’n Verenigde broederskap

JEHOVAH GOD het ongeveer 1 500 jaar lank met die nasie Israel as sy naamvolk gehandel. Toe het Jehovah “aan die nasies gedink . . . sodat hy uit hulle ’n volk vir sy naam kan neem” (Hand. 15:14). Die volk vir Jehovah se naam sou sy getuies wees, verenig in denke en dade ongeag waar hulle op die aarde woon. Hoe sou hierdie volk vir God se naam in eenheid versamel word? Deur die uitvoering van Jesus se opdrag aan sy volgelinge: “Gaan dus en maak dissipels van mense van al die nasies, en doop hulle in die naam van die Vader en van die Seun en van die heilige gees, en leer hulle om alles te gehoorsaam wat ek julle beveel het.” – Matt. 28:19, 20.

² Deur jou aan Jehovah toe te wy en te laat doop, het jy ’n dissipel van Jesus Christus geword. Jy is deel van ’n verenigde, wêreldwye broederskap van Christene, wat nie toelaat dat hulle verdeel word omdat hulle aan verskillende nasies, stamme of ekonomiese klasse behoort nie (Ps. 133:1). Gevolglik het jy jou mede-Christene in die gemeente lief en respekteer jy hulle. Jy sou party van hulle dalk voorheen vermy het as gevolg van verskille in ras, nasionaliteit of opvoeding. Jy geniet ’n band van broederliefde met hulle wat baie sterker is as enige ander verhouding, of dit nou ’n sosiale, godsdienstige of familieverhouding is. – Mark. 10:29, 30; Kol. 3:14; 1 Pet. 1:22.

AANPASSINGS IN DENKE

³ As party sukkel om ontslae te raak van rasse-, politieke, sosiale of ander diepgewortelde partydigheid, kan hulle aan die vroeë Joodse Christene dink. Hulle moes ontslae raak van die godsdiensdiskriminasie wat die Jode teen mense van alle ander nasies gehad het. Toe Petrus die opdrag gekry het om na die huis van die Romeinse hoofman Kornelius te gaan, het Jehovah Petrus liefdevol vir die toewysing voorberei. – Hand, hfst. 10.

⁴ In ’n visioen is daar vir Petrus gesê om sekere diere te slag en te eet. Hierdie diere was vir Jode seremonieel onrein. Toe Petrus beswaar maak, het ’n stem uit die hemel vir hom gesê: “Hou op om die dinge wat God gereinig het, onrein te noem” (Hand. 10:15). Petrus het ’n boodskap van God nodig gehad sodat hy sy verstand kon voorberei vir die toewysing om ’n man van die nasies te gaan besoek. Terwyl Petrus Jehovah se opdrag uitgevoer het, het hy vir die mense wat in Kornelius se huis bymekaargekom het, gesê: “Julle weet dat dit teen die wet is vir ’n Jood om met iemand van ’n ander ras te assosieer of na hom toe te gaan, maar God het vir my gewys dat ek geen mens onrein of onheilig moet noem nie. Daarom het ek gekom sonder om beswaar te maak toe ek geroep is” (Hand. 10:28, 29). Daarna het Petrus ’n bewys gesien dat Jehovah Kornelius en almal in sy huis goedgekeur het.

⁵ Nederigheid was nodig vir Saulus van Tarsus, ’n hooggeleerde Fariseër, om te assosieer met mense wat voorheen vir hom sosiaal onaanvaarbaar was. Hy moes selfs na hulle luister (Hand. 4:13; Gal. 1:13-20; Fil. 3:4-11). Ons kan ons net voorstel watter aanpassings mense soos Sergius Paulus, Dionisius, Damaris, Filemon, Onesimus en ander in hulle denke moes maak toe hulle die goeie nuus aangeneem en dissipels van Jesus Christus geword het. – Hand. 13:6-12; 17:22, 33, 34; Filem. 8-20.

