Lei ’n eenvoudige, gebalanseerde lewe
DIT is waarlik lonend om ’n eenvoudige, gebalanseerde lewe te lei. Maar wat behels dit? Eerstens moet jy dalk oor jou prioriteite nadink. Hoe kan jy dit doen?
Vra jou af: ‘Wat het ek tot dusver bereik? Wat moet nog gedoen word?’ Skryf jou belangrikste doelwitte hieronder neer:
1. ․․․․․
2. ․․․․․
3. ․․․․․
Vandag het baie mense ’n korttermyn-, materialistiese beskouing van die lewe. Hulle sê in werklikheid: “Laat ons eet en drink, want môre gaan ons sterf” (1 Korintiërs 15:32). Hulle glo dat vandag se verbruikerslewenstyl van geld verdien en uitgee, die beste is wat hierdie lewe kan bied. Die Bybel is dit egter nie eens met hierdie beskouing nie.
In een van sy gelykenisse het Jesus vertel van ’n man wat besittings bymekaargemaak het en toe gesterf het voordat hy dit kon geniet. “So gaan dit met die mens wat vir homself skatte vergaar, maar nie ryk is teenoor God nie” (Lukas 12:16-21). Was dit verkeerd van die man om hard te werk om in sy behoeftes te voorsien? Glad nie. Die probleem was sy materialistiese uitkyk. Hy het God nie by sy planne ingesluit nie. Gevolglik sou al sy rykdom—alles waarvoor hy gewerk het—hom op die lange duur nie werklik baat nie. Hoe tragies tog!—Prediker 2:17-21; Matteus 16:26.
In teenstelling hiermee nooi Jesus ons om vir ’n ewige beloning te werk. “Moenie werk vir die voedsel wat vergaan nie”, het hy gemaan, “maar vir die voedsel wat vir die ewige lewe bly” (Johannes 6:27). Vroeër het hy gesê: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Wat ’n wonderlike beloning!
Hoe kan jy angstigheid oorkom?
Jesus het erken dat mense geneig is om hulle oor materiële dinge te bekommer. Daarom het hy sy dissipels aangespoor: “Hou . . . op om te soek wat julle sal eet en wat julle sal drink, en hou op om in angstige spanning te verkeer; want al hierdie dinge jaag die nasies van die wêreld gretig na, maar julle Vader weet dat julle hierdie dinge nodig het. Maar soek voortdurend sy koninkryk, en hierdie dinge sal vir julle bygevoeg word.”—Lukas 12:29-31.
Hierdie vertroostende woorde het tallose Christene beweeg om hulle lewe te vereenvoudig. Juliet, wat in Maleisië woon, vertel: “My werk het my uitgeput en gefrustreerd laat voel. Daarom het ek en my man tot Jehovah gebid vir hulp om ons lewe te vereenvoudig. Ons gebed is gou verhoor. Binne ’n maand is ek ’n deeltydse werk aangebied om gestremde kinders te leer.” Steve, ’n dakmaker in Australië, het sy werk aangepas sodat hy meer tyd saam met sy gesin aan geestelike bedrywighede kan bestee. Sy vrou, Maureen, verduidelik: “Hy is nou soveel gelukkiger, en ons is ook. Die kinders is so bly daaroor! Ek is so bly daaroor! Hou dinge eenvoudig, en die hele gesin floreer.”
As jy egter jou werk verloor het en weldra jou huis gaan verloor, verg dit groot geloof om Jesus se raad te volg. As jy nogtans geestelike dinge eerste stel en op God vertrou, kan jy ook ’n eenvoudige, gebalanseerde lewe lei. Dít sal jou help om te streef na “die werklike lewe”—die ewige lewe in God se nuwe wêreld van regverdigheid, waar alle werk genotvol en geen inspanning tevergeefs sal wees nie.—1 Timoteus 6:17-19; Jesaja 65:21-23.
Sal jy graag meer wil leer oor hierdie “werklike lewe” wat die Bybel belowe? Indien wel, kom gerus in aanraking met Jehovah se Getuies in jou omgewing, of skryf na die gepaste adres op bladsy 5 van hierdie tydskrif.
[Lokteks op bladsy 9]
In God se nuwe wêreld sal alle werk genotvol en lonend wees
[Venster op bladsy 8]
KAN JY WERK SKEP WEG VAN DIE HUIS AF?
Hier is ’n paar wenke wat in sommige wêrelddele gedurende ’n werkloosheidskrisis kan help:
● Huisoppas (wanneer mense op sakereise of met vakansie gaan en wil hê dat hulle huis opgepas moet word)
● Skoonmaakwerk: winkels; kantore; huise en woonstelle ná konstruksie, ná brande, nadat mense uitgetrek het; huiswerk (in ander se huise); vensters (besighede en huise)
● Herstelwerk: fietse; allerhande toestelle (biblioteke het eenvoudige boeke oor hoe om herstelwerk te doen)
● Algemene werk: buitemuurbekleding; bou van kabinette, deure, stoepe; verfwerk; oprig van heinings; dakwerk
● Plaaswerk: plant- en oeswerk, pluk van vrugte
● Binnenshuise tuinaanleg en versorging van plante in: kantore, banke, voorportale, winkelsentrums en binnehowe
● Toesig oor eiendomme: deurwagter, opsigter (sluit soms gratis verblyf in)
● Lê en skoonmaak van matte en fineerhoutvloere
● Koerantaflewering (volwassenes en kinders) en ander afleweringsdienste: advertensies, munisipale rekeninge
● Vervoer, berging
● Tuinuitleg, snoeiwerk, grasperkversorging, houtkappery
● Bestuur van ’n skoolbus
● Fotografie (portrette en openbare geleenthede)
● Verkoop van aas aan vissermanne
● Uitruilwerk: ruil motorherstelwerk vir elektriese werk, naaldwerk vir loodgieterswerk
Vir meer inligting, sien die Ontwaak! van 8 Maart 1996, bladsye 3-11.
[Venster/Prent op bladsy 9]
MOONTLIKHEDE OM WERK TE SKEP BY DIE HUIS
Kyk wat die behoeftes in jou omgewing is. Vra bure. Gebruik jou inisiatief.
● Pas kinders op, dagsorg
● Verkoop tuisgekweekte groente of blomme; vrugtesappe
● Naaldwerk, verstel en herstel van klere
● Stukwerk vir vervaardigers
● Bak en voedselvoorbereiding
● Kwilt-, hekel-, breiwerk; macramé, pottebakkery; ander handvaardighede
● Stoffering
● Boekhou, tik, tuisrekenaardienste
● Telefoonantwoorddiens
● Haarkappery
● Neem loseerders in
● Adresseer en vul koeverte vir adverteerders
● Was en poleer motors (klant bring motor na jou huis)
● Troeteldierversorging en -oefening
● Herstel slotte en maak sleutels (werkswinkel by die huis)
Let wel: Vir baie van die werk wat hierbo genoem word, kan advertensies gratis of teen lae koste in advertensieblaaie of op kennisgewingborde by supermarkte geplaas word.