“Trek uit jou land en uit jou familie”

IN November 1981 het Tony en sy vrou Margaret met hulle twee kinders van 9 en 11 van Engeland na die weste van Ierland verhuis. Waarom? Om met die openbare predikingswerk van Jehovah se Getuies te help. Slegs ’n paar weke later het moeilikhede begin opduik. Dit was ’n bitter koue winter. Tony kon, teen die verwagting in, geen werk kry nie, en hy het dus ’n onderneming begin wat skoorstene skoonmaak. Hy was nog nie baie bedrewe nie en het na ’n dag se harde werk vol roet tuisgekom. Stel jou voor hoe verslae hy was toe hy uitgevind het dat al die water in die pype verys het en hy net ’n keteltjie water gehad het om mee te was! “Ek het net vir ’n oomblik begin wonder waarom ons van ons tuiste en ons familie af weggetrek het”, het hy erken.

Dit verg groot geloof om van jou familie en vriende af weg te trek om God in groter mate te dien en dan ondanks moeilikhede te volhard. Byna 4 000 jaar gelede was die aartsvader Abraham iemand wat sulke geloof getoon het. Die dissipel Stefanus het van hom gesê: “Die God van die heerlikheid het verskyn aan ons vader Abraham toe hy in Mesopotamië was, voordat hy in Haran gewoon het, en [God het] vir hom gesê: Trek uit jou land en uit jou familie, en kom na die land wat Ek jou sal wys.”—Handelinge 7:2, 3.

Vandag is daar natuurlik niemand wat so ’n spesifieke opdrag van God ontvang het om uit sy of haar geboorteland weg te trek nie. Duisende Christene in hierdie 20ste eeu het hulle sake egter só gereël dat hulle dieselfde as Abraham kon doen—om na nuwe gebiede te verhuis ten einde God se belange te bevorder (Mattheüs 24:14; 28:19; Romeine 10:13-15). Hulle het besef dat ‘die saailand die wêreld is’ en dat daar op talle plekke ’n groot behoefte aan meer hulp is (Mattheüs 13:38). Net soos Jesaja, het hulle kragdadig gereageer op Jehovah se woorde: “Wie sal Ek stuur? En wie sal vir ons gaan?” Omdat hulle gesien het watter behoefte daar is, het hulle ook geantwoord: “Hier is ek, stuur my.”—Jesaja 6:8.

Waarom doen hulle dit?

Watter soort mense verhuis na sulke gebiede? Hulle kom nie uit enige besondere ouderdomsgroep en het geen spesifieke agtergrond nie, nòg gee hulle voor dat hulle buitengewone vermoëns het. Hulle is maar net mense wat, ten eerste, gewillig is om persoonlike begeertes en geriewe ter wille van God se Koninkryk prys te gee. Dit is soos toe Abraham uit die welvarende stad Ur weggetrek het om in ’n vreemde land in tente te woon.—Hebreërs 11:8-10.

“Ons het altyd besef hoe noodsaaklik dit is om soveel moontlik in Jehovah se diens te doen”, het een egpaar gesê wat in 1983 met hulle twee tienderjarige seuns verhuis het. “Ons het soos die apostel Paulus gevoel toe hy gesê het: ‘Die oorblywende tyd het kort geword’; daarom het ons besluit om ‘na lerland oor te gaan’ en met die werk in daardie land te help.” (1 Korinthiërs 7:29, NW; vergelyk Handelinge 16:9.) Volgens een vrye vertaling is die strekking van Paulus se woorde in 1 Korinthiërs 7:29: “Die belangrike ding wat ons moet onthou, is dat die tyd kort is”, en so ook ons geleenthede om die Here se werk te doen (Die Lewende Bybel). Talle getroue Christene het verhuis na waar hulle ook al nodig is sodat hulle hierdie geleenthede kan aangryp voordat die kans verspeel is, en die kosbare tyd wat nog oor is ten beste kan benut.

“Ons het dit as ’n goeie geleentheid beskou om altyd ‘oorvloedig in die werk van die Here te wees’” (1 Korinthiërs 15:58). “Ons wou Jehovah dien waar ons die meeste hulp kon verleen.” “Ons het besef dat ons finansieël in ’n posisie was om te kan verhuis en dat, as ons iewers in ’n behoefte kon voorsien, dit verkeerd van ons sou wees as ons dit nie doen nie.” Sulke woorde beskryf die gevoelens van talle wat stappe gedoen het om te dien waar hulle nodiger is. Hierdie Christene het die vermaning in Spreuke 3:9, 27 (LB) ter harte geneem: “Eer die Here met jou besittings en met die mooiste van jou oes. As daar aan iemand iets goed gedoen moet word, doen dit dan as jy in ’n posisie is om dit te doen.” Nadat hulle hul omstandighede noukeurig ondersoek het, het hulle besluit dat hulle ‘in ’n posisie is’ om blywende goed aan hulle medemense in ander wêrelddele te doen.—Kyk ook Romeine 1:14, 15; Lukas 10:27-37.

Jy is moontlik in ’n posisie om te verhuis na waar hulp nodig is. Dan sal jy belangstel in hoe sommige wat reeds verhuis het die volgende vrae beantwoord.

Wat moet ’n mens oorweeg voordat jy verhuis?

