Gebruik tydskrifte in jou bediening
1, 2. Hoe het Die Wagtoring en Ontwaak! al mense se lewens geraak?
1 “Interessant, tydig en bemoedigend.” “Die bemoedigendste tydskrifte wat ek nog gelees het.” Hierdie opmerkings is ’n goeie aanduiding van hoe lesers oral in die wêreld oor Die Wagtoring en Ontwaak! voel. Ja, ons tydskrifte is beslis waardevolle hulpmiddels om “alle soorte mense” met die goeie nuus te bereik.—1 Tim. 2:4.
2 ’n Sakeman het ’n Ontwaak! geneem wat handel oor ’n onderwerp waarin hy belanggestel het. Later het hy die bygaande nommer van Die Wagtoring gelees, waarin daar ’n artikel was wat hom beweeg het om sy lewenslange geloof in die Drie-eenheid te ondersoek. Dit het sy belangstelling gewek. Ses maande later is hy gedoop. ’n Ander man het die tydskrifte gereeld ontvang maar dit nooit gelees nie. Sy vrou daarenteen het die Getuies vermy, maar het die tydskrifte gelees wat by haar man gelaat is. Haar hart is geraak deur die Bybel se belofte van ’n aardse paradys vol regverdige mense. Mettertyd het sy, haar seun en haar suster knegte van Jehovah geword.
3. Waarom is dit goed om die tydskrifte as ’n stel aan te bied?
3 Bied dit aan as ’n stel: Soos die voorgaande voorbeelde toon, kan ons nie seker wees wie ons tydskrifte sal lees of wat moontlik hulle belangstelling sal wek nie (Pred. 11:6). Dit is dus goed om Die Wagtoring en Ontwaak! saam as ’n stel aan te bied, al vestig ons gewoonlik in ons aanbieding die aandag net op een tydskrif. Onder sekere omstandighede is dit dalk gepas om tydens ’n besoek verskeie nommers van ons tydskrifte aan te bied.
4. Hoe kan ons tyd inruim vir tydskrifwerk?
4 Dit sal goed wees as ons een dag per week opsysit vir tydskrifwerk. Op die Kalender van Jehovah se Getuies vir 2005 word elke Saterdag ’n “Tydskrifdag” genoem. Aangesien plaaslike en persoonlike omstandighede verskil, kan party natuurlik ’n ander dag opsysit vir tydskrifwerk. Is dit deel van jou weeklikse rooster?
5. Watter geleenthede kan ons benut om tydskrifte te versprei, en wat kan ons hiermee help?
5 Stel ’n persoonlike doelwit: As ons ’n persoonlike doelwit stel om ’n sekere aantal tydskrifte per maand te versprei, kan dit ons help om meer tydskrifbewus te wees. Het jy ’n tydskrifroete? Bied jy tydskrifte aan vir diegene wat jy in die bediening teëkom? Kan jy tydskrifte in straatwerk, in sakegebied en in openbare plekke aanbied? Het jy tydskrifte by jou wanneer jy reis, inkopies doen en afsprake nakom? Benut elke gepaste geleentheid om ander te help om by Die Wagtoring en Ontwaak! baat te vind.
6. Hoe kan ons ouer nommers van die tydskrifte goed gebruik?
6 Ons kan ons ook voorneem om van ons ouer nommers te versprei. Al word tydskrifte nie binne ’n maand of twee ná die datum van die nommer versprei nie, bly die inligting waardevol. Kry dit in die hande van belangstellendes. Die Wagtoring en Ontwaak! was al vir miljoene mense “’n woord . . . op sy regte tyd” (Spr. 25:11). Laat ons dit gebruik om nog miljoene te help om Jehovah te leer ken en te dien.