Jongmense vra . . .

Wat kan ek doen sodat hy my sal uitlos?

David is die gewildste seun by die skool. En skielik, tot nyd van elke meisie by die skool, het hy in jou begin belangstel! Hy het jou verskeie kere gevra om saam met hom uit te gaan en jy het elke keer geweier. Maar David sê vir jou dat geen ander meisie hom al ooit so laat voel het nie en dat hy nie nee as ’n antwoord sal aanvaar nie. Jy wil nie sy gevoelens seermaak nie, maar jy weet wat hy waarskynlik in gedagte het. Waarom kan hy jou nie net uitlos nie?

JONG vroue oral (en vandag dikwels ook jong mans) word lastig geval deur skoolmaats en werkmaats wat ongewenste romantiese aandag aan hulle gee. Die voorstelle kom dikwels neer op ’n duidelike uitnodiging om aan geslagsonsedelikheid deel te neem. Hoe sal jy reageer as dit met jou gebeur?

’n Artikel in Psychology Today sê: “As ’n man seksualiteit in ’n gesprek inbring, deur insinuasie of fisiese gebare, moet jy dadelik reageer. As jy dit nie doen nie, moedig jou swye hom aan om daarmee voort te gaan.” Dus moet jy iets doen—maar wat?

Waarom dit moeilik is om nee te sê

’n Jong vrou met die naam Sherron erken taamlik reguit: “Gewoonlik is dit nie moeilik om nee te sê wanneer ’n seun onaantreklik is nie.” Die probleem is dat ons almal van aandag hou. En wanneer dit kom van iemand wat ons bewonder of aantreklik vind, is dit nie maklik om dit van die hand te wys nie. Maar vra jou af: ‘Het hierdie persoon dieselfde doelwitte, geestelike beskouing en waardes as ek?’ (2 Korinthiërs 6:14). Indien nie, kan dit jou op ’n rampspoedige weg plaas as jy gunstig op sy voorstelle reageer.

Jy kan nietemin ook hewige portuurdwang ondervind om jou godsdiensstandaarde oorboord te gooi. Jong Dana deel ons mee: “Die meisies by die werk oefen druk op my uit om saam met hulle te gaan dans; hulle wil weet waarom ek met niemand uitgaan nie.” As jy nog op skool is, kan skoolmaats jou op soortgelyke wyse aanpor om met van die seuns daar uit te gaan. Hierdie soort druk kan jou besluit maklik verswak. Wat kan jy doen om dit te versterk?

Stel perke

Die ou spreekwoord lui: “Voorsorg voorkom nasorg.” Maria stem saam. Sy sê: “Ek maak dit bekend dat ek een van Jehovah se Getuies is.” Wanneer seuns weet dat jy hoë sedelike standaarde het, is die kanse minder dat hulle jou sal steur.

Behoorlike persoonsversorging speel ook ’n belangrike rol in die ontmoediging van ongewenste aandag. Een New Yorkse bestuurderes het dit geleer toe sy probleme met mans by haar werk begin ondervind het. Sy sê: “Hoewel ek ernstig oor my werk was, het ek nie daardie indruk geskep nie. Daarom het ek my hare in ’n bolla vasgesteek en begin om katoenbloese, ’n groot bril en snyersklere werk toe te dra. Ek lyk ernstig, dat ek hier is om te werk en nie om te flankeer nie.” So ’n voorkoms is dalk nie nodig in jou situasie nie, maar dit illustreer hoe belangrik dit is om seker te wees dat jou klere en persoonsversorging die regte indruk skep.—1 Timotheüs 2:9.

Jou keuse van vriende is nog ’n belangrike faktor. Die Bybel sê: “Gaan met die wyse om, dan word jy wys; maar hy wat met [sedelike] dwase verkeer, versleg” (Spreuke 13:20). Jy moet dus nie met mense omgaan—of selfs na hulle luister—as hulle vuil grappe vertel of oor seksuele eskapades spog nie. As jy dit doen, kan ander die verkeerde indruk omtrent jou kry. Jong Erika sê dat wanneer die gesprek hand-uit ruk, sy vir hulle sê: “Dis nou tyd dat ek loop”, en hulle snap die punt.

Word “’n muur”

Selfs al vind hulle uit dat jy ’n Christen is, is dit met tye nie genoeg om sommige seuns te ontmoedig nie. (“Wat maak dit saak dat jy ’n Christen is?” het een vasbeslote jong man geredeneer. “Jy is steeds ’n vrou, en ek is steeds ’n man.”) Hoe hanteer jy sulke situasies? Wel, beskou die Bybel se voorbeeld van die Sulammitiese meisie. Sy is die hof gemaak deur een van die rykste, wysste en magtigste mans wat ooit geleef het—koning Salomo. Maar sy was reeds verlief op ’n nederige herder van haar tuisdorp. Wat kon sy dus doen sodat Salomo haar sou uitlos?

