Van ons lesers

Antieke manuskripte—Hoe word hulle ouderdom vasgestel? (Februarie 2008) Hierdie artikel het my ontstel. Soos ek dit verstaan, staan G.J. vir “Gewone Jaartelling” en v.G.J. vir “voor die Gewone Jaartelling”. Gedurende my 70 jaar op aarde het ek nog altyd die terme v.C. en n.C. gesien as ’n tydverwysing, wat verwys na voor en ná die geboorte van Jesus. Dit lyk vir my asof die gebruik van v.G.J. of G.J. Jesus se geboorte op die een of ander manier ontken.

R.W., Verenigde State

“Ontwaak!” antwoord: Hoewel n.C. (na Christus) en v.C. (voor Christus) gebruik word in lande waar die meeste mense beweer dat hulle Christene is, het ons besluit om die terme G.J. (Gewone Jaartelling) en v.G.J. (voor die Gewone Jaartelling) te gebruik. Waarom? Eerstens, daar is heelwat bewyse wat daarop dui dat Jesus in die jaar 2 v.G.J. gebore is. Tweedens, die lektuur wat deur Jehovah se Getuies gedruk word, word wyd versprei in tale wat deur baie nie-Christene gelees word. Derdens, die titel “Christus” beteken “Gesalfde”. Jesus het die Messias, of die Christus, geword toe hy by sy doop in 29 G.J. met God se gees gesalf is (Matteus 3:13-17). Jesus is dus nie as die Christus gebore nie; hy het die Christus geword in die jaar toe hy gedoop is. Wees verseker dat Jehovah se Getuies Jesus en sy offerande as onontbeerlik beskou vir die verwesenliking van God se voorneme en ons persoonlike redding.

Jongmense vra . . . Hoe kan ek met my gesondheidsprobleem saamleef? (Februarie 2008) Woorde kan nie beskryf hoeveel ek hierdie artikel waardeer het, wat ek net op die regte tyd ontvang het nie! Ek het siek geword en is vir drie weke in die hospitaal opgeneem. Ek het net uit die hospitaal gekom toe ek die tydskrif ontvang het. Ek kon my in baie opsigte vereenselwig met die jongmense wat in die artikel genoem is. Dankie vir die voorbeelde wat julle voorsien het en die raad wat gegee is.

K.P., Kanada

My hart is diep geraak deur die feit dat Jehovah God vertroosting bied, selfs aan dié wat, soos ek, gestremd is. Toe ek baie jonk was, is ek met serebrale verlamming gediagnoseer. Hoewel ek nie kan loop nie, doen ek hulppionierdiens. Ek sien uit na die tyd wanneer al dié wat met gestremdhede moet saamleef, op die komende Paradysaarde “net soos ’n takbok [sal] klim”.—Jesaja 35:5, 6.

J.J., Republiek van Korea

Ek het hierdie artikel oor en oor gelees. Ek kon die trane nie keer nie, want ek het Jehovah se tere gedagtes aangevoel. Dit was asof hy ons in ’n warm kombers toegedraai het sodat ons niks sou oorkom nie. Baie, baie dankie.

M.T., Japan

Die dood—Is dit werklik die einde? (Desember 2007) Ek het my ma ’n paar maande gelede aan die dood afgestaan, en die verduideliking in hierdie reeks, veral die beloftes aangaande die opstanding, het my hart werklik geraak. Baie dankie. Dit het my regtig vertroos en aangemoedig.

M.R., Madagaskar