Tien vrae oor seks beantwoord

1 Was seks die eerste sonde wat Adam en Eva gepleeg het terwyl hulle in die tuin van Eden was?

▪ Antwoord: Baie mense is onder die indruk dat die verbode vrug in die tuin van Eden geslagsomgang voorgestel het. Maar dit is nie wat die Bybel leer nie.

Dink hieraan: Selfs voordat Eva geskep is, het God Adam beveel om nie van die vrug van “die boom van die kennis van goed en kwaad” te eet nie (Genesis 2:15-18). Aangesien Adam alleen was, kon hierdie verbod nie na geslagsomgang verwys het nie. Daarbenewens het God Adam en Eva die ondubbelsinnige opdrag gegee om ‘vrugbaar te wees en baie te word en die aarde te vul’ (Genesis 1:28). Sou ’n liefdevolle God die eerste egpaar beveel om ‘die aarde te vul’—wat natuurlik geslagsomgang vereis het—en hulle dan tot die dood veroordeel omdat hulle sy opdrag gehoorsaam het?—1 Johannes 4:8.

Wat meer is, Eva se man was nie by haar toe sy “van [die verbode] vrugte begin neem en dit geëet [het nie]. Daarna het sy ook vir haar man daarvan gegee toe hy by haar was, en hy het dit begin eet.”—Genesis 3:6.

Laastens, Adam en Eva is nie veroordeel toe hulle omgang gehad het en kinders voortgebring het nie (Genesis 4:1, 2). Dit is duidelik dat die vrugte wat Adam en Eva geëet het, nie geslagsomgang voorgestel het nie, maar letterlike vrugte was wat aan ’n boom gegroei het.

2 Verbied die Bybel seksuele genot?

▪ Antwoord: Die eerste boek van die Bybel openbaar dat dit God was wat die eerste mense as “man en vrou” geskep het. God het verklaar dat sy skepping “baie goed” was (Genesis 1:27, 31). Later het God ’n Bybelskrywer geïnspireer om mans te beveel: “Verheug jou met die vrou van jou jeug . . . Laat haar borste jou te alle tye bedwelm” (Spreuke 5:18, 19). Klink dit vir jou of die Bybel seksuele genot verbied?

Benewens die feit dat God geslagsorgane geskep het om voortplanting moontlik te maak, is dit duidelik dat hy dit ook só geskep het dat ’n egpaar hulle liefde en geneentheid vir mekaar kan uitdruk op ’n manier wat vir albei genotvol is. Omgang kan dus die fisiese en emosionele behoeftes bevredig van ’n man en vrou wat in ’n liefdevolle, intieme verhouding is.

3 Keur die Bybel dit goed as ’n man en vrou saamwoon sonder om wetlik getroud te wees?

▪ Antwoord: Die Bybel sê duidelik dat ‘God hoereerders en egbrekers sal oordeel’ (Hebreërs 13:4). In breë trekke verwys die Griekse woord vir hoerery, por·neiʹa, na die misbruik van die geslagsorgane van persone wat nie met mekaar getroud is nie.a Gevolglik is dit verkeerd in God se oë as ’n paartjie saamwoon—selfs al is hulle van plan om later te trou.

Al is ’n paartjie werklik verlief, vereis God nog steeds dat hulle trou voordat hulle seks het. Dit is God wat ons met die vermoë geskep het om lief te hê. God se hoofeienskap is liefde. Hy het dus goeie rede om daarop aan te dring dat slegs egpare seks mag hê, soos die volgende artikel sal verduidelik.

4 Is poligamie aanvaarbaar?

▪ Antwoord: Vir ’n tyd lank het God mans wel toegelaat om meer as een vrou te hê (Genesis 4:19; 16:1-4; 29:18–30:24). Maar poligamie het nie sy ontstaan by God gehad nie. Hy het Adam slegs een vrou gegee.

God het Jesus Christus die gesag gegee om Sy oorspronklike standaard van monogamie te herstel (Johannes 8:28). Toe Jesus oor die huwelik gevra is, het hy gesê: “Hy wat hulle geskep het, het hulle van die begin af man en vrou gemaak en het gesê: ‘Daarom sal ’n man sy vader en sy moeder verlaat en sy vrou aankleef, en die twee sal een vlees wees.’”—Matteus 19:4, 5.

Een van Jesus se dissipels is later deur God geïnspireer om te skryf: “Laat elke man . . . sy eie vrou hê en elke vrou haar eie man” (1 Korintiërs 7:2). Die Bybel sê ook dat enige getroude man in die Christengemeente aan wie spesiale verantwoordelikhede gegee word, “die man van een vrou” moet wees.—1 Timoteus 3:2, 12.

