Bybelleringe — Raad wat altyd werk

DINK HIERAAN: Jy is in ’n museum vol ou kunsvoorwerpe. Die meeste van hulle is verweer en vol gate. Party is stukkend en dele daarvan is weg. Maar een van hulle is nog in ’n baie goeie toestand. Elke deel van die ingewikkelde ontwerp kan nog duidelik gesien word. “Is hierdie een nuwer as die ander?” vra jy die toergids. Hy sê: “Nee, dit is ouer as die meeste van die kunswerke, en daar is nog nooit herstelwerk daaraan gedoen nie.” “Was dit beskerm teen die wind en die weer?” vra jy. Jou toergids antwoord: “Nee, dit het deur die ergste storms ooit gegaan. En baie mense het probeer om dit te beskadig.” Dalk is jy verbaas en wonder jy: ‘Waarvan is dit gemaak?’

Op ’n manier is die Bybel soos daardie ongelooflike kunswerk. Dit is ’n baie ou boek — ouer as die meeste boeke. Daar is natuurlik ander boeke wat ook oud is. Maar soos met verweerde ou kunswerke is die meeste ou boeke erg beskadig deur tyd. Wat hierdie boeke byvoorbeeld oor die wetenskap sê, is verkeerd bewys deur nuwe kennis en bewysbare feite. Die mediese raad in hierdie boeke kan baie keer meer kwaad as goed doen. En dikwels is daar net fragmente of klein gedeeltes van hierdie ou boeke oor omdat dele daarvan verlore of erg beskadig is.

Maar die Bybel is anders as hierdie boeke. Al is daar meer as 35 eeue gelede begin om die Bybel te skryf, het geen deel daarvan verlore gegaan nie. Dit is deur die eeue oor en oor aangeval — verbrand, verban en afgekraak — maar die dinge wat daarin geskryf is, het elke toets deurstaan. In plaas daarvan dat die Bybel deur nuwe kennis verkeerd bewys is, wys die dinge wat in die Bybel staan eerder ’n verbasende hoeveelheid insig. — Kyk na die venster “Outyds of voor sy tyd?”

WAARHEDE VIR ONS DAG

Jy wonder dalk: ‘Is dit wat die Bybel leer, regtig prakties in ons moderne tyd?’ Om die antwoord te kry, vra jou af: ‘Wat is die ergste probleme wat die mensdom vandag het? Watter probleme bekommer jou die meeste?’ Dalk dink jy aan oorlog, besoedeling, misdaad of korrupsie. Kom ons kyk na ’n paar waarhede in die Bybel. Terwyl ons dit doen, vra jou af: ‘Sou die wêreld nie ’n beter plek gewees het as mense volgens hierdie waarhede gelewe het nie?’

LIEFDE VIR VREDE

“Gelukkig is die vredeliewendes, want hulle sal ‘kinders van God’ genoem word” (Matteus 5:9). “Wees, indien moontlik, sover dit van julle afhang, vreedsaam teenoor alle mense.” — Romeine 12:18.

MEDELYE, VERGIFNIS

“Gelukkig is die barmhartiges, want aan hulle sal barmhartigheid [medelye] bewys word” (Matteus 5:7). “Hou aan om mekaar te verdra en mekaar vryelik te vergewe as iemand rede tot klagte teen ’n ander het. Net soos Jehovaha julle vryelik vergewe het, so moet julle ook doen.” — Kolossense 3:13.

GEEN RASSEHAAT

God “het uit een mens elke nasie van die mense gemaak om op die hele oppervlak van die aarde te woon” (Handelinge 17:26). “God [is] nie partydig . . . nie, maar in elke nasie is die mens wat hom vrees en regverdigheid beoefen, vir hom aanneemlik.” — Handelinge 10:34, 35.

RESPEK VIR DIE AARDE

“Jehovah God het . . . die mens geneem en hom in die tuin van Eden geplaas om dit te bewerk en daarvoor te sorg” (Genesis 2:15). God sal “die verderwers van die aarde . . . verderf.” — Openbaring 11:18.

