’n Nuwe program vir die bou van Koninkryksale
Jehovah kom ongetwyfeld sy belofte na om sy huis te leer en hulle in sy weë te lei (Jes. 54:13). Hy tref al baie eeue lank reëlings vir verenigde aanbidding waarvan lewensbelangrike onderrig deel uitmaak (Deut. 31:12, 13; Neh. 8:1-9; Ps. 122:1). Dit het sy getroue volk tot groot voordeel gestrek. Omdat hulle streng by sy raad gebly het, kon hulle afgeskeie van die wêreld bly en ’n hegte band met medegelowiges behou (Ex. 34:11-16; 2 Kor. 6:14-18). Ons word veral in hierdie laaste dae gemaan om gereeld te vergader sodat ons nie net deur Jehovah onderrig kan word nie, maar mekaar ook wedersyds kan bemoedig en tot liefde en goeie werke kan aanspoor.—Rom. 1:11, 12; Hebr. 10:23-25.
Christene vergader al sedert die eerste eeu in huise sowel as in openbare plekke vir aanbidding (Hand. 2:42, 46, NW; 12:12). Maar veral sedert 1935, toe daar aangekondig is dat ’n nuwe vergaderplek wat in Hawaii in aanbou was ’n Koninkryksaal genoem gaan word, het gemeentes van Jehovah se Getuies in alle wêrelddele hulle eie kenmerkende plek van aanbidding probeer kry en dit met hierdie naam geïdentifiseer. Gevolglik sien ons nou Koninkryksale dwarsdeur die wêreld, en elke jaar word nog gebou of op ander maniere aangeskaf as gereelde vergaderplekke vir gemeentes.
Vir Jehovah se Getuies is die Koninkryksaal die belangrikste gebou in enige gemeenskap. Dalk is dit ’n mooi gebou, maar al is die buitekant betreklik eenvoudig word dit besonder waardeer as ’n sentrum van ware aanbidding en die middelpunt van teokratiese bedrywighede in die gemeenskap. Dit is ’n bewys dat die goeie nuus van die Koninkryk plaaslik verkondig word. Dit is ’n plek waar almal wat van hulle geestelike behoefte bewus is ware geestelike verkwikking en onderrig ontvang.—Matt. 5:3, NW.
DIE VRAAG NA KONINKRYKSALE
Verslae uit die veld toon dat Jehovah voortgaan om die insamelingswerk te ‘bespoedig’ terwyl die einde van hierdie stelsel vinnig nader kom. Sy woorde by monde van die profeet Jesaja dat “die kleinste . . . ’n geslag [sal] word en die geringste ’n magtige nasie” is inderdaad bewaarheid (Jes. 60:22). In Suid-Afrika was daar die afgelope paar jaar byvoorbeeld ’n puik vermeerdering in die aantal verkondigers. Baie nuwe gemeentes is as gevolg hiervan gestig, en baie nuwe Koninkryksale moes gebou word om tred te hou met hierdie vermeerdering. Daarbenewens het ons vroeg in 1983 toestemming gekry om Koninkryksale in Swart dorpsgebiede te bou. Gedurende die afgelope vyf jaar is daar dus 102 Koninkryksale gebou, hoofsaaklik in die Swart veld. Bykans alle Koninkryksale wat in die Swart dorpsgebiede gebou is, is gefinansier deur Koninkryksaallenings wat deur die Be-stuursliggaam voorsien is. Geen lenings is aan enige van die Blanke gemeentes beskikbaar gestel nie. Hulle moes reël om lenings by bougenootskappe of elders te kry. Weens die hoë rentekoerse gaan hierdie gemeentes onder ’n swaar las gebuk, aangesien hulle amper dubbel die geleende bedrag moet terugbetaal.
