Sien om na Koninkryksaad
1 ’n Boer bewerk die land en saai die saad, en watter vreugde en tevredenheid ondervind hy tog wanneer die saad opkom! Hoewel dit baie inspanning van hom verg, sal hy vreugdevol hard werk in die hoop dat hy ’n goeie oes sal insamel. Jesus het “die woord van God” vergelyk met saad wat gesaai word (Luk. 8:11). Ons moet derhalwe ’n volle deelname hê aan die saai van Koninkryksaad, dit wil sê, “die woord van die koninkryk”, in die hoop dat dit persone sal bereik wie se harte soos “die goeie grond” is wat in Jesus se illustrasie beskryf word.—Matt. 13:19, 23; Luk. 8:15.
2 Het jy die voorreg gehad om verlede maand van die ouer boeke te versprei, of het jy goeie Skriftuurlike besprekings met persone in jou gebied gehad? Kan jy meer doen om hulle belangstelling in die Koninkryksboodskap aan te wakker? Herbesoeke is ’n doeltreffende manier om om te sien na die belangstelling wat getoon is. Dit kan dikwels binne ’n dag of twee na die eerste besoek gedoen word.
3 Gedurende Februarie het ons verdere geleenthede om die ouer publikasies aan te bied. ’n Gedagte in een van hulle is dalk net wat nodig is om die belangstellende se begeerte vir geestelike vooruitgang aan te wakker. Wees ook voorberei om ’n paar gedagtes te deel oor die seëninge wat die Koninkryk vir diegene met ontvanklike harte sal bring.
4 Hulppionierdiens sal sommige die geleentheid bied om hulle diens uit te brei, herbesoeke te doen en moontlik nuwe studies te begin. Talle broers en susters gryp elke jaar die geleentheid aan om in Maart en April hulppionierdiens te doen. Vanjaar het April vyf Saterdae, ’n sterk voordeel vir diegene wat voltyds sekulêre werk doen. Jong verkondigers kan dalk die wêreld se Paasvakansietydperk gebruik om aan die veldbediening deel te neem.
5 In ’n paar gemeentes het die hele liggaam van ouere manne en bedieningsknegte sowel as hulle vrouens ’n goeie voorbeeld gestel deur hulppionierdiens te doen. Verlede April het een gemeente 83 hulp- en 12 gewone pioniers gehad. Wat ’n bron van bemoediging vir die hele gemeente! Mag Jehovah julle sorgvuldige beplanning seën!
HERBESOEKE KAN STUDIES WORD
6 As jy doeltreffend wil wees wanneer jy herbesoeke doen, moes jy gepaste aantekeninge op jou huis-tot-huisverslag gemaak het. Dit sal jou help om te bepaal watter onderwerp jy moet bespreek wanneer jy teruggaan. Sommige verkondigers hou daarvan om die huisbewoner met die eerste besoek die meeste van die praatwerk te laat doen en op daardie manier uit te vind wat hy op die hart het en watter onderwerpe vir hom van belang is. As die persoon verkeerde idees uitspreek, sal dit verstandig wees om aanvanklik nie op sulke kommentare te konsentreer nie, maar eerder die beloftes van die Koninkryk te beklemtoon.
7 Die Bybelstudiewerk is die belangrikste manier waarop persone gehelp word om van Jehovah se voornemens te leer. Jy kan iets in die publikasies gebruik wat jy meen vir die persoon van besondere belang sal wees. Vra ’n vraag, en toon dan hoe die lektuur die Bybel se antwoord geredelik voorsien. Bespreek ’n paar paragrawe as die tyd dit toelaat. ’n Positiewe gesindheid toon dat ons opreg daarvan oortuig is dat wat ons het goed is. As jy jou doelwit voor oë hou, sal jy ook spoedig goeie Bybelstudies kan begin. Jy kan die boek gebruik wat jy by die huisbewoner gelaat het of ’n ander een wat hy reeds het. Sodra jy meen die tyd reg is, kan julle na die Paradys op aarde-boek oorgaan.
8 Is dit nie fassinerend om letterlike saad te saai en dan te kyk hoe die plante groei wanneer ons daarna omsien nie? Ons sal selfs groter tevredenheid geniet wanneer ons “die woord van die koninkryk” sien wortelskiet en groei in die harte van individue met wie ons studeer. Wanneer sulke persone in die waarheid kom, word hulle ’n bron van lof en eer vir Jehovah. Mag hy ons pogings mildelik seën wanneer ons Koninkryksaad saai en dan tot sy lof omsien na wat dit voortbring!