Wat sal jy vir ’n Joodse persoon sê?
1 In die eerste eeu het baie van “die kinders van Israel” met waardering gereageer op Jesus en sy apostels se predikingswerk (Hand. 10:36). Net soos destyds, is daar vandag ’n aantal opregte Jode wat die waarheid heelhartig aanneem—nie net in Israel nie, maar ook in Rusland, die Verenigde State en ander lande. Wil jy graag met groter welslae met Joodse mense kommunikeer? Die volgende wenke sal jou help om ’n taktvolle getuienis vir godsdienstige sowel as sekulêre Jode te gee.
2 Wanneer jy vir godsdienstige Jode getuig: Dit is belangrik om te onthou dat godsdienstige Jode dikwels meer besorg is oor die onderhouding van die rabbi’s se tradisies as oor die omskrywing van spesifieke leerstellings. Trouens, oor die algemeen het tradisie vir hulle net soveel gesag as die Skrif. Gevolglik stel hulle nie noodwendig daarin belang om diep Bybelonderwerpe te bespreek nie. Hulle is ook geneig om die Bybel as ’n Christelike boek te beskou. Daarom is dit gewoonlik beter om die terme “die Hebreeuse Geskrifte”, “die Tora” of “die Skrif” te gebruik wanneer jy na die Bybel verwys. ’n Uitstekende publikasie wat spesifiek vir Jode saamgestel is, is die brosjure Will There Ever Be a World Without War?
3 In watter onderwerpe sal godsdienstige Jode moontlik belangstel? Wel, hulle glo dat daar een God is wat intens belangstel in die mensdom. Hulle glo ook dat God in menseaangeleenthede ingryp. Jy kan hierdie punte gebruik om ’n gemeenskaplike grondslag te lê. Daarbenewens is die meeste Jode pynlik bewus van hulle volk se lyding gedurende die Tweede Wêreldoorlog. Hulle wonder waarom God sulke ongeregtigheid toegelaat het en wanneer goddeloosheid tot ’n einde sal kom. Ons is goed toegerus om sulke vrae te beantwoord, aangesien ons byvoorbeeld kan verwys na dit wat ons broers gedurende die Slagting deurgemaak het.
4 Ons wil natuurlik nie die huisbewoner van ons vervreem nie, daarom is dit beter om die kwessie van die Messias se identiteit nie te gou by die gesprek in te bring nie. Jy kan eerder die rol bespreek wat Moses in Israel se geskiedenis gespeel het en die huisbewoner vra of hy glo dat Moses se leringe vandag van toepassing is. Wanneer dit gepas lyk om die identiteit van die Messias te bespreek, kan jy eers Deuteronomium 18:15 lees, wat sê: “’n Profeet uit jou midde, uit jou broers, soos ek is, sal die HERE jou God vir jou verwek; na Hom moet julle luister.” Vra die huisbewoner wie Moses in gedagte gehad het toe hy van ’n profeet soos hy gepraat het. Dek dan ’n paar punte in die World Without War-brosjure, bladsy 14, paragrawe 17 en 18.
5 Sekulêre Jode het ’n ander beskouing: Nie elkeen wat sê dat hy ’n Jood is, aanvaar die leerstellings van Judaïsme nie. Baie Jode het ’n sekulêre beskouing van sake. Hulle stel meer daarin belang om ’n afsonderlike Joodse identiteit met sy kultuur, tradisie en opvoeding te bevorder as om die Joodse godsdiens te beoefen. Party sekulêre Jode is agnosties—’n paar is selfs ateïste. Jy sal aanvanklik min uitrig as jy die Hebreeuse Geskrifte breedvoerig aanhaal. Dit sal nuttiger wees om die gesprek te benader soos enige ander bespreking met iemand wat nie godsdienstig is nie. Jy kan byvoorbeeld verduidelik waarom die Bybel prakties vir ons dag is. As die huisbewoner nie glo dat die Bybel geïnspireer is nie, sal ’n paar punte in die World Without War-brosjure dalk nuttig wees, veral die punte in die deel op bladsy 3 met die titel “The Bible—Inspired by God?”
6 Wanneer jy vir ’n Joodse persoon getuig, kan jy sê:
◼ “Die meeste van ons het al die hartseer ondervinding gehad om ’n geliefde aan die dood af te staan. Wat dink jy gebeur met ons wanneer ons sterf?” Wag vir ’n antwoord. Wys dan vir die huisbewoner die venster met die titel “Death and the Soul—What Are They?” op bladsy 22 van die World Without War-brosjure. Die venster vergelyk wat die rabbi’s leer met wat die Skrif oor lewe ná die dood sê. Blaai dan na paragraaf 17 op bladsy 23 en wys vir die huisbewoner dat die dooies, volgens die Skrif, opgewek sal word tot lewe op ’n paradysaarde. Bied die brosjure aan. Ter voorbereiding vir die herbesoek kan jy meld dat die aartsvader Job die opstandingshoop gekoester het. Verwys na die tekste wat aan die einde van paragraaf 17 aangegee word, en bied aan om terug te kom en dit te bespreek.
7 Die boeke Matteus, Markus, Lukas, Johannes en Handelinge bevat ondervindinge van Jode wat na die waarheid geluister en daarop gereageer het. Jehovah hou nog steeds die weg na die ewige lewe oop. Talle opregte Jode sal moontlik nog van Jehovah, die ware God, leer sodat ook hulle vir ewig in God se nuwe wêreld kan lewe.—Miga 4:1-4.