Die aankondiging by die “Godvrugtige Toegewydheid”-Streekbyeenkoms dat die Genootskap sy eie Koninkryksaalfonds kan stig, is gevolglik met groot entoesiasme verwelkom. Dit sal geld aan alle gemeentes beskikbaar stel wat vir ’n Koninkryksaallening in aanmerking kom. Die doel van die fonds is om nuwe Koninkryksale te bou of om bestaande sale te vergroot. Hier is ’n paar besonderhede wat al die broers sal help om beter te verstaan hoe die nuwe reëling presies sal werk en hoe elkeen dit in die toekoms kan ondersteun.
DIE BEHOEFTE
Die publikasie Georganiseer om ons bediening te vervul sê op bladsy 61 aangaande Koninkryksale: “Daar die Koninkryksaal ’n plek van aanbidding is, moet dit nie ’n spoggerige gebou wees om ander te beïndruk nie. Hoewel die vorm van plek tot plek sal wissel, is die doel daarvan funksioneel. (Vergelyk Handelinge 17: 24.) Dit moet ’n gemaklike en gerieflike plek wees vir Christenvergaderinge wat ons help om geestelik te groei en om van Jehovah te leer en wat ons aanspoor om aan sy Koninkryksdiens deel te neem.”As ’n sentrum van Bybelonderrig in die gemeenskap dra die Koninkryksaal ook direk daartoe by dat die goeie nuus in ons gemeente se gebied verkondig word.
Wanneer gemeentes te groot word en die Koninkryksaal beknop raak, raak party, veral nuwelinge, ontmoedig en woon hulle vergaderinge nie gereeld by nie. Dit word vir die ouere manne en bedieningsknegte moeiliker om in die broers en susters se behoeftes te voorsien deur die nodige persoonlike hulp te verleen. Wanneer die Koninkryksaal reeds deur drie of meer gemeentes gebruik word, huiwer die ouere manne om die stigting van ’n nuwe gemeente aan te beveel omdat die nuwe gemeente nêrens sal hê om bymekaar te kom nie.
Wanneer meer as twee gemeentes ’n Koninkryksaal gebruik, raak dit vir hulle moeilik om gerieflike reëlings te tref vir spesiale geleenthede, soos die besoek van die kringopsiener of die jaarlikse herdenking van Christus se dood; dit kan dit moeilik maak om toereikende velddiensreëlings vir elk van die gemeentes te tref. Wanneer ’n Koninkryksaal daagliks onder hierdie omstandighede gebruik word, word sekere probleme partykeer met instandhouding of herstelwerk ondervind. Op plekke waar Koninkryksale baie dikwels gebruik word, was bure al ontevrede weens verkeersophopings of soortgelyke probleme wat met te min spasie gepaard gaan. Wanneer die broers ver moet ry om by die saal te kom, maak dit vergaderingbywoning ongerieflik en belemmer dit die gemeente se groei. Hoewel prysenswaardige vooruitgang met die bou van Koninkryksale gemaak is, het ons nog honderde nodig, veral in die Swart dorpsgebiede en op die platteland, om geskikte plekke van aanbidding vir ons broers en nuwelinge wat na Jehovah se huis van aanbidding optrek te voorsien (Miga 4:2-4). En omdat die einde van hierdie stelsel nou vinnig nader kom, is dit dringend dat nog Koninkryksale gebou word.
WAT GEDOEN KAN WORD
Soos julle seker weet, het die Genootskap deur die jare heen die bou van Koninkryksale aangemoedig en hulp verleen deur lenings uit beskikbare fondse toe te staan. Ons is deeglik bewus van die nodigheid om dinge te bespoedig. Ons het die huidige behoeftes van die gemeentes goed in oënskou geneem, en hierdie ondersoek het daartoe gelei dat ’n nuwe reëling ingestel is om die nodige hulp op ’n regverdige manier te verskaf wat nie ’n onnodige las op enigeen van die broers sal plaas nie. Trouens, die basiese Bybelbeginsel waarop hierdie reëling gebaseer is, is die een wat die apostel Paulus in 2 Korinthiërs 8:14, 15 gemeld het. Hy was besorg oor die materiële behoeftes van die broers in Palestina en het gepaste voorstelle gedoen oor hoe die gemeentes in Klein-Asië hulp kon verleen.