Sy het, om mee te begin, ’n gepaste opinie van haarself gehad. Sy het gesê: “Ek is niks meer as ’n saffraan van die kusvlakte nie” (Hooglied 2:1, NW). ’n Soortgelyke nederige gesindheid is van die uiterste belang omdat vleitaal verleiers se vernaamste instrument is. Die Sulammiet was te beskeie om daarvoor te swig. En toe die “dogters van Jerusalem” portuurdwang gebruik het om haar te probeer dwing om Salomo te aanvaar, het sy hulle ’n eed laat neem “om nie die liefde wakker te maak of op te wek voordat dit die liefde behaag nie” (Hooglied 3:5). As jy jou metgeselle inlig oor jou standpunt sal dit eweneens help dat hulle minder druk op jou uitoefen.

Die heel belangrikste is dat die Sulammitiese meisie vasbeslote was om elke poging van die koning om haar van gedagte te laat verander, te weerstaan. “Ek is ’n muur”, het sy trots verklaar (Hooglied 8:10). Jy moet wys dat jy net so vasbeslote is wanneer dit kom by onbetaamlike voorstelle. Soos die Sulammiet moet jy leer om maklik nee te sê. As dit vir jou moeilik is, moet jy oefen om in minder ernstige situasies nee te sê. Raak gewoond daaraan om vas te staan by die dinge waarin jy glo. Wanneer die ernstige situasies dan opduik, sal jy beter voorbereid wees om hulle die hoof te bied.

Stuit daardie voorstel!

Kom ons bespreek nou ’n paar algemene versoekings wat seuns gebruik en hoe jy hulle moet beskou:

‘Almal doen dit.’ Moenie dit glo nie! ’n Opname deur die organisasie Beplande Ouerskap het getoon dat 53 persent van 17-jarige meisies in die Verenigde State deelgeneem het aan immorele seks. Dit laat egter steeds 47 persent wat dit nie gedoen het nie—jy inkluis! Buitendien, Christene ‘volg nie die meerderheid’ wanneer Bybelbeginsels geskend word nie.—Exodus 23:2.

‘Jy is onvolwasse.’ Nouliks! Volwasse mense word in die Bybel gedefinieer as “die wat geestesvermoëns besit deur die gewoonte geoefen, om goed van kwaad te onderskei”.—Hebreërs 5:14.

‘Jy is dit aan my verskuldig.’ Jy is seks aan niemand verskuldig nie—of dit nou ’n skoolmaat, ’n baas, ’n vriend, of enigiemand anders is! En niemand het die reg om dit te eis nie.

‘Ag, lewe vir vandag. Môre sterf ons dalk!’ As Christene sien ons uit na die ewige lewe. Ons kan nie toelaat dat een oomblik van ongeoorloofde seksuele genot ’n ewigheid van geluk vernietig nie.—1 Korinthiërs 15:32-34.

Sulke slinkse benaderings vereis reguit—soms kortaf—reaksies. En wanneer iemand hardnekkig volhou, sal dit moontlik nodig wees om dieper na te dink oor hoe jy die persoon beter kan antwoord (Spreuke 15:28). Wat jy ook al sê, jy moet toon dat jy ernstig is wanneer jy sy voorstelle verwerp; moenie geamuseerd of verleë optree nie.

Skryfster Joyce Jillson stel eweneens voor: “As jy dinge regtig permanent wil laat afkoel, moet jy oor godsdiens begin praat.” Baie Christenjeugdiges het gevind dat dit waar is. Een meisie sê: “Elke keer wanneer iemand probeer om toenadering te soek, haal ek Die Wagtoring uit.” Ja, een van die beste verweermiddels is om jou oortuigings duidelik te stel. Laat die persoon weet waarom jy sy voorstelle verwerp. Jy verwerp hom nie soseer as persoon as wat jy die weg wat hy wil inslaan, verwerp nie. Dit is veral nuttig om so ’n redenasie te volg as die persoon iemand is met wie jy elke dag persoonlik in aanraking kom. As hy enigsins belangstelling in die Bybel se boodskap toon, kan ’n manlike lid van die Christengemeente dit opvolg.

Ongelukkig is daar sommige met wie jy nie kan redeneer nie. Al wat jy kan doen, is om, sonder ’n glimlag, jou posisie duidelik te stel—en weg te stap. As die teistering voortduur of die situasie vir jou te moeilik is om te hanteer, moet jy die saak met jou ouers bespreek. Hulle kan ’n paar voorstelle aan die hand doen—of besluit om iets omtrent die saak te doen. In sommige gevalle sal jy selfs van ’n situaise moet vlug!—Vergelyk Genesis 39:12.

Jy sal heel moontlik beledig en geterg word as gevolg van jou standpunt, maar moenie mismoedig word nie. Soos die Sulammiet sal jy die gemoedsrus geniet wat jy kry deur te doen wat reg is (Hooglied 8:10). Buitendien sal nie alle seuns beledigend optree nie. Hoewel die meisie koning Salomo verwerp het, het hy haar nie in ’n slegte lig beskou nie. Trouens, hy het haar besing deur een van die mooiste liefdesliedjies wat ooit gekomponeer is, te skryf! Die meeste seuns sal jou moedige standpunt op soortgelyke wyse respekteer. En as hulle dit nie doen nie? Hou net aan om so vasbeslote soos die Sulammiet te wees. Wees “’n muur” en nie “’n deur” wat maklik oopgaan nie (Hooglied 8:9). Onthou: Jou ewige welsyn en selfrespek is op die spel!

[Prent op bladsy 13]

Hoe kan jy seuns hanteer wat nee nie as ’n antwoord aanvaar nie?