gedagte aan so ’n plek vir Jehovah verfoeilik is.—Jeremia 19:5; 32:35; 1 Johannes 4:8, 16.

25. (a) Wie word “gedood met die lang swaard . . . van die een wat op die perd sit”? (b) Moet ons verwag dat enige van dié wat “gedood” word, ’n opstanding sal kry?

²⁵ Alle ander wat nie regstreeks deel van ’n regering uitgemaak het nie, maar wat nietemin ’n onhervormbare deel van hierdie verdorwe mensewêreld was, word ook “gedood met die lang swaard . . . van die een wat op die perd sit”. Jesus sal verklaar dat hulle die dood verdien. Moet ons verwag dat hulle ’n opstanding sal kry, aangesien die poel van vuur nie in hulle geval gemeld word nie? Ons word nêrens meegedeel dat dié wat op hierdie tyd deur Jehovah se Regter tereggestel word, opgewek sal word nie. Soos Jesus self gesê het, almal wat nie “skape” is nie, sal weggaan “die ewige vuur in wat vir die Duiwel en sy engele berei is”, dit wil sê “die ewige vernietiging in” (Matteus 25:33, 41, 46). Dit is die klimaks van “die dag van die oordeel en van die vernietiging van die goddelose mense”.—2 Petrus 3:7; Nahum 1:2, 7-9; Maleagi 4:1.

26. Beskryf kortliks die uitslag van Armageddon.

²⁶ So kom Satan se hele aardse organisasie aan sy einde. Die “vorige hemel” van politieke heerskappy het verbygegaan. Die “aarde”, die skynbaar permanente stelsel wat Satan deur die eeue heen opgebou het, is nou geheel en al vernietig. Die “see”, die goddelose mensemassa wat Jehovah teëstaan, bestaan nie meer nie (Openbaring 21:1; 2 Petrus 3:10). Maar wat gaan Jehovah met Satan doen? Johannes vertel ons vervolgens.

Hoofstuk 40

Die Slang se kop word verbrysel

Visioen 14—Openbaring 20:1-10

Onderwerp: Satan word in die afgrond gewerp, die Duisendjarige Heerskappy, die mensdom se finale toets en Satan se vernietiging

Tyd van vervulling: Vanaf die einde van die groot verdrukking tot die vernietiging van Satan

1. Hoe het die vervulling van die eerste Bybelprofesie gevorder?

ONTHOU jy nog die eerste Bybelprofesie? Dit is deur Jehovah God uitgespreek toe hy vir die Slang gesê het: “Ek sal vyandskap stel tussen jou en die vrou en tussen jou saad en haar saad. Hy sal jou kop vermorsel, en jy sal hom in die hakskeen wond” (Genesis 3:15). Nou bereik die vervulling van hierdie profesie sy klimaks! Ons het die geskiedenis van Satan se stryd teen Jehovah se hemelse gemalinorganisasie nagespoor (Openbaring 12:1, 9). Die Slang se aardse saad, met sy godsdienstige, politieke en sakesektor, het die vrou se saad, Jesus Christus en sy 144 000 gesalfde volgelinge, hier op die aarde wreed vervolg (Johannes 8:37, 44; Galasiërs 3:16, 29). Satan het Jesus ’n pynlike dood laat sterf. Maar dit was soos ’n hakskeenwond, want God het sy getroue Seun op die derde dag opgewek.—Handelinge 10:38-40.

2. Hoe word die Slang vermorsel, en wat gebeur met die Slang se aardse saad?

² Wat van die Slang en sy saad? Omstreeks 56 G.J. het die apostel Paulus ’n lang brief aan die Christene in Rome geskryf. Hy het dit met hierdie aanmoedigende woorde afgesluit: “Wat die God betref wat vrede gee, hy sal Satan binnekort onder julle voete verbrysel” (Romeine 16:20). Dit is meer as ’n oppervlakkige wond. Satan gaan verbrysel word! Paulus het hier ’n Griekse woord, sun·triʹbo, gebruik, wat beteken om tot ’n jellieagtige toestand te vermorsel, te vertrap, heeltemal te vernietig deur te verbrysel. Wat die menslike saad van die Slang betref, dit sal in die dag van die Here groot teistering ondergaan, wat by die groot verdrukking ’n klimaks sal bereik wanneer Babilon die Grote en die politieke stelsels van die wêreld, tesame met hulle finansiële en militêre trawante, geheel en al verbrysel word (Openbaring, hoofstukke 18 en 19). Sodoende voer Jehovah die vyandskap tussen die twee sade tot ’n klimaks. Die Saad van God se vrou seëvier oor die aardse saad van die Slang, sodat daardie saad nie meer bestaan nie!

Satan in die afgrond

3. Wat sê Johannes gaan met Satan gebeur?

³ Wat lê dan vir Satan en sy demone voor? Johannes sê vir ons: “En ek het ’n engel uit die hemel sien neerdaal met die sleutel van die afgrond en ’n groot ketting in sy hand. En hy het die draak gegryp, die oorspronklike slang, wat die Duiwel en Satan is, en hom vir duisend jaar gebind. En hy het hom in die afgrond geslinger en dit gesluit en dit bo hom verseël, sodat hy die nasies nie meer sou mislei totdat die duisend jaar geëindig het nie. Ná hierdie dinge moet hy vir ’n klein rukkie losgelaat word.”—Openbaring 20:1-3.

4. Wie is die engel met die sleutel van die afgrond, en hoe weet ons dit?

⁴ Wie is hierdie engel? Hy moet geweldige krag hê om van Jehovah se aartsvyand ontslae te kan raak. Hy het “die sleutel van die afgrond en ’n groot ketting”. Laat dit ons nie aan ’n vroeëre visioen dink nie? Ja, die koning oor die sprinkane word “die engel van die afgrond” genoem! (Openbaring 9:11). Hier sien ons dus weer Jehovah se Hoofregverdiger, die verheerlikte Jesus Christus, in aksie. Hierdie aartsengel wat Satan uit die hemel gewerp het, wat Babilon die Grote geoordeel het en wat by Armageddon van “die konings van die aarde en hulle leërs” ontslae geraak het, sal tog sekerlik nie opsystaan sodat ’n mindere engel die kroon op die werk kan plaas deur Satan in die afgrond te werp nie!—Openbaring 12:7-9; 18:1, 2; 19:11-21.

5. Wat doen die engel van die afgrond met Satan die Duiwel, en waarom?

⁵ Toe die groot vuurkleurige draak uit die hemel gewerp is, is daar van hom gepraat as “die oorspronklike slang, die een wat Duiwel en Satan genoem word, wat die hele bewoonde aarde mislei” (Openbaring 12:3, 9). Nou, wanneer hy gegryp en in die afgrond gewerp word, word hy weer volledig beskryf as “die draak . . . , die oorspronklike slang, wat die Duiwel en Satan is”. Hierdie berugte verslinder, bedrieër, lasteraar en teenstander word vasgeketting en “in die afgrond” gewerp, wat gesluit en bo hom verseël word, “sodat hy die nasies nie meer sou mislei” nie. Hierdie gevangenskap van Satan sal duisend jaar duur, waartydens sy invloed op die mensdom niks meer sal wees as dié van ’n gevangene in ’n diep kerker nie. Die engel van die afgrond sorg dat Satan geheel en al van die Koninkryk van regverdigheid afgesny is. Wat ’n verligting vir die mensdom!

6. (a) Watter getuienis is daar dat die demone ook in die afgrond ingaan? (b) Wat kan dan begin, en waarom?

⁶ Wat gebeur met die demone? Hulle is ook “vir die oordeel bewaar” (2 Petrus 2:4). Satan word “Beëlsebub, die heerser van die demone”, genoem (Lukas 11:15, 18; Matteus 10:25). Behoort hulle nie, weens hulle langdurige samewerking met Satan, dieselfde oordeel te ontvang nie? Hierdie demone is al lank bang vir die afgrond; toe Jesus hulle eenkeer gekonfronteer het, het hulle “hom bly soebat om hulle nie te beveel om in die afgrond in te gaan nie” (Lukas 8:31). Maar wanneer Satan in die afgrond gewerp word, sal sy engele beslis saam met hom daarin gewerp word. (Vergelyk Jesaja 24:21, 22.) Nadat Satan en sy demone in die afgrond gewerp is, kan die Duisendjarige Heerskappy van Jesus Christus begin.

7. (a) In watter toestand sal Satan en sy demone in die afgrond wees, en hoe weet ons dit? (b) Is Hades en die afgrond dieselfde? (Sien voetnoot.)

