Jongmense vra

Is ek gereed om die huis te verlaat?

“Soms voel ek dat mense op my neersien omdat ek 19 is en nog steeds by my ouers bly, asof ek eers ’n volwassene sal wees as ek op my eie bly.”—Katie.a

“Ek is amper 20, en ek haat dit dat ek so min sê het oor wat in my lewe gebeur. Ek het dit al oorweeg om die huis te verlaat omdat ek moeg is daarvoor dat my ouers my wense ignoreer en vir my sê dat hulle beter weet.”—Fiona.

LANK voordat jy gereed is om die huis te verlaat, sal jy dalk begin voel dat jy onafhanklik wil wees. Dit is normaal om so te voel. God se oorspronklike voorneme was immers dat jongmense grootword, uiteindelik hulle vader en moeder verlaat en hulle eie gesin begin (Genesis 2:23, 24; Markus 10:7, 8). Maar beteken die feit dat jy na meer vryheid smag dat dit tyd is om uit te trek? Moontlik. Maar hoe sal jy weet of jy werklik gereed is om die huis te verlaat? Daar is drie belangrike vrae wat jy moet beantwoord. Die eerste is . . . 

Wat is my beweegredes?

Die lys wat volg, kan jou help om uit te pluis hoekom jy wil uittrek. Nommer die redes hoekom jy die huis wil verlaat in volgorde van belangrikheid.

․․․ Om van probleme by die huis af weg te kom

․․․ Om meer vryheid te hê

․․․ Sodat my vriende my meer sal respekteer

․․․ Om ’n vriend te help wat ’n woonstelmaat nodig het

․․․ Om elders met vrywillige werk te gaan help

․․․ Om ondervinding op te doen

․․․ Om my ouers se finansiële las te verlig

․․․ Ander ․․․․․

Die redes wat hierbo gemeld word, is nie noodwendig sleg nie. Maar die beweegrede waarmee jy die huis verlaat, kan ’n groot invloed hê op hoe gelukkig jy sal wees wanneer jy eers onder jou ouers se dak uit is. As jy byvoorbeeld die huis verlaat bloot om van probleme af weg te kom of om meer vryheid te hê, wag daar heel moontlik ’n skok op jou!

Danielle, wat ’n ruk lank op haar eie gaan bly het toe sy 20 was, het baie uit die ondervinding geleer. Sy sê: “Ons almal moet met sekere beperkings saamleef. Wanneer jy op jou eie is, sal jou werkrooster of gebrek aan geld beperk wat jy kan doen.” Carmen, wat ses maande lank oorsee gaan bly het, sê: “Ek het die ondervinding geniet, maar ek het dikwels gevoel dat ek geen vrye tyd het nie! Ek moes bybly met die gewone huiswerk—die woonstel skoonmaak, dinge regmaak, onkruid uittrek, wasgoed was, vloere skrop, ensovoorts.”

Om uit te trek, kan jou wel ’n bietjie meer vryheid gee, en dalk sal jou vriende jou meer respekteer. Maar jý sal die een wees wat die rekeninge moet betaal, die kos moet voorberei, die huis moet skoonmaak en die ure moet vul wanneer daar nie vriende en familie om jou is nie. Moet dus nie toelaat dat ander druk op jou uitoefen om ’n oorhaastige besluit te neem nie (Spreuke 29:20). Selfs al het jy geldige redes om die huis te verlaat, het jy meer as goeie bedoelings nodig. Jy het oorlewingsvaardighede nodig—en dit lei tot die tweede vraag . . . 

Is ek gereed daarvoor?

Om op jou eie te gaan bly, is soos om in ’n wildernis te gaan stap. Sal jy die wildernis invaar sonder om te weet hoe om ’n tent op te slaan, ’n vuur te maak, ’n maaltyd te kook of ’n kaart te lees? Nie sommer nie! Tog trek talle jongmense uit die huis uit met min van die vaardighede wat nodig is om ’n huishouding te behartig.

Die wyse koning Salomo het gesê: “Die skerpsinnige gee ag op sy voetstappe” (Spreuke 14:15). Kyk na die volgende onderhofies om jou te help besluit of jy gereed is om op jou eie te bly. Maak ’n ✔ langs die vaardighede wat jy reeds het en ’n X langs dié waaraan jy nog moet werk.

◯ Geldsake “Ek het nog nooit nodig gehad om vir enigiets te betaal nie”, sê Serena, 19. “Ek is bang om die huis te verlaat en volgens ’n begroting te moet lewe.” Hoe kan jy leer om met geld te werk?

