Corcovado—Costa Rica se ongeslypte diamant
Deur Ontwaak!-medewerker in Costa Rica
“’N ONGESLYPTE diamant.” Hierdie bekende uitdrukking is ’n goeie beskrywing van die Corcovado- Nasionale Park. Dit is geleë op die Osa-skiereiland, aan die suidelike Pasifiese kus van die Sentraal-Amerikaanse land Costa Rica. Corcovado is ’n baie interessante plek om te besoek, want die natuurskoon van hierdie feitlik ongerepte, afgeleë reënwoud is onbeskryflik, en dit het ’n verbasende verskeidenheid bome, insekte, reptiele en soogdiere.
Al is hierdie park pragtig, is dit as ’t ware ’n ongeslypte diamant. Dit is in een van Sentraal-Amerika se grootste tropiese reënwoude geleë, en hier sal jy nie baie restaurante, hotelle of soewenierwinkels vind nie. Buiten ’n paar veldwagterstasies en die lang voetslaanpaaie—wat ’n reisgids die beste voetslaanpadstelsel van al die reënwoudparke noem—is daar baie min wat jou aan die mens se teenwoordigheid laat dink.
Van woud tot park
In die vroeë 1970’s is daar ernstig oorweeg om hierdie reënwoud in ’n nasionale park te omskep. Maar so ’n verandering sou nie maklik wees nie. Baie mannekrag en materiële middele sou nodig wees. Gedurende die middel-1970’s het nedersetters hulle volgens berig in die gebied begin vestig. Boonop was ’n houtkapmaatskappy wat baie grond in die woud besit het, van plan om met grootskaalse houtkappery te begin, en ’n groot aantal jagters het die wild in die woud gejag.
Maar wetenskaplikes en bioloë oor die hele wêreld wat die belangrikheid daarvan besef het om hierdie reënwoud te bewaar, het hulle invloed uitgeoefen. Op 31 Oktober 1975 het die regering van Costa Rica die stigting van die Corcovado- Nasionale Park aangekondig. Sedertdien was grootskaalse houtkappery en jagtery nie meer ’n bedreiging nie.
Die verskillende fasette van Corcovado
Corcovado, wat 54 000 hektaar beslaan, het ’n groot verskeidenheid plant- en diersoorte. Daar is minstens agt habitats, of ekosisteme, in die park. In hierdie ekosisteme is daar ten minste 500 boomsoorte. Die grootste boom in die park is ’n kapokboom. Dit het ’n deursnee van meer as drie meter en is meer as 70 meter hoog.
Geniet jy voëlkykery? Daar is byna 400 voëlsoorte in Corcovado, wat jou beslis besig en gelukkig sal hou. Die park is die tuiste van die grootste skarlakenmakaobevolking in die land. Wanneer hulle vlieg, flits die tropiese son op hulle pragtige helderkleurige vere.
Maar miskien stel jy meer belang in iets nader aan die aarde. Geen probleem nie! In Corcovado is daar 116 verskillende soorte amfibieë en reptiele, met inbegrip van die fer-de-lance. Maar moenie hierdie giftige slang te lank of van te naby bekyk nie, want hy is bekend daarvoor dat hy besonder aggressief is! Onder die amfibieë is daar ’n soort padda wat deursigtig is—as dit op ’n deursigtige glasoppervlak gesit word, kan jy sy inwendige organe sien werk!
Jy kan ook na party van die 140 soogdiersoorte in Corcovado gaan kyk. Dit sluit jaguars, oselotte, vier aapsoorte, drie soorte miervreters, twee luidiersoorte en twee soorte pantserdiere in. Daar is ook ongeveer 10 000 soorte insekte in die park.
Shirley Ramirez Carvajal, bioloog en parkkoördineerder van die program vir natuurlewebestuur in Corcovado, het vir Ontwaak! vertel van ’n projek om vir jaguars en ander diere ’n radiohalsband aan te sit. Dit sal wetenskaplikes help om hulle eetgewoontes en die omvang van hulle habitat te bestudeer. Die inligting sal parkamptenare dan help om te bepaal of die grense van die park uitgebrei moet word om te verseker dat daar genoeg kos vir die dierebevolking is. As die park vergroot word, kan dit diere ook teen die genetiese gevare van inteling beskerm.
Maar daar is nie net baie diere in Corcovado te sien nie. Jy kan ook die Salsipuedes-grot besoek, wat bekend is omdat ’n deel van die skat van die Engelse seevaarder en ontdekkingsreisiger sir Francis Drake daar gebêre is. Net ’n paar kilometer noord van Corcovado is Drake-baai, waar hierdie ontdekkingsreisiger glo in 1579 tydens sy reis om die aarde aan wal gegaan het.
Goudkoors het vroeër hierdie “diamant” bedreig. Goudklonte wat tot een kilogram geweeg het, het in die 1930’s tot die eerste goudstormloop gelei. Nog ’n goudstormloop het later in die 1960’s plaasgevind en toe weer ’n paar jaar nadat die park gestig is. Met hierdie laaste stormloop het honderde delwers daarheen getrek. In 1986 het die regering delwers uit Corcovado verban.
Soos enige ander plek is Corcovado nie sonder probleme nie. Ontwaak! het met Gerardo A. Chaves, onderbestuurder van die Corcovado- Nasionale Park, gepraat, en hy het gesê dat die voortdurende stryd om geld en ander hulpbronne te verkry sowel as ontbossing buite die grense van die park en wilddiefstal rede tot kommer is. Al hierdie sake sal beslis in die nabye toekoms aandag moet geniet om te verseker dat Corcovado aanhou floreer.
Die Corcovado- Nasionale Park bly ongetwyfeld een van die mees ongerepte gebiede op aarde. Ja, net soos mense van ’n letterlike diamant hou omdat dit pragtig en duursaam is, sal Costa Rica se ongeslypte diamant beslis nog jare lank waardeer en geniet word deur duisende besoekers wat die natuurlike en unieke prag van die aarde waardeer. Die park laat Christene dink aan hoe pragtig die hele aarde sal wees wanneer God dit in ’n paradys verander!—Lukas 23:43.
[Kaart op bladsy 14]
(Sien publikasie vir oorspronklike teksuitleg)
Corcovado- Nasionale Park
[Prent op bladsy 15]
Reënwoud
[Erkenning]
Steve Pace
[Prente op bladsy 15]
Wit swamme en rooi paddastoele
[Erkenning]
©kevinschafer.com
[Prent op bladsy 16, 17]
Die reënwoud strek tot by die strand
[Prent op bladsy 16, 17]
Pylgifpadda
[Prent op bladsy 16, 17]
Voetslaner onder ’n waterval
[Prent op bladsy 17]
Rooirugsaimiri’s
[Prent op bladsy 17]
Oselot
[Prent op bladsy 17]
Motmot
[Prent op bladsy 17]
Luidier
[Prent op bladsy 17]
Skarlaken- makao
[Foto-erkennings op bladsy 17]
Strand: Barbara Magnuson/Larry Kimball; padda: © Michael and Patricia Fogden; waterval: ©kevinschafer.com; alle ander foto’s: Steve Pace