Jongmense vra . . .

Musiekvideo’s—Hoe kan ek selektief wees?

‘Sodra ek die naam van ’n twyfelagtige groep of liedjie sien, verander ek die kanaal.’—Casey.

MUSIEKVIDEO’S—baie jongmense geniet dit om daarna te kyk. Maar soos ’n vorige artikel in hierdie reeks getoon het, bevat talle musiekvideo’s skokkende tonele van geslagsonsedelikheid en geweld.a Wanneer enige vorm van vermaak iets bevorder wat deur God veroordeel word, moet ’n Christen natuurlik nie daarna kyk nie. Maar nie alle musiekvideo’s is openlik onsedelik nie. Party is dalk redelik onskadelik. En dit lyk miskien of ander nie regtig goddeloosheid bevat nie. Tog kan sulke video’s subtiele boodskappe oordra wat in stryd is met God se Woord.

As jou ouers jou toelaat om na musiekvideo’s te kyk, sal jy selektief moet wees en jou Bybelopgeleide “waarnemingsvermoëns” moet gebruik sodat jy kan onderskei wat gepas is om na te kyk en wat nie (Hebreërs 5:14). Watter Bybelbeginsels kan jou hiermee help? Hier is ’n paar Bybeltekste en kommentare wat dalk nuttig sal wees.

Spreuke 4:23: “Bewaak jou hart meer as enigiets anders wat bewaar moet word, want daaruit is die oorspronge van die lewe.” Het jy sporttoerusting of ’n musiekinstrument wat vir jou kosbaar is? Jy doen ongetwyfeld baie moeite om dit in ’n goeie toestand en op ’n veilige plek te hou. Jy sal dit sekerlik nie op straat los nie, nie eers vir ’n oomblik nie, omdat jy bang is dat dit beskadig of gesteel sal word. Ja, jy bewaak dit. Net so moet jy besluit dat jy jou hart sal bewaak en dit nie eers vir ’n oomblik in gevaar sal stel deur dit aan skadelike vermaak bloot te stel nie.

Efesiërs 2:1, 2: “God [het] júlle lewend gemaak, hoewel julle dood was in julle oortredings en sondes, waarin julle vroeër volgens die stelsel van dinge van hierdie wêreld gewandel het, volgens die heerser van die gesag van die lug, die gees wat nou in die seuns van die ongehoorsaamheid werk.” Die lug is die gees van die wêreld, die denkwyse en die gesindhede wat agter goddelose gedrag skuil. Hierdie gees word in baie musiekvideo’s weerspieël en is lynreg in stryd met God se gees, wat eienskappe soos vreugde, vrede en selfbeheersing voortbring.—Galasiërs 5:22, 23.

2 Timoteus 2:22: “Vlug . . . vir die begeertes wat eie is aan die jeug.” As ’n mens na sekstonele kyk—al is dit kort—sal dit net hierdie begeertes aanwakker. Talle jongmense erken dat dit vir hulle moeilik is om sulke tonele te vergeet; hulle is dalk selfs geneig om herhaaldelik daaraan te dink. ’n Jong man met die naam Dave, wat na ’n suggestiewe video gekyk het, erken: “Daarna het ek, elke keer as ek daardie liedjie gehoor het, aan hierdie video gedink.” As ’n mens na sulke video’s kyk, kan dit dus ’n begeerte na onsedelike geslagsomgang wek.—1 Korintiërs 6:18; Kolossense 3:5.

Spreuke 13:20: “Hy wat hom met die sotte inlaat, met hom sal dit sleg gaan.” Vra jou af: ‘Sal ek mense wat hulle aan gewelddade, spiritisme, dronkenskap of onsedelikheid skuldig maak, in my huis innooi?’ As jy deur middel van die televisie met sulke mense assosieer, kom dit daarop neer dat jy hulle in jou huis innooi. Kan dit daartoe lei dat dit met jou ‘sleg sal gaan’? Kimberly sê: “Ek het al gesien hoe meisies by ’n geselligheid die kleredrag of suggestiewe dansbewegings naboots wat hulle kort tevore in ’n video gesien het.” Jy het dit moontlik ook al opgemerk. Die feit dat hierdie jongmense diegene navolg wat geen respek vir Goddelike standaarde het nie, toon dat dit reeds met hulle begin “sleg gaan”. Vermy dus ten alle koste enige vorm van “slegte omgang”.—1 Korintiërs 15:33.

Psalm 11:5: “Jehovah ondersoek die regverdige sowel as die goddelose, en Sy siel haat beslis elkeen wat geweld liefhet.” Kan dit dalk die indruk skep dat ons “geweld liefhet” as ons na video’s kyk wat sinnelose, verlagende geweld bevorder?

