Gee jy ’n rede vir die hoop in jou?
1 ’n Broer is onlangs gevra: “Glo jy dat jou godsdiens die enigste regte een is?” Hy het geantwoord: “Natuurlik glo ek dit. As ek dit nie geglo het nie, sou ek by ’n ander een aangesluit het.” Toe het hy vriendelik verduidelik wat Jehovah se Getuies glo en die Skriftuurlike grondslag daarvoor uiteengesit. Hy het die vermaning gevolg: Wees “altyd gereed om julle te verdedig voor iedereen wat van julle ’n rede verlang vir die hoop wat in julle is, maar doen dit met sagaardigheid en diepe agting”.—1 Pet. 3: 15, NW.
2 Daar is daagliks geleenthede om ’n rede vir ons hoop te gee. By die werk wonder medewerkers dalk waarom jy nie deel het in hul verdorwe gesprekke nie. By die skool vra onderwysers of medeleerlinge miskien waarom jy nie vakansiedae vier nie. Bure kan vra waarom jy so dikwels vergaderinge toe gaan. Sulke geleenthede kan ons die kans gee om die apostel Petrus se raad toe te pas. As jy vooraf gedink het hoe jy kan antwoord, kan jy persone wat opreg vrae stel, help om te leer om Jehovah saam met ons te dien.
BEREIK LUISTERAARS SE HARTE
3 Dit is noodsaaklik om ’n gemeenskaplike grondslag te lê as jy ’n gesprek met iemand wil voer. Dit geld wanneer ons in die velddiens is of informeel gesels. ’n Uitstekende Bybelse voorbeeld is in Handelinge 17:22-31 opgeteken. Let op hoe die apostel Paulus uit die staanspoor op doeltreffende wyse ’n gemeenskaplike grondslag gelê het en hoe hy dit dwarsdeur die bespreking behou het. As gevolg hiervan is sommige van die waarheid oortuig.—Kyk Skoolhandleiding, bladsye 156-158, paragrawe 15-24.
4 Probeer om ’n gemeenskaplike grondslag te vind om gesprekke te begin wanneer jy gedurende Januarie van huis tot huis gaan. Ons het met dieselfde probleme as die huisbewoners te kampe. Besorgdheid oor die veiligheid van ons kinders en oor hulle toekoms, die gebrek aan ware vrede en toenemende misdadigheid en dwelmmisbruik tel hieronder. God se Koninkryk is die oplossing, en ons ‘Onderwerp vir gesprekke’ beklemtoon dus sommige van die seëninge van die Koninkryk.
5 Gemeentes wat van die sakformaatboeke in voorraad het wat vir gebruik in hierdie kampanje aangegee word, moet hulle teen ’n bydrae van R1,00 elk aanbied. Beklemtoon spesifieke informasie wat die aandag op God se Koninkryk vestig wanneer jy sulke publikasies aanbied. Indien ouer publikasies nie beskikbaar is nie, kan enige ander sakformaatpublikasie teen ’n bydrae van R2,00 elk aangebied word.
TYDENS HERBESOEKE
6 Wanneer jy terugkeer om voort te bou op belangstelling wat getoon is, moet jy voorberei wees om die rede vir jou hoop in meer besonderhede te verduidelik. Bou op die gemeenskaplike grondslag wat jy voorheen met die huisbewoner gelê het. Luister na sy beskouings. Redeneer met hom. Wek die afwagting dat toekomstige besoeke meer heilsame informasie sal verskaf wat hom ’n verdere rede vir hoop kan gee.
7 Ons moet elke geleentheid wat hom voordoen om ’n rede vir die hoop in ons te gee, benut. Hetsy jonk of oud, ons moet verstaanbare, duidelike en oortuigende redes vir ons geloof kan gee. Mag ons almal sterk geloof openbaar deur ywerig ’n rede vir ons hoop te gee.