Bybelstandaarde—Waarom daarvolgens lewe?
IS DIE Bybel se beskouing van seks ouderwets en onnodig beperkend? Nee. Inteendeel, die Bybel se beskouing van seks kan ons help om die volgende te vermy:
▪ Seksueel oordraagbare siektes
▪ Buite-egtelike swangerskappe
▪ Die hartseer gevolge van gebroke huwelike
▪ ’n Skuldige gewete
▪ Die gevoel van vernedering omdat jy misbruik is
Ons Skepper, Jehovah God,a wil hê dat ons sy gawes moet geniet en daarby moet baat vind. God is “die Een wat jou leer om jouself te bevoordeel” (Jesaja 48:17). Iemand wat in ooreenstemming met die Bybel se riglyne oor seks lewe, geniet:
▪ God se goedkeuring
▪ Gemoedsrus
▪ Beter gesinsverhoudings
▪ ’n Goeie reputasie
▪ Selfrespek
Maar sê nou jy lewe nie tans volgens die Bybel se sedelike standaarde nie? Kan jy jou lewenswyse verander? Sal God jou vergewe vir wat jy in die verlede gedoen het?
Dink hieraan: Party in die eerste-eeuse Christengemeente was voorheen hoereerders, egbrekers en homoseksuele. Hulle het besluit om hulle lewenswyse te verander, en hulle het wonderlike voordele geniet (1 Korintiërs 6:9-11). Vandag het duisende mense regoor die wêreld ’n soortgelyke besluit geneem. Hulle het losgebreek van ’n promiskue lewenswyse en die voordele geniet wat daarmee gepaardgaan om in ooreenstemming met die Bybel se standaarde te lewe. Kyk byvoorbeeld na die ondervinding van Sarah, wat in die eerste artikel genoem is.
“Ek het onmiddellik verlig gevoel”
Sarah het tot die besef gekom dat haar losbandige lewenswyse haar nie die vryheid en bevrediging gegee het waarna sy gesmag het nie. “Ek het gevoel dat my gewete afgestomp geraak het”, sê sy. “Ek was beskaamd en was bekommerd dat ek swanger sou word of ’n verskriklike siekte sou opdoen. Ek het nooit opgehou glo dat God bestaan nie, en ek het geweet dat my lewenswyse hom seermaak. Ek het vuil gevoel, en dit het aan my geknaag.”
Uiteindelik het Sarah die krag gevind om haar lewenswyse te verander. Sy het haar ouers, wat Jehovah se Getuies is, om hulp gevra. Sy het bekwame Christen- ouer manne in die plaaslike gemeente ook om hulp genader. “Ek is aangenaam verras deur die hartlikheid en liefde van my ouers en die gemeentelike ouer manne”, sê Sarah. “Ek het onmiddellik verlig gevoel.”
Nou het Sarah self twee kinders. “Ek vertel my kinders openlik van die keuses wat ek gemaak het”, sê Sarah. “Ek wil hê hulle moet verstaan wat met my gebeur het omdat ek God se standaarde verontagsaam het. Dit is my doel om hulle te help om te verstaan watter fisiese, verstandelike en emosionele voordele dit inhou as ons volgens God se standaarde lewe wat seks betref. Ek is daarvan oortuig dat God ons sedelike standaarde gee omdat hy nie wil hê dat ons seerkry nie.”
Jy kan ook die voordele geniet wat dit meebring as ’n mens God se liefdevolle leiding volg. Die Bybel belowe: “Die bevele van Jehovah is reg; hulle maak die hart bly; die gebod van Jehovah is rein; dit laat die oë straal. . . . In die onderhouding daarvan is ’n groot beloning.”—Psalm 19:8, 11.b
[Voetnote]
a Jehovah is God se persoonlike naam soos dit in die Bybel geopenbaar word.
b Om meer oor die Bybel se praktiese raad uit te vind, kan jy gerus met Jehovah se Getuies in jou omgewing in verbinding tree. Of jy kan na die gepaste adres op bladsy 4 skryf of ons webwerf www.watchtower.org besoek.
[Lokteks op bladsy 8]
Dikwels veroorsaak diegene wat die Bybel se standaarde ignoreer, emosionele pyn vir ander
[Lokteks op bladsy 9]
Diegene wat volgens Bybelstandaarde lewe, het ’n skoon gewete en beter gesinsverhoudings