⁷ Sal Satan en sy demone bedrywig wees terwyl hulle in die afgrond is? Wel, dink aan die skarlakenkleurige wilde dier met die sewe koppe, wat ‘was, maar nie is nie, en tog op die punt staan om uit die afgrond op te kom’ (Openbaring 17:8). Terwyl hy in die afgrond was, ‘was hy nie’. Hy het nie gefunksioneer nie, was buite aksie, so goed as dood. Die apostel Paulus het eweneens van Jesus gesê: “‘Wie sal in die afgrond neerdaal?’ dit is, om Christus uit die dode op te bring” (Romeine 10:7). Terwyl Jesus in daardie afgrond was, was hy dood.a Dit is dan redelik om die gevolgtrekking te maak dat Satan en sy demone gedurende die duisend jaar dat hulle in die afgrond is, in ’n toestand van doodse onbedrywigheid sal wees. Watter goeie nuus is dit tog vir liefhebbers van regverdigheid!

Regters duisend jaar lank

8, 9. Wat vertel Johannes ons nou oor dié wat op trone sit, en wie is hulle?

⁸ Ná die duisend jaar word Satan vir ’n kort rukkie uit die afgrond losgelaat. Waarom? Voordat Johannes die antwoord gee, vestig hy weer ons aandag op die begin van hierdie tydperk. Ons lees: “En ek het trone gesien, en daar was dié wat daarop gaan sit het, en hulle is mag gegee om te oordeel” (Openbaring 20:4a). Wie is hierdie persone wat op trone sit en saam met die verheerlikte Jesus in die hemele regeer?

⁹ Hulle is “die heiliges” wat volgens Daniël se beskrywing saam met die Een “soos ’n seun van die mens” in die Koninkryk regeer (Daniël 7:13, 14, 18). Hulle is dieselfde as die 24 ouderlinge wat in Jehovah se teenwoordigheid op hemelse trone sit (Openbaring 4:4). Hulle sluit die 12 apostels in, aan wie Jesus beloof het: “In die herskepping, wanneer die Seun van die mens op sy glorieryke troon gaan sit, sal ook julle wat my gevolg het, op twaalf trone sit en die twaalf stamme van Israel oordeel” (Matteus 19:28). Hulle sluit ook Paulus in, sowel as die Christene in Korinte wat getrou gebly het (1 Korintiërs 4:8; 6:2, 3). Hulle sal ook lede van die gemeente in Laodisea wat oorwin het, insluit.—Openbaring 3:21.

10. (a) Hoe beskryf Johannes nou die 144 000 konings? (b) Wie word onder die 144 000 konings ingesluit, volgens wat Johannes vroeër vir ons gesê het?

¹⁰ Trone—144 000 trone—word voorberei vir hierdie gesalfde oorwinnaars wat “uit die mensdom gekoop [is] as eerstelinge vir God en vir die Lam” (Openbaring 14:1, 4). “Ja”, sê Johannes verder, “ek het die siele gesien van dié wat met die byl tereggestel is weens die getuienis wat hulle van Jesus afgelê het en omdat hulle oor God gepraat het, en dié wat nie die wilde dier of sy beeld aanbid het nie en wat nie die merk op hulle voorkop en op hulle hand ontvang het nie” (Openbaring 20:4b). Onder hierdie konings is dan die gesalfde Christenmartelaars wat vroeër, toe die vyfde seël geopen is, vir Jehovah gevra het hoeveel langer hy sou wag om hulle bloed te wreek. Hulle is toe ’n wit kleed gegee en gesê om nog ’n rukkie te wag. Maar nou is hulle gewreek deur die verwoesting van Babilon die Grote, die vernietiging van die nasies deur die Koning van die konings en Here van die here en die opsluiting van Satan in die afgrond.—Openbaring 6:9-11; 17:16; 19:15, 16.

11. (a) Hoe moet ons die uitdrukking “met die byl tereggestel” verstaan? (b) Waarom kan daar gesê word dat al 144 000 ’n offerdood gesterf het?

¹¹ Is al hierdie 144 000 koninklike regters fisies “met die byl tereggestel”? Waarskynlik is betreklik min van hulle letterlik só tereggestel. Maar hierdie uitdrukking sluit ongetwyfeld al die gesalfde Christene in wat op die een of ander manier ’n marteldood gesterf het (Matteus 10:22, 28).b Satan sou hulle almal sekerlik graag met die byl wou tereggestel het, maar in werklikheid sterf nie al Jesus se gesalfde broers as martelaars nie. Baie van hulle sterf weens siekte of die ouderdom. Maar ook hulle behoort tot die groep wat Johannes nou sien. Hulle sterf almal in sekere sin ’n offerdood (Romeine 6:3-5). Daarbenewens was nie een van hulle deel van die wêreld nie. Gevolglik het die wêreld hulle almal gehaat en in werklikheid as dood beskou (Johannes 15:19; 1 Korintiërs 4:13). Nie een van hulle het die wilde dier of sy beeld aanbid nie, en toe hulle gesterf het, het nie een van hulle die merk van die dier gehad nie. Hulle het almal as oorwinnaars gesterf.—1 Johannes 5:4; Openbaring 2:7; 3:12; 12:11.

12. Wat vertel Johannes ons van die 144 000 konings, en wanneer word hulle lewend?

¹² Nou lewe hierdie oorwinnaars weer! Johannes vertel: “En hulle het lewend geword en duisend jaar lank saam met die Christus as konings geheers” (Openbaring 20:4c). Beteken dit dat hierdie regters opgewek word eers nadat die nasies vernietig en Satan en sy demone in die afgrond gewerp is? Nee. Die meeste van hulle is reeds baie beslis lewend, aangesien hulle by Armageddon saam met Jesus teen die nasies opgeruk het (Openbaring 2:26, 27; 19:14). Trouens, Paulus het aangedui dat hulle opstanding kort ná die begin van Jesus se teenwoordigheid in 1914 begin en dat party voor ander opgewek word (1 Korintiërs 15:51-54; 1 Tessalonisense 4:15-17). Hulle word derhalwe oor ’n tydperk lewend namate hulle individueel onsterflike lewe in die hemele as gawe ontvang.—2 Tessalonisense 1:7; 2 Petrus 3:11-14.

13. (a) Hoe moet ons die duisend jaar beskou waartydens die 144 000 regeer, en waarom? (b) Hoe het Papias van Hiërapolis die duisend jaar beskou? (Sien voetnoot.)

¹³ Hulle sal duisend jaar lank regeer en oordeel. Is dit letterlik duisend jaar, of moet ons dit simbolies as ’n onbepaalde, lang tydperk beskou? “Duisende” kan ’n groot, onbepaalde getal beteken, soos in 1 Samuel 21:11. Maar hier is die “duisend” letterlik, aangesien dit drie keer in Openbaring 20:5-7 as “die duisend jaar” voorkom. Paulus het hierdie oordeelstyd “’n dag” genoem toe hy gesê het: “Hy [God] het ’n dag vasgestel waarop hy van voorneme is om die bewoonde aarde in regverdigheid te oordeel” (Handelinge 17:31). Aangesien Petrus vir ons sê dat een dag by Jehovah soos duisend jaar is, is dit gepas dat hierdie Oordeelsdag letterlik duisend jaar lank is.c—2 Petrus 3:8.

Die res van die dooies

14. (a) Watter verklaring las Johannes omtrent “die res van die dooies” in? (b) Hoe werp wat die apostel Paulus gesê het, lig op die uitdrukking “lewend geword”?

¹⁴ Maar wie sal deur hierdie konings geoordeel word as, soos die apostel Johannes hier byvoeg, “(die res van die dooies . . . nie lewend geword [het] totdat die duisend jaar geëindig het nie)”? (Openbaring 20:5a). Die uitdrukking “lewend geword” moet weer eens volgens die konteks verstaan word. Hierdie uitdrukking kan in verskillende omstandighede verskillende betekenisse hê. Paulus het byvoorbeeld van sy gesalfde mede-Christene gesê: “Verder het God júlle lewend gemaak, hoewel julle dood was in julle oortredings en sondes” (Efesiërs 2:1). Ja, geesgesalfde Christene is “lewend gemaak”, selfs in die eerste eeu, deurdat hulle regverdig verklaar is op grond van hulle geloof in Jesus se offerande.—Romeine 3:23, 24.

15. (a) Watter posisie voor God het voor-Christelike getuies van Jehovah geniet? (b) Hoe sal die ander skape ‘lewend word’, en wanneer sal hulle die aarde in die volste sin besit?

¹⁵ Voor-Christelike getuies van Jehovah is ook regverdig verklaar as vriende van God; en Abraham, Isak en Jakob is “lewendes” genoem hoewel hulle fisies dood was (Matteus 22:31, 32; Jakobus 2:21, 23). Maar hulle en al die ander wat opgewek word, sowel as die groot menigte getroue ander skape wat Armageddon oorleef en enige kinders wat in die nuwe wêreld vir hulle gebore word, moet nog tot menslike volmaaktheid verhef word. Dit sal gedurende die duisendjarige Oordeelsdag deur Christus en sy medekonings en -priesters gedoen word, op grond van Jesus se losprysoffer. Teen die einde van daardie Dag sal ‘die res van die dooies lewend geword het’ in die sin dat hulle volmaakte mense sal wees. Soos ons sal sien, moet hulle dan ’n finale toets deurstaan, maar hulle sal hierdie toets as volmaakte mense ondergaan. Wanneer hulle die toets deurstaan, sal God verklaar dat hulle waardig is om vir ewig te lewe en in die volste sin regverdig is. Hulle sal die algehele vervulling ondervind van die belofte: “Die regverdiges sal die aarde besit, en hulle sal vir ewig daarop woon” (Psalm 37:29). Watter heerlike toekoms lê tog vir gehoorsame mense voor!

