“Hou op om julle te kwel”
“Die geld in ons bankrekening was op, asook die spaargeld wat ons in ons kinders se name gehad het. Ons was maande lank sonder ’n inkomste.”
● Ek het ’n skool bestuur in ’n plattelandse gebied in Indië, en dit het baie goed gegaan. Op een stadium was ongeveer 500 leerders daar ingeskryf. Toe het ’n vooraanstaande skool in die stad busse na ons gebied begin stuur, en hulle het toelating tot hulle skool maklik gemaak. Dit is te verstane dat baie van my leerders na die stadskool oorgegaan het. Trouens, die getal leerders by my skool het van ongeveer 500 tot sowat 60 afgeneem. Om sake te vererger, het ’n skoolamptenaar met wie ek ’n finansiële ooreenkoms gehad het, op daardie stadium kop uitgetrek, en hy het my nog geld geskuld. Met baie skoolpersoneel om te betaal, het ek voor ’n finansiële krisis te staan gekom.
Ons het as ’n gesin gaan sit en die situasie bespreek. Ons het almal ’n selfopofferende gees getoon terwyl ons Jesus se raad probeer volg het om in finansiële sake ’n ‘eenvoudige oog’ te behou—met ander woorde, om nie meer uit te gee as wat ons kon bekostig nie (Matteus 6:22, 25). Ons moes ’n ruk lank ophou om ons motor te gebruik weens die koste van brandstof en instandhouding. Ons het ons voedseluitgawes besnoei deur laat in die aand inkopies te doen, wanneer die prys van oorblywende voedselprodukte verminder word. Ons het ook minder items per maaltyd geëet.
Ons is Jehovah se Getuies, en daarom voel ons dat dit belangrik is om saam met medegelowiges by Christelike vergaderinge bymekaar te kom (Hebreërs 10:25). Hoewel ons finansiële situasie moeilik was, het ons ons voorgeneem om nie van vergaderinge en byeenkomste af weg te bly nie—selfs as ons lang afstande moes reis. Ons bediening—wat behels dat ons mense die Bybel leer—sluit in dat ons verafgeleë gebiede moet besoek. Vir hierdie werk het ons ’n bromponie pleks van ’n motor gebruik. Natuurlik kon net twee op ’n slag op die bromponie ry.
Maar dit het nie beteken dat ons minder tyd in die bediening deurgebring het nie. Inteendeel, my vrou sowel as my dogter het meer tyd daaraan begin bestee om met ander oor die Bybel te praat. Soms het hulle ses tot agt kilometer geloop om tuisbybelstudies met belangstellendes te gaan hou. Ek en my seun het ook probeer om meer tyd daaraan te bestee om ander van die Bybel te leer.
Dit gaan nou finansieel ’n bietjie beter met ons. As ’n gesin het ons egter uit ons beproewing geleer om nie te veel waarde aan materiële besittings te heg nie. Ons het ook geleer om ons nie te veel te kwel oor dinge waaroor ons geen beheer het nie. Psalm 55:22 was vir ons baie bemoedigend. Dit sê: “Werp jou las op Jehovah, en hy sal jou onderskraag. Nooit sal hy die regverdige laat wankel nie.” Hierdie woorde was absoluut waar in ons tyd van finansiële benoudheid!—Bygedra.