BESKERM ONS INTERNASIONALE EENHEID

⁶ Die liefde van die broers en susters in die gemeente het beslis gehelp om jou tot Jehovah en sy organisasie aan te trek. Jy het die duidelike bewys gesien van liefde wat ware dissipels van Jesus Christus kenmerk. Hy het daarvan gepraat toe hy gesê het: “Ek gee julle ’n nuwe gebod: Julle moet mekaar liefhê. Net soos ek julle liefgehad het, moet julle ook mekaar liefhê. So sal almal weet dat julle my dissipels is – as julle liefde vir mekaar het” (Joh. 13:34, 35). En jy het Jehovah en sy organisasie selfs meer begin waardeer toe jy besef het dat die liefde in die gemeente net ’n weerspieëling is van die liefde wat in die wêreldwye broederskap is. Jy sien die vervulling van die Bybelprofesie dat mense in die laaste dae versamel sou word om Jehovah in vrede en eenheid te aanbid. – Miga 4:1-5.

⁷ Wie sou ooit kon dink dat dit moontlik is om mense “uit alle nasies en stamme en volke en tale” te verenig in ’n wêreld waar daar soveel verdeeldheid is? (Op. 7:9). Dink aan die verskille tussen moderne stadsbewoners en mense wat volgens ou stamtradisies lewe. Kyk na die godsdiensverdeeldheid tussen mense van dieselfde ras en nasionaliteit. Nasionalisme veroorsaak dat mense polities meer verdeeld is as ooit tevore. Daar is ook ekonomiese verskille sowel as baie ander dinge wat verdeeldheid veroorsaak. Die feit dat mense uit alle nasies, tale, groepe en klasse deur ’n onbreekbare band van liefde en vrede verenig word, is dus ’n wonderwerk wat net deur die almagtige God gedoen kan word. – Sag. 4:6.

⁸ Maar hierdie eenheid is ’n werklikheid, en toe jy ’n toegewyde, gedoopte Getuie van Jehovah geword het, het jy deel daarvan geword. Omdat hierdie eenheid jou help, het jy die verantwoordelikheid om dit te beskerm. Jy kan dit doen deur te luister na die woorde van die apostel Paulus in Galasiërs 6:10: “Laat ons dan, solank ons die geleentheid het, goed doen aan almal, maar veral aan ons medegelowiges.” Ons volg ook die volgende raad: “Moenie stryerig wees of te veel van julleself dink nie, maar wees nederig en beskou ander as hoër as julleself, terwyl julle nie net aan julle eie belange dink nie, maar ook aan die belange van ander” (Fil. 2:3, 4). As ons voortdurend daaraan werk om ons broers en susters te beskou soos Jehovah hulle beskou en nie volgens wat hulle uiterlik is nie, sal ons ’n vreedsame en gelukkige verhouding met hulle geniet. – Ef. 4:23, 24.

WEES BESORG OOR MEKAAR

⁹ Soos die apostel Paulus geïllustreer het, is die gemeente nie verdeeld nie; hulle gee eerder om vir mekaar (1 Kor. 12:14-26). Groot afstande skei ons dalk van party in ons wêreldwye broederskap, maar dit beteken nie dat ons nie vir hulle omgee nie. As party van ons broers vervolg word, is die res van ons baie bekommerd. As party swaarkry of die slagoffers van ’n ramp of ’n oorlog of gevegte is, doen die ander alles wat hulle kan om geestelike sowel as materiële hulp te gee. – 2 Kor. 1:8-11.

