‘Ons is eerder aan God gehoorsaam as aan mense’

Toe Adam 17 jaar oud was, was hy een van drie wenners van ’n wedstryd wat deur die Amerikaanse Slagtingsgedenkmuseum geborg is. Diegene wat ingeskryf het—altesaam byna 500—het mense se moed gedurende Nazi-onderdrukking in kunswerke of opstelle uitgebeeld. Adam is een van Jehovah se Getuies, en hy het besluit om ’n collage te maak wat die teenstand uitbeeld waarvoor lede van sy godsdiens tydens die Nazi-regime te staan gekom het. Volgens Adam het die kunswerk nie ’n nederlaag of bitterheid uitgebeeld nie, maar vreugde omdat Jehovah se Getuies oor die aanslag van daardie wrede onderdrukker geseëvier het. Daar is ook ’n kind in die collage. Waarom? “Om te toon dat selfs kinders tydens Nazi-vervolging standvastig gebly het”, sê Adam.

Jehovah se Getuies is daarvoor bekend dat hulle gedurende die Nazi-era geweier het om Hitler te salueer of sy politieke party te ondersteun. Hulle standpunt word bo in die regterhoek van Adam se collage uitgebeeld. ’n Brief word aangehaal wat op 7 Oktober 1934 deur al die gemeentes van Jehovah se Getuies aan die Duitse regering gestuur is. Die brief het gedeeltelik gesê: “Daar is ’n direkte konflik tussen julle wet en God se wet, en in navolging van die getroue apostels ‘moet ons aan God meer gehoorsaam wees as aan die mense’, en dit is wat ons sal doen (Handelinge 5:29). . . . Aangesien julle regering en sy amptenare voortgaan om ons te probeer dwing om aan die hoogste wet van die heelal ongehoorsaam te wees, staan ons nou onder verpligting om julle in kennis te stel dat ons Jehovah God, deur sy genade, sal gehoorsaam en ten volle op Hom sal vertrou om ons van alle verdrukking en verdrukkers te verlos.”

Adam is trots op sy geestelike erfenis. “Jehovah se Getuies het vas geglo dat hulle nie hulle medemens leed mag aandoen of enigiemand behalwe God mag aanbid nie, selfs al het dit hulle dood beteken”, sê hy. Die onwrikbare standpunt van Jehovah se Getuies word weerspieël in die titel van Adam se collage: “Ons sal eerder aan God gehoorsaam wees as aan mense!”