Die eerste opstanding

16. Hoe beskryf Johannes die opstanding van dié wat saam met Christus as konings heers, en waarom?

¹⁶ Johannes keer nou terug na dié wat ‘lewend geword en saam met die Christus as konings geheers het’ en skryf: “Dit is die eerste opstanding” (Openbaring 20:5b). In watter sin is dit eerste? Dit is “die eerste opstanding” met betrekking tot tyd, want dié wat dit ervaar, is “eerstelinge vir God en vir die Lam” (Openbaring 14:4). Dit is ook eerste in belangrikheid, aangesien dié wat daaraan deel het, medeheersers met Jesus in sy hemelse Koninkryk word en die res van die mensdom oordeel. Ten slotte is dit eerste in gehalte. Buiten Jesus Christus self is dié wat in die eerste opstanding opgewek word, die enigste skepsele wat volgens die Bybel onsterflikheid ontvang.—1 Korintiërs 15:53; 1 Timoteus 6:16.

17. (a) Hoe beskryf Johannes die geseënde vooruitsig wat die gesalfde Christene het? (b) Wat is “die tweede dood”, en waarom het dit “geen gesag” oor die 144 000 oorwinnaars nie?

¹⁷ Wat ’n geseënde vooruitsig het hierdie gesalfdes tog! Soos Johannes sê: “Gelukkig en heilig is enigeen wat deel het aan die eerste opstanding; oor hulle het die tweede dood geen gesag nie” (Openbaring 20:6a). Soos Jesus die Christene in Smirna beloof het, is daar geen gevaar dat hierdie oorwinnaars wat deel het aan “die eerste opstanding”, benadeel sal word deur “die tweede dood”, wat uitwissing, vernietiging sonder die hoop op ’n opstanding, beteken nie (Openbaring 2:11; 20:14). Die tweede dood het “geen gesag” oor hierdie oorwinnaars nie, want hulle sal met onverderflikheid en onsterflikheid beklee wees.—1 Korintiërs 15:53.

18. Wat sê Johannes nou van die aarde se nuwe heersers, en wat sal hulle doen?

¹⁸ Hoe anders tog as die aarde se konings gedurende die tyd dat Satan mag uitgeoefen het! Hulle het hoogstens ’n skrale 50 of 60 jaar regeer, en die oorgrote meerderheid van hulle net ’n paar jaar. Baie van hulle het die mensdom onderdruk. Hoe kan die nasies in elk geval blywend baat vind onder steeds wisselende heersers met steeds wisselende beleide? In teenstelling hiermee sê Jesus van die aarde se nuwe heersers: “Maar hulle sal priesters van God en van die Christus wees en sal die duisend jaar lank saam met hom as konings heers” (Openbaring 20:6b). Saam met Jesus sal hulle duisend jaar lank die enigste regering uitmaak. Hulle priesterlike diens, naamlik om die waarde van Jesus se volmaakte menseoffer aan te wend, sal gehoorsame mense tot geestelike, sedelike en liggaamlike volmaaktheid verhef. Hulle koninklike diens sal ’n wêreldwye mensegemeenskap tot stand bring wat Jehovah se regverdigheid en heiligheid weerspieël. As regters gedurende ’n tydperk van duisend jaar sal hulle, saam met Jesus, ontvanklike mense liefdevol na die doelwit van ewige lewe lei.—Johannes 3:16.

Die finale toets

19. In watter toestand sal die aarde en die mensdom teen die einde van die Duisendjarige Heerskappy wees, en wat doen Jesus dan?

¹⁹ Teen die einde van die Duisendjarige Heerskappy sal die hele aarde soos die oorspronklike Eden lyk. Dit sal ’n ware paradys wees. Die volmaakte mensdom sal nie meer ’n hoëpriester nodig hê om voor God vir hulle as bemiddelaar op te tree nie, aangesien alle spore van Adamitiese sonde verwyder en die laaste vyand, die dood, vernietig sal wees. Christus se Koninkryk sal God se voorneme om een wêreld met een regering te skep, verwesenlik het. Op hierdie stadium gee Jesus ‘die koninkryk aan sy God en Vader oor’.—1 Korintiërs 15:22-26; Romeine 15:12.

20. Wat sê Johannes sal gebeur wanneer die tyd vir die finale toets aanbreek?

²⁰ Die tyd breek nou aan vir ’n finale toets. Sal hierdie volmaakte mensewêreld, in teenstelling met die eerste mense in Eden, hulle onkreukbaarheid handhaaf? Johannes sê vir ons wat gebeur: “En sodra die duisend jaar geëindig het, sal Satan uit sy gevangenis losgelaat word, en hy sal uitgaan om daardie nasies te mislei wat in die vier hoeke van die aarde is, Gog en Magog, om hulle vir die oorlog te versamel. Hulle getal is soos die sand van die see. En hulle het oor die breedte van die aarde opgetrek en die kamp van die heiliges en die geliefde stad omsingel.”—Openbaring 20:7-9a.

21. Hoe wend Satan sy laaste poging aan, en waarom moet ons nie verbaas wees dat party mense Satan selfs ná die Duisendjarige Heerskappy sal volg nie?

²¹ Hoe suksesvol sal Satan se laaste poging wees? Hy bedrieg “daardie nasies . . . wat in die vier hoeke van die aarde is, Gog en Magog,” en lei hulle na “die oorlog”. Maar wie sal so dwaas wees om hom ná duisend jaar van vreugdevolle, opbouende teokratiese heerskappy aan Satan se kant te skaar? Wel, moenie vergeet dat Satan dit reggekry het om die volmaakte Adam en Eva te mislei terwyl hulle in die Paradys van Eden gelewe het nie. En hy het dit reggekry om hemelse engele te verlei wat die slegte gevolge van die oorspronklike opstand gesien het (2 Petrus 2:4; Judas 6). Ons moet dus nie verbaas wees dat party volmaakte mense selfs ná duisend jaar van aangename heerskappy deur God se Koninkryk verlok sal word om Satan te volg nie.

22. (a) Wat word aangedui deur die uitdrukking “daardie nasies . . . wat in die vier hoeke van die aarde is”? (b) Waarom word die rebelle “Gog en Magog” genoem?

²² Die Bybel noem hierdie rebelle “nasies . . . wat in die vier hoeke van die aarde is”. Dit beteken nie dat die mensdom weer in afsonderlike volksgroepe verdeel sal wees nie. Dit dui bloot aan dat hulle hulle van Jehovah se regverdige, lojale knegte sal afskei en dieselfde slegte gees sal openbaar as wat die nasies vandag toon. Hulle sal, soos die Gog van Magog in Esegiël se profesie, “’n skadelike plan uitdink”, met die doel om teokratiese heerskappy op die aarde te vernietig (Esegiël 38:3, 10-12). Hulle word derhalwe “Gog en Magog” genoem.

23. Wat word aangedui deur die feit dat die getal van die rebelle “soos die sand van die see” is?

²³ Die getal van die mense wat hulle by Satan in sy opstand skaar, sal “soos die sand van die see” wees. Hoeveel is dit? Daar is geen voorbestemde getal nie. (Vergelyk Josua 11:4; Rigters 7:12.) Die uiteindelike totale getal van die rebelle sal afhang van hoe elke persoon op Satan se bedrieglike liste reageer. Maar daar sal ongetwyfeld ’n aansienlike getal wees, aangesien hulle sal dink dat hulle sterk genoeg is om “die kamp van die heiliges en die geliefde stad” te oorwin.

24. (a) Wat is “die geliefde stad”, en hoe kan dit omsingel word? (b) Wat word deur “die kamp van die heiliges” afgebeeld?

²⁴ “Die geliefde stad” moet die stad wees wat die verheerlikte Jesus Christus in Openbaring 3:12 aan sy volgelinge gemeld het en wat hy “die stad van my God, die nuwe Jerusalem, wat van my God af uit die hemel neerdaal,” noem. As dit ’n hemelse organisasie is, hoe kan daardie aardse magte dit dan “omsingel”? In die sin dat hulle “die kamp van die heiliges” omsingel. ’n Kamp is buite ’n stad; “die kamp van die heiliges” moet derhalwe ’n afbeelding wees van dié op die aarde wat buite die hemelse ligging van Nuwe Jerusalem is en Jehovah se regeringsreëling lojaal ondersteun. Wanneer die rebelle onder leiding van Satan hierdie getroues aanval, beskou die Here Jesus dit as ’n aanval teen hom (Matteus 25:40, 45). “Daardie nasies” sal probeer om alles uit te wis wat die hemelse Nuwe Jerusalem tot stand gebring het deur die aarde ’n paradys te maak. Wanneer hulle dus “die kamp van die heiliges” aanval, val hulle ook “die geliefde stad” aan.

