Ná die ontploffings
DEUR ONTWAAK!-MEDEWERKER IN ECUADOR
DIE 20ste November 2002 was ’n lieflike dag in die Ecuadoriaanse stad Riobamba. Die lug was blou, en wit donsige wolke het bo die stad gesweef. Die sneeubedekte vulkane in die omgewing was prentjiemooi. Die 124 000 inwoners van hierdie stad wat ongeveer 2 700 meter bo seespieël in die Andesgebergte geleë is, het hulle gewone gang gegaan en nie geweet dat hierdie rustige dag oomblikke later met ’n geweldige slag versteur sou word nie. In die middagstilte was daar skielik ’n oorverdowende ontploffing! Vensters en vloere het begin skud. ’n Onheilspellende paddastoelwolk het gevorm en vinnig groter geword.
Binne tien minute het ’n tweede ontploffing plaasgevind, en dit het gepaardgegaan met ’n kragtige skokgolf wat vensters versplinter en deure van hulle skarniere afgeruk het. ’n Malende wolk van vuur en rook—wat die eerste wolk klein laat lyk het—het toe verskyn. ’n Reeks ontploffings en flitse het gevolg.
José en sy vrou, Ana—albei Jehovah se Getuies—is ’n egpaar in hulle sestigerjare wat ongeveer 400 meter van die plek af gewoon het waar die ontploffing plaasgevind het. Die krag van die ontploffing het hulle teen die vloer gegooi. Ana het naby die voordeur gestaan toe dit van sy skarniere afgeruk en teen die oorkantste muur gegooi is. Terwyl die verskrikte egpaar na die agterkant van hulle huis gehardloop het, het die plafon op hulle begin inval. Op die een of ander manier het hulle dit reggekry om uit te hardloop tot in ’n klein agterste binnehof, waar hulle mekaar vasgehou en begin bid het. Gelukkig het hulle seun 15 minute later met ’n motor opgedaag en hulle na veiligheid gebring.
Nie almal was so gelukkig nie. Paniek het ná die ontploffings uitgebreek. Hordes mense het te voet gevlug. Te midde van geskreeu en gille het party gegly en geval op die gebreekte glas wat oor die sypaadjies verstrooi was. Motors, busse en vragmotors het teen ’n gevaarlike spoed uit die stad gejaag, en party het in die verkeerde rigting in eenrigtingstrate opgery! Baie wat van hulle skool of werk af gevlug het, het eers byna 24 uur later uitgevind wat van hulle gesinslede geword het.
Wat het tot al hierdie chaos gelei? ’n Brand in ’n ondergrondse wapenopslagplek by die nabygeleë militêre basis het ’n ontsaglike kettingreaksie van ontploffende fakkels, handgranate, kanonkoeëls en mortiere aan die gang gesit. Terwyl hierdie ontploffings plaasgevind het, het polisievoertuie oor luidsprekers aangekondig dat almal ten minste 15 kilometer uit die stad moes gaan.
Riobamba was gou verlate. Duisende plaaslike inwoners het langs die hoofweg buite die stad in die koue naglug styf teen mekaar gesit—baie sonder ’n jas of baadjie. Ná etlike ure het die ontploffings eindelik begin afneem. Omdat die temperatuur naby vriespunt was, het die inwoners versigtig na die stad toe begin terugstap. Die volgende oggend, in die daglig, het baie gesien dat die vensters, deure, dakke, plafonne en mure van hulle huis erg beskadig is. Een gesin het dolkvormige glasstukke gevind wat in ’n slaapkamermatras ingedryf is. Ander het skrapnel in en om hulle huis gekry.
Volgens die eerste verslae was ten minste 7 dood, 538 beseer en 18 000 huise beskadig. Nie een van die 950 Getuies van Jehovah in die gebied het hulle lewe verloor nie, maar twee is vir ernstige snywonde behandel.
Hulp vir die geteisterdes
Die oggend ná die ontploffings het ouer manne in plaaslike gemeentes van Jehovah se Getuies hulle Christenbroers begin besoek om te sien hoe dit met hulle gaan. Later daardie dag het ’n reisende bedienaar van Jehovah se Getuies met ouer manne van 13 gemeentes in en om die stad vergader om vas te stel hoeveel skade aangerig is en wie beseer is. Hy het die ouer manne aangespoor om in die emosionele en geestelike behoeftes van die oorlewendes te voorsien. Dit was selfs onder hierdie moeilike omstandighede baie belangrik om Christelike vergaderinge by te woon! (Hebreërs 10:24, 25). Gevolglik het die plaaslike gemeentes die aand ná die ramp hulle vergaderinge soos gewoonlik gehou.