Raadpleeg die ouere manne in jou eie gemeente voordat jy verhuis. Vind uit wat hulle van jou planne dink (Spreuke 24:6). Daar is dalk redes waarom so ’n stap in jou geval nie raadsaam sal wees nie, en hulle sal jou help om jou situasie behoorlik te evalueer. ’n Persoon wat na elders wil verhuis, moet byvoorbeeld geestelik sterk wees as hy ’n aanwins vir die nuwe gebied wil wees en nie ’n las nie.

Werk deur die takkantoor van Jehovah se Getuies in die land waarheen jy hoop om te verhuis—of deur jou plaaslike takkantoor as jy hoop om na ’n ander deel van jou eie land te verhuis. Bring, indien moontlik, ’n besoek aan die voorgenome gebied om iets van die land en die mense te wete te kom voordat jy ’n finale besluit neem.

Ontleed jou motiewe alvorens jy verhuis. Abraham het weggetrek omdat hy ’n diep begeerte gehad het om God se wil uit te voer, en nie weens ’n avontuurgees of ’n persoonlike gier of gril nie. Oorweeg al die betrokke faktore noukeurig. Sal daar dalk ’n taalprobleem wees? Kan jy jou by ’n ander kultuur en klimaat aanpas? Het jy enige spesiale gesondheidsbehoeftes? Is al die betrokke gesinslede heeltemal ten gunste van die verhuising? Het jy jou finansiële sake so gereël dat jy ’n stap van die aard met welslae kan doen? (Vergelyk Lukas 14:28.) Hierdie en talle ander faktore verg noukeurige en biddende oorweging.—Efesiërs 6:18.

Watter moeilikhede moet jy dalk oorkom?

Jy kom dalk moeilikhede teë nog voordat jy verhuis. Nie almal sal sake net soos jy beskou nie. Jy hoor moontlik onbedagsame of negatiewe opmerkings. Maar onthou dat selfs die apostel Petrus negatief gereageer het toe hy gehoor het wat met Jesus sou gebeur. Pleks van Jesus aan te spoor om onwrikbaar Jehovah se wil te doen het Petrus gesê: “Mag God dit verhoed, Here, dit sal U nooit oorkom nie!” Wees vasbeslote om net soos Jesus enige negatiewe praatjies van die aard teen te staan.—Mattheüs 16:22, 23.

Heimwee kan ’n ernstige probleem wees nadat jy jou in die nuwe gebied gevestig het. Liefde vir Jehovah en vir die mense wat die goeie nuus van sy Koninkryk moet hoor, sal jou help om dit die hoof te bied. Talle probleme kan makliker gemaak word as jy jou nuwe woonplek waarlik jou tuiste maak. Vermy negatiewe vergelykings met jou vorige tuiste, want dit kan ontevredenheid en teësinnigheid tot gevolg hê. Dink aan Jehovah se uitnodiging in Maleagi 3:10 wanneer jy voor moeilikhede te staan kom: “Beproef My tog hierin, . . . of Ek vir julle nie die vensters van die hemel sal oopmaak en op julle ’n oorvloedige seën sal uitstort nie.”

Watter seëninge kan dit meebring?

Hoe meer jy betrokke raak by die werk om die goeie nuus te verkondig, des te meer sal die gehalte van jou bediening verbeter. Jy sal meer vaardighede as ’n onderrigter van God se Woord ontwikkel. Dit sal nie net vir jou nie, maar ook vir almal wat na jou luister voordele bring (1 Timotheüs 4:15, 16). Wat ’n voorreg is dit tog om tuisbybelstudies te hou en regskape mense van Babiloniese, valse leerstellings te help bevry! Jy kan die vreugde smaak wat deur die apostel Paulus beskryf is toe hy aan sommige wat hy gehelp het om Christene te word, geskryf het: “Wie anders as julle is ons hoop of blydskap of kroon van roem?” (1 Thessalonicense 2:19). Ja, dit is ’n vreugde en ’n seën om individue en gemeentes te help om geestelik vooruit te gaan.

Abraham is “’n vriend van God” genoem omdat hy God se leiding geredelik gehoorsaam het (Jakobus 2:21-23; Jesaja 41:8). Jý kan ook jou persoonlike verhouding met God versterk. Namate jy jou inspan in sy diens, sal jy sy liefdevolle sorg en steun ondervind. Jy sal beter verstaan wat die psalmis bedoel het toe hy gesê het: “Smaak en sien dat die HERE goed is” (Psalm 34:9).

Tony, Margaret en hulle kinders het voor probleme te staan gekom toe hulle verhuis het om Jehovah in ’n groter mate te kan dien. Maar hulle het dit met Jehovah se hulp suksesvol te bowe gekom. “Ons het nie toegelaat dat moeilikhede ons van ons vreugde beroof nie”, het hulle gese. “In situasies soos die waarmee ons te kampe gehad het, het ons geleer om meer op Jehovah te vertrou, en ons het sy hand in alles gesien namate die een probleem na die ander weggesmelt het.” Duisende hedendaagse knegte van Jehovah het soortgelyke geloof getoon deur te verhuis na waar daar ook al meer hulp nodig is. Kan jy dit ook doen?

[Prent op bladsy 23]

Gesinsbesprekings kan bydra tot die sukses van verhuising