Die poel van vuur en swael

25. Hoe beskryf Johannes die uitslag van die rebelle se aanval teen “die kamp van die heiliges”, en wat sal dit vir Satan beteken?

²⁵ Sal hierdie finale poging van Satan slaag? Beslis nie—net so min as Gog van Magog se aanval teen geestelike Israel in ons dag! (Esegiël 38:18-23). Johannes gee ’n treffende beskrywing van die uitslag: “Maar vuur het uit die hemel neergedaal en hulle verteer. En die Duiwel, wat hulle mislei het, is in die poel van vuur en swael geslinger, waar die wilde dier sowel as die valse profeet reeds was” (Openbaring 20:9b-10a). Pleks van bloot in die afgrond gewerp te word, sal Satan, die oorspronklike slang, hierdie keer verbrysel, vermorsel, geheel en al uitgewis word asof deur vuur.

26. Waarom kan “die poel van vuur en swael” nie ’n letterlike plek van pyniging wees nie?

²⁶ Ons het reeds gesien dat “die poel van vuur en swael” nie ’n letterlike plek van pyniging kan wees nie (Openbaring 19:20). As Satan tot in alle ewigheid daar verskriklike pyniging moes ondergaan, sou Jehovah hom aan die lewe moes hou. Maar die lewe is ’n gawe, nie ’n straf nie. Die dood is die straf vir sonde, en volgens die Bybel voel dooie skepsele geen pyn nie (Romeine 6:23; Prediker 9:5, 10). Buitendien lees ons later dat die dood self, saam met Hades, in hierdie selfde poel van vuur en swael gewerp word. Die dood en Hades kan sekerlik nie pyn ervaar nie!—Openbaring 20:14.

27. Hoe help wat met Sodom en Gomorra gebeur het, ons om die uitdrukking “die poel van vuur en swael” te verstaan?

²⁷ Dit alles versterk die beskouing dat die poel van vuur en swael simbolies is. Verder laat die melding van vuur en swael ons dink aan die lot van eertydse Sodom en Gomorra, wat weens hulle growwe goddeloosheid deur God vernietig is. Toe hulle tyd aangebreek het, “het Jehovah swael en vuur van Jehovah, uit die hemel, op Sodom en op Gomorra laat reën” (Genesis 19:24). Wat met die twee stede gebeur het, word “die regterlike straf van die ewige vuur” genoem (Judas 7). Maar hierdie twee stede het nie ewige pyniging ervaar nie. Hulle is eerder uitgewis, vir ewig vernietig, tesame met hulle verdorwe inwoners. Hierdie stede bestaan nie vandag nie, en niemand kan vir seker sê waar hulle geleë was nie.

28. Wat is die poel van vuur en swael, en hoe verskil dit van die dood, Hades en die afgrond?

²⁸ In ooreenstemming hiermee verduidelik die Bybel self die betekenis van die poel van vuur en swael: “Dit beteken die tweede dood, die poel van vuur” (Openbaring 20:14). Dit is duidelik dat dit dieselfde is as die Gehenna waarvan Jesus gepraat het, ’n plek waar die goddelose vernietig bly, nie vir ewig gepynig word nie (Matteus 10:28). Dit is volkome, algehele vernietiging sonder die hoop op ’n opstanding. Hoewel daar dan sleutels vir die dood, Hades en die afgrond is, is daar geen melding van ’n sleutel om die poel van vuur en swael oop te sluit nie (Openbaring 1:18; 20:1). Dit sal nooit die gevangenes daarin vrylaat nie.—Vergelyk Markus 9:43-47.

Vir ewig dag en nag gepynig

29, 30. Wat sê Johannes van die Duiwel sowel as die wilde dier en die valse profeet, en hoe moet dit verstaan word?

²⁹ Met verwysing na die Duiwel sowel as die wilde dier en die valse profeet sê Johannes nou vir ons: “En hulle sal dag en nag gepynig word vir ewig en altyd” (Openbaring 20:10b). Wat kan dit beteken? Soos reeds gemeld is, is dit nie logies om te sê dat simbole, soos die wilde dier en die valse profeet, sowel as die dood en Hades, letterlik gepynig kan word nie. Ons het gevolglik geen rede om te glo dat Satan vir ewig sal ly nie. Hy gaan vernietig word.

³⁰ Die Griekse woord wat hier vir “pynig” gebruik word, ba·sa·niʹzo, beteken hoofsaaklik “om (metale) met die toetssteen te toets”. “Om deur marteling te ondervra”, is ’n tweede betekenis (The New Thayer’s Greek-English Lexicon of the New Testament). In die konteks dui die gebruik van hierdie Griekse woord aan dat wat met Satan gebeur, vir ewig as ’n presedent sal dien in die geskil oor die regtheid en regverdigheid van Jehovah se heerskappy. Hierdie geskil oor soewereine heerskappy sal eens en vir altyd besleg wees. Nooit weer sal ’n betwisting van Jehovah se soewereiniteit oor ’n lang tydperk getoets hoef te word om dit verkeerd te bewys nie.—Vergelyk Psalm 92:1, 15.

31. Hoe help twee Griekse woorde wat verwant is aan die een wat “pynig” beteken, ons om die straf te verstaan wat Satan die Duiwel ondergaan?

³¹ Daarbenewens word die verwante woord ba·sa·ni·stesʹ, “pyniger”, in die Bybel gebruik om “tronkbewaarder” aan te dui (Matteus 18:34, Kingdom Interlinear). In ooreenstemming hiermee sal Satan vir ewig in die poel van vuur gevange gehou word; hy sal nooit vrygelaat word nie. Ten slotte word die verwante woord baʹsa·nos in die Griekse Septuagint, waarmee Johannes goed bekend was, gebruik om te verwys na vernedering wat tot die dood lei (Esegiël 32:24, 30). Dit help ons om te sien dat die straf wat Satan ondergaan, ’n vernederende, ewige dood in die poel van vuur en swael is. Sy werke sterf saam met hom.—1 Johannes 3:8.

32. Watter straf sal die demone ondergaan, en hoe weet ons dit?

³² Die demone word weer nie in hierdie vers gemeld nie. Sal hulle aan die einde van die duisend jaar saam met Satan losgelaat word en dan die straf van die ewige dood saam met hom ondergaan? Al die getuienis dui daarop. In die gelykenis van die skape en die bokke het Jesus gesê dat die bokke sou weggaan “die ewige vuur in wat vir die Duiwel en sy engele berei is” (Matteus 25:41). Die uitdrukking “ewige vuur” moet verwys na die poel van vuur en swael waarin Satan gewerp gaan word. Die Duiwel se engele is saam met hom uit die hemel gewerp. Hulle het klaarblyklik aan die begin van die Duisendjarige Heerskappy saam met hom in die afgrond ingegaan. Dit volg dus dat hulle ook saam met hom in die poel van vuur en swael vernietig sal word.—Matteus 8:29.

33. Watter laaste besonderheid van Genesis 3:15 sal dan vervul word, en op watter saak vestig Jehovah se gees nou Johannes se aandag?

³³ Op hierdie manier word die laaste besonderheid van die profesie in Genesis 3:15 vervul. Wanneer Satan in die poel van vuur gewerp word, sal hy so dood wees soos ’n slang waarvan die kop onder ’n ysterhakskeen vergruis is. Hy en sy demone sal vir ewig verdelg wees. Hulle word nie weer in die boek Openbaring gemeld nie. Noudat Jehovah se gees profeties van hulle ontslae geraak het, vestig dit die aandag op ’n saak van dringende belang vir dié wat ’n aardse hoop koester: Wat sal die hemelse heerskappy van die “Koning van die konings” en “die geroepenes en uitverkorenes en getroues wat saam met hom is”, vir die mensdom meebring? (Openbaring 17:14). Om dit te beantwoord, bring Johannes ons weer eens terug na die begin van die Duisendjarige Heerskappy.

[Voetnote]

[Prent op bladsy 293]

Die Dooie See. Moontlike ligging van Sodom en Gomorra

[Prente op bladsy 294]

“Ek sal vyandskap stel tussen jou en die vrou en tussen jou saad en haar saad. Hy sal jou kop vermorsel, en jy sal hom in die hakskeen wond”

Hoofstuk 41

God se oordeelsdag—Die vreugdevolle uitslag!

Visioen 15—Openbaring 20:11–21:8

Onderwerp: Die algemene opstanding, die Oordeelsdag en seëninge van nuwe hemele en ’n nuwe aarde

Tyd van vervulling: Die Duisendjarige Heerskappy

1. (a) Wat het die mensdom verloor toe Adam en Eva gesondig het? (b) Watter voorneme van God het nie verander nie, en hoe weet ons dit?

