Seks

Definisie: Die eienskappe van aardse skepsele wat dit vir ’n ouerpaar moontlik maak om voort te plant. Die verskille tussen die manlike en vroulike geslag het verreikende gevolge in die menselewe. Aangesien God self die Bron van die lewe is en aangesien mense veronderstel is om sy hoedanighede te weerspieël, moet die vermoë om lewe deur geslagsomgang oor te dra met groot respek bejeën word.

Leer die Bybel dat geslagsomgang sondig is?

Gen. 1:28: “God het hulle [Adam en Eva] geseën, en God het vir hulle gesê: Wees vrugbaar en vermeerder en vul die aarde.” (Hulle sou geslagsomgang moes hê om hierdie goddelike opdrag uit te voer, nie waar nie? Dit sou nie sondig wees nie, maar klop met God se voorneme dat die aarde bevolk moes word. Sommige persone meen dat die ‘verbode vrug’ in Eden moontlik ’n simboliese verwysing na ’n goddelike beperking of selfs verbod op geslagsomgang tussen Adam en Eva was. Maar dit is strydig met God se opdrag wat hierbo aangehaal is. Dit is ook strydig met die feit dat, hoewel Adam en Eva die verbode vrug in Eden geëet het, die eerste vermelding van geslagsomgang tussen hulle was nadat hulle uit Eden gedryf is.—Gen. 2:17; 3:17, 23; 4:1.)

Gen. 9:1: “God het Noag en sy seuns geseën en aan hulle gesê: Wees vrugbaar en vermeerder en vul die aarde.” (Hierdie verdere seën, tesame met ’n herhaling van die goddelike opdrag om voort te plant, is ná die sondvloed in Noag se dag gegee. God se beskouing van geoorloofde geslagsomgang het nie verander nie.)

1 Kor. 7:2-5, NAV: “Weens die gevare van onsedelikheid [“hoererye”, AB] behoort elke man sy eie vrou te hê en elke vrou haar eie man. Die man moet sy huweliksplig teenoor sy vrou nakom, en net so ook die vrou teenoor haar man. . . . Moenie vir mekaar omgang weier nie, behalwe met wedersydse toestemming en net vir ’n bepaalde tyd . . . sodat die Satan julle nie miskien weens julle gebrek aan selfbeheersing verlei nie.” (Dit is hoerery wat veroordeel word, nie geoorloofde geslagsomgang tussen man en vrou nie.)

Is voorhuwelikse geslagsomgang verkeerd?

1 Thess. 4:3-8: “Dit is die wil van God: . . . dat julle jul moet onthou van die hoerery; dat elkeen van julle moet weet om sy eie vrou te verkry [“in besit te kom van sy eie vat”, NW] in heiligheid en eer, nie in hartstogtelike begeerlikheid soos die heidene wat God nie ken nie; dat niemand sy broeder in hierdie saak moet bedrieg en benadeel nie, omdat die Here ’n wreker is oor al hierdie dinge, soos ons aan julle ook vantevore gesê en betuig het. Want God het ons nie tot onreinheid geroep nie, maar tot heiligmaking. Daarom, hy wat dit verwerp, verwerp nie ’n mens nie, maar God wat ook sy Heilige Gees aan ons gegee het.” (Die Griekse woord por·neiʹa, wat met “hoerery” vertaal word, sien op geslagsomgang tussen ongetroude persone, asook op buite-egtelike omgang deur getroude persone.)

Ef. 5:5: “Dit moet julle weet dat geen hoereerder of onreine of gierigaard, wat ’n afgodedienaar is, ’n erfdeel het in die koninkryk van Christus en van God nie.” (Dit beteken nie dat enigiemand wat in die verlede ’n hoereerder was nie die seëninge van God se Koninkryk kan geniet nie, maar hy moet daardie lewenswyse staak om God se goedkeuring weg te dra. Kyk 1 Korinthiërs 6:9-11.)

Keur die Bybel dit goed dat mense as man en vrou saamleef sonder om wettig getroud te wees?

Kyk bladsye 201, 202, onder “Huwelik”.

Wat sê die Bybel oor homoseksualiteit?

Rom. 1:24-27, NAV: “Daarom gee God hulle aan die drange van hulle hart oor en aan sedelike onreinheid, sodat hulle hulle liggame onder mekaar onteer. . . . Daarom gee God hulle oor aan skandelike drifte. Hulle vroue verander die natuurlike omgang in ’n teen-natuurlike omgang. Net so laat vaar die mans ook die natuurlike omgang met die vrou en brand van begeerte vir mekaar. Mans pleeg skandelikhede met mans en bring oor hulleself die verdiende straf vir hulle perversiteit.”

1 Tim. 1:9-11: “Hy weet dat die wet nie gegee is vir die regverdige nie, maar vir die wettelose en tugtelose mense, goddelose en sondaars, . . . hoereerders, sodomiete [“mense wat homoseksualiteit beoefen”, NAV] . . . en wat daar anders met die gesonde leer in stryd is, volgens die evangelie van die heerlikheid van die salige God.” (Vergelyk Levitikus 20:13.)