¹⁰ Ons almal moet elke dag vir ons broers bid. Party kom te staan voor die versoeking om te doen wat verkeerd is. Sommige broers se probleme is algemeen bekend terwyl ander probleme het waarvan ons nie weet nie. Hulle kry dalk teenstand by die werk of in ’n verdeelde huisgesin (Matt. 10:35, 36; 1 Tess. 2:14). Ons is besorg oor broers in sulke situasies, want ons is ’n wêreldwye broederskap (1 Pet. 5:9). Party van ons werk hard in Jehovah se diens deur die leiding te neem in die predikingswerk en in die gemeentes. Ander moet oor die wêreldwye werk toesig hou. Almal het ons gebede nodig, al is daar miskien niks anders wat ons persoonlik kan doen om hulle te help nie. Dit is hoe ons ons liefde en opregte belangstelling kan wys. – Ef. 1:16; 1 Tess. 1:2, 3; 5:25.

¹¹ Daar is gedurende hierdie laaste dae baie probleme op die aarde, en daarom moet Jehovah se volk bereid wees om mekaar te help. Soms is daar rampe, soos aardbewings en oorstromings, wat vereis dat grootskaalse noodlenigingspogings en materiële hulp georganiseer word. Die eerste-eeuse Christene het ’n goeie voorbeeld hierin gestel. Die dissipels in Antiogië het Jesus se raad gevolg en was bly om materiële gawes aan die broers in Judea te stuur (Hand. 11:27-30; 20:35). Later het die apostel Paulus die Korintiërs aangespoor om met die noodleniging te help. Hierdie noodleniging is op ’n ordelike manier gedoen (2 Kor. 9:1-15). Wanneer ons broers vandag in moeilike omstandighede is en materiële bystand nodig het, reageer die organisasie en individuele Christene vinnig en voorsien hulle wat nodig is.

AFGESONDER OM JEHOVAH SE WIL TE DOEN

¹² Ons verenigde, wêreldwye broederskap is georganiseer om Jehovah se wil te doen. Vandag is dit sy wil dat die goeie nuus van die Koninkryk oor die hele aarde as ’n getuienis vir al die nasies verkondig word (Matt. 24:14). Terwyl ons hierdie werk doen, is dit Jehovah se wil dat ons volgens sy hoë sedelike standaarde lewe (1 Pet. 1:14-16). Ons moet bereid wees om onderdanig aan mekaar te wees en om ons in te span om die goeie nuus te bevorder (Ef. 5:21). Dit is nou meer as ooit tevore die tyd om God se Koninkryk eerste in ons lewe te stel en nie ons eie belange na te jaag nie (Matt. 6:33). As ons dit in gedagte hou terwyl ons ter wille van die goeie nuus saam werk, gee dit ons nou vreugde en bevrediging en sal dit tot ewige seëninge lei.

¹³ As Jehovah se Getuies is ons uniek, afgeskeie van die res van die mensdom as ’n rein volk, ywerig in die diens van ons God (Tit. 2:14). Ons aanbidding van Jehovah maak ons anders. Ons werk nie net skouer aan skouer saam met ons broers regoor die wêreld nie, maar ons praat die een taal van waarheid en lewe daarvolgens. Jehovah het dit deur sy profeet Sefanja voorspel: “Ek [sal] die taal van die volke in ’n suiwer taal verander, sodat hulle almal die naam van Jehovah sal aanroep om hom skouer aan skouer te dien.” – Sef. 3:9.

¹⁴ Jehovah het Sefanja ook geïnspireer om die wêreldwye broederskap te beskryf wat vandag ’n werklikheid geword het: “Dié wat in Israel oorbly, sal geen onregverdige dade beoefen nie. Hulle sal nie ’n leuen vertel nie, en ’n bedrieglike tong sal ook nie in hulle mond gevind word nie. Hulle sal wei en gaan lê, en niemand sal hulle bang maak nie” (Sef. 3:13). Omdat ons Jehovah se Woord van waarheid verstaan en ons denkwyse en lewe volgens Jehovah se standaarde verander het, kan ons in eenheid saam werk. Ons bereik dinge wat onmoontlik lyk in die oë van mense wat sake uit ’n menslike oogpunt sien. Ja, ons is werklik ’n unieke volk, God se volk, wat hom oor die hele aarde vereer. – Miga 2:12.