“Vrees God en gee Hom heerlikheid”
“Vrees God en gee Hom heerlikheid.”—OPENBARING 14:7.
1. Wie moet ons vrees, en wat moet ons nie vrees nie?
WIE MOET ONS VREES? Beslis nie die vuurrooi draak, Satan, en sy skare demone nie! Christus Jesus het hulle ná die geboorte van die Koninkryk in 1914 uit die hemel gewerp. Maar die visioene van Apokalips openbaar vervolgens die organisasie wat Satan hier op aarde gebruik in sy eindpoging om God se voornemens te verydel. Twee wrede wilde diere en ’n dronk prostituut—Babilon die Grote—beklee vername plekke in hierdie afbeelding. Moet ons hulle vrees? Glad nie! Ons moet eerder Jehovah en sy Christus vrees, wie se Koninkryk Satan se verdorwe wêreld nou tot sy finale oordeel gebring het.—Spreuke 1:7; Mattheüs 10:28; Openbaring 12:9-12.
Godslasterlike diere
2. Watter wilde dier verskyn in die agtste visioen, en wat beeld hy af?
2 Namate die agtste visioen van Openbaring hom ontvou, verrys ’n wilde dier uit die onstuimige see van die mensdom. Hy het sewe koppe en tien horings met tien krone, ’n afbeelding van koninklike gesag wat Satan hom gegee het. Die dier laster Jehovah en verskeur Sy knegte net soos ’n luiperd, ’n beer of ’n leeu; maar sy gesag is tydelik, aangesien dit van die draak, Satan, kom, met wie hy baie ooreenkom. Die profeet Daniël het aardse politieke regerings vroeër as diere beskryf, en die regerings self kies dikwels wilde diere as hulle volksimbole, soos die Britse leeu en die Amerikaanse arend (Daniël 8:5-8, 20-22). Maar nou sien ons ’n samegestelde dier, wat al die politieke moondhede van die Bybelgeskiedenis insluit wat God se ware knegte op aarde so dikwels onderdruk het. Vername “koppe” onder hulle was Egipte, Assirië, Babilon, Medo-Persië, Griekeland, Rome en laastelik die Anglo-Amerikaanse Tweeledige Wêreldmoondheid.—Openbaring 13:1, 2; 12:3, 7-9.
3. (a) Hoe het een van die wilde dier se koppe ’n “swaardwond” ontvang? (b) Hoe neem die wilde dier met die twee horings die inisiatief om ’n beeld vir die eerste wilde dier te maak? (c) Wat is die naam van die eerste wilde dier en die betekenis van die naam?
3 Gedurende die wêreldoorlog van 1914-1918 het Groot-Brittanje, as die sewende wêreldmoondheid, ’n “swaardwond” ontvang wat dodelik kon gewees het. Maar die Verenigde State van Amerika het hom te hulp gekom. Sedertdien het Amerika en Brittanje as ’n tweeledige wêreldmoondheid saamgewerk, wat voorts deur Johannes beskryf word as ’n wilde dier met twee horings wat uit ’n gevestigde mensegemeenskap, “die aarde”, opkom. Hierdie dier met die twee horings neem die inisiatief om ’n beeld vir die eerste wilde dier te maak en lewe daarin te blaas, wat afbeeld hoe die Anglo-Amerikaanse Wêreldmoondheid die vernaamste ondersteuner en lewegewer van die Volkebond sowel as sy opvolger, die Verenigde Volke, geword het. Die eerste wilde dier het ’n getalnaam, 666. Ses is ’n onvolmaakte getal—minder as die Bybels volmaakte sewe—sodat ses in die derde graad die jammerlike onvolmaaktheid van hedendaagse menseheersers te kenne gee. Hoewel Jehovah se Getuies staatsbestuur respekteer en voorbeeldig is ten opsigte van gehoorsaamheid aan die wette van die land waarin hulle woon, weier hulle moedig om “die wilde dier” of sy beeld te aanbid.—Openbaring 13:3-18; Romeine 13:1-7.
Vrees God—Waarom?
4. (a) Wie staan in die visioen op die hemelse berg Sion, en wie word deur die 24 ouere manne voor God se troon afgebeeld? (b) Wat is die verskil tussen die “nuwe lied” wat die gesalfdes sing en die “nuwe lied” wat die groot menigte sing?
