Aankondigings

◼ Lektuuraanbod vir Oktober: Intekeninge op die Ontwaak! of Die Wagtoring teen ’n bydrae van R19,00 vir halfmaandelikse uitgawes. Jaarintekeninge op maandelikse uitgawes en halfjaarlikse intekeninge op halfmaandelikse uitgawes kos R9,50. November: Die Bybel—God se woord of die mens s’n? teen ’n bydrae van R3,00. (Engels: New World Translation of the Holy Scriptures saam met die boek The Bible—God’s Word or Man’s? teen ’n bydrae van R15,00.) Desember: Die grootste mens wat nog geleef het teen ’n bydrae van R9,00. Januarie: Die mensdom se soeke na God teen ’n bydrae van R4,50.

◼ Die “Rooster vir die Teokratiese Bedieningskool vir 1994”-byvoegsel is in hierdie nommer van Ons Koninkryksbediening en daar moet gedurende 1994 deurgaans daarna verwys word.

◼ Gemeentes kan nou die 1994-jaarteks bestel, wat teen R13,00 elk in Afrikaans, Engels, Suid-Sotho, Xhosa en Zulu beskikbaar is. Die koste sal teen die lektuurrekening gedebiteer word. Gemeentes wat ’n nadelige saldo op hulle lektuurrekening het, moet kontant saam met hulle bestelling stuur. Ons stel voor dat alle gemeentes die nuwe jaarteks teen 1 Januarie 1994 in hulle vergaderplek aangebring het.

◼ Gemeentes moet Ondersoek die Skrif elke dag—1994 van 1 Oktober af saam met hulle gewone lektuurbestelling begin bestel. Die boekies sal beskikbaar wees in Afrikaans, Engels, Duits, Frans, Grieks, Italiaans, Kwanyama, Portugees, Sepedi, Suid-Sotho, Tsonga, Tswana, Venda, Xhosa en Zulu. Totdat hierdie boekies beskikbaar is en versend word, sal hulle as “Back Ordered” op gemeentelike fakture verskyn. Ondersoek die Skrif-boekies is ’n beheerde item en sal teen R1,50 elk teen die lektuurrekening gedebiteer word, wat die prys vir verkondigers is. Gewone en spesiale pioniers wat voor 1 Julie 1993 op die lys was, kan een gratis eksemplaar kry en bykomende eksemplare teen 75 sent elk bekom. Gemeentes wat nie ’n rekening by die Genootskap het nie of ’n nadelige saldo op hulle lektuurrekening het, moet kontant saam met hulle bestelling stuur. ’n Afsonderlike inskrywing moet op die Remittance and Credit Request-vorm (S-AB-20) gemaak word om die gratis eksemplare vir pioniers aan te dui. Dit moet deur die gemeente bestel word. ONS MOEDIG ELKE GESINSLID AAN, ONDER ANDERE KINDERS WAT KAN LEES, OM HULLE EIE EKSEMPLAAR VAN DIE BOEKIE TE HÊ.

◼ Nuwe kassette beskikbaar:

Zulu: Luister na die Groot Onderwyser. (Vyf kassette en ’n boek in ’n album. Gemeente en publiek: R38,00; pioniers: R32,50).

Wees onpartydig in die bediening

¹ ‘God is geen aannemer van die persoon nie’, het Petrus gesê, maar ‘in elke nasie is die een wat Hom vrees en geregtigheid doen, Hom welgevallig’ (Hand. 10:34, 35). Ons bediening word vandag voortgesit in volle erkenning van daardie waarheid wat so duidelik gestel is. Daarom is dit belangrik dat ons alles probeer om enige hindernis te oorkom wat ons verhinder om almal met die goeie nuus te bereik.

² In onlangse tye het mense van verskeie nasionaliteite dalk in julle gemeente se gebied ingetrek. Veral in metropolitaanse gebiede is dit nie vreemd om mense te vind wat een of meer van die volkstale praat nie. Voorheen was party gebiede dalk oorwegend Engelssprekend. Dit is egter in die meeste gebiede nie meer die geval nie. Selfs in gebiede waar daar oorwegend Zulu gepraat is, kom broers nou mense teë wat Tsonga, Portugees, Venda of ander tale praat. Wat kan gedoen word om al hierdie mense te help om tot ’n kennis van die waarheid te kom?

³ Eerstens moet ons persoonlik verantwoordelik voel vir elke belangstellende wat ons in die veld ontmoet, ongeag daardie persoon se ras of taal. Die ouere manne, veral die diensopsiener, moet toesien dat daar voldoende na alle taalgroepe omgesien word, in die veld sowel as by die gemeentelike vergaderinge.

⁴ Elke gemeente moet seker maak dat hulle ’n voorraad lektuur het in al die tale wat in hulle gebied voorkom. Verkondigers en pioniers moet ’n klein voorraad van hierdie publikasies by hulle hê wanneer hulle aan die bediening deelneem. In baie gevalle kan die persoon ten minste Engels of een van die ander hooftale van die gebied praat. In die verlede het ons miskien te gou hulle naam en adres aan die Genootskap gestuur en gevra dat iemand van hulle eie taal hulle moet besoek. As daar nie ’n gemeente of ’n groep in die omgewing is wat ’n getuienis in die nodige taal kan gee nie, is daar dalk ’n verkondiger in een van die plaaslike gemeentes wat die taal ken en die besoek kan doen. As dit egter nie moontlik is nie, kan jy daardie belangstelling gerus self verder ontwikkel. Party verkondigers het al ’n ander taal geleer, selfs gebaretaal, sodat hulle ’n belangstellende kon help om die Bybel te bestudeer. As dit onmoontlik is om met die persoon te kommunikeer, moet jy met die diensopsiener praat wat dan met die stadsopsiener in aanraking sal kom. As niemand gevind kan word wat die taal praat nie, selfs nadat die stadsopsiener geraadpleeg is, moet die plaaslike broers hulle bes probeer om toe te sien dat ’n getuienis gegee word. Die brosjure Jy kan vir ewig op die aarde lewe! was al baie nuttig in sulke omstandighede.

⁵ In die meeste gemeentes in ons veld word daar ’n hele paar tale gepraat. Dit kan vir die ouere manne ’n ware uitdaging bied. As diegene wat ons vergaderinge bywoon in een van die hooftale kan antwoord, moet ons hulle aanmoedig om dit te doen. Maar party kan dalk net in hulle eie taal antwoord. Waar dit moontlik en prakties is, kan die ouere manne reël dat ’n boekstudie of selfs ’n aparte Wagtoring-studie in daardie taal gehou word. As hulle nie hulle toesprake in die Teokratiese Bedieningskool kan hou in een van die hooftale wat in die gemeente gepraat word nie, kan die skoolopsiener reël dat hulle hulle toesprake in die tweede of derde skool hou en miskien reël dat die hele tweede skool daardie aand in daardie spesifieke taal gehou word. Dit het tot die stigting van gemeentes van ander tale in die gebied gelei. Ons stel ook voor dat julle op die gemeente se bord waarop vergaderingtye verskyn, aandui dat alle mense by julle vergaderinge welkom is en dit nie net in die gemeente se hooftaal doen nie, maar ook in een of meer van die volkstale wat in julle gebied gepraat word.

⁶ Deur ons ten volle in te span om alle mense, ongeag hulle taal, met die goeie nuus te bereik, sal ons die liefde weerspieël van ons God, Jehovah, “wat wil hê dat alle mense gered word en tot kennis van die waarheid kom”.—1 Tim. 2:4.