Help ander om vertroosting te vind
1 Baie mense is moeg om te hoor van rampe, oorloë, misdaad en lyding. Vertroosting, hoewel dit ooglopend afwesig is in vandag se nuusberigte, is iets wat die mensdom werklik nodig het. Om te vertroos, beteken om aan iemand “krag en hoop te gee” en om sy “hartseer of probleme te verlig”. As Getuies van Jehovah is ons toegerus om mense op hierdie manier te help (2 Kor. 1:3, 4). Ons Bybelbrosjures wat ons in Julie en Augustus gaan aanbied, bevat vertroostende boodskappe van waarheid (Rom. 15:4). Hier volg ’n paar wenke oor hoe hulle in verskillende situasies aangebied kan word:
2 ’n Tragiese nuusberig kan jou die geleentheid bied om ’n getuienis te gee en vertroosting aan ander te bring, deur dalk iets te sê soos:
◼ “Wanneer sulke dinge gebeur, wonder sommige of God werklik bestaan en, indien wel, of hy vir ons omgee. Wat dink jy? [Wag vir ’n antwoord.] Een manier om uit te vind of daar ’n God is, is om ’n vasstaande beginsel toe te pas.” Lees Hebreërs 3:4. Wys ander dinge om ons uit wat duidelik ’n maker nodig gehad het. Sê dan: “Ek het ’n brosjure wat ek weet jy vertroostend sal vind. Die titel daarvan is Gee God werklik vir ons om? [Lees die vrae op die voorblad.] Dit bevat oortuigende bewys dat God nie net bestaan nie, maar dat hy binnekort ’n einde gaan bring aan al die onregverdige toestande waarvoor ons vandag te staan kom. Sal jy dit graag wil lees?” Reël om terug te gaan.
3 Met die herbesoek kan jy sê:
◼ “Ons het gepraat oor die bewys dat God bestaan toe ek die brosjure Gee God werklik vir ons om? by jou gelaat het. Dalk het jy hierdie punt op bladsy 7 opgemerk. [Wys die prent en som paragraaf 15 op.] Dit is net een voorbeeld wat toon dat daar werklik ’n besorgde God moet bestaan. [Lees paragraaf 27 op bladsy 8.] ’n Persoonlike studie van die Bybel het my gehelp om die lewe se alledaagse probleme die hoof te bied omdat dit God se beskouing van sake gee.” Bied aan om ’n studie te demonstreer.
4 Telefoongetuieniswerk kan gedoen word deur die brosjure “Wat is die doel van die lewe—Hoe kan jy dit vind?” te gebruik. Jy kan jouself voorstel en sê:
◼ “Ek skakel omdat ek vir jou ’n belangrike boodskap het en jou nie persoonlik kan kom sien nie.” Lees die eerste paragraaf op bladsy 4 van die brosjure op ’n natuurlike wyse asof jy met die persoon van aangesig tot aangesig gesels. Vra hom wat hy dink en laat hom antwoord. “Ek het my Bybel oop by Jesaja 45:18. Hierdie teks toon dat die aarde geskep is met ons in gedagte. Mag ek dit vir jou lees?” Verduidelik daarna die doel van die brosjure en vra of dit moontlik is om vir hom ’n eksemplaar te bring.
5 Met die daaropvolgende besoek kan jy hierdie benadering gebruik om ’n studie te begin:
◼ “Ek wil graag voortbou op ons vorige gesprek deur te illustreer wie dit is wat vir ons kan sê wat die doel van die lewe is. [Parafraseer paragrawe 1 en 2 op bladsy 6 in die Doel van die lewe-brosjure.] Openbaring 4:11 verduidelik dat Jehovah God ons Skepper is. [Lees.] Hy moes tog sekerlik ’n rede gehad het om ons te skep. Mense wat wou uitvind wat dit is, het God se geskrewe Woord, die Bybel, bestudeer. Ek wil graag vir jou daardie geleentheid aanbied.” Verduidelik hoe ons gratis tuisbybelstudiekursus gehou word, en tref reëlings om die studie te begin.
6 Hierdie positiewe benadering sal dalk diegene vertroos wat die dood van ’n geliefde deurgemaak het:
◼ “Ek lewer ’n openbare diens ten behoewe van almal wat ’n geliefde aan die dood afgestaan het. Aangesien dit een van die moeilikste dinge kan wees wat enigeen van ons ooit sal moet verwerk, is hierdie brosjure, Wanneer ’n geliefde sterf, voorberei. Dit het al miljoene mense gehelp. Ek wil graag vir jou wys wat dit sê oor ’n opwindende belofte wat Jesus Christus gemaak het. [Lees die vyfde paragraaf op bladsy 26, asook Johannes 5:21, 28, 29.] Hierdie prent op bladsy 29 is ’n uitbeelding van die Evangelieverslag waar Jesus Lasarus uit die dood opgewek het. As jy graag hierdie vertroostende brosjure wil lees, sal ek bly wees om dit by jou te laat teen ’n bydrae van R1,20.”
7 Wanneer jy teruggaan, kan jy weer die prent op bladsy 29 van die brosjure “Wanneer ’n geliefde sterf” wys en sê:
◼ “Onthou jy ons gesprek oor die keer toe Christus vir Lasarus opgewek het? [Lees die byskrif op bladsy 28 en bespreek die materiaal onder die onderhofie “Het dit werklik gebeur?”] As jy graag in jou hart wil glo dat jy ’n afgestorwe dierbare weer kan sien, sal ek jou met graagte wil help om die opstandingshoop vir jou ’n werklikheid te maak.” Bied ’n tuisbybelstudie aan.
8 Laat ons in die maande wat voorlê ons bes doen om Jesus na te volg deur “al die treurendes te troos”.—Jes. 61:2.