’N HAAT VIR GIERIGHEID EN SEKSUELE SONDE

“Waak teen elke soort hebsug [gierigheid], want selfs wanneer iemand oorvloed het, spruit sy lewe nie voort uit die dinge wat hy besit nie” (Lukas 12:15). “Laat hoerery [seksuele sonde] en elke soort onreinheid of hebsug nie eens onder julle genoem word nie, net soos dit heilige mense betaam.” — Efesiërs 5:3.

EERLIKHEID, HARDE WERK

“Ons [wil] ons in alles eerlik . . . gedra” (Hebreërs 13:18). “Laat die steler nie meer steel nie, maar laat hom liewer hard werk.” — Efesiërs 4:28.

HELP MENSE WAT DIT NODIG HET

“Praat vertroostend met die terneergedrukte siele, ondersteun die swakkes, wees lankmoedig teenoor almal” (1 Tessalonisense 5:14). Sien “om na wese en weduwees in hulle verdrukking”. — Jakobus 1:27.

Die Bybel noem nie net hierdie waarhede op nie. Dit leer ons hoe belangrik hierdie waarhede is en hoe ons dit elke dag op praktiese maniere kan toepas. As meer mense vandag volgens hierdie leringe gelewe het, sou daar beslis minder probleme in die wêreld wees. Eintlik is Bybelwaarhede presies wat ons vandag nodig het en meer prakties as ooit tevore! Maar wat kan die dinge wat die Bybel leer, nou vir jou beteken?

HOE BYBELLERINGE JOU NOU KAN HELP

Die grootste mens wat ooit gelewe het, het gesê dat wysheid deur resultate geregverdig word (Matteus 11:19). Stem jy hiermee saam? Wanneer jy Bybelleringe toepas en sien hoe dit werk, sal dit jou oortuig dat dit regtig wysheid is. Maar jy dink dalk: ‘As die Bybel regtig prakties is, moet dit dan nie resultate in my lewe hê nie? Hoe kan dit my help met die probleme wat ek nou het?’ Kyk na ’n voorbeeld.

Delphineb het ’n vol en besige lewe gehad, en sy was gelukkig. Maar skielik het die een verskriklike ding ná die ander met haar gebeur. Haar tienerdogter is dood. Haar huwelik het uitmekaargeval. Sy het groot finansiële probleme gehad. Sy sê: “Ek het nie meer geweet wie ek was nie — sonder my dogter, sonder my man, sonder my huis. Ek het so leeg gevoel — geen identiteit, geen energie, geen plan vir die toekoms nie.”

Delphine het besef hoe waar die volgende woorde is: “Die dae van ons jare is op sigself sewentig jaar; en as dit weens besondere krag tagtig jaar is, is dit nietemin vol moeite en skadelike dinge; want gou sal dit verbygaan, en ons vlieg daarheen.” — Psalm 90:10.

Dit is verbasend hoe baie die Bybel Delphine in hierdie moeilike tyd gehelp het. Soos ons in die volgende drie artikels sal sien, het die Bybel baie ander mense ook gehelp toe hulle die raad daarin gebruik het om hulle probleme te oorkom. Hulle beskou die Bybel soos die kunswerk wat aan die begin van hierdie artikel beskryf is. Dit is heeltemal anders as ander boeke wat oud word en nie meer gebruik kan word nie. Het dit iets te doen met die inhoud van die Bybel? Bevat dit dalk God se gedagtes en nie net mense s’n nie? — 1 Tessalonisense 2:13.

Dalk het jy ook al agtergekom dat die lewe kort en vol probleme is. Waar kry jy vertroosting, ondersteuning en goeie raad wanneer jou probleme te veel word om te hanteer?

Kom ons kyk na drie belangrike maniere waarop die Bybel jou prakties kan help. Dit kan jou leer hoe om

1. probleme sover moontlik te vermy.

2. probleme wat oor jou pad kom, op te los.

3. met situasies wat jy nie kan verander nie, saam te lewe.

Die volgende artikels sal hierdie drie maniere bespreek.