4 Vir eers genoeg van daardie diere! In verkwikkende teenstelling daarmee vestig die negende visioen ons aandag op die Lam. Hy staan op die berg Sion, saam met die 144 000 wat hy as eerstelinge uit die mensdom koop. Hoewel sommige van hulle nog op die aarde dien, het al 144 000 in geestelike sin “gekom by die berg Sion en . . . die hemelse Jerusalem” (Hebreërs 12:22). Dit is gepas dat die 24 ouere manne hier ook voor God se troon gesien word, want hulle beeld dieselfde gesalfde groep uit ’n ander oogpunt af—as verresenes en aangestelde konings en priesters. Die 144 000 sing “’n nuwe lied”. Dit spruit voort uit hulle unieke ondervinding, naamlik dat hulle van die aarde gekoop is om Koninkrykserfgename te word. Die groot menigte “sing tot eer van die HERE ’n nuwe lied”, maar dit verskil in die opsig dat hulle sing met die vooruitsig om die ewige lewe in die aardse ryk van die Koninkryk te verkry.—Openbaring 7:9; 14:1-5; Psalm 96:1-10; Mattheüs 25:31-34.
5. (a) Watter nuus verkondig die engel wat in die middel van die hemel vlieg, en waarom is dit ewige nuus? (b) Wat beveel die engel met ’n harde stem, en waarom is dit so gepas?
5 Die visioen brei hom nou uit. Johannes sien ’n ander engel in die middel van die hemel vlieg. En watter goeie tyding verkondig hy tog nie! Dit is ewige goeie nuus, want dit beteken die ewige lewe vir mense uit elke nasie en stam en taal en volk wat God in hierdie uur van sy oordeel gehoorsaam. Moet hierdie wonderlike God nie, in teenstelling met die aaklige diere wat Johannes pas beskryf het, aanbid, ja, vereer, word nie? Hy het die hemel en die aarde geskep. Hy is die Bron van alles wat bestaan, lewend en leweloos. Daar is dus goeie rede vir die engel om met ’n bulderende stem te sê: “VREES GOD EN GEE HOM HEERLIKHEID”! Die engel se stem word oor die hele aarde gehoor, en Jehovah se Getuies rig sy besielende uitnodiging in sowat 200 tale aan die mensdom.—Openbaring 14:6, 7; Jesaja 45:11, 12, 18.
Die val van groot Babilon
6. Watter verbasende nuus verkondig ’n ander engel?
6 Nog ’n engel verskyn. Die boodskap wat hy verkondig, is inderdaad verbasend: “Geval, geval het Babilon die [Grote], omdat sy al die nasies laat drink het van die wyn van die grimmigheid van haar hoerery” (Openbaring 14:8, vgl. NW). Wie is Babilon die Grote dat sy selfs nasies kan verlei en hulle dronk kan maak?
7. War is Babilon die Grote, en hoe het dit ontwikkel?
7 Eertydse Babilon was die bakermat van valse godsdiens, wat oor die hele aarde uitgebrei het om ’n demonistiese wêreldryk te word wat gepas “Babilon die Grote” genoem word. Mettertyd het Rome in daardie godsdiensryk prominent geword, want dit was onder Rome dat die afvallige Christenheid ontwikkel het. Rome is steeds ’n wêreldsentrum vir Babiloniese godsdiens. Dit was baie duidelik in 1986 toe die wêreld se godsdiensleiers aan die pous van Rome se versoek voldoen het deur saam met hom in Assisi, naby Rome, byeen te kom om te bid ten behoewe van die Internasionale Vredesjaar wat deur die Verenigde Volke uitgeroep is.
8. (a) Hoe het Babilon die Grote tot ’n groot val gekom, en van wanneer af is dit gesien? (b) Wat toon dat godsdiensleiers se gebede om vrede nie verhoor word nie?
8 Maar Babilon die Grote het tot ’n groot val gekom! Dit is sedert 1919 te sien in die verminderende ondersteuning van valse godsdiens oor die hele wêreld. Ateïstiese kommunisme beheer nou groot dele van die aarde. Die hedendaagse jeug word evolusie geleer, wat God se Woord weerspreek. In Protestantse Europa is min mense nog kerkgangers, en ’n reisende pous sukkel om sy Katolieke ryk bymekaar te hou. Gebede tot die menigte gode van die wêreld se godsdienste word duidelik nie verhoor nie. Ruth L. Sivard het berig: “Twee-en-twintig oorloë was in 1987 aan die gang, meer oorloë as in enige vorige jaar in die geskrewe geskiedenis. Die totale dodetal in hierdie oorloë is tot dusver ten minste 2 200 000—en dit neem vinnig toe.”a Hoe kragteloos was die biduur in Assisi tog nie! En tog het die pous in 1987 by die herdenking van daardie vergadering ’n penning laat slaan met sy beeltenis op die een kant en ’n simbool van die biduur op die ander kant. Hulle bly “sê: Vrede, vrede!—terwyl daar geen vrede is nie”.—Jeremia 6:14.