Die apostel het melding gemaak van Jehovah se liefdevolle reëling om in die Israeliete se behoeftes gedurende hulle veertigjarige reis deur die woestyn te voorsien, en gesê: “Dat volgens gelykheid julle oorvloed in hierdie tyd hulle gebrek kan aanvul, sodat ook hulle oorvloed julle gebrek kan aanvul en daar gelykheid kan wees. Soos geskrywe is: Hy wat baie gehad het, het nie te veel gehad nie; en hy wat weinig gehad het, het nie te min gehad nie.” (Vergelyk Exodus 16:18.) Maar presies hoe sal daar in hierdie huidige behoefte aan nuwe Koninkryksale voorsien word?
DIE GENOOTSKAP-KONINKRYKSAALFONDS—HOE DIT SAL WERK
Die doel van hierdie reëling is om geld bymekaar te maak om Koninkryksale te bou of bestaande sale te vergroot. Die reëling tree op 1 Maart 1990 in werking. Gemeentes in Suid-Afrika en buurlande wat onder die Suid-Afrikaanse tak werk, sal ’n spesiale bydraebussie aanbring wat “Genootskap-Koninkryksaalfonds” gemerk is. Twee etikette met die woorde “BYDRAES VIR GENOOTSKAP-KONINKRYKSAALFONDS” word aan elke gemeente gestuur om die bussie vir hierdie spesiale fonds te identifiseer. Hierdie reëling sal elkeen in die gemeente wat van tyd tot tyd ’n vrywillige bydrae daarin wil gooi die geleentheid bied om dit te doen. Sulke bydraes sal aan die einde van elke maand aan die Genootskap gestuur word en sal uitsluitlik gebruik word om gemeentes te help wat geld nodig het om ’n Koninkryksaal te bou. Die Genootskap sal ontvangs van alle bydraes erken, en die Genootskap-Koninkryksaalfonds sal met daardie bedrag gekrediteer word.—Vergelyk 2 Konings 12:9-16.
Die gemeentes wat tans hulle eie Koninkryksaal afbetaal en ’n bydraebussie vir die boufonds het, mag natuurlik voortgaan om daardie bussie te gebruik. As hulle ook graag ander gemeentes wil help, kan hulle ’n bydraebussie vir die Genootskap-Koninkryksaalfonds aanbring.
Dit sal ’n tydjie duur voordat daar genoeg geld in die Genootskap-Koninkryksaalfonds is om lenings aan ’n aantal gemeentes beskikbaar te stel. Die Bestuursliggaam het liefdevol ingestem om intussen Koninkryksaallenings van die buiteland af te voorsien. Gemeentes kan dus voortgaan om Koninkryksaallenings by die Genootskap aan te vra. Dit geld vir Swart, Blanke, Indiër- en Kleurlinggemeentes. Die doel van Koninkryksaallenings is om Koninkryksale te bou, geboue te koop wat omgebou kan word of om bestaande Koninkryksale te verander en te vergroot. Sulke lenings sal deur die gemeente of gemeentes wat die Koninkryksaal gebruik, terugbetaal word. Die gemeentes sal voortgaan om rente op hierdie lenings te betaal om die uitgawes te dek wat met hierdie reëling verband hou en ook om hierdie fonds aan te vul.
GEMEENTES WIE SE KONINKRYKSALE AFBETAAL IS
Party gemeentes besit reeds hulle Koninkryksaal en skuld feitlik niks meer daarop nie. Onder hierdie nuwe reëling sal sulke gemeentes dalk graag tot die Genootskap-Koninkryksaalfonds wil bydra om ander gemeentes te help om ’n geskikte saal te kry. Hulle besluit miskien om dieselfde bedrag opsy te sit as toe hulle hul lening afbetaal het en sal sodoende in staat wees om maandeliks tot die Genootskap-Koninkryksaalfonds by te dra. As so ’n reëling redelik lyk, kan die ouere manne die saak deur middel van ’n resolusie aan die gemeente voorlê en die gemeente hulle begeerte laat uitspreek om op hierdie manier te help.