AS MENSE is ons geskep om vir ewig te lewe. As Adam en Eva God se bevele gehoorsaam het, sou hulle nooit gesterf het nie (Genesis 1:28; 2:8, 16, 17; Prediker 3:10, 11). Maar toe hulle gesondig het, het hulle volmaaktheid en die lewe vir hulleself sowel as vir hulle nageslag verloor, en die dood het as ’n meedoënlose vyand oor die mensdom begin heers (Romeine 5:12, 14; 1 Korintiërs 15:26). Nietemin het God se voorneme dat volmaakte mense vir ewig op ’n paradysaarde lewe, nie verander nie. Uit sy groot liefde vir die mensdom het hy sy enigverwekte Seun, Jesus, na die aarde toe gestuur om sy volmaakte menselewe as ’n losprys vir “baie” van Adam se nageslag te gee (Matteus 20:28; Johannes 3:16). Jesus kan nou hierdie wetlike waarde van sy offerande gebruik om gelowige mense tot volmaakte lewe op ’n paradysaarde te herstel (1 Petrus 3:18; 1 Johannes 2:2). Wat ’n wonderlike rede vir die mensdom om ‘bly te wees en hulle te verbly’!—Jesaja 25:8, 9.

2. Wat sê Johannes in Openbaring 20:11, en wat is die “groot wit troon”?

² Met Satan in die afgrond opgesluit, begin Jesus se glorieryke Duisendjarige Heerskappy. Dit is nou die “dag” waarop God “van voorneme is om die bewoonde aarde in regverdigheid te oordeel deur ’n man wat hy aangestel het” (Handelinge 17:31; 2 Petrus 3:8). Johannes sê: “En ek het ’n groot wit troon gesien en die een wat daarop sit. Die aarde en die hemel het voor hom weggevlug, en geen plek is vir hulle gevind nie” (Openbaring 20:11). Wat is hierdie “groot wit troon”? Dit kan niks anders wees nie as die regterstoel van “God, die Regter van almal” (Hebreërs 12:23). Hy sal nou die mensdom oordeel om te bepaal wie by Jesus se losprysoffer baat sal vind.—Markus 10:45.

3. (a) Wat word aangedui deur die feit dat daar gesê word dat God se troon “groot” en “wit” is? (b) Wie sal op die Oordeelsdag oordeel, en op grond waarvan?

³ God se troon is “groot”, wat Jehovah se grootsheid as Soewereine Heer beklemtoon, en dit is “wit”, wat die aandag op sy vlekkelose regverdigheid vestig. Hy is die hoogste Regter van die mensdom (Psalm 19:7-11; Jesaja 33:22; 51:5, 8). Hy het egter die oordeelswerk aan Jesus Christus opgedra: “Die Vader oordeel hoegenaamd niemand nie, maar hy het die oordeel geheel en al aan die Seun toevertrou” (Johannes 5:22). Saam met Jesus is sy 144 000 metgeselle, aan wie die “mag gegee [is] om te oordeel . . . duisend jaar lank” (Openbaring 20:4). Nietemin is dit Jehovah se standaarde wat bepaal wat gedurende die Oordeelsdag met elke persoon sal gebeur.

4. Wat beteken dit dat ‘die aarde en die hemel weggevlug het’?

⁴ Hoe ‘het die aarde en die hemel weggevlug’? Dit is dieselfde hemel wat soos ’n boekrol gewyk het toe die sesde seël oopgemaak is—die menslike regeringsmagte wat ‘vir die vuur weggelê en bewaar word tot die dag van die oordeel en van die vernietiging van die goddelose mense’ (Openbaring 6:14; 2 Petrus 3:7). Die aarde is die georganiseerde stelsel van dinge wat onder hierdie heerskappy bestaan (Openbaring 8:7). Hierdie hemel en aarde vlug weg wanneer die wilde dier en die konings van die aarde en hulle leërs, tesame met dié wat die merk van die wilde dier ontvang het en dié wat sy beeld aanbid, vernietig word (Openbaring 19:19-21). Nadat oordeel aan Satan se aarde en hemel voltrek is, bepaal die Groot Regter dat daar nog ’n Oordeelsdag sal wees.

Die duisendjarige Oordeelsdag

5. Wie bly oor om geoordeel te word nadat die ou aarde en die ou hemel weggevlug het?

⁵ Wie bly oor om geoordeel te word nadat die ou aarde en die ou hemel weggevlug het? Nie die gesalfde oorblyfsel van die 144 000 nie, want hulle is reeds geoordeel en verseël. As enige van die gesalfdes ná Armageddon nog op die aarde lewe, moet hulle kort daarna sterf en hulle hemelse beloning deur ’n opstanding ontvang (1 Petrus 4:17; Openbaring 7:2-4). Maar die miljoene lede van die groot menigte wat nou uit die groot verdrukking gekom het, staan “voor die troon”, waar hulle duidelik sigbaar is. Hulle is reeds regverdig gereken vir oorlewing danksy hulle geloof in Jesus se vergote bloed, maar hulle oordeel moet gedurende die duisend jaar voortduur terwyl Jesus aanhou om hulle na “fonteine van waters van die lewe” te lei. Dan sal hulle, nadat hulle tot menslike volmaaktheid herstel en daarna getoets is, in die volste sin regverdig verklaar word (Openbaring 7:9, 10, 14, 17). Kinders wat die groot verdrukking oorleef en enige kinders wat gedurende die Millennium vir die groot menigte gebore word, sal ook gedurende die duisend jaar geoordeel moet word.—Vergelyk Genesis 1:28; 9:7; 1 Korintiërs 7:14.

6. (a) Watter skare sien Johannes, en wat word aangedui deur die woorde “groot en klein”? (b) Hoe sal die miljoene der miljoene in God se geheue ongetwyfeld opgewek word?

⁶ Maar Johannes sien ’n skare wat baie talryker is as die oorlewende groot menigte. Dit is ’n skare wat duisendmiljoene sal tel! “En ek het die dooies, groot en klein, voor die troon sien staan, en boekrolle is oopgemaak” (Openbaring 20:12a). “Groot en klein” behels die vooraanstaande sowel as die minder vooraanstaande mense wat gedurende die afgelope 6 000 jaar op hierdie aarde gelewe en gesterwe het. In die Evangelie wat die apostel Johannes kort ná Openbaring geskryf het, het Jesus van die Vader gesê: “Hy het hom [Jesus] gesag gegee om te oordeel, omdat hy die Seun van die mens is. Moet julle nie hieroor verwonder nie, want die uur kom waarin almal wat in die gedenkgrafte is, sy stem sal hoor en sal uitkom” (Johannes 5:27-29). Wat ’n ontsaglike projek—om die sterftes en begrafnisse deur die hele geskiedenis heen ongedaan te maak! Hierdie miljoene der miljoene in God se geheue sal ongetwyfeld met verdrag opgewek word sodat die groot menigte—wat baie min is in vergelyking met hulle—probleme die hoof sal kan bied wat moontlik sal ontstaan omdat verresenes dalk aanvanklik geneig sal wees om hulle ou lewenstyl, met sy vleeslike swakhede en gesindhede, te volg.

Wie word opgewek en geoordeel?

7, 8. (a) Watter boekrol word oopgemaak, en wat vind daarna plaas? (b) Vir wie sal daar geen opstanding wees nie?

⁷ Johannes voeg by: “Maar ’n ander boekrol is oopgemaak; dit is die boekrol van die lewe. En die dooies is geoordeel na dié dinge wat in die boekrolle geskrywe staan, volgens hulle dade. En die see het die dooies daarin gegee, en die dood en Hades het die dooies in hulle gegee, en elkeen van hulle is volgens hulle dade geoordeel” (Openbaring 20:12b, 13). Inderdaad ’n asemrowende toneel! ‘Die see, die dood en Hades’ speel elkeen ’n rol, maar let daarop dat hierdie woorde nie onderling uitsluitend is nie.a Toe Jona in die buik van ’n vis en derhalwe in die midde van die see was, het hy gesê dat hy in Sjeool, of Hades, is (Jona 2:2). As iemand in die greep van Adamitiese dood vasgehou word, is hy waarskynlik ook in Hades. Hierdie profetiese woorde gee ’n sterk versekering dat niemand oorgesien sal word nie.

⁸ Daar is natuurlik ’n onbekende aantal wat nie opgewek sal word nie. Onder hulle is die onberouvolle skrifgeleerdes en Fariseërs wat Jesus en die apostels verwerp het, die godsdienstige “mens van wetteloosheid” en gesalfde Christene wat “afvallig geword het” (2 Tessalonisense 2:3; Hebreërs 6:4-6; Matteus 23:29-33). Jesus het ook gepraat van bokagtige mense aan die einde van die wêreld wat weggaan “die ewige vuur in wat vir die Duiwel en sy engele berei is”, naamlik “ewige vernietiging” (Matteus 25:41, 46). Geen opstanding vir húlle nie!

