Is daar ’n geheim om gesinsgeluk te geniet?

1. Waarom is sterk gesinne belangrik in die mensegemeenskap?

DIE gesin is die oudste instelling op aarde, en dit speel ’n belangrike rol in die mensegemeenskap. Deur die geskiedenis heen het sterk gesinne sterk gemeenskappe gehelp vorm. Die gesin is die beste reëling om kinders groot te maak sodat hulle ryp volwassenes sal wees.

2-5. (a) Beskryf die geborgenheid wat ’n kind in ’n gelukkige gesin voel. (b) Watter probleme word in party gesinne ondervind?

² ’n Gelukkige gesin is ’n hawe van veiligheid en geborgenheid. Stel jou vir ’n oomblik die ideale gesin voor. Gedurende hulle aandete sit liefdevolle ouers saam met hulle kinders en bespreek die dag se gebeure met hulle. Die kinders babbel opgewonde terwyl hulle vir hulle pa en ma vertel wat by die skool gebeur het. Hierdie tyd wat hulle saam ontspan, verkwik almal vir nog ’n dag in die wêreld daarbuite.

³ In ’n gelukkige gesin weet ’n kind dat sy vader en moeder vir hom sal sorg wanneer hy siek word; hulle sal moontlik beurte maak om deur die nag by sy bed te sit. Hy weet dat hy na sy moeder of vader kan gaan met die probleme van sy jong lewe en dat hy raad en ondersteuning sal kry. Ja, die kind voel veilig, ongeag hoe vol probleme die wêreld daarbuite ook mag wees.

⁴ Wanneer kinders grootword, trou hulle gewoonlik en het hulle hulle eie gesin. “’n Mens besef hoeveel jy aan jou ouers verskuldig is wanneer jy jou eie kind het”, sê ’n Oosterse spreuk. Met ’n diep gevoel van dankbaarheid en liefde probeer die volwasse kinders om hulle eie gesin gelukkig te maak, en hulle sorg ook vir hulle bejaarde ouers, wat dit geniet om saam met die kleinkinders te wees.

⁵ Miskien dink jy op hierdie stadium: ‘Wel, ek het my gesin lief, maar dis nie soos die een wat nou net beskryf is nie. Ek en my vrou werk nie dieselfde tye nie en sien mekaar beswaarlik. Ons praat meestal oor geldelike probleme.’ Of sê jy: ‘My kinders en kleinkinders woon in ’n ander dorp, en ek kry nooit ’n kans om hulle te sien nie’? Ja, om redes wat dikwels buite die beheer van die betrokkenes is, is die gesinslewe van baie mense nie heeltemal ideaal nie. En tog is daar party gesinne wat ’n gelukkige gesinslewe lei. Hoe? Is daar ’n geheim om gesinsgeluk te geniet? Die antwoord is ja. Maar voordat ons bespreek wat dit is, moet ons ’n belangrike vraag beantwoord.

WAT IS ’N GESIN?

6. Watter soort gesinne gaan in hierdie boek bespreek word?

⁶ In Westerse lande bestaan die meeste gesinne uit ’n vader, ’n moeder en kinders. Grootouers woon dalk in hulle eie huis so lank as hulle kan. Hoewel kontak behou word met dié wat verlangs familie is, is hulle pligte teenoor hierdie familielede beperk. Dít is in wese die gesin wat ons in hierdie boek gaan bespreek. Maar ander gesinne het in die laaste jare al hoe algemener geword—die enkelouergesin, die stiefgesin en die gesin wie se ouers om een of ander rede nie saamlewe nie.

7. Wat is die uitgebreide familie?

⁷ In party kulture is die uitgebreide familie iets algemeens. Indien moontlik word grootouers onder hierdie reëling gewoonlik deur hulle kinders versorg en word noue bande en verantwoordelikhede uitgebrei tot dié wat verlangs familie is. Byvoorbeeld, familielede help dalk om hulle niggies, neefs of dié wat verlangs familie is te onderhou, groot te maak en om selfs vir hulle opvoeding te betaal. Die beginsels wat in hierdie publikasie bespreek gaan word, is ook op uitgebreide families van toepassing.

DIE GESIN ONDER DRUK

8, 9. Watter probleme in party lande toon dat die gesin besig is om te verander?

⁸ Die gesin is vandag besig om te verander—ongelukkig nie ten goede nie. ’n Voorbeeld kan in Indië gesien word, waar ’n vrou dalk saam met haar man se familie woon en onder die gesag van haar skoonouers in die huis werk. Deesdae is dit egter nie ongewoon vir Indiese vrouens om werk buite die huis te gaan soek nie. Maar daar word blykbaar steeds van hulle verwag om hulle tradisionele rol in die huis te vervul. In baie lande word daar gevra: Hoeveel werk moet ’n vrou met ’n sekulêre werk in die huis doen in vergelyking met ander gesinslede?

