Van ons lesers

Seksonderrig Ek skryf om julle hartlik te bedank vir julle artikels oor “Seksonderrig—Wie moet dit gee?” (22 Februarie 1992). Ek het twee kinders en het nooit met hulle hieroor gepraat nie. Ek het self nooit sulke onderrig ontvang nie, en ek het nie geweet wat om vir hulle te sê of hoe om dit te doen nie. Maar nadat ek daardie artikels gelees het, het ek met elke kind afsonderlik gepraat. Dit was ’n genotvolle ervaring, ’n ervaring wat geen ouer moet mis nie.

M. A. P., Spanje

Hierdie artikel was nie skokkend nie, maar het duidelik en op ’n eerbiedige wyse getoon hoe ons ons kinders kan onderrig. Dankie dat julle my gehelp het om te sien dat ek my plig in hierdie verband versuim het. Ek het sake reggestel, danksy hierdie wonderlike artikel.

V. B., Frankryk

Ek is ’n 25-jarige vrou wat nou die Bybel se beskouing oor sedelikheid insien. Die sogenaamde plesier wat hoerery verskaf, is nie die onvermydelike verlies aan gemoedsrus werd nie. Hoewel ek nie meer ’n kind of ’n tiener is nie, het ek gevoel dat ek waardevolle lesse uit hierdie artikels geleer het.

S. H., Verenigde State

Ek het nog nooit so iets gelees nie. Dit is uitsonderlik dat julle getoon het hoe om kinders seksonderrig te gee en hulle terselfdertyd te help om hoë sedelike waardes te hê.

N. C., Italië

Ek is die ma van twee tienderjarige meisies. Ek kon al wonderlike besprekings met hulle oor alle aspekte van seks hê. Maar ek is ook ’n ma van twee jong seuns, wat 11 en 9 jaar oud is. Hoewel ek al in die algemeen met hulle oor seks gepraat het, het ek nog nie die liggaamlike veranderinge wat hulle sal ondergaan met hulle bespreek nie. Julle wonderlike tydskrif het net vanmiddag met die pos gekom. Dit sal my help om die saak met albei my seuns te bespreek.

P. W., Australië

Ek, as ’n jong meisie, het baie daarby baat gevind om hierdie tydskrif te lees. My ouers het nie geweet hoe om ons gepaste seksonderrig te gee nie. Met Jehovah se hulp het ek nie van God se sedelike standaarde afgewyk nie. Ek hoop nogtans dat hierdie artikel ouers sal help wat nog nie met hulle kinders oor seksuele aangeleenthede gepraat het nie.

A. M., Mexiko

Julle voorstel dat seksonderrig as die “gesin se geheim” beskou moet word, kan onvoorsiens groot probleme vir sommige van julle lesers veroorsaak. Maatskaplike werkers, onderwysers, verpleegsters en ander beroepsmense word nou opgelei om op die uitkyk te wees na tekens van kindermolestering. Een só ’n teken is wanneer ’n kind die woord “geheim” gebruik, aangesien baie mense wat kinders seksueel misbruik vir die kinders sê om dit geheim te hou.

E. R. N., Verenigde State

’n Hele paar lesers het hierdie feit onder ons aandag gebring, en ons is jammer as ons lesers wat sensitief oor die kwessie van kindermolestering is enigsins ontstel het. Ons dink dit is ’n geldige punt. Om moontlike misverstande te vermy, sal dit dalk beter wees as ouers sê dat seksuele aangeleenthede “privaat” is pleks van ’n “geheim”.—RED.