9. Hoe dui die apostel Paulus aan dat party in die opstanding spesiaal begunstig sal word, en wie sluit dit in?

⁹ Daarenteen sal party in die opstanding spesiaal begunstig word. Die apostel Paulus het dit aangedui toe hy gesê het: “Ek het die hoop op God . . . dat daar ’n opstanding van die regverdiges sowel as die onregverdiges sal wees” (Handelinge 24:15). Wat die aardse opstanding betref, sal “die regverdiges” getroue manne en vroue van die ou tyd insluit—Abraham, Ragab en baie ander—wat regverdig verklaar is as vriende van God (Jakobus 2:21, 23, 25). Hierdie groep sal ook die regverdige ander skape insluit wat in hedendaagse tye getrou aan Jehovah gesterf het. Al hierdie handhawers van onkreukbaarheid sal waarskynlik vroeg in Jesus se Duisendjarige Heerskappy opgewek word (Job 14:13-15; 27:5; Daniël 12:13; Hebreërs 11:35, 39, 40). Baie van hierdie verrese regverdiges sal ongetwyfeld spesiale voorregte ontvang as toesighouers oor die ontsaglike herstelwerk in die Paradys.—Psalm 45:16; vergelyk Jesaja 32:1, 16-18; 61:5; 65:21-23.

10. Wie is “die onregverdiges” wat opgewek sal word?

¹⁰ Maar wie is “die onregverdiges” wat in Handelinge 24:15 gemeld word? Hulle sal die groot mensemassa insluit wat deur die geskiedenis heen gesterf het, veral diegene wat in ‘tye van onkunde’ gelewe het (Handelinge 17:30). Hulle het, as gevolg van waar hulle gebore is of wanneer hulle gelewe het, geen geleentheid gehad om gehoorsaamheid aan Jehovah se wil te leer nie. Daarbenewens is daar dalk party wat wel die boodskap van redding gehoor het, maar wat op daardie tydstip nie ten volle gereageer het nie of wat gesterf het voordat hulle tot toewyding en doop gevorder het. In die opstanding sal sulke persone verdere veranderinge in hulle denke en lewenswyse moet maak as hulle wil baat vind by hierdie geleentheid om die ewige lewe te verkry.

Die boekrol van die lewe

11. (a) Wat is “die boekrol van die lewe”, en wie se name is in hierdie boekrol opgeteken? (b) Waarom sal die boekrol van die lewe gedurende die Duisendjarige Heerskappy oopgemaak word?

¹¹ Johannes praat van “die boekrol van die lewe”. Dit is ’n lys van dié wat in aanmerking kom om die ewige lewe van Jehovah te ontvang. Die name van die gesalfde broers van Jesus, van die groot menigte en van getroue manne van die ou tyd, soos Moses, is in hierdie boekrol opgeteken (Eksodus 32:32, 33; Daniël 12:1; Openbaring 3:5). Op hierdie stadium is nie een van die ‘onregverdige’ verresenes se name al in die boekrol van die lewe nie. Daarom sal die boekrol van die lewe gedurende die Duisendjarige Heerskappy oopgemaak word sodat die name van ander wat aan die vereistes voldoen, daarin geskryf kan word. Diegene wie se name nie in die boekrol, of boek, van die lewe geskryf word nie, word “in die poel van vuur geslinger”.—Openbaring 20:15; vergelyk Hebreërs 3:19.

12. Wat sal bepaal of ’n persoon se naam in die geopende boekrol van die lewe geskryf word, en hoe het Jehovah se aangestelde Regter die voorbeeld gestel?

¹² Wat sal dan bepaal of ’n persoon se naam gedurende daardie tyd in die geopende boekrol van die lewe geskryf word? Die sleutelfaktor sal dieselfde wees as in die dae van Adam en Eva: gehoorsaamheid aan Jehovah. Soos die apostel Johannes aan geliefde mede-Christene geskryf het: “Die wêreld gaan verby en so ook sy begeerte, maar hy wat die wil van God doen, bly vir ewig” (1 Johannes 2:4-7, 17). Wat gehoorsaamheid betref, het Jehovah se aangestelde Regter die voorbeeld gestel: “Hoewel [Jesus] ’n Seun was, het hy gehoorsaamheid geleer uit die dinge wat hy gely het; en nadat hy tot volmaaktheid gebring is, het hy verantwoordelik geword vir die ewige redding van almal wat hom gehoorsaam.”—Hebreërs 5:8, 9.

Ander boekrolle word oopgemaak

13. Hoe moet verresenes hulle gehoorsaamheid toon, en watter beginsels moet hulle naleef?

¹³ Hoe moet hierdie verresenes hulle gehoorsaamheid toon? Jesus self het op die twee groot gebooie gewys en gesê: “Die eerste is: ‘Hoor, o Israel, Jehovah ons God is een Jehovah, en jy moet Jehovah jou God liefhê met jou hele hart en met jou hele siel en met jou hele verstand en met al jou krag.’ Die tweede is dit: ‘Jy moet jou naaste liefhê soos jouself’” (Markus 12:29-31). Daar is ook Jehovah se gevestigde beginsels wat hulle moet naleef, soos om diefstal, leuens, moord en onsedelikheid te verwerp.—1 Timoteus 1:8-11; Openbaring 21:8.

14. Watter ander boekrolle word oopgemaak, en wat bevat hulle?

¹⁴ Maar Johannes het pas tevore ander boekrolle gemeld wat gedurende die Duisendjarige Heerskappy oopgemaak sal word (Openbaring 20:12). Watter boekrolle sal dit wees? Jehovah het soms spesifieke instruksies vir bepaalde situasies gegee. Byvoorbeeld, in Moses se dag het hy ’n uitvoerige reeks wette voorsien wat vir die Israeliete die lewe beteken het as hulle dit gehoorsaam het (Deuteronomium 4:40; 32:45-47). Gedurende die eerste eeu is nuwe instruksies gegee om getroues te help om Jehovah se beginsels onder die Christelike stelsel van dinge na te leef (Matteus 28:19, 20; Johannes 13:34; 15:9, 10). Nou sê Johannes dat die dooies “geoordeel [sal word] na dié dinge wat in die boekrolle geskrywe staan, volgens hulle dade”. Die oopmaak van hierdie boekrolle sal dus blykbaar Jehovah se uitvoerige vereistes vir die mensdom gedurende die duisend jaar bekend maak. Deur die voorskrifte en gebooie van hierdie boekrolle in hulle lewens toe te pas, sal gehoorsame mense hulle dae kan verleng en uiteindelik die ewige lewe kan verkry.

15. Watter soort onderrigtingsprogram sal gedurende die opstanding nodig wees, en hoe sal die opstanding waarskynlik plaasvind?

¹⁵ Wat ’n omvattende program van teokratiese onderrigting sal tog nodig wees! In 2005 het Jehovah se Getuies wêreldwyd gemiddeld 6 061 534 Bybelstudies op verskillende plekke gehou. Maar gedurende die opstanding sal daar ongetwyfeld miljoene der miljoene studies aan die hand van die Bybel en die nuwe boekrolle gehou word! Al die lede van God se volk sal onderrigters moet word en hulle moet inspan. Namate die verresenes vorder, sal hulle ongetwyfeld aan hierdie ontsaglike onderrigtingsprogram deelneem. Die opstanding sal waarskynlik só plaasvind dat dié wat lewe, die vreugde sal smaak om voormalige gesinslede en kennisse te verwelkom en te onderrig, wat dan op hulle beurt ander sal verwelkom en onderrig. (Vergelyk 1 Korintiërs 15:19-28, 58.) Die meer as sesmiljoen Getuies van Jehovah wat die waarheid vandag ywerig verkondig, lê ’n goeie grondslag vir die voorregte wat hulle hoop om gedurende die opstanding te ontvang.—Jesaja 50:4; 54:13.

16. (a) Wie se name sal nie in die boekrol, of boek, van die lewe geskryf word nie? (b) Wie se opstanding sal ’n opstanding “van die lewe” wees?

¹⁶ Met betrekking tot die aardse opstanding het Jesus gesê dat ‘dié wat goeie dinge gedoen het, uitkom tot ’n opstanding van die lewe, dié wat veragtelike dinge beoefen het, tot ’n opstanding van oordeel’. Hier word “lewe” teenoor “oordeel” gestel, wat toon dat die verresenes wat “veragtelike dinge beoefen het” nadat hulle in die geïnspireerde Skrif en boekrolle onderrig is, as onwaardig vir die lewe beoordeel word. Hulle name sal nie in die boekrol, of boek, van die lewe geskryf word nie (Johannes 5:29). Dit sal ook geld vir enigiemand wat voorheen getrou was, maar wat gedurende die Duisendjarige Heerskappy om die een of ander rede afvallig word. Name kan uitgevee word (Eksodus 32:32, 33). Daarenteen sal dié wat gehoorsaam is aan die dinge wat in die boekrolle geskrywe staan, hulle name in die geskrewe verslag, die boekrol van die lewe, hou en bly lewe. Vir hulle sal die opstanding ’n opstanding “van die lewe” wees.