’n Bybelspreuk sê: “’n Wyse sal luister en meer onderrigting inneem” (Spreuke 1:5). Hoekom vra jy jou ouers dus nie hoeveel dit moontlik per maand vir een persoon sal kos om huur of ’n verband te betaal, kos te koop en ’n motor op die pad te hou of ander vervoerkostes te dek nie? Laat jou ouers jou dan leer hoe om ’n begroting op te stel en die rekeninge te betaal. Hoekom is dit belangrik om te leer om volgens ’n begroting te lewe? Kevin, 20, sê: “Wanneer jy eers op jou eie is, is daar ’n klomp onverwagte uitgawes. As jy nie versigtig is nie, kan jy jou doodwerk om skuld te probeer afbetaal.”

Wat van ’n proeflopie? As jy ’n werk het, gee jou ouers ’n tyd lank die volle bedrag wat dit elke maand sou kos om jou kos, huisvesting en ander uitgawes te dek. As jy nie vir die koste van jou onderhoud kan of wil betaal terwyl jy in die huis is nie, sal jy nie goed voorbereid wees om op jou eie te gaan bly nie.—2 Tessalonisense 3:10, 12.

◯ Huishoudelike vaardighede Brian, 17, sê dat die ding waarvoor hy die bangste is as hy die huis sou verlaat, is om self sy wasgoed te moet was. Hoe weet jy of jy gereed is om vir jouself te sorg? Aron, 20, gee hierdie wenk: “Probeer ’n week lank lewe asof jy op jou eie bly. Eet net kos wat jy self voorberei het, wat jy self by die winkel gekoop het en waarvoor jy met jou geld betaal het. Dra klere wat jý gewas en gestryk het. Doen al jou eie huiswerk. En probeer om self uit te kom waar jy moet wees, sonder dat iemand anders jou optel of aflaai.” As jy hierdie wenk volg, sal dit twee dinge vir jou doen: Dit sal (1) jou waardevolle vaardighede leer en (2) jou waardering vergroot vir die werk wat jou ouers doen.

◯ Sosiale vaardighede Kom jy goed oor die weg met jou ouers, broers en susters? Indien nie, neem jy dalk aan dat die lewe makliker sal wees as jy saam met ’n vriend intrek. Miskien sal dit. Maar kyk na wat Eve, 18, sê: “Twee van my vriendinne het saam ingetrek. Hulle was boesemvriendinne voordat hulle die woonstel gedeel het, maar hulle kon eenvoudig nie saambly nie. Die een was netjies, die ander slordig. Die een was geestelikgesind, die ander nie soveel nie. Dit het eenvoudig nie gewerk nie!”

Erin, 18, wil die huis verlaat. Maar sy sê: “Jy kan baie leer oor hoe om met mense oor die weg te kom terwyl jy nog in die huis is. Jy leer hoe om probleme op te los en kompromisse aan te gaan. Ek het opgelet dat diegene wat die huis verlaat om onenigheid met hulle ouers te vermy, leer om van konflikte af weg te hardloop, nie om dit op te los nie.”

◯ ’n Persoonlike geestelike roetine Party verlaat die huis met die spesifieke doel om van hulle ouers se godsdiensroetine af weg te kom. Ander is vasbeslote om ’n goeie persoonlike roetine van Bybelstudie en aanbidding te volg, maar verval gou in slegte gewoontes. Hoe kan jy keer dat ‘jou geloof skipbreuk ly’?—1 Timoteus 1:19.

Moenie net jou ouers se godsdiensoortuigings blindelings aanvaar nie. Jehovah God wil hê dat ons almal die dinge wat ons glo, aan onsself moet bewys (Romeine 12:1, 2). Werk dus ’n goeie persoonlike roetine vir Bybelstudie en aanbidding uit en bly dan daarby. Skryf gerus jou geestelike roetine op ’n kalender neer en kyk of jy ’n maand lank daarby kan bly sonder dat jou ouers aan jou moet karring om dit te doen.

Die derde en laaste vraag waaraan jy moet dink, is . . . 

Waarheen is ek op pad?

Party wat die huis verlaat, hardloop van probleme af weg of wil onder hulle ouers se gesag uitkom. Hulle fokus op wat hulle agterlaat, nie op waarheen hulle op pad is nie. Maar hierdie benadering is net so redelik soos om te probeer bestuur terwyl jou oë stip op die truspieël gerig is. Wanneer ’n bestuurder fokus op dit waarvan hy wegbeweeg, is hy blind vir wat voor hom is. Die les? As jy suksesvol wil wees, moet jy nie net daarop konsentreer om van die huis af weg te kom nie—hou jou oë gerig op ’n doelwit wat die moeite werd is.

Sommige jong volwassenes onder Jehovah se Getuies het getrek om in afgesonderde gebiede in hulle land of selfs oorsee te gaan preek. Ander trek om met die bou van plekke van aanbidding te help of om by ’n takkantoor van Jehovah se Getuies te gaan werk. Ander weer, wil eers ’n ruk op hulle eie bly voordat hulle trou.b

Skryf hier ’n doelwit neer wat jy wil bereik deur uit te trek. ․․․․․

In sekere gevalle is dit moontlik om te lank in die huis te bly en nie die volwassenheid en vaardighede te ontwikkel wat nodig is om op jou eie te bly nie. Moet nogtans nie ’n oorhaastige besluit neem nie. Dink goed daaroor na. “Die planne van die vlytige lei gewis tot voordeel”, sê ’n Bybelspreuk, “maar elkeen wat oorhaastig is, stuur gewis op gebrek af” (Spreuke 21:5). Luister na jou ouers se raad (Spreuke 23:22). Bid oor die saak. En terwyl jy daaroor besluit, moet jy die Bybelbeginsels wat ons nou hier bespreek het, in gedagte hou.