Jud. 7: “Sodom en Gomorra en die stede rondom hulle, wat . . . agter vreemde vlees aan geloop het [“het hulle aan onnatuurlike seksuele drange toegegee”, LB], [is] as ’n voorbeeld gestel . . . terwyl hulle die straf van die ewige vuur ondergaan.” (Die naam Sodom het die grondslag geword vir die woord “sodomie”, wat gewoonlik ’n homoseksuele gebruik aandui. Vergelyk Genesis 19:4, 5, 24, 25.)

Wat is ware Christene se gesindheid teenoor diegene met ’n homoseksuele verlede?

1 Kor. 6:9-11: “Geen hoereerders of afgodedienaars of egbrekers of wellustelinge of sodomiete [“mense wat homoseksualiteit beoefen”, NAV] . . . sal die koninkryk van God beërwe nie. En dit was sommige van julle; maar julle het jul laat afwas, maar julle is geheilig, maar julle is geregverdig in die Naam van die Here Jesus en deur die Gees van onse God.” (Ongeag so ’n agtergrond kan sulke mense ’n rein naam by God hê as hulle nou hulle voormalige onrein gebruike die rug toekeer, Jehovah se regverdige standaarde toepas en in sy voorsiening vir die vergifnis van sondes deur Christus glo. Nadat hulle hulle hervorm het, kan hulle in die Christengemeente verwelkom word.)

Ware Christene weet dat selfs diepgewortelde verkeerde begeertes, ook die wat ’n genetiese grondslag of fisiese oorsake het of met omgewingsfaktore verband hou, nie onoorkoomlik is vir persone wat Jehovah waarlik wil behaag nie. Sommige mense is van nature baie emosioneel. In die verlede het hulle hulle moontlik aan woedeuitbarstings oorgegee; maar kennis van God se wil, die begeerte om hom te behaag en die hulp van sy gees stel hulle in staat om selfbeheersing te ontwikkel. ’n Persoon is dalk ’n alkoholis, maar met die regte aansporing kan hy ophou om te drink en dus voorkom dat hy ’n dronkaard word. ’n Persoon kan eweneens sterk aangetrokke voel tot ander lede van dieselfde geslag, maar deur ag te slaan op die raad van God se Woord kan hy rein bly van homoseksuele gebruike. (Kyk Efesiërs 4:17-24.) Jehovah laat ons nie toe om te dink dat verkeerde gedrag nie eintlik saak maak nie; hy waarsku ons vriendelik maar ferm teen die gevolge en verleen oorgenoeg hulp aan diegene wat ‘die ou persoonlikheid met sy gebruike wil aflê en hulle met die nuwe persoonlikheid wil beklee’.—Kol. 3:9, 10, NW.

Is die Bybel se beskouing van seks outyds en onnodig beperkend?

1 Thess. 4:3-8: “Dit is die wil van God . . . dat julle jul moet onthou van die hoerery . . . Hy wat dit verwerp, verwerp nie ’n mens nie, maar God wat ook sy Heilige Gees aan ons gegee het.” (Die Bybel se beskouing van seks is nie bloot iets wat lank gelede deur mense uitgedink is nie. Dit kom van die mensdom se Skepper af; dit toon duidelik wat nodig is om sy goedkeuring weg te dra; dit voorsien ook riglyne wat tot bestendige gesinne en gesonde verhoudinge buite die gesin bydra. Diegene wat hierdie raad toepas, beskerm hulleself teen die diep, emosionele littekens en walglike siektes wat met onsedelike gedrag gepaard gaan. Die Bybel se raad voorsien vandag nog ten volle in die behoeftes van diegene wat ’n rein gewete voor God en ’n lewe vry van onnodige frustrasie begeer.)

As iemand sê—

‘Wat is julle beskouing van homoseksualiteit?’

Jy kan antwoord: ‘Ons huldig die standpunt wat hier in die Bybel gestel word. Ek glo dat dít belangriker is as enige menslike opinie, want dit bevat die gedagtes van die mensdom se Skepper (1 Kor. 6:9-11). U sal oplet dat sommige van diegene wat Christene geword het vantevore homoseksualiteit beoefen het. Maar as gevolg van hulle liefde vir God, en met behulp van sy gees, het hulle verander.’

Of jy kan sê: ‘In antwoord op u vraag wil ek meld dat ek opgelet het dat baie wat meen dat daar geen stigma aan ’n homoseksuele lewenswyse moet kleef nie, nie glo dat die Bybel God se Woord is nie. Hoe beskou u die Bybel?’ As die persoon wel geloof in die Bybel bely, kan jy byvoeg: ‘Homoseksualiteit is nie ’n nuwe geskil nie. Die Bybel stel Jehovah God se onveranderlike beskouing baie duidelik. (Jy kan die materiaal op bladsye 371, 372, gebruik.)’ As die persoon bedenkinge oor God se bestaan of oor die Bybel uitspreek, kan jy byvoeg: ‘As daar geen God was nie, sou ons mos nie voor hom aanspreeklik wees nie en sou ons kon lewe soos ons wou. Die eintlike vraag is dus: Is daar ’n God, en is ek my bestaan aan hom verskuldig? [Moontlik ook: Is die Bybel deur God geïnspireer?] (Gebruik dan gedagtes op bladsye 160-166 of 74-84.)’