Hoe om groter vreugde uit vergaderinge te put
1 Vergaderinge is noodsaaklik vir ons geestelike welsyn. Die vreugde wat ons daaruit put, hou direk verband met wat ons voor, gedurende en ná die vergaderinge doen. Hoe kan ons onsself en ander help om groot vreugde uit vergaderingbywoning te put?
2 Voor vergaderinge: Voorbereiding dra direk by tot die vreugde wat ons uit vergaderinge put. Wanneer ons goed voorbereid is, is ons meer geneig om aandag te skenk en deel te neem. Daarbenewens moet enige vergaderingtoewysing wat ons ontvang goed voorberei word met die doel om die inligting akkuraat oor te dra volgens die instruksies en die gehoor se belangstelling te behou. Ons moet dit deeglik oefen. Wanneer ons bydra tot lewendige en opbouende vergaderinge waarby almal baat vind, word ons persoonlike vooruitgang duidelik en ondervind ons groter vreugde.—1 Tim. 4:15, 16.
3 Gedurende vergaderinge: As ons kommentaar lewer, kan dit ons help om vergaderinge meer te geniet. Programdele wat gehoordeelname insluit, moet beskou word as ’n persoonlike toewysing vir elkeen in die gemeente. Kommentare wat bondig en tot die punt is, is gewoonlik die voordeligste. ’n Kort, opbouende ondervinding kan baie aanmoedigend en verkwikkend wees, en ons moet wakker wees vir geleenthede om dit by die program in te sluit (Spr. 15:23; Hand. 15:3). Wanneer ons ’n deel op die program behartig, moet ons met geesdrif en oortuiging praat en dit interessant, realisties en prakties maak.
4 Ná vergaderinge: Ons sal almal daarby baat vind as ons ’n paar vriendelike woorde, ’n vriendelike groet en van die sleutelgedagtes wat by vergaderinge bespreek is, wissel. As ons vir jonges, oues en nuwelinge sê hoe bly hulle deelname ons maak, verinnig dit die liefde van die broederskap. Ons moenie negatiewe dinge sê oor diegene wat van vergaderinge af wegbly nie, maar moet hulle eerder vertel van die vreugde wat ons uit vergaderingbywoning put en hulle sodoende aanmoedig om teenwoordig te wees.—Heb. 10:24, 25.
5 Ons moenie ons hierdie noodsaaklike voorsiening ontsê om ’n uitwisseling van aanmoediging te geniet nie (Rom. 1:11, 12). Deur ons pligsgetrou en ywerig in te span, kan ons almal voortdurend vreugde uit die bywoning van Christelike vergaderinge put.