Sleutel 3: Spanwerk

“Twee is beter as een . . . As een van hulle val, kan die ander sy metgesel ophelp.”—Prediker 4:9, 10.

Wat dit behels. Suksesvolle egpare respekteer God se hoofskapreëling soos dit in die Bybel uiteengesit word (Efesiërs 5:22-24). Nietemin beskou die man sowel as die vrou hulle huwelik in terme van “ons s’n” en “ons” eerder as “myne” en “ek”. Wanneer daar spanwerk is, is die man en vrou nie meer in hulle hart ongetroud nie. Hulle is “een vlees”—’n Bybelse term wat nie net beskryf hoe permanent die verbintenis is nie, maar ook hoe intiem dit is.—Genesis 2:24.

Waarom dit saak maak. As jy en jou huweliksmaat nie ’n span is nie, kan onbenullige gebeurtenisse gou in groot geskille ontaard waarin die een die ander aanval pleks daarvan om die probleem op te los. Maar as jy en jou maat ’n span is, is julle soos ’n vlieënier en medevlieënier wat dieselfde vlugplan het en nie soos twee vlieëniers wat op ’n botsing afstuur nie. Wanneer julle ’n meningsverskil het, werk julle praktiese oplossings uit pleks daarvan om tyd en emosionele energie te vermors deur mekaar te blameer en te beskuldig.

Probeer hierdie oefening. Bepaal hoe goed jou spangees is deur die volgende vrae te beantwoord.

◼ Beskou ek die geld wat ek verdien as “net myne”, aangesien ek die een is wat daarvoor gewerk het?

◼ Hou ek my maat se familie op ’n afstand, al is hy of sy na aan hulle?

◼ Moet ek van my maat af weg wees om heeltemal te kan ontspan?

Stel ’n doelwit. Dink aan een of twee maniere waarop jy tot die spangees in julle huwelik kan bydra.

Vra jou maat wat hy of sy sou voorstel.

[Prent op bladsy 5]

Spanwerk beteken dat julle soos ’n vlieënier en medevlieënier met dieselfde vlugplan is