Bemoediging

Definisie: Iets wat moed gee of met hoop besiel. Almal het bemoediging nodig. Om dit te gee, moet ’n mens dalk persoonlike hulp verleen of waardering uitspreek. Dit behels dikwels hulp aan iemand om ’n moeilike situasie die hoof te bied of die aanvoer van redes vir vertroue in ’n beter toekoms. Die Bybel bied die beste grondslag vir sulke bemoediging, en die tekste wat hieronder aangehaal word, kan nuttig wees om persone wat met verskeie situasies te kampe het te bemoedig. Soms kan ’n mens veel nut stig bloot deur simpatiek te wees.—Rom. 12:15.

Vir diegene wat beproef word deur SIEKTE—

Openb. 21:4, 5: “God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan. En Hy wat op die troon sit, het gesê: Kyk, Ek maak alles nuut. En Hy het aan my gesê: Skryf, want hierdie woorde is waaragtig en betroubaar.”

Matt. 9:35: “Jesus het by al die stede en dorpe rondgegaan . . . en die evangelie van die koninkryk verkondig en elke siekte en elke kwaal onder die volk genees.” (Deur sulke genesingswerke met sy prediking oor die Koninkryk te assosieer, het Jesus ’n wonderlike voorsmaak gegee van wat hy gedurende sy Duisendjarige Heerskappy vir die mensdom sal doen.)

2 Kor. 4:13, 16: “Ons [glo] ook . . . Daarom gee ons nie moed op nie, maar al vergaan ons uiterlike mens [ons stoflike liggaam] ook, nogtans word die innerlike mens dag ná dag vernuwe [of nuwe krag gegee].” (Ons gaan moontlik fisies agteruit. Maar geestelik word ons vernuwe terwyl ons voortgaan om ons met God se kosbare beloftes te voed.)

Kyk ook Lukas 7:20-23.

Vir persone wat dierbares aan die DOOD moes afstaan—

Jes. 25:8, 9: “Hy sal die dood vir ewig vernietig, en die Here HERE sal die trane van alle aangesigte afvee . . . En hulle sal in dié dag sê: Kyk, dit is onse God op wie ons gewag het, dat Hy ons kan verlos; dit is die HERE op wie ons gewag het: laat ons juig en bly wees oor sy hulp.”

Joh. 5:28, 29: “Moenie julle hieroor verwonder nie. Want daar kom ’n uur wanneer almal wat in die grafte is, sy stem sal hoor en sal uitgaan, die wat goed gedoen het, tot die opstanding van die lewe, en die wat kwaad gedoen het, tot die opstanding van die veroordeling.”

Joh. 11:25, 26: “Jesus sê vir haar: Ek is die opstanding en die lewe; wie in My glo, sal lewe al het hy ook gesterwe; en elkeen wat lewe en in My glo, sal nooit sterwe tot in ewigheid nie. Glo jy dit?”

Ps. 146:5, 9: “Welgeluksalig is hy . . . wie se hoop is op die HERE sy God . . . Hy rig wees en weduwee weer op.” (God toon nóú sulke liefdevolle besorgdheid teenoor bedroefdes.)

Kyk ook Lukas 7:11-16; 8:49-56.

Vir persone wat VERVOLG word omdat hulle God se wil doen—

Ps. 27:10: “My vader en my moeder het my verlaat, maar die HERE sal my aanneem.”

1 Pet. 4:16: “Wanneer iemand as ’n Christen ly, moet hy hom nie skaam nie, maar God verheerlik in hierdie opsig.”

Spr. 27:11: “Wees wys, my seun, en verbly my hart, sodat ek hom wat my smaad, kan antwoord gee.” (Deur getrouheid verstrek ons ’n antwoord op Satan se valse aantyging dat niemand wat groot ontbering verduur, sal aanhou om God te dien nie.)

Matt. 5:10-12: “Salig is die wat vervolg word ter wille van die geregtigheid, want aan hulle behoort die koninkryk van die hemele. Salig is julle wanneer die mense julle beledig en vervolg en valslik allerhande kwaad teen julle spreek om My ontwil. Verbly en verheug julle omdat julle loon groot is in die hemele; want so het hulle die profete vervolg wat voor julle gewees het.”

