HOE IS DIE BYBEL ANDERS? Eertydse orakels was berug vir hulle dubbelsinnigheid en onbetroubaarheid, en hedendaagse horoskope is geensins beter nie. Futurologie, oftewel toekomskunde, is gebaseer op huidige tendense en probeer selde spesifieke gebeurtenisse eeue vooruit voorspel. In teenstelling hiermee is Bybelprofesieë gedetailleerd en word dit altyd bewaarheid, al voorspel dit “van ouds af die dinge wat nog nie gedoen is nie”.—Jesaja 46:10.

’N VOORBEELD: In die sesde eeu VHJ het die profeet Daniël ’n visioen gesien waarin voorspel is dat Medo-Persië vinnig deur Griekeland tot ’n val sou gebring sou word. Dit het ook voorspel dat sodra die seëvierende koning van Griekeland “magtig geword” het, sy koningskap “gebreek” sou word. Wie sou sy plek inneem? Daniël het geskryf: “Daar sal vier koninkryke uit sy nasie opstaan, maar nie met sy krag nie.”—Daniël 8:5-8, 20-22.

WAT GESKIEDKUNDIGES SÊ: Meer as 200 jaar ná Daniël se dag het Aleksander die Grote koning van Griekeland geword. Binne tien jaar het Aleksander die Medo-Persiese Ryk verower en die Griekse heerskappy uitgebrei tot by die Indusrivier (in hedendaagse Pakistan). Maar hy het skielik op 32-jarige ouderdom gesterf. Later het ’n veldslag naby Ipsus in Klein-Asië sy ryk laat verbrokkel. Die vier oorwinnaars van daardie veldslag het die Griekse Ryk uiteindelik onder mekaar verdeel. Maar nie een van hulle het so magtig soos Aleksander geword nie.

WAT DINK JY? Kan enige ander boek aanspraak maak op so ’n rekord van vervulde profesie? Of is die Bybel uniek?

HOE IS DIE BYBEL ANDERS? Eertydse boeke bevat dikwels misleidende en gevaarlike idees wat geheel en al deur die moderne wetenskap weerlê is. Selfs vandag moet skrywers handboeke in ooreenstemming met nuwe ontdekkings bywerk. Maar die Bybel sê dat die Skepper die Outeur daarvan is en dat sy Woord ‘vir ewig bly’.—1 Petrus 1:25.

’N VOORBEELD: Die Mosaïese Wet het die Israeliete beveel om hulle ontlasting “buite die kamp” te begrawe (Deuteronomium 23:12, 13). As die Israeliete aan die dooie liggaam van ’n dier of mens geraak het, moes hulle hulle met water was (Levitikus 11:27, 28; Numeri 19:14-16). Destyds is melaatses onder kwarantyn geplaas totdat ’n liggaamlike ondersoek bevestig het dat hulle nie meer aansteeklik is nie.—Levitikus 13:1-8.

WAT DIE MODERNE GENEESKUNDE SÊ: Behoorlike rioolverwydering, handewassery en kwarantyn is nog steeds doeltreffende maniere om siekte te voorkom. As daar geen toilette of ander sanitasiestelsels in die omgewing is nie, beveel die Amerikaanse Sentrums vir Siektebeheer (CDC) die volgende aan: “Jy moet jou ten minste 30 meter van enige waterbron ontlas en jou ontlasting dan begrawe.” Wanneer gemeenskappe op ’n veilige manier van ontlasting ontslae raak, verminder hulle, volgens die Wêreldgesondheidsorganisasie, diarreale siektes met 36 persent. Minder as 200 jaar gelede het dokters besef dat hulle baie pasiënte besmet het omdat hulle nie hulle hande gewas het nadat hulle aan lyke geraak het nie. Die CDC noem handewassery nog steeds “die heel doeltreffendste manier om die oordrag van siektes te voorkom”. En wat van die gebruik om melaatses of diegene met ander siektes onder kwarantyn te plaas? Die Saudi Medical Journal het onlangs gesê: “In die beginstadium van ’n epidemie is afsondering en kwarantyn dalk die enigste en laaste uitweg om aansteeklike siektes doeltreffend te bekamp.”

WAT DINK JY? Sou jy verwag dat enige ander eertydse heilige boek met die moderne wetenskap ooreenstem? Of is die Bybel uniek?

HOE IS DIE BYBEL ANDERS? Selfs eertydse verslae wat uit dieselfde tyd dateer, weerspreek mekaar dikwels. Boeke wat deur verskillende mense, op verskillende plekke en op verskillende tye geskryf is, is selde in volkome harmonie met mekaar. Tog sê die Bybel dat al 66 boeke waaruit dit bestaan net een Outeur het—en dit bevat een harmoniese boodskap.—2 Timoteus 3:16.

’N VOORBEELD: Moses, ’n herder van die 16de eeu VHJ, het in die eerste boek van die Bybel geskryf dat ’n “saad” sou verskyn om die mensdom te red. Hierdie boek het later voorspel dat die saad ’n nakomeling van Abraham, Isak en Jakob sou wees (Genesis 3:15; 22:17, 18; 26:24; 28:14). Sowat 500 jaar later het die profeet Natan geopenbaar dat die saad in die koninklike lyn van Dawid sou kom (2 Samuel 7:12). Eenduisend jaar daarna het die apostel Paulus verduidelik dat die saad sou bestaan uit Jesus en ’n groep van sy gekose volgelinge (Romeine 1:1-4; Galasiërs 3:16, 29). Uiteindelik, teen die einde van die eerste eeu HJ, het die laaste boek van die Bybel voorspel dat lede van die saad van Jesus sal getuig terwyl hulle op die aarde is, na die hemel opgewek sal word en 1 000 jaar lank saam met hom sal regeer. Die saamgestelde saad sal die Duiwel vernietig en die mensdom red.—Openbaring 12:17; 20:6-10.

WAT BYBELKOMMENTATORS SÊ: Ná ’n deeglike ondersoek van die Bybel se 66 boeke het Louis Gaussen geskryf dat hy verbaas was oor “die indrukwekkende harmonie van hierdie boek, wat oor ’n tydperk van eenduisend-vyfhonderd jaar deur talle mense geskryf is, . . . en tog het hulle een en dieselfde oogmerk nagestreef, en voortdurend, asof hulle dit self verstaan het, na daardie een groot doel voortbeweeg, naamlik die geskiedenis van die wêreld se verlossing deur die Seun van God”.—Theopneusty—The Plenary Inspiration of the Holy Scriptures.

WAT DINK JY? Sou jy verwag dat ’n boek wat oor ’n tydperk van meer as 1 500 jaar deur ongeveer 40 manne geskryf is, in volkome harmonie met mekaar sou wees? Of is die Bybel uniek?