Ons beskou die wêreld
“Mense wat nie rook nie, fisies aktief is, alkohol matig gebruik en ten minste vyf porsies vrugte of groente per dag eet, lewe gemiddeld 14 jaar langer as diegene wat dit nie doen nie.” Die gevolgtrekking is gebaseer op ’n 11 jaar lange studie van 20 000 mense.—UC BERKELEY WELLNESS LETTER, VSA.
“Lees is die beste manier om te ontspan. . . . Selfs ses minute is genoeg om spanning met meer as twee derdes te verminder.”—INDIA TODAY INTERNATIONAL, INDIË.
Verlate “speelgoed”
“Die slegte ekonomie het ’n groot aantal verlate bote tot gevolg”, sê The New York Times oor die situasie in die Verenigde State. Eienaars skuur die name van hulle bote af, verwyder registrasienommers en laat hulle vaartuie dan net daar of sink dit, soms met die doel om van hulle versekering te eis. Waarom doen hulle dit? “Party . . is in dieselfde verknorsing as oorbelaste huiseienaars: hulle moet hoë paaiemente betaal op ’n bate waarvan die waarde verminder en besluit dus om nie daarmee voort te gaan nie”, sê die Times, wat na die bote verwys as “speelgoed wat duur is om te onderhou en hulle aantrekkingskrag verloor het”. Die koerant verduidelik: “Die eienaars kan dit nie verkoop nie, want die tweedehandse mark is oorvoer. Hulle kan dit nie bekostig om honderde dollars per maand te spandeer om die bote vas te meer en in stand te hou nie. En hulle het nie die duisende dollars wat nodig is om op die regte manier daarvan ontslae te raak nie.”
Voorskoolse kinders se liggaamsbeeld
Kinders wat net vier jaar oud is, “probeer hulle voorkoms verander sodat dit voldoen aan wat die samelewing as die ideale liggaam voorhou”, berig Sydney se Sunday Telegraph. In ’n studie van voorskoolse kinders se eet- en oefengewoontes is bevind dat seuns sowel as meisies oor hulle liggaamsgrootte besorg is—meisies wou gewig verloor en seuns wou spiere bou. “Dit wil voorkom asof kinders dieselfde beskouing van hulle liggaam het as hulle ma’s [wat] oor die algemeen ontevrede met hulle eie liggaam is”, het die skrywers van die studie gesê.
Kinders doen aanlyninkopies
“’n Vyfde van kinders [in die Verenigde Koninkryk] doen aanlyninkopies sonder hulle ouers se toestemming, en die helfte van dié wat iets koop, gebruik hulle ouers se kredietkaarte”, berig The Daily Telegraph van Londen. Baie kinders weet watter webwerwe en wagwoorde hulle ouers vir aanlyninkopies gebruik—wat hulle ook maklike toegang tot hulle ouers se kredietkaartnommer kan gee. Min ouers dink dat hulle kinders sonder hulle toestemming aanlyninkopies kan doen. Daar is “’n kommerwekkende verskil” tussen wat ouers dink hulle kinders weet en wat hulle kinders werklik weet, sê die berig. Hierdie gedrag kan ouers onder andere aan bedrog blootstel. Raad aan ouers wat op die Internet koop, is: “Moenie krediet- of debietkaartbesonderhede aanlyn stoor nie”, gebruik slegs betroubare webwerwe en “teken uit ’n webwerf uit wanneer jy klaar is”.