“Die gelukkigste dag van ons lewe”
’N TROUE is ’n vreugdevolle geleentheid. Baie paartjies het al gesê: “Dit was die gelukkigste dag van ons lewe.” Maar dit kan ook een van die veeleisendstes wees. Die bruid en bruidegom en hulle gesinne sal dalk baie gespanne en uitgeput wees weens al die besluite wat geneem en die voorbereidings wat getref moet word, sowel as al die mense wat die bruid en bruidegom op daardie dag sal ontmoet.
Die troue is die begin van ’n nuwe lewenswyse vir die paartjie. Maar hulle sal nie die enigstes wees wat hierdeur geraak word nie. Wanneer ’n dogter, ’n seun, ’n suster of ’n broer trou, beteken dit dikwels dat ’n geliefde sy of haar eie huisgesin begin, en die gesin sal dikwels gemengde gevoelens hieroor hê.
Bruilofsgebruike verskil van land tot land, en dit is nie moontlik om almal hier te bespreek nie. Hierdie artikels sal die aandag vestig op wat tradisie geword het in Westerse en soortgelyke lande. Om daar te trou, kan baie duur wees. Party bestee ’n klein fortuintjie op die troudag, onder meer om ’n saal of restaurant vir die onthaal te huur en ’n maaltyd deur spyseniers te laat voorberei. Daar word geskat dat die gemiddelde troue in Italië meer as R90 000 kos. In Japan, soos op ander plekke, kan dit selfs duurder wees. Die bruid en bruidegom betaal gewoonlik nie die rekening nie. Hulle ouers betaal dit.
Mense maak baie geld uit troues. Baie agentskappe bevorder die idee van die “volmaakte” troue, waar niks ontbreek nie. Buitendien, sê hulle, “dit is die gelukkigste dag van jou lewe!” Hulle bied dus ’n magdom produkte en dienste aan wat “noodsaaklik” is om jou groot dag “volmaak” te maak. Daar is dalk spesiaal ontwerpte uitnodigings, jou “droomtrourok”, rokke vir die strooimeisies en aandpakke of soortgelyke pakke vir die mans in die trougeselskap. Dan is daar ook blomme, limousines, moontlik ’n restaurant waar ’n ete bedien sal word, ’n fotograaf, ’n orkes en nog meer. Die lys van al die dinge wat ’n bruid en bruidegom moontlik wil hê, sowel as al die uitgawes wat daarmee saamgaan, kan baie vaders skoon laat sidder.
In verskeie gemeenskappe word groot waarde aan tradisie geheg. Daar is ’n spesifieke manier waarop verskeie gebruike nagekom moet word, en daar word verwag dat die bruid en bruidegom dit so sal doen. Ja, daar is baie dinge om te onthou, maar daar is net ’n beperkte hoeveelheid tyd waarin alles gereël kan word.
Is dit ’n opwindende of ’n skrikwekkende vooruitsig? Hoe jy ook al antwoord, wanneer ’n mens alles in aanmerking neem wat by ’n troue betrokke kan wees, laat dit ’n hele paar vrae ontstaan. Wat beteken dit deesdae om te trou? Is al hierdie dinge werklik nodig om ’n “ordentlike” troue te hê? Wat kan ’n mens doen om al die praktiese en emosionele uitdagings die hoof te bied?
Ondanks die spanning het baie al ’n sukses gemaak van die troureëlings en die geleentheid geniet. Hulle ondervindinge kan ander help wat hiervoor voorberei. Daar is ook Bybelbeginsels wat ’n mens kan help wanneer trouplanne gemaak word sodat dit ’n aangename, gelukkige en opbouende dag vir almal sal wees.