Babilon se hoerery word onthul
9. Vir watter onsedelikheid het die geestelikes van Babilon die Grote berug geword?
9 Openbaring 14:8 toon dat Babilon die Grote ’n hoer is. Haar geestelikes het berug geword vir hulle onsedelikheid. TV-evangeliste het hulle kuddes van honderdmiljoene rande gemelk, terwyl hulle hul terselfdertyd aan flagrante onsedelikheid skuldig gemaak het. Die Katolieke priesterdom is ook baie in die gedrang, soos blyk uit die volgende verslag op 3 Januarie 1988 in The Beacon journal van Philadelphia, Pennsilvanië: “Volgens ouers, sielkundiges, polisiebeamptes en prokureurs wat by die sake betrokke was, het honderde kinders wat gedurende die afgelope vyf jaar deur Katolieke priesters in die Verenigde State gemolesteer is ernstige emosionele trauma deurgemaak.” Geslagsonsedelikheid het baie geestelikes van Babilon die Grote ’n slegte reputasie gegee.
10. (a) Wat beteken die “hoerery” van Babilon die Grote in Openbaring 18:3? (b) Waarom deel die geestelikes van Babilon die Grote volgens Openbaring 18:24 ’n groot bloedskuld?
10 “Die wyn van die grimmigheid van haar hoerery” het egter in die besonder betrekking op die feit dat valse godsdiens die heersers die hof maak, hulle politieke veldtogte en oorloë ondersteun en die mense verplig om die een of ander nasionalistiese deel van die wilde dier te aanbid. Politici het dikwels gevind dat godsdiens ’n nuttige vennoot is om hulle doelwitte te bereik, soos blyk uit Hitler se konkordaat met die Vatikaan in 1933 en die Spaanse Burgeroorlog van 1936-1939. Gedurende die Tweede Wêreldoorlog het die geestelikes van Katolieke, Protestantse, Boeddhistiese en ander godsdienste aan albei kante opgetree asof hulle deur die nasionalistiese oorlogsywer bedwelm was. Hulle deel ’n groot bloedskuld vir die miljoene soldate en burgerlikes wat sedert 1914 in oorloë gesterf het. Die geestelikes wat die Fasciste en die Nazi’s ondersteun het, is ook bloedskuldig weens die Getuies van Jehovah, en ander, wat tereggestel is of in konsentrasiekampe omgekom het.—Jeremia 2:34; Openbaring 18:3, 24.
11. (a) Wat het die gesalfde Christene en die groot menigte geweier om te aanbid? (b) Watter wonderlike vooruitsigte is ’n goeie rede om God te vrees en hom heerlikheid te gee?
11 Gedurende die afgelope 74 jaar het lojale gesalfde Christene, saam met die groeiende groot menigte, aangehou om GOD TE VREES EN HOM HEERLIKHEID TE GEE. Ons het onwrikbaar geweier om enige nasionalistiese deel van die wilde dier te aanbid. Ons het geweier om die dier se beeld—die Volkebond en die VV—te verheerlik, want ons besef dat net ‘die koninkryk van onse HERE [Jehovah] en van sy Christus’ ware vrede en veiligheid kan bring. Ons is vasbeslote om “die gebooie van God en die geloof in Jesus” te bewaar. Daardie volharding word beloon! Gesalfde Christene wat “in die Here sterwe”, is gelukkig, want “hulle werke volg met hulle”. Die vriendskap wat die groot menigte met God aangekweek het, verseker dat enige van hulle wat dalk weens vervolging, siekte of ongelukke sterf ’n vroeë opstanding tot die “nuwe aarde”-gemeenskap sal ontvang. Hierdie wonderlike vooruitsigte is inderdaad goeie rede om GOD TE VREES EN HOM HEERLIKHEID TE GEE.—Openbaring 11:15, 17, NW; 12:10; 14:9-13; 21:1.
12. Watter twee oeste vind plaas, en wanneer?
12 Namate die oordeel vorder, gee engele opdrag dat twee oeste ingesamel word. Die eerste Oester is onteenseglik Jesus, wat sedert 1914 in Koninkryksheerlikheid heers, want hy sit op ’n wit wolk, is gekroon en is “soos ’n menseseun”. Nou, in die dag van die Here, oes hy die aarde, eers die oorblywende gesalfde Christene en dan die miljoene lede van die groot menigte. (Vergelyk Mattheüs 25:31-34; Johannes 15:1, 5, 16.) Die tweede oes is daarenteen “die wingerdstok van die aarde”, wat in “die groot parskuip van die grimmigheid van God” gegooi word. Dit is die oordeel wat by Har-Magedon voltrek word, wanneer ’n goddelose, verwarde mensegemeenskap ontwortel word en die giftige vrug daarvan verbrysel word. Mag Jehovah verheerlik word wanneer hy die aarde van hierdie giftige wingerdstok suiwer!—Openbaring 14:14-20; 16:14, 16.