GEBRUIK DIE BETALINGSVORM
Sekretarisse moet die bygewerkte “Remittance and Credit Request”-vorm (S-AB-20) gebruik wanneer die maandelikse bydrae tot die Genootskap-Koninkryksaalfonds aan die Genootskap gestuur word. ’n Voorraad van hierdie vorms sal binnekort aan elke gemeente gestuur word. Daarna moet al die ou S-20-vorms vernietig word om verwarring te vermy. Maak asseblief seker dat julle bydrae tot die Genootskap-Koninkryksaalfonds op die regte plek ingevul is. Alle bydraes tot die Genootskap-Koninkryksaalfonds sal afsonderlik as sodanig op die maandstaat erken word.
DIE GENOOTSKAP SAL PLAASLIKE BEHOEFTES ONDERSOEK
Vroeër in hierdie byvoegsel het ons die aandag gevestig op die ooglopende behoefte om oral die oprigting van Koninkryksale te bespoedig. Ons het ook gemeld waarom dit ’n verenigde poging van al die gemeentes sal verg om die huidige uitdaging die hoof te bied en te verseker dat die toekomstige groei nie weens die tekort aan geskikte vergaderplekke vir gemeentes belemmer sal word nie. Maar voordat enige lenings uit die Genootskap-Koninkryksaalfonds toegestaan word en terwyl ons wag dat hierdie spesiale fonds aangevul word, sal die Genootskap noukeurig ondersoek wat die spesifieke behoeftes oral in Suid-Afrika en die buurlande is. Die Genootskap sal reël dat bekwame broers die opname in kringe, stede en dorpe doen en sal op die manier vasstel watter spesifieke behoeftes die dringendste is en waar geld van die Genootskap-Koninkryksaalfonds eerste aangewend moet word. Hierdie broers sal ook in verskeie gebiede probeer vasstel watter hulp beskikbaar is in die vorm van vakarbeiders, broers wat die leiding kan neem en toerusting om bou- of ombouingswerk te doen, ensovoorts. Sodoende sal die Genootskap-Koninkryksaalfonds tot die grootste voordeel in die kortste tyd aangewend kan word. As plaaslike ouere manne hulle volle samewerking gee, sal die opname binnekort afgehandel wees.
ONLANGSE VOORBEELDE VAN VERENIGDE POGINGS
Soos reeds gemeld, het die bou van Koninkryksale gedurende die afgelope vyf jaar vinnig gevorder. Broers in verskillende dele van die land het hulleself goedhartig besikbaar gestel om met die program te help, soms met aansienlike opoffering. En met die bouwerk in volle gang verwag ons dat nog 25 Koninkryksale vanjaar voltooi en toegewy sal word. In een stedelike gebied het die broers die boutyd, van die begin tot die einde, tot vyf naweke verkort. Op die platteland het dieselfde span broers net drie naweke nodig om ’n saal met sitplek vir tot 200 mense te bou. Na gelang van beskikbare fondse en mannekrag bou die broers oral teen ’n konstante pas. Die Genootskap is baie tevrede met die vordering wat gemaak word.
BOU VOLGENS DIE BEHOEFTES
In ’n aantal gebiede waar kringe probleme ondervind het om geskikte fasiliteite vir hulle byeenkomste te kry, het broers groot Koninkryksale gebou met die bedoeling dat dit aan ’n dubbele doel moet beantwoord. Hulle het egter gevind dat dit baie onprakties is. Die saal het dalk sitplek vir 400 tot 500 mense en raak gou te klein vir ’n kringbyeenkoms. Terselfdertyd is dit te groot vir ’n gemeente en ook duur om te bou. Wanneer ’n gemeente 140 of meer gereelde verkondigers het, word afstigting om praktiese redes oorweeg. Dit is derhalwe duidelik dat al die ekstra vloerruimte wat nie deur die gemeente gebruik word nie en wat te klein vir ’n kringbyeenkoms is as ’t ware ’n vermorsing is. So ’n saal is ’n swaar finansiële las op ’n gemeente en beantwoord nie aan die voorgenome doel nie. Daarom raai ons julle heeltemal af om so ’n saal te bou. Hoewel elke gemeente volgens sy behoeftes sal bou, beveel ons nie aan dat julle ’n saal bou wat sitplek vir meer as 250 persone het nie. As daar ’n Streekboukomitee in julle omgewing is, raai ons aan dat julle jul behoeftes met hulle bespreek. Anders kan julle aan die Genootskap skryf.