Die einde van die dood en Hades

17. (a) Watter wonderlike daad beskryf Johannes? (b) Wanneer sal Hades leeg wees? (c) Wanneer sal die Adamitiese dood “in die poel van vuur geslinger” word?

¹⁷ Johannes beskryf vervolgens iets werklik wonderliks! “En die dood en Hades is in die poel van vuur geslinger. Dit beteken die tweede dood, die poel van vuur. En as daar gevind is dat iemand nie in die boek van die lewe opgeskryf is nie, is hy in die poel van vuur geslinger” (Openbaring 20:14, 15). Aan die einde van die duisendjarige Oordeelsdag word “die dood en Hades” geheel en al verwyder. Waarom is duisend jaar hierby betrokke? Hades, die gemeenskaplike graf van die hele mensdom, sal leeg wees wanneer die laaste persoon in God se geheue opgewek word. Maar solank enige mense met erfsonde besmet is, is hulle nog aan Adamitiese dood onderhewig. Almal wat op die aarde opgewek word, sowel as die groot menigte wat Armageddon oorleef, sal gehoorsaam moet wees aan wat in die boekrolle geskrywe staan totdat Jesus se lospryswaarde ten volle aangewend is om siekte, ouderdom en ander oorgeërfde gebreke te verwyder. Dan word die Adamitiese dood, tesame met Hades, “in die poel van vuur geslinger”. Hulle sal vir ewig weg wees!

18. (a) Hoe beskryf die apostel Paulus die sukses van Jesus se heerskappy as Koning? (b) Wat doen Jesus met die volmaakte mensegesin? (c) Watter ander dinge vind aan die einde van die duisend jaar plaas?

¹⁸ So word die program voltooi wat die apostel Paulus in sy brief aan die Korintiërs beskryf: “Want [Jesus] moet as koning heers totdat God alle vyande onder sy voete gestel het. As die laaste vyand gaan die [Adamitiese] dood tot niet gemaak word.” Wat gebeur daarna? “Wanneer alles aan hom onderwerp is, dan sal die Seun self hom ook onderwerp aan die Een wat alles aan hom onderwerp het.” Met ander woorde, Jesus ‘gee die koninkryk aan sy God en Vader oor’ (1 Korintiërs 15:24-28). Ja, nadat Jesus die Adamitiese dood deur die waarde van sy losprysoffer oorwin het, sal hy ’n volmaakte mensegesin aan sy Vader, Jehovah, oorgee. Dit is klaarblyklik op hierdie tydstip, aan die einde van die duisend jaar, dat Satan losgelaat word en die finale toets plaasvind om te bepaal wie se name permanent in die boekrol van die lewe opgeteken sal bly. “Span [jou] kragtig in” sodat jou naam ook daar kan wees!—Lukas 13:24; Openbaring 20:5.

[Voetnoot]

[Prent op bladsy 298]

Die name van ‘onregverdige’ verresenes wat gehoorsaam is aan die boekrolle wat gedurende die Duisendjarige Heerskappy oopgemaak word, kan ook in die boekrol van die lewe geskryf word

Hoofstuk 42

’n Nuwe hemel en ’n nuwe aarde

1. Wat beskryf Johannes wanneer die engel hom na die begin van die Duisendjarige Heerskappy terugneem?

HIERDIE glorieryke visioen ontvou hom verder wanneer die engel Johannes na die begin van die Duisendjarige Heerskappy terugneem. Wat beskryf hy? “En ek het ’n nuwe hemel en ’n nuwe aarde gesien; want die vorige hemel en die vorige aarde het verbygegaan, en die see is daar nie meer nie” (Openbaring 21:1). ’n Fassinerende panorama word sigbaar!

2. (a) Hoe is Jesaja se profesie oor nuwe hemele en ’n nuwe aarde in 537 v.G.J. ten opsigte van die herstelde Jode vervul? (b) Hoe weet ons dat daar ’n verdere toepassing van Jesaja se profesie sal wees, en hoe word hierdie belofte vervul?

² Honderde jare voor Johannes se dag het Jehovah vir Jesaja gesê: “Want kyk, ek skep nuwe hemele en ’n nuwe aarde; en die vorige dinge sal nie onthou word nie, en ook sal dit nie in die hart opkom nie” (Jesaja 65:17; 66:22). Hierdie profesie is aanvanklik vervul toe getroue Jode in 537 v.G.J. ná hulle 70 jaar lange ballingskap in Babilon na Jerusalem teruggekeer het. Tydens hierdie herstelling het hulle ’n gereinigde gemeenskap, “’n nuwe aarde”, onder ’n nuwe regeringstelsel, “nuwe hemele”, gevorm. Maar die apostel Petrus het op ’n verdere toepassing van die profesie gewys en gesê: “Maar daar is nuwe hemele en ’n nuwe aarde wat ons volgens sy belofte verwag, en daarin sal regverdigheid woon” (2 Petrus 3:13). Johannes toon nou dat hierdie belofte gedurende die dag van die Here vervul word. “Die vorige hemel en die vorige aarde”, Satan se georganiseerde stelsel van dinge met sy regeringstruktuur onder die invloed van Satan en sy demone, sal verbygaan. Die onstuimige “see” van goddelose, opstandige mense sal ophou bestaan. In die plek daarvan sal daar “’n nuwe hemel en ’n nuwe aarde” wees—’n nuwe aardse gemeenskap onder ’n nuwe regering, God se Koninkryk.—Vergelyk Openbaring 20:11.

3. (a) Wat beskryf Johannes, en wat is Nuwe Jerusalem? (b) Hoe ‘daal Nuwe Jerusalem uit die hemel neer’?

³ Johannes sê verder: “Ek het ook die heilige stad, Nuwe Jerusalem, van God af uit die hemel sien neerdaal, toeberei soos ’n bruid wat vir haar man versier is” (Openbaring 21:2). Nuwe Jerusalem is die bruid van Christus, saamgestel uit die gesalfde Christene wat tot die dood getrou bly en wat opgewek word om saam met die verheerlikte Jesus konings en priesters te word (Openbaring 3:12; 20:6). Net soos aardse Jerusalem in eertydse Israel die regeringsetel geword het, maak die luisterryke Nuwe Jerusalem en haar Bruidegom die regering van die nuwe stelsel van dinge uit. Dit is die nuwe hemel. Die ‘bruid daal uit die hemel neer’, nie letterlik nie, maar in die sin dat sy haar aandag op die aarde rig. Die Lam se bruid sal sy lojale helper wees in die bestuur van ’n regverdige regering oor die hele mensdom. Inderdaad ’n seën vir die nuwe aarde!

4. Watter belofte maak God wat soortgelyk is aan sy belofte aan die pas gevormde nasie Israel?

⁴ Johannes sê verder vir ons: “Toe het ek ’n harde stem van die troon af hoor sê: ‘Kyk! Die tent van God is by die mensdom, en hy sal by hulle woon, en hulle sal sy volke wees. En God self sal by hulle wees’” (Openbaring 21:3). Toe Jehovah die Wetsverbond met die destyds nuwe nasie Israel gesluit het, het hy beloof: “Ek sal beslis my tabernakel in julle midde plaas, en my siel sal julle nie verafsku nie. En ek sal inderdaad in julle midde wandel en bewys dat ek julle God is, en julle sal my volk wees” (Levitikus 26:11, 12). Jehovah maak nou ’n soortgelyke belofte aan getroue mense. Gedurende die duisendjarige Oordeelsdag sal hulle vir hom ’n baie spesiale volk word.

5. (a) Hoe sal God gedurende die Duisendjarige Heerskappy by die mensdom woon? (b) Hoe sal God ná die Duisendjarige Heerskappy onder die mensdom woon?

⁵ Gedurende die Duisendjarige Heerskappy sal Jehovah in ’n tydelike reëling onder die mensdom “woon”, verteenwoordig deur sy koninklike Seun, Jesus Christus. Maar aan die einde van die Duisendjarige Heerskappy, wanneer Jesus die Koninkryk aan sy Vader oorgee, sal geen koninklike verteenwoordiger of bemiddelaar nodig wees nie. Jehovah sal in geestelike sin permanent en regstreeks by “sy volke” woon. (Vergelyk Johannes 4:23, 24.) Wat ’n verhewe voorreg vir die herstelde mensdom!

6, 7. (a) Watter wonderlike beloftes maak Johannes bekend, en wie sal die seëninge geniet? (b) Hoe beskryf Jesaja ’n geestelike sowel as ’n fisiese paradys?