Jehovah . . . “regverdig en waaragtig”
13. (a) Watter lied sing verrese gesalfdes in die tiende visioen, en wat is die woorde daarvan? (b) Hoe word God se regverdige oordele duidelik in hierdie visioen geopenbaar?
13 In die tiende visioen van Openbaring sien ons weer dinge wat in die hemel voor God se troon gebeur. Watter vreugde is daar tog in sy teenwoordigheid! Verrese gesalfdes—wat oorwin het omdat hulle GOD VREES EN HOM HEERLIKHEID GEE—sing ‘die lied van Moses en van die Lam’: “Groot en wonderlik is u werke, Here God, Almagtige; regverdig en waaragtig is u weë, o Koning van die [ewigheid]. Wie sal U nie vrees nie, Here, en u Naam nie verheerlik nie? Want U alleen is [lojaal]; want al die nasies sal kom en voor U aanbid, omdat U regverdige dade openbaar geword het.” God se oordele is inderdaad regverdig en waaragtig, soos baie duidelik in hierdie hele visioen geopenbaar word! Die engele gooi sewe skale van God se grimmigheid uit, wat lei tot die versameling van alle nasies na Har-Magedon en ’n herinnering dat ‘Babilon die Grote voor God in gedagtenis gebring is’! Die oproep: VREES GOD EN GEE HOM HEERLIKHEID, is inderdaad tydig.—Openbaring 15:1–16:21, vgl. NW.
14. Watter prominente rol speel Babilon in visioene 11 en 12, en waarom is dit hoog tyd om haar te verlaat?
14 Babilon die Grote word herhaaldelik in Openbaring gemeld. Ons sien haar weer as ’n sleutelfiguur in visioene 11 en 12. Sy ‘sit op baie waters’ in die sin dat sy volke beheer en hulle met haar giftige, leuenagtige leerstellings dronk maak. Sy is self dronk van “die bloed van die heiliges”, wat sy in vervolging doodgemaak het, en sy dra bloedskuld vir “almal” wat weens haar verraderlike oorlogstokery “op die aarde gedood is”. Haar handelsvennootskappe met die sakesektor en die feit dat sy die mense gemelk het, het groot, onregmatige rykdom opgelewer. Haar politieke flirtasie is die laakbaarste, aangesien sy selfs geknoei het om prominent te wees en op die dier van vrede en veiligheid—die VV—te ry. Maar gemilitariseerde horings van daardie selfde dier gaan haar verskeur en vernietig. Dit is hoog tyd dat almal wat GOD VREES EN HOM HEERLIKHEID GEE haar verlaat, “want haar sondes reik tot aan die hemel, en God het haar ongeregtighede onthou”.—Openbaring 17:1–18:24.
15. Tot watter lofliedere gee die vernietiging van die groot hoer aanleiding, en watter ander vreugdevolle gebeurtenis volg daarop?
15 Die teregstelling van Babilon die Grote kom derhalwe as ’n regverdige oordeel van Jehovah. Uit waardering hiervoor weerklink ‘Hallelujahs’, in die hemel en dan op aarde, wat redding, heerlikheid en krag aan Jehovah toeskryf. Hierdie refreine van “Loof Jah!” is ’n uiting van groot vreugde oor die ewige vernietiging van die groot hoer. Wat ’n groot verskil is daar tog nie tussen haar verwoesting en ’n uiters vreugdevolle gebeurtenis in die hemel nie—die huwelik van die Lam, Christus Jesus, en sy bruid, die 144 000 getroue oorwinnaars! ’n Dawerende loflied word voor “[Jehovah onse] God, die Almagtige”, aangehef, ja, “laat ons bly wees en ons verheug en aan Hom die heerlikheid gee, want die bruilof van die Lam het gekom en sy vrou het haar gereed gemaak”!—Openbaring 19:1-10, vgl. NW
16. Watter geskil sal volgens visioen 13 vir goed besleg word en hoe?
16 Maar voordat daardie huwelik in die hemel plaasvind, toon visioen 13 hoe die geskil ten opsigte van Jehovah se soewereiniteit besleg word. Sy Koning van konings en die Here van die here, Jesus, vergesel van skares engele, “oordeel en voer oorlog in geregtigheid” en trap die parskuip van die grimmigheid van die toorn van God die Almagtige. Elke oorblywende deel van Satan se aardse stelsel word verbrysel, vermorsel! (Openbaring 19:11-21). Terwyl ons daardie vinnig naderende oorwinning deur die visioene van Openbaring beskou, het ons beslis alle rede om GOD TE VREES EN HOM HEERLIKHEID TE GEE!