Donderdag en Vrydag is ’n uitvoerige verslag van die skade aan die huise van Getuies saamgestel en na die plaaslike takkantoor van Jehovah se Getuies in Guayaquil gestuur. Volgens die verslag was daar ’n dringende behoefte daaraan om honderde gebreekte vensters te seël sodat die inwoners teen die koue beskerm kon word. Binne ure het die takkantoor groot rolle deursigtige plastiek, rolletjies kleefband en muurspykers gekoop om tydelike herstelwerk te doen.
’n Vragmotor met voorraad het Saterdag om 9:00 vm. van die takkantoor af daar aangekom. Spanne Getuiemans en -vroue was reeds besig om hulle mede-Getuies te help om die gebreekte glas uit hulle huise te verwyder sodat die werk kon begin om die vensters met plastiek te seël. ’n Plaaslike Koninkryksaal het die middelpunt van die noodlenigingspoging geword. Merke is op die vloer gemaak om die plastiek vinnig te meet. Met behulp van mates wat deur noodlenigingswerkers verkry is, is plastiekvelle in die regte lengtes gesny en toe by die wagtende herstelspanne afgelewer.
José, wat vroeër genoem is, vertel: “Toe ons die middag ná die ontploffing by die huis aankom, was die broers reeds daar, besig om puin te verwyder. Saterdag het my buurman kom kuier en kommentaar gelewer oor die uitstekende werk wat gedoen is om die vensters van my huis met plastiekvelle te seël, en hy het my gevra: ‘Hoeveel het dit jou gekos?’” Hoe verbaas was sy buurman tog toe hy hoor dat dit kosteloos gedoen is!
Teen Saterdagaand het sowat 200 vrywilligers van plaaslike gemeentes die vensters van 91 Getuiehuise geseël. Baie mense wat nie Getuies is nie, het ook daarby baat gevind. ’n Plaaslike koerant het ’n foto geplaas van ’n huis waaraan die Getuies gewerk het en gesê dat net een van die agt inwoners een van Jehovah se Getuies is.
Emosionele ondersteuning
Die ontploffings het natuurlik groot angs veroorsaak. ’n Spesiale vergadering is vir Maandag 25 November om 5:00 nm. gereël om vertroosting aan die plaaslike Getuies te bied. Verteenwoordigers van die plaaslike takkantoor is gestuur om dit te hou. Omdat elektriese lig nie beskikbaar was nie, kon die vergadering nie later daardie aand gehou word nie. Aangesien die tyd blykbaar effens ongeleë was, is ’n opkoms van net sowat 600 verwag. Maar ’n skare van 1 421, wat bure ingesluit het wat nie Getuies is nie, het die Riobamba-Byeenkomssaal volgepak! ’n Sleutelteks wat gedurende die program bespreek is, is Psalm 4:8: “In vrede sal ek gaan lê en ook slaap, want u alleen, o Jehovah, laat my in veiligheid woon.” Almal wat daar was, het groot waardering uitgespreek vir die bemoedigende geestelike program.
Honderde afskrifte van die Ontwaak!-artikel “Natuurrampe—Help jou kind om dit te verwerk” (22 Junie 1996) is aan die einde van die program vir ouers gegee. Een paragraaf van die artikel sê:
“Die Amerikaanse Federale Agentskap vir Noodoptrede (FEMA) sê dat kinders onmiddellik ná ’n ramp gewoonlik bang is dat (1) hulle alleen gelaat sal word, (2) hulle van die gesin geskei sal word, (3) die gebeurtenis weer sal plaasvind en (4) iemand beseer sal word of sal doodgaan.” Op grond van hierdie artikel is ouers die volgende wenke gegee:
1. Probeer die gesin bymekaarhou.
2. Neem tyd om die situasie kalm te verduidelik.
3. Moedig die kinders aan om te praat.
4. Betrek kinders by skoonmaakbedrywighede.
Ekstra afskrifte van die Ontwaak!-artikel is later ook vir bure en Bybelstudente gegee.
Drie weke ná die ontploffing is boumateriaal gekoop om permanenter herstelwerk te doen, wat nuwe vensters, plafonne en dakke ingesluit het. Binne nog drie weke is hierdie projekte sowel as die herstelwerk aan twee Koninkryksale afgehandel. Baie het hulle dank uitgespreek vir hierdie liefdevolle voorsienings.
Gedurende hierdie “laaste dae” kom verskillende soorte rampe algemeen voor (2 Timoteus 3:1-5). Maar die ondersteuning wat Jehovah se Getuies mekaar en hulle bure gee, getuig van die krag van ware Christelikheid. José het dit mooi gestel toe hy gesê het: “Jehovah se organisasie tree sonder versuim op om hulp te verleen wanneer ons dit nodig het.”
[Prente op bladsy 15]
Sowat 200 Getuies het aangebied om met die skoonmaakwerk te help. Nuwe vensters is gemeet, gesny en ingesit. Dakke is vervang