Kom nader aan God
‘U sal vurig verlang’
DIT is hartverskeurend om te sien hoe ’n geliefde ly en sterf. Dit is natuurlik dat ons oor so ’n verlies treur. Dit is egter vertroostend om te weet dat ons Skepper, Jehovah God, ons droefheid verstaan. Wat meer is, hy smag daarna om sy ongeëwenaarde krag te gebruik om die dooies op te wek. Kyk watter hoop Job se woorde ons gee, soos opgeteken in Job 14:13-15.
Let op die agtergrond. Job, ’n man met uitsonderlike geloof, verduur hewige beproewinge—onder meer die verlies van sy materiële besittings, die dood van al sy geliefde kinders en ’n pynlike siekte. Oorweldig deur ellende roep hy uit tot God: “Ag, as u my maar in Sjeool [die mensdom se gemeenskaplike graf] wou verberg!” (vers 13). Job beskou Sjeool as ’n welkome verligting. Daar sal hy, soos ’n skat wat deur God verberg is, vry wees van ontberinge en pyn.a
Sal Job vir altyd in Sjeool verskuil bly? Job dink nie so nie. Hy sê verder in sy gebed: “Ag, as . . . u maar vir my ’n tydgrens wou stel en aan my wou dink!” Job het die vertroue dat hy net tydelik in Sjeool sal bly en dat Jehovah hom nie sal vergeet nie. Job vergelyk die tyd wat hy in Sjeool sal deurbring met “dwangarbeid”—’n verpligte wagtyd. Hoe lank sal dit wees? “Totdat my verligting kom”, sê hy (vers 14). Daardie verligting sal verlossing uit Sjeool beteken—met ander woorde, ’n opstanding uit die dood!
Waarom is Job oortuig dat sy verligting sal kom? Omdat hy weet hoe ons liefdevolle Skepper voel oor Sy getroue knegte wat gesterf het. Job sê: “U sal roep, en ek sal u antwoord. Na die werk van u hande sal u vurig verlang” (vers 15). Job erken dat hy die werk van God se hande is. Die Lewegewer, wat Job in die baarmoeder gevorm het, kan hom beslis weer lewend maak nadat hy gesterf het.—Job 10:8, 9; 31:15.
Job se woorde leer ons ’n pragtige les oor Jehovah: Hy het ’n spesiale liefde vir diegene wat hulle, soos Job, in sy hande laat en hom toelaat om hulle te vorm sodat hulle mense kan word wat begeerlik is in sy oë (Jesaja 64:8). Vir Jehovah is sy getroue knegte kosbaar. Hy ‘verlang vurig’ na lojales wat gesterf het. Die Hebreeuse woord wat so vertaal word, is “ongetwyfeld een van die kragtigste woorde om die emosie van verlange uit te druk”, sê een geleerde. Ja, Jehovah onthou nie net sy aanbidders nie, maar hy smag ook daarna om hulle weer lewend te maak.
Gelukkig het Jehovah dit goedgedink om sy voorneme om die dooies op te wek in die boek Job—een van die eerste Bybelboeke wat geskryf is—te openbaar.b Hy wil jou herenig met jou geliefdes wat gesterf het. Hierdie gedagte kan dit makliker maak om die verlies te dra. Dit sal goed wees as jy meer leer omtrent hierdie liefdevolle God en hoe jy hom kan toelaat om jou te vorm sodat jy die soort persoon kan word wat die verwesenliking van Sy voorneme sal sien.
Voorgestelde Bybelleesgedeelte vir Maart:
[Voetnote]
a Een naslaanwerk sê dat Job se woorde ‘verberg my’ kan beteken “om [my] veilig weg te bêre as ’n kosbare bewaargewing”. ’n Ander bron sê dat hierdie woorde impliseer: “Steek my weg soos ’n skat.”
b Om meer te leer oor die Bybel se belofte van ’n opstanding tot lewe in ’n regverdige nuwe wêreld, sien hoofstuk 7 van die boek Wat leer die Bybel werklik?, uitgegee deur Jehovah se Getuies.