Verheerlik God vir ewig
17. Wat openbaar visioene 14 en 15 aangaande die gelukkige uiteinde vir almal wat God vrees en hom heerlikheid gee?
17 Visioene 14 en 15 van Openbaring openbaar die vreugdevolle uiteinde vir almal wat GOD VREES EN HOM HEERLIKHEID GEE. Wanneer Satan en sy demone vir duisend jaar in die afgrond gebind word, vind die huwelik van die Lam en sy bruid in die hemel plaas, en hierdie 144 001 konings en priesters heers duisend jaar lank terwyl hulle die mensdom tot volmaaktheid verhef. Na ’n finale toets sal diegene wat aanhou om GOD TE VREES EN HOM HEERLIKHEID TE GEE, oorwin en vir die ewige lewe goedgekeur word. Hierdie groep sal miljarde van die verrese dode, “klein en groot”, insluit wat bewys dat hulle waardig is om hulle name in die boek van die lewe geskryf te hê. “’n Nuwe hemel en ’n nuwe aarde” sal tallose seëninge vir die mensdom meebring, seëninge wat wis en seker is, want as die Een wat ‘alles nuut maak’ sê Jehovah: “Skryf, want hierdie woorde is waaragtig en betroubaar.”—Openbaring 20:1-21:8.
18. Wat is volgens visioen 16 die klimaks van die boek Openbaring?
18 Visioen 16 openbaar die klimaks van Openbaring. Wat is dit? Dit is ’n visioen van ’n stad. Hierdie stad, Nuwe Jerusalem, is heel anders as enige stad wat die mens ooit hier op aarde gebou het—dit verskil hemelsbreed van Babilon die Grote, die stad wat God grootliks deur haar afvalligheid, onsedelikheid en politieke hoerery onteer het. Die heilige stad is suiwer, rein, kosbaar. Dit is die Lam se bruid, sy medehelper om die ewige lewe aan die mensewêreld te gee (Johannes 3:16). Geen wonder dat die bevel om uit die valse stad, Babilon die Grote, te gaan hard en helder weerklink nie!—Openbaring 18:4; 21:9-22:5.
19. (a) Watter uitnodiging word deur die bruidsklas gerig, en hoe reageer sagmoediges daarop? (b) Wat sal die gevolg wees as ons gehoor gee aan die bevel: “Vrees God en gee hom heerlikheid”?
19 Jehovah se dinamiese gees rig deur middel van die bruidsklas die aansporende uitnodiging: “Kom!” Ja, alle sagmoediges wat na die ewige lewe in ’n aardwye paradys smag, kom na die “rivier van die water van die lewe” en aanvaar al Jehovah se voorsienings deur Christus en sy bruid om die ewige lewe te verkry! Wat ’n wonderlike vooruitsig—menselewe in volmaaktheid op ’n paradysaarde! Dit sal die beloning wees vir die talle wat gehoor gee aan die bevel: “VREES GOD EN GEE HOM HEERLIKHEID”!—Openbaring 22:6-21.
[Voetnoot]
a World Military and Social Expenditures 1987-88.
HOE SOU JY ANTWOORD?
◻ Watter tydige les is daar vir ons in die visioen van die twee wilde diere?
◻ Hoe moet ons reageer op die aankondiging van die engel wat in die middel van die hemel vlieg?
◻ Hoe maak Babilon die Grote haar aan hoerery skuldig, en hoe word dit beskou deur diegene wat God vrees?
◻ Hoe word die aarde gedurende die dag van die Here geoes?
◻ Watter vreugdevolle gebeure sluit Openbaring af, en hoe kan God se volk ’n deel daarin hê?
[Prent op bladsy 23]
Hierdie bronspenning is in Oktober 1987 tydens die herdenking van die Gebed om Vrede in Assisi uitgereik. Aan die een kant is ’n beeltenis van die “Heilige Vader”, met die datum en die inskripsie: Johannes Paulus II Pontifex Maximus” as randskrif. Aan die ander kant vra “Sint Franciscus” om “Vrede die Gawe van God” by die “Gebed om Vrede”-vergadering in Assisi