Die eintlike vraag is nie ‘Is ek gereed om die huis te verlaat?’ nie, maar ‘Is ek gereed om my eie huishouding te behartig?’ As die antwoord op hierdie laaste vraag ja is, is dit dalk tyd vir jou om op jou eie te gaan bly.

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

IETS OM OOR TE DINK

● Hoe kan dit jou tot voordeel strek om nog ’n ruk in die huis te bly, selfs al is julle gesinslewe moeilik?

● Wat kan jy doen, terwyl jy nog in die huis is, wat julle gesin tot voordeel sal strek en jou sal voorberei om jou eie huishouding te behartig?

[Venster/Prente op bladsy 11]

WAT JOU PORTUURS SÊ

“As jou ouers, terwyl jy in die huis is, vir jou verantwoordelikhede gee—die soort wat jy sal hê as jy op jou eie is—is dit ’n veilige manier om te leer hoe om later onafhanklik te wees.”

“Dit is normaal om onafhanklik te wil wees. Maar as jou beweegrede bloot is om van reëls af weg te kom, toon dit maar net dat jy nie werklik gereed is om uit te trek nie.”

[Prente]

Sarah

Aron

[Venster op bladsy 13]

’N WOORDJIE AAN OUERS

Serena, wat in die bygaande artikel aangehaal word, is bang om die huis te verlaat. Wat is een rede? Sy sê: “Selfs wanneer ek iets met my eie geld wil koop, laat my pa my nie toe nie. Hy sê dat dit sy werk is. Daarom maak die idee om my eie rekeninge te moet betaal, my bang.” Serena se pa het ongetwyfeld goeie bedoelings, maar dink jy dat hy sy dogter voorberei sodat sy haar eie huishouding sal kan behartig?—Spreuke 31:10, 18, 27.

Is jou kinders oorbeskerm en dus swak voorberei om op hulle eie te bly? Hoe sal jy weet? Kyk na dieselfde vier vaardighede wat in die artikel gemeld word, maar uit ’n ouer se perspektief.

Geldsake. Weet jou ouer kinders hoe om ’n belastingopgawe in te vul of wat hulle moet doen om plaaslike belastingwette na te kom? (Romeine 13:7). Weet hulle hoe om krediet op verantwoordelike wyse te gebruik? (Spreuke 22:7). Kan hulle ’n begroting opstel en dan binne hulle vermoë lewe? (Lukas 14:28-30). Het hulle al die vreugde gesmaak om iets te koop met geld wat hulle verdien het? Het hulle al die selfs groter vreugde gesmaak om van hulle tyd en middele te gee om ander te help?—Handelinge 20:35.

Huishoudelike vaardighede. Weet jou dogters en seuns hoe om kos te maak? Het jy hulle geleer hoe om klere te was en te stryk? Kan jou kinders, as hulle ’n motor kan bestuur, eenvoudige instandhouding doen soos om ’n smeltdraadjie, die olie of ’n pap wiel te vervang?

Sosiale vaardighede. Tree jy altyd as die skeidsregter op en besluit jy wat die finale oplossing vir die probleem is wanneer jou ouer kinders meningsverskille het? Of het jy jou kinders geleer om ’n vreedsame oplossing vir die probleem te vind en dan terug te kom na jou toe?—Matteus 5:23-25.

’n Persoonlike geestelike roetine. Sê jy vir jou kinders wat hulle moet glo, of oortuig jy hulle? (2 Timoteus 3:14, 15). Leer jy hulle om “denkvermoë” te ontwikkel en ‘hulle waarnemingsvermoëns te oefen om te onderskei wat reg en verkeerd is’, eerder as om altyd hulle vrae oor godsdiens- en sedelike kwessies te beantwoord? (Spreuke 1:4; Hebreërs 5:14). Sal jy wil hê dat hulle jou voorbeeld moet volg wanneer dit kom by persoonlike Bybelstudie, of sal jy wil hê dat hulle beter moet doen?

Om jou kinders op die gebiede wat hierbo gemeld word, op te lei, verg ongetwyfeld tyd en heelwat inspanning. Maar die beloning is beslis die moeite werd wanneer die bittersoet dag aanbreek om totsiens te sê.

[Prent op bladsy 12]

Om van die huis af weg te trek, is soos om in die wildernis te gaan stap—jy moet oorlewingsvaardighede aanleer voordat jy die staptog aanpak