VERENIGDE POGINGS MOET VOORTGAAN
Die Streekboukomitees het hulle goed van hul taak gekwyt om die leiding te neem met die oprigting van Koninkryksale. Hulle gee nie net die nodige riglyne aan gemeentes nie, maar help ook direk met die bouwerk. Hulle en ander broers het onselfsugtig hulle dienste aangebied. Sommige van die broers ry ver na die bouterreine en doen dit meestal op eie koste. Ons wil al hierdie broers en almal wat met die bouprogram help, prys vir hulle voortreflike opoffering om ware aanbidding te bevorder.
Koninkryksale in die onderskeie gemeenskappe voorsien nie net op ’n wonderlike manier in die direkte behoeftes van die gemeentes nie, maar is ook ’n bewys aan almal wat hulle sien dat Jehovah se naamvolk in die gebied bedrywig is. Hoewel die broers die koste dra om al hierdie plaaslike projekte te bou en te onderhou, het hulle boonop voortgegaan om milddadige bydraes te gee om die Koninkrykswerk uit te brei.
Met die oog op die entoesiastiese reaksie op die aanvanklike aankondiging oor die Genootskap-Koninkryksaalfonds by die “Godvrugtige Toegewydheid”-Streekbyeenkoms is ons seker dat al die broers net so gunstig sal reageer wanneer hulle hierdie addisionele besonderhede ontvang. Namate verdere aspekte van die reëling uitgewerk word en nadat die Genootskap meer spesifieke informasie deur middel van die opname ontvang het, sal verdere besonderhede en uiteensettings voorsien word.
Maar hierdie nuwe reëling ten opsigte van die Genootskap-Koninkryksaalfonds bied ons selfs nou ’n verdere geleentheid om op ’n baie praktiese wyse te toon dat ons werklik ’n toegewyde volk is wat Jehovah as een organisasie in Koninkrykseenheid aanbid. Ons moet nie net aan ons eie gemeente se onmiddellike behoeftes dink nie, maar moet die behoeftes van ons broers in ander dele van die land in ag neem wat ’n besondere behoefte aan finansiële hulp vir die oprigting van Koninkryksale het. ’n Bykomende voordeel is dat dit ons hegter sal saamsnoer in Koninkrykseenheid terwyl ons die behoeftes van ons “broederskap wat in die wêreld is” meer realisties in oënskou neem om vas te stel wat ons individueel en as gemeentes kan doen om in die klaarblyklike behoefte te voorsien.—1 Pet. 5:9.
SLOT
Mag hierdie hele reëling vir ons almal ’n saak van volgehoue, dringende en hartgrondige gebed word. En mag ons almal maniere soek om in harmonie met ons gebede op te tree sodat daar in hierdie huidige behoefte aan meer Koninkryksale voorsien kan word. Dit is ons bede dat Jehovah nie net sal voortgaan om die weg te open sodat meer lede van die “ander skape” in die een kudde van sy verenigde aanbidders ingebring kan word nie, maar ook sal toesien dat ons geskikte fasiliteite het om al hierdie nuwelinge te help om stewig in die waarheid gevestig te raak en tot geestelike rypheid te groei. Mag ons vreugdevolle en verenigde uitroep sonder ophou van dag tot dag gehoor word en toeneem, totdat die verwagte hoogtepunt daarvan bereik word wanneer die allerlaaste een aan wie Jehovah sy beskerming gedurende die groot verdrukking gaan verleen, ingesamel is. Ons smaak voorwaar nou oorvloedige geluk, en met Jehovah se ryke seën op ons toegewyde aanbidding van hom as die enige ware God sal dit in die toekoms selfs groter word.