⁹ In Oosterse gemeenskappe is sterk uitgebreide familiebande ’n tradisie. Maar vanweë die invloed van Westerse individualisme en die druk van ekonomiese probleme word die tradisionele uitgebreide familie ondermyn. Daarom beskou baie die versorging van bejaarde familielede as ’n las pleks van ’n plig of ’n voorreg. Party bejaarde ouers word mishandel. Trouens, mishandeling en verwaarlosing van die bejaardes kom vandag in baie lande voor.

10, 11. Watter feite toon dat die gesin in Europese lande besig is om te verander?

¹⁰ Egskeidings word al hoe algemener. In Spanje het die egskeidingsyfer aan die begin van die laaste dekade van die 20ste eeu gestyg tot 1 uit 8 huwelike—’n groot styging van 1 uit 100 net 25 jaar gelede. Brittanje, wat na bewering die hoogste egskeidingsyfer in Europa het (4 uit 10 huwelike sal na verwagting verbrokkel), het ’n skielike toename in die aantal enkelouergesinne ondervind.

¹¹ Dit lyk of baie in Duitsland geheel en al van die tradisionele gesin wegbreek. In die negentigerjare is daar gevind dat 35 persent van alle Duitse huishoudings uit ’n enkele persoon bestaan en dat 31 persent uit net twee individue bestaan. Die Franse trou ook nie meer so dikwels nie, en diegene wat wel trou, skei meer dikwels en ook vroeër as wat dit vantevore die geval was. Al hoe meer verkies om saam te lewe sonder die verantwoordelikhede van die huwelik. Soortgelyke neigings word wêreldwyd gesien.

12. Hoe ly kinders as gevolg van veranderinge in die hedendaagse gesin?

¹² Wat van kinders? In die Verenigde State en baie ander lande word al hoe meer kinders buite die huwelik gebore, party vir jong tienderjariges. Baie tienderjarige meisies het ’n aantal kinders by verskillende vaders. Verslae van oor die hele wêreld toon dat miljoene hawelose kinders in die strate ronddwaal; baie vlug uit huise waar hulle gemolesteer word of hulle word verstoot deur gesinne wat nie meer vir hulle kan sorg nie.

13. Watter algemene probleme ontneem gesinne hulle geluk?

¹³ Ja, die gesin beleef ’n krisis. Benewens wat reeds genoem is, ontneem tieneropstandigheid, kindermolestering, huweliksgeweld, alkoholisme en ander verwoestende probleme baie gesinne hulle geluk. Vir baie kinders en volwassenes is die gesin allesbehalwe ’n veilige hawe.

14. (a) Wat is volgens party die oorsake van die gesinskrisis? (b) Hoe het ’n eerste-eeuse wetsgeleerde die hedendaagse wêreld beskryf, en watter uitwerking het die vervulling van sy woorde op gesinslewe gehad?

¹⁴ Waarom die gesinskrisis? Party sê dat die hedendaagse gesinskrisis te wyte is aan vroue se toetrede tot die sakewêreld. Ander blameer die hedendaagse sedelike verval. En bykomende oorsake word genoem. Byna tweeduisend jaar gelede het ’n welbekende wetsgeleerde voorspel dat die gesin baie druk sou ondervind toe hy geskryf het: “In die laaste dae [sal daar] kritieke tye . . . wees wat moeilik is om deur te kom. Want mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir goedheid, verraaiers, eiesinnig, opgeblase van trots, liefhebbers van genot eerder as liefhebbers van God” (2 Timoteus 3:1-4). Wie sal daaraan twyfel dat hierdie woorde vandag vervul word? Is dit dan nie te verstane dat baie gesinne in ’n wêreld met sulke toestande ’n krisis beleef nie?

DIE GEHEIM VAN GESINSGELUK

15-17. Na watter gesag wat die geheim van gesinsgeluk bevat, sal daar in hierdie boek verwys word?

¹⁵ Raad oor hoe geluk in die gesin verkry kan word, kom van alle kante. In die Weste is daar ’n eindelose stroom selfhelpboeke en -tydskrifte wat raad gee. Die probleem is dat menslike beraders mekaar weerspreek, en raad wat vandag in die mode is, word dalk môre as onprakties beskou.

¹⁶ Waar kan ons dan na betroubare gesinsleiding soek? Wel, sal jy in ’n boek soek wat ongeveer 1 900 jaar gelede voltooi is? Of sal jy dink dat so ’n boek geheel en al verouderd is? Feit is dat die ware geheim van gesinsgeluk juis in so ’n bron gevind word.