⁶ Johannes sê verder: “En hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan” (Openbaring 21:4). Ons word weer eens aan vroeëre geïnspireerde beloftes herinner. Jesaja het ook uitgesien na die tyd wanneer die dood en verdriet nie meer daar sal wees nie en droefheid deur verheuging vervang sal word (Jesaja 25:8; 35:10; 51:11; 65:19). Johannes bevestig nou dat hierdie beloftes gedurende die duisendjarige Oordeelsdag op ’n wonderlike wyse in vervulling sal gaan. Eers sal die groot menigte die seëninge geniet. “Die Lam, wat in die middel van die troon is”, sal voortgaan om hulle herder te wees en “sal hulle na fonteine van waters van die lewe lei. En God sal elke traan van hulle oë afvee” (Openbaring 7:9, 17). Maar uiteindelik sal almal wat opgewek word en geloof in Jehovah se voorsienings beoefen, saam met hulle daar wees en ’n geestelike sowel as ’n fisiese paradys geniet.

⁷ “Dan”, sê Jesaja, “sal die oë van die blindes geopen word, en die ore van die dowes sal ontsluit word.” Ja, “dan sal die kreupele net soos ’n takbok klim, en die tong van die stomme sal van vreugde uitroep” (Jesaja 35:5, 6). In daardie tyd sal hulle ook “beslis huise bou en dit bewoon; en hulle sal beslis wingerde plant en die vrug daarvan eet. Hulle sal nie bou sodat iemand anders dit bewoon nie; hulle sal nie plant sodat iemand anders dit eet nie. Want die dae van my volk sal wees soos die dae van ’n boom; en die werk van hulle eie hande sal my uitverkorenes ten volle benut” (Jesaja 65:21, 22). Hulle sal dus nie van die aarde weggeneem word nie.

8. Wat sê Jehovah self oor die betroubaarheid van hierdie wonderlike beloftes?

⁸ Watter aangrypende toekomsbeelde vul ons gedagtes wanneer ons oor hierdie beloftes peins! Wonderlike voorsienings wag op die getroue mensdom onder die hemel se liefdevolle regering. Is sulke beloftes te goed om te glo? Is dit net die drome van ’n ou man in ballingskap op die eiland Patmos? Jehovah antwoord self: “En die Een wat op die troon sit, het gesê: ‘Kyk! Ek maak alles nuut.’ Ook sê hy: ‘Skryf, want hierdie woorde is betroubaar en waaragtig.’ En hy het vir my gesê: ‘Dit het geskied! Ek is die Alfa en die Omega, die begin en die einde.’”—Openbaring 21:5, 6a.

9. Waarom kan ons absoluut seker wees dat hierdie toekomstige seëninge verwesenlik sal word?

⁹ Dit is asof Jehovah self vir die getroue mensdom ’n waarborg, of eiendomsbewys, van hierdie toekomstige seëninge onderteken. Wie sou dit waag om Iemand wat so ’n waarborg gee, in twyfel te trek? Trouens, hierdie beloftes van Jehovah is so seker dat hy praat asof dit reeds vervul is: “Dit het geskied!” Is Jehovah dan nie “die Alfa en die Omega . . . , die Een wat is en wat was en wat kom, die Almagtige” nie? (Openbaring 1:8). Hy is inderdaad! Hy sê self: “Ek is die eerste en ek is die laaste, en buiten my is daar geen God nie” (Jesaja 44:6). As sodanig kan hy profesieë inspireer en dit in elke besonderheid vervul. Hoe geloofversterkend is dit tog! Hy beloof dus: “Kyk! Ek maak alles nuut”! Pleks van te twyfel of hierdie wonders werklik sal gebeur, moet ons ons liewer afvra: ‘Wat moet ek persoonlik doen om sulke seëninge te beërf?’

“Water” vir dié wat dors is

10. Watter “water” bied Jehovah aan, en wat beeld dit af?

¹⁰ Dit is Jehovah self wat sê: “Aan elkeen wat dors is, sal ek uit die fontein van die water van die lewe gee, verniet” (Openbaring 21:6b). Om hierdie dors te les, moet ’n persoon bewus wees van sy geestelike behoefte en bereid wees om “die water” te aanvaar wat Jehovah voorsien (Jesaja 55:1; Matteus 5:3). Watter “water”? Jesus self het hierdie vraag beantwoord toe hy vir ’n vrou langs ’n put in Samaria getuig het. Hy het vir haar gesê: “Wie ook al van die water drink wat ek hom sal gee, sal nóóit dors word nie, maar die water wat ek hom sal gee, sal in hom ’n fontein van water word wat opborrel om die ewige lewe te gee.” Hierdie “fontein van die water van die lewe” vloei van God af deur Christus as Sy voorsiening om die mensdom tot volmaakte lewe te herstel. Soos die Samaritaanse vrou moet ons inderdaad gretig wees om met diep teue uit hierdie fontein te drink! En soos daardie vrou moet ons bereid wees om alledaagse belange te laat vaar en liewer die goeie nuus aan ander te verkondig!—Johannes 4:14, 15, 28, 29.

Die oorwinnaars

11. Watter belofte maak Jehovah, en op wie is die woorde ten eerste van toepassing?

¹¹ Dié wat van hierdie verkwikkende “water” drink, moet ook oorwin, soos Jehovah vervolgens sê: “Elkeen wat oorwin, sal hierdie dinge beërf, en ek sal sy God wees en hy sal my seun wees” (Openbaring 21:7). Hierdie belofte is soortgelyk aan die beloftes in die boodskappe aan die sewe gemeentes; gevolglik moet hierdie woorde ten eerste op gesalfde dissipels van toepassing wees (Openbaring 2:7, 11, 17, 26-28; 3:5, 12, 21). Christus se geestelike broers het deur die eeue heen gretig uitgesien na die voorreg om deel van Nuwe Jerusalem te wees. As hulle oorwin, soos Jesus oorwin het, sal hulle verwagtinge verwesenlik word.—Johannes 16:33.

12. Hoe sal Jehovah se belofte in Openbaring 21:7 ten opsigte van die groot menigte vervul word?

¹² Die groot menigte uit alle nasies sien ook uit na hierdie belofte. Ook hulle moet oorwin deur God lojaal te dien totdat hulle uit die groot verdrukking kom. Dan sal hulle hulle aardse erfenis binnegaan, ‘die koninkryk wat van die grondlegging van die wêreld af vir hulle berei is’ (Matteus 25:34). Hulle en ander aardse skape van die Here wat die toets aan die einde van die duisend jaar deurstaan, word “heiliges” genoem (Openbaring 20:9). As lede van sy universele organisasie sal hulle ’n heilige vader-en-kind-verhouding met hulle Skepper, Jehovah God, geniet.—Jesaja 66:22; Johannes 20:31; Romeine 8:21.

13, 14. Watter gebruike moet ons vasbeslote wees om te vermy as ons God se wonderlike beloftes wil beërf, en waarom?

¹³ Hoe belangrik is dit tog, met die oog op hierdie wonderlike vooruitsig, dat Jehovah se Getuies nou rein bly van die besoedelende dinge van Satan se wêreld! Ons moet sterk, beslis en vasbeslote wees dat die Duiwel ons nooit sal laat sink tot die vlak van dié wat Jehovah self hier beskryf nie: “Maar wat die lafaards betref en dié sonder geloof en dié wat walglik is in hulle vuilheid en moordenaars en hoereerders en dié wat spiritisme beoefen en afgodedienaars en al die leuenaars, hulle deel sal wees in die poel wat met vuur en swael brand. Dit beteken die tweede dood” (Openbaring 21:8). Ja, die toekomstige erfgenaam moet die gebruike vermy wat hierdie ou stelsel van dinge besoedel het. Hy moet oorwin deur getrou te bly ten spyte van alle druk en versoekings.—Romeine 8:35-39.

¹⁴ Hoewel die Christendom beweer dat sy die bruid van Christus is, word sy gekenmerk deur die walglike gebruike wat Johannes hier beskryf. Sy word dus saam met die res van Babilon die Grote vir ewig vernietig (Openbaring 18:8, 21). Enige gesalfdes of lede van die groot menigte wat begin om sulke bose dinge te beoefen, of om dit te bevorder, staar ook ewige vernietiging in die gesig. As hulle daarmee volhou, sal hulle nie die beloftes beërf nie. En in die nuwe aarde sal enigiemand wat probeer om sulke gebruike in te voer, gou vernietig word en die tweede dood ondergaan, sonder die hoop op ’n opstanding.—Jesaja 65:20.

15. Wie is by uitstek oorwinnaars, en met watter visioen word Openbaring tot ’n grootse klimaks gevoer?

¹⁵ Die Lam, Jesus Christus, en sy bruid van 144 000, Nuwe Jerusalem, is by uitstek oorwinnaars. Hoe gepas dan dat Openbaring tot ’n grootse klimaks gevoer word met ’n finale, allesoortreffende beskrywing van Nuwe Jerusalem! Johannes beskryf nou sy laaste visioen.

[Prente op bladsy 302]

In die “nuwe aarde”-gemeenskap sal daar vreugdevolle werk en kameraadskap vir almal wees