’n Besoek aan Jerusalem in Quebec

BESOEKERS aan hedendaagse Jerusalem kan hulle probeer voorstel hoe dit in Bybeltye gelyk het. Maar ’n unieke uitsig van hierdie eertydse stad kan sowat 8 500 kilometer wes van Jerusalem geniet word in ’n klein dorpie langs die St. Lawrence-rivier in Kanada. Daar word besoekers ’n uitgestrekte panoramiese uitsig oor Jerusalem en sy omgewing gegee. Maar hoe is dit moontlik? ’n Verduideliking is gepas.

In ’n sirkelvormige gebou in die dorpie Sainte Anne de Beaupré, Quebec, is een van die wêreld se grootste panoramiese skilderye, die Groot Siklorama van Jerusalem. Hierdie enorme werk is 14 meter hoog met ’n omtrek van 110 meter. Hoewel nie al die besonderhede in die skildery akkuraat is nie, is dit nogtans van belang vir Bybelstudente, aangesien dit die lewe in die Jerusalem van Bybeltye merkwaardig realisties uitbeeld.

Besoekers staan op ’n platform in die middel van die gebou terwyl hulle na die landelike omgewing om eerste-eeuse Jerusalem kyk. Terwyl hulle oë oor die skildery rondom hulle beweeg, verskyn die beroemde stad met sy hoë mure, luisterryke tempel en weelderige paleise. Verderaan is daar nog ’n toneel waarin die laaste oomblikke van Jesus se aardse lewe uitgebeeld word. Die illusie wat hierdie enorme werk skep, is so lewensgetrou dat dit vir besoekers voel of hulle in die toneel is en saam met die skares in die strate van Jerusalem rondbeweeg.

Dit is verbasend dat hierdie unieke skildery met sy driedimensionele effek nie ’n onlangse prestasie is nie. Trouens, Paul Philippoteaux, ’n beroemde Paryse kunstenaar, het van 1878 tot 1882 daaraan gewerk. Vyf ander skilders—twee van die Verenigde State, twee van Frankryk en een van Engeland—het hom met sy meesterstuk gehelp. Maar die oorspronklike idee word toegeskryf aan die Duitse skilder Bruno Piglhein, wat vasbeslote was om iets te doen omtrent die publiek se onkunde aangaande die daaglikse lewe in Bybeltye. Nadat die werk in München, Duitsland, voltooi is, is dit in die groot stede van Europa uitgestal. Sedert 1895 word dit permanent in Kanada ten toon gestel.

[Foto-erkenning op bladsy 31]

Alle foto’s: Cyclorama de Jérusalem inc.