¹⁷ Daardie bron is die Bybel. Volgens alle getuienis is dit deur God self geïnspireer. In die Bybel vind ons die volgende woorde: “Die hele Skrif is deur God geïnspireer en is nuttig om te onderrig, om tereg te wys, om dinge reg te stel, om in regverdigheid te dissiplineer” (2 Timoteus 3:16). In hierdie publikasie sal ons jou aanspoor om te ondersoek hoe die Bybel jou kan help om “dinge reg te stel” wanneer jy die druk en probleme hanteer waarvoor gesinne vandag te staan kom.

18. Waarom is dit redelik om die Bybel as ’n gesag op die gebied van huweliksberading te aanvaar?

¹⁸ As jy geneig is om te twyfel dat die Bybel gesinne kan help om gelukkig te wees, kan jy gerus hieroor nadink: Die Een wat die Bybel geïnspireer het, is die Insteller van die huweliksreëling (Genesis 2:18-25). Die Bybel sê dat sy naam Jehovah is (Psalm 83:18, NW). Hy is die Skepper en ‘die Vader, aan wie elke familie sy naam te danke het’ (Efesiërs 3:14, 15). Jehovah neem gesinslewe al sedert die mens se begin waar. Hy weet watter probleme kan ontstaan en het raad gegee oor hoe dit opgelos kan word. Deur die geskiedenis heen het diegene wat Bybelbeginsels werklik in hulle gesinslewe probeer toepas het groter geluk gesmaak.

19-21. Watter hedendaagse ondervindinge toon die krag wat die Bybel het om huweliksprobleme op te los?

¹⁹ ’n Huisvrou in Indonesië was byvoorbeeld ’n kompulsiewe dobbelaar. Jare lank het sy haar drie kinders verwaarloos en gereeld met haar man baklei. Toe het sy die Bybel begin bestudeer. Stelselmatig het die vrou begin glo wat die Bybel sê. Toe sy die raad daarin toegepas het, het sy ’n beter vrou geword. Haar pogings, wat op Bybelbeginsels gebaseer is, het haar hele gesin gelukkig gemaak.

²⁰ ’n Huisvrou in Spanje sê: “Ons was maar net ’n jaar getroud toe ons ernstige probleme begin ondervind het.” Sy en haar man het nie veel in gemeen gehad nie, en hulle het min met mekaar gepraat behalwe wanneer hulle gestry het. Ondanks die feit dat hulle ’n jong dogtertjie gehad het, het hulle tog besluit om van bed en tafel te skei. Maar voordat dit gebeur het, is hulle aangespoor om die Bybel te ondersoek. Hulle het die raad vir getroude mans en vrouens wat daarin is, bestudeer en dit begin toepas. Kort voor lank kon hulle op ’n vreedsame wyse kommunikeer en was hulle gesinnetjie gelukkig en verenig.

²¹ Die Bybel help bejaardes ook. Beskou byvoorbeeld die ondervinding van ’n sekere Japannese egpaar. Die man was opvlieënd en soms gewelddadig. Eers het die egpaar se dogters die Bybel begin bestudeer, ten spyte van hulle ouers se teenstand. Daarna het die vader saam met sy dogters begin studeer, maar die moeder het nog steeds daarteen beswaar gemaak. Deur die jare het sy egter opgemerk watter goeie uitwerking Bybelbeginsels op haar gesin gehad het. Haar dogters het goed vir haar gesorg, en haar man het baie sagmoediger geword. Hierdie veranderinge het die vrou beweeg om self die Bybel te ondersoek, en dit het dieselfde goeie uitwerking op haar gehad. Hierdie bejaarde vrou het herhaaldelik gesê: “Ons het in die ware sin van die woord ’n egpaar geword.”

22, 23. Hoe help die Bybel mense van alle nasionaliteite om geluk in hulle gesinslewe te vind?

²² Hierdie persone is van die talle wat die geheim van gesinsgeluk geleer het. Hulle het die Bybel se raad aanvaar en dit toegepas. Hulle lewe weliswaar in dieselfde gewelddadige, onsedelike wêreld met sy ekonomiese druk waarin ons almal lewe. Hulle is boonop onvolmaak, maar hulle vind geluk deur die wil te probeer doen van die Insteller van die gesinsreëling. Jehovah God is, soos die Bybel sê, “die Een wat jou leer om jouself te bevoordeel‚ die Een wat jou laat tree op die weg waarop jy moet wandel”.—Jesaja 48:17, NW.

²³ Alhoewel die Bybel byna tweeduisend jaar gelede voltooi is, is die raad daarin vandag nog van toepassing. Daarbenewens was dit vir alle mense geskryf. Die Bybel is nie ’n Amerikaanse of Westerse boek nie. Jehovah “het uit een mens elke nasie van die mense gemaak”, en Hy ken alle mense se samestelling (Handelinge 17:26). Bybelbeginsels kan alle mense help. As jy dit toepas, sal jy ook die geheim van gesinsgeluk leer ken.