5 Is dit verkeerd vir egpare om voorbehoedmiddels te gebruik?

▪ Antwoord: Jesus het nie sy volgelinge beveel om kinders te hê nie. En nie een van Jesus se dissipels het so ’n opdrag gegee nie. Nêrens in die Bybel word geboortebeperking uitdruklik afgekeur nie.

Egpare kan dus self besluit of hulle kinders sal hê of nie. Hulle kan ook besluit hoeveel kinders hulle sal hê en wanneer hulle kinders sal hê. As ’n man en vrou besluit om ’n nievrugafdrywende voorbehoedmiddel te gebruik om swangerskap te voorkom, is dit hulle persoonlike besluit en verantwoordelikheid.b Niemand moet hulle oordeel nie.—Romeine 14:4, 10-13.

6 Is dit verkeerd om ’n aborsie te ondergaan?

▪ Antwoord: Lewe is heilig in God se oë, en hy beskou selfs ’n embrio as ’n lewende wese in eie reg (Psalm 139:16). God het gesê dat ’n persoon aanspreeklik gehou sou word as hy ’n ongebore kind beseer. Hy beskou dit dus as moord as iemand ’n ongebore kind doodmaak.—Eksodus 20:13; 21:22, 23.

Maar sê nou ’n noodsituasie tydens bevalling dwing ’n egpaar om tussen die lewe van die moeder en die baba te kies? In so ’n geval sal die egpaar moet besluit wie se lewe hulle sal probeer red.c

7 Laat die Bybel egskeiding toe?

▪ Antwoord: Die Bybel laat egskeiding toe. Maar Jesus het slegs een aanvaarbare rede geïdentifiseer om ’n huwelik te beëindig en gesê: ‘Elkeen wat van sy vrou skei, behalwe op grond van hoerery [seks buite die huwelik], en met ’n ander trou, pleeg egbreuk.’—Matteus 19:9.

God haat egskeiding wanneer dit met listigheid en verraderlikheid gepaardgaan. Hy sal diegene wat hulle maat om onbenullige redes verlaat, aanspreeklik hou, veral as hulle dit doen sodat hulle ’n ander maat kan neem.—Maleagi 2:13-16; Markus 10:9.

8 Keur God homoseksualiteit goed?

▪ Antwoord: Die Bybel veroordeel hoerery uitdruklik, en dit sluit homoseksuele verhoudings in (Romeine 1:26, 27; Galasiërs 5:19-21). Hoewel die Bybel duidelik toon dat God hierdie lewenswyse afkeur, weet ons ook dat “God . . . die wêreld so liefgehad [het] dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê”.—Johannes 3:16.

Hoewel ware Christene nie homoseksuele verhoudings vergoelik nie, is hulle goedhartig teenoor almal (Matteus 7:12). God wil hê dat ons ‘alle soorte mense moet eer’. Ware Christene is dus nie homofobies nie.—1 Petrus 2:17.

9 Is daar enigiets verkeerd met telefoonseks, sexting of kuberseks?

▪ Antwoord: Telefoonseks behels dat persone op ongepaste wyse oor die telefoon oor seks praat of na eksplisiete erotiese boodskappe luister. Sexting is ’n woord wat daarna verwys om erotiese beelde en seksueel eksplisiete teksboodskappe deur middel van selfone aan ander te stuur. Kuberseks behels erotiese interaksie op die Internet.

Die Bybel bespreek nie spesifiek sulke moderne gebruike nie. Maar dit sê wel: “Laat hoerery en elke soort onreinheid of hebsug nie eens onder julle genoem word nie, net soos dit heilige mense betaam; ook nie skandelike gedrag of dwase praatjies of onwelvoeglike skertsery nie, dinge wat nie betaamlik is nie” (Efesiërs 5:3, 4). Gebruike soos telefoonseks, sexting en kuberseks bevorder ’n verwronge beskouing van seks en moedig mense aan om seksuele genot buite die huweliksreëling te soek. Hierdie gebruike help mense nie om hulle geslagsdrange in toom te hou nie, maar bevorder eerder selfsugtige bevrediging.

10 Wat is die Bybel se beskouing van masturbasie?

▪ Antwoord: Masturbasie—doelbewuste selfstimulering wat seksuele prikkeling veroorsaak en tot orgasme lei—word nie spesifiek in die Bybel genoem nie. Maar God se Woord beveel Christene: “Maak dan dood julle liggaamsdele wat op die aarde is ten opsigte van hoerery, onreinheid, [en ongepaste] geslagsdrif.”—Kolossense 3:5.

Masturbasie bevorder ’n verwronge en selfsugtige beskouing van seks. Die Bybel verseker ons dat God diegene wat ’n opregte poging aanwend om met hierdie gewoonte te breek, “krag wat bo die normale is”, kan gee.—2 Korintiërs 4:7; Filippense 4:13.

[Voetnote]