Hand. 5:41, 42: “[Die apostels] het toe van die Raad af weggegaan, bly dat hulle waardig geag was om vir sy Naam oneer te ly. En hulle het nie opgehou om elke dag in die tempel en van huis tot huis te leer nie, en die evangelie te verkondig dat Jesus die Christus is.”

Filip. 1:27-29: “Gedra julle waardig die evangelie van Christus, sodat . . . julle jul in geen opsig laat afskrik deur die teëstanders nie. Dit is vir hulle wel ’n bewys van verderf, maar vir julle van redding, en dit van God; omdat dit aan julle ter wille van Christus genadiglik gegee is om nie alleen in Hom te glo nie, maar ook vir Hom te ly.”

Vir diegene wat mismoedig is as gevolg van ONGEREGTIGHEID—

Ps. 37:10, 11: “Nog ’n klein rukkie en die goddelose sal daar nie wees nie; ja, jy sal ag gee op sy plek, maar hy sal daar nie wees nie. Die ootmoediges daarenteen sal die aarde besit en hulle verlustig oor groot vrede.”

Jes. 9:5, 6: “’n Kind is vir ons gebore, ’n Seun is aan ons gegee; en die heerskappy is op sy skouer, en Hy word genoem: Wonderbaar, Raadsman, Sterke God, Ewige Vader, Vredevors—tot vermeerdering van die heerskappy en tot vrede sonder einde, op die troon van Dawid en oor sy koninkryk, om dit te bevestig en dit te versterk deur reg en deur geregtigheid, van nou af tot in ewigheid. Die ywer van die HERE van die leërskare sal dit doen.”

Dan 2:44: “In die dae van dié konings sal die God van die hemel ’n koninkryk verwek wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie; dit sal al daardie koninkryke verbrysel en daar ’n einde aan maak, maar self sal dit vir ewig bestaan.”

Kyk ook Jesaja 32:1, 2; 2 Petrus 3:13.

Vir diegene wat gebuk gaan onder EKONOMIESE PROBLEME—

Jes. 65:21, 22: “Hulle sal huise bou en bewoon, en wingerde plant en die vrug daarvan eet: hulle sal nie bou dat ’n ander dit bewoon nie; hulle sal nie plant dat ’n ander dit eet nie . . . my uitverkorenes sal die werk van hulle hande self geniet.”

Ps. 72:8, 16: “Hy [die Messiaanse Koning] sal heers van see tot see en van die Rivier tot by die eindes van die aarde. . . . Mag daar volheid van koring wees in die land, op die top van die berge.”

Matt. 6:33: “Soek eers die koninkryk van God en sy geregtigheid, en al hierdie dinge [materiële lewensbehoeftes] sal vir julle bygevoeg word.”

Rom. 8:35, 38, 39: “Wie sal ons skei van die liefde van Christus—verdrukking of benoudheid of vervolging of honger of naaktheid of gevaar of swaard? . . . Want ek is versekerd dat geen dood of lewe of engele of owerhede of magte of teenwoordige of toekomende dinge of hoogte of diepte of enige ander skepsel ons sal kan skei van die liefde van God wat daar in Christus Jesus, onse Here, is nie.”

Kyk ook Hebreërs 13:5, 6.

Vir individue wat mismoedig is weens hulle eie TEKORTKOMINGE—

Ps. 34:19: “Die HERE is naby die wat gebroke is van hart, en Hy verlos die wat verslae is van gees.”

Ps. 103:13, 14: “Soos ’n vader hom ontferm oor die kinders, so ontferm die HERE Hom oor die wat Hom vrees. Want Hy, Hy weet watter maaksel ons is, gedagtig dat ons stof is.”

Neh. 9:17: “U is ’n God van vergewing, genadig en barmhartig, lankmoedig en groot van goedertierenheid.”

2 Pet. 3:9, 15: “Die Here vertraag nie die belofte soos sommige dit vertraging ag nie, maar Hy is lankmoedig oor ons en wil nie hê dat sommige moet vergaan nie, maar dat almal tot bekering moet kom. . . . En ag die lankmoedigheid van onse Here as saligheid.”