Die uitdaging om selektief te wees

Omdat ‘die hele wêreld in die mag van die bose lê’, word dit al hoe moeiliker om vermaak te vind wat nie met die denkwyse en gesindhede van die wêreld besmet is nie (1 Johannes 5:19). Party musiekvideokanale vertoon moontlik ’n groot hoeveelheid aanstootlike materiaal. Selfs as ’n video nie openlik onsedelik of gewelddadig is nie, bevorder dit dikwels die gees van die wêreld. ’n Professionele musikant het gesê dat ’n welbekende musiekvideokanaal “van ’n musiekkanaal na ‘’n lewenstylkanaal’ verander het”.

Die oplossing lyk miskien eenvoudig: Verander die kanaal as ’n video sleg is. Die probleem is dat jy dalk net so waaksaam moet wees wanneer jy na ander TV-kanale kyk. Baie vertoon programme wat onverbloemde geweld of wellus bevat of wat mense in onsedelike situasies uitbeeld. Ons gee toe dat dit ’n ergernis kan wees—miskien selfs frustrerend—as jy vermaak probeer geniet en terselfdertyd gereed moet wees om die kanaal te verander. En soms is die skade reeds aangerig teen die tyd dat die kanaal verander is. Onsedelike beelde is klaar in die verstand ingeprent. Maar jy kan seker wees dat Jehovah God enige opregte pogings sal seën wat jy aanwend om jou hart te bewaak.—2 Samuel 22:21.

Daar is ander praktiese stappe wat nuttig kan wees. Casey, wat vroeër genoem is, het verduidelik wat hom help: “Die naam van die groep en die liedjie se titel word gewoonlik aan die begin van die video gewys. Musiekgroepe het reputasies, en daarom weet jy byna altyd watter groepe en watter liedjies waarskynlik sleg sal wees. Sodra ek dus die naam van ’n twyfelagtige groep of liedjie sien, verander ek die kanaal. Reg aan die begin.”

‘Spreek die waarheid in jou hart’

Al het jy ’n kennis van Bybelbeginsels, kan jy dinge begin aanvaar wat aanstootlik is. Hoe? Deur met allerhande verskonings vorendag te kom (Jakobus 1:22). Die Bybel sê vir ons dat iemand wat ’n vriend van Jehovah is, “in sy hart die waarheid spreek” (Psalm 15:2). Wees dus eerlik met jouself. Moenie jouself bedrieg nie. As jy vind dat jy dit probeer regverdig wanneer jy na twyfelagtige vermaak kyk, moet jy jou afvra: ‘Sal Jehovah dit werklik goedkeur as ek hierna kyk?’ Onthou, die uitdaging is dikwels nie om bloot te weet wat reg of verkeerd is nie, maar om te besluit dat jy sal doen wat reg is! Jy moet jou verhouding met Jehovah kosbaarder ag as enige vorm van vermaak.—2 Korintiërs 6:17, 18.

Dit is gewoonlik nie genoeg om net ’n halfhartige, algemene besluit te neem om meer selektief te wees nie. As dit nie ’n vaste besluit is nie, kan jy dit gou uit die oog verloor. Die Bybel sê vir ons dat die man van God met die naam Job vasbeslote was om getrou aan sy vrou te bly. Hy het gesê: “’n Verbond het ek met my oë gesluit. Hoe sou ek dan kon ag gee op ’n maagd?” (Job 31:1). Stel jou voor! Job het ’n verbond, of plegtige ooreenkoms, met homself gesluit dat hy sy oë nie sou toelaat om na sekere dinge te kyk nie. Jy kan in werklikheid dieselfde doen. Maak ’n vaste besluit—’n plegtige belofte aan jouself—om nie te kyk na wat sleg is nie. Stel spesifieke perke. Bid daaroor. Bly dan by jou besluit; skryf dit selfs neer as dit sal help. As jy ’n bietjie meer ondersteuning nodig het, kan jy gerus met ’n ouer persoon gesels wat jy vertrou—byvoorbeeld met jou ouers.

Weens die gevare wat musiekvideo’s inhou, het party Christenjongmense eenvoudig besluit om glad nie daarna te kyk nie. Wat jy ook al hieroor besluit, jy moet jou waarnemingsvermoëns gebruik. Behou ’n skoon gewete. As jy altyd heilsame en verkwikkende vermaak kies, kan jy voorkom dat jy benadeel word en kan jy ook jou vriendskap met Jehovah behou.

[Voetnoot]

[Prent op bladsy 12]

Party video’s wat nie openlik onsedelik is nie, bevorder nog steeds skadelike idees

[Prent op bladsy 13]

Wees vasbeslote om nie